• Bhausaheb_Bhoir.jpg
  • DPU1250x200.jpg
  • Mahesh_Landge.jpg
  • mpc.jpg
  • MPC_news.JPG
  • Nitin_Kalje.jpg
  • PCCO.jpg
  • Sunil_Shelke.jpg
21 Jul 2017

(दीनानाथ घारपुरे)

एमपीसी न्यूज- आजच्या काळात मैत्री जोडायला वेळ लागत नाही. मैत्री करण्याची साधने तर खूप आहेत, इंटरनेट, फेसबुक, मोबाईल, इत्यादी गोष्टींचा वापर करून मैत्री होऊ शकते. ह्यामुळे आपण आपल्या मित्र-मैत्रिणींच्या सतत संपर्कात राहू शकतो. त्यामुळे कळत न कळत त्या व्यक्तीविषयी आकर्षण निर्माण होते. ती व्यक्ती आपणाला कधी भेटेल कधी दिसेल असे वाटू लागते. कधी त्याविषयी नकारात्मक भावना मनांत थैमान घालू लागतात. हे किशोरवयात अधिक होण्याची शक्यता अधिक असते. मग आपल्या मित्रांच्या संगतीने कोणत्याही गोष्टी करायला आपले किशोरवयीन असलेले वय तयार होते आणि त्यातून धोका होऊ शकतो. नात्यांना जोडायला प्रेमाची गरज असते, आणि माणसांना शोधायला विश्वासाची साथ लागते. आई वडिलांनी फक्त आपल्या आयुष्यात न जगता हे नाते मुलांच्या समवेत जोडायचे असते. नेमका हाच धागा पकडून " मांजा " ह्या चित्रपटाची निर्मिती करण्यात आली आहे.

Manja 1

समिधा आपल्या मुलगा जयदीप ह्याला गोव्यातून लोणावळा येथील शाळेत घेऊन येते, त्या शाळेत प्रवेश देण्यासाठी समिधाचे मित्र वीणा आणि सौरभ हे मदत करतात, समिधाला काही घरगुती कारणामुळे जयदीपला गोव्याहून लोणावळा येथे आणावे लागलेले असते. त्यासाठी तिने आपली तिकडची नोकरी, व्यवसाय सोडलेला असतो. त्या घरगुती वातावरणाचा परिणाम जयदीपवर झालेला असल्याने त्याच्या स्वभाव हा अबोल आणि घाबरट असा बनलेला असतो.

शाळेच्या पहिल्याच दिवशी त्याची विकी बरोबर ओळख होते, जयदीप आणि विकी हे दोघे मित्र बनतात. विकी हा हुशार, बोलका आणि धाडसी मुलगा असतो. जयदीपला फुटबॉल खेळायला शिकवतो त्याची भीती घालवतो. पण ह्या किशॊर वयात तो आपल्या आई-वडिलांना सोडून लोणावळा येथे एकटाच रहात असतो. त्याला काही वाईट सवयी असतात. मुलींच्या हॉस्टेल मध्ये डोकावणे, त्यांचे फोटो काढणे, कोणाचीही बाईक घेणे, आपल्या होस्टेलवर उशीरा जाणे. त्याच्या ह्या सवयींचा परिणाम जयदीपवर व्हायला लागतो. त्याला सुद्धा तो घाबरवतो, आपल्या हातामधील बाहुले बनविण्याचा प्रयत्न करतो. विकीला माया नावाची मुलगी आवडत असते. त्याला तिच्याशी बोलायचे असते. पण ती मुलगी जयदीपच्या आईच्या मैत्रिणीची मुलगी असल्याचे कळल्याने तिला वापरण्यासाठी तो आपला स्वतःचा विचार न करता जयदीपला त्यात अडकविण्याचा प्रयत्न करतो. 

आपण एका सश्याची जीवघेणी हत्या कशी केली हे सांगून त्याला आपली योजना ऐकवतो. त्याची योजना अत्यंत विकृत असते. जयदीपला विकी आवडत नाही पण त्याची योजना तो आपल्या आईला सांगतो. समिधा हे सर्व वीणा, सौरभ आणि प्रिन्सिपॉल यांच्या कानावर घालते पण त्यावर कोणीच विश्वास ठेवत नाही कारण पुरावा नसतो. विकी चांगला मुलगा आहे अशी त्याची समजूत पहिल्यापासून झालेली असते. त्यामुळे त्याच्या ह्या विकृत वागण्याकडे ते लक्ष देत नाहीत. 

विकीसारखी मुले ही अतिशय योजनाबद्ध काम करणारी, कावेबाज आणि हुशार असतात. त्याने दिलेल्या धमक्या किंवा योजना ते प्रत्यक्षात आणतील किंवा दुसऱ्याला आपल्या जाळ्यात फसवतील अश्या मुलांची मानसिकता ही हवेत उडणाऱ्या पतंगासारखी असते. ही मुले मानसिकतेने कमकुवत असलेल्या मुलांना हेरतात. त्याच्याशी गोड बोलून आपलेसे करतात आणि आपल्या हातातील खेळणे बनवतात. दुसऱ्यांच्या डोळ्यातील भीती ही त्यांची ऊर्जा असते.

ही त्यांची दुसरी बाजू इतरांच्या नजरेला पडू देत नाहीत. अशी मुले दिसायला-बोलायला स्मार्ट असतात. हे सगळं पतंग उडविण्या सारखं आहे. पतंग उडवतांना आपण मांजा घट्ट धरून ठेवला तर बोट कापलं जाऊ शकत आणि अधिक प्रमाणात ढील दिली तरी आपलं बोट कापलं जाऊ शकत. ह्या दोन्ही गोष्टींचा समनव्यय नीट साधला तर पतंग हवेत मस्त उडू शकतो.

शेवटी विकीची योजना काय असते ? ती सफल होते की नाही ? माया आणि जयदीप भेटतात त्यावेळी नेमके काय होते ? जयदीपला आत्मविश्वास देण्यासाठी त्याची आई समिधा नेमके काय करतात ? अश्या अनेक मानसिक उलट-सुलट प्रश्नांची उत्तरे मांजा मध्ये मिळतील. अश्विनी भावे हिने समिधाच्या भूमिके मधील सर्व बारीकसारीक छटा अतिशय उत्तमपणे पेश केल्या आहेत. रोहित फाळके यांनी जयदीपचा घाबरट, अबोल आणि नंतरचा आत्मविश्वासाने वागणारा मुलगा छान दाखवला आहे. सुमेध मुदगलकर यांनी विकीचा हसमुख, कावेबाज, आणि त्याच्या विकृतीच्या भावना उत्तम सादर केल्या आहेत. तिघेही लक्षांत रहातात. सोबत माया [ पूर्वा अरोरा ], वीणा [ शिवानी टांकसाळे ], सौरभ [ मोहन कपूर ], प्रिन्सिपॉल [ डेंझिल स्मिथ ],यांनी त्यांच्या भूमिकेला न्याय दिलेला आहे.

एम एफ डी सी प्रस्तुत आणि इंडिया स्टोरीज प्रोडक्शन ह्यांच्या तर्फे प्रस्तुतकर्ते नितीन केणी, मनिश वसिष्ठ आणि निर्माते त्रिलोक मल्होत्रा, के आर हरिष यांनी " मांजा " हा चित्रपट सादर केला आहे. कथा-पटकथा-दिग्दर्शन जतिन वागळे यांचे असून संवाद उपेंद्र सिधये यांनी लिहिले आहेत. 

छायाचित्रणाची जबाबदारी फसाहत खान यांनी सांभाळलेली असून संगीत मंगेश कांगे यांचे आहे. या मध्ये अश्विनी भावे, सुमेध मुदगलकर, रोहित फाळके, पूर्वा अरोरा, शिवानी टांकसाळे, मोहन कपूर, डेंझिल स्मिथ असे कलाकार असून प्रत्येकानी आपापली भूमिका यथायोग्य केली आहे.

आई वडिलांनी आपल्या मुलांशी मैत्रीचे नातं जोडले पाहिजे असा संदेश हा सिनेमा कळत-न-कळत देऊन जातो, एकंदरीत " मांजा " पाहायला हरकत नाही.

 

20 Jul 2017

एमपीसी न्यूज - मराठी चित्रपटसृष्टीचा रोमँटिक हिरो स्वप्नील जोशीचा सिनेमा म्हटल्यावर त्यात एखादे प्रेमगीत हे असायलाच हवे. स्वप्नील आणि रोमान्स हे सूत्र आगामी 'भिकारी' सिनेमातील 'ये आता' या गाण्यातही आपल्याला पाहायला मिळत आहे. मी मराठा एंटरटेनमेंटचे शरद देवराम शेलार आणि गणेश आचार्य निर्मित तसेच जीसिम्सचे कार्तिक निशानदार व अर्जुन बरन यांची प्रस्तुती असलेल्या या सिनेमातील 'ये आता' हे रॉमेंटिक गाणे सध्या खूप गाजत आहे. नवोदित अभिनेत्री रुचा इनामदार आणि स्वप्नील जोशीवर आधारित असलेल्या या गाण्यातील दृश्य पाहणा-यांचे डोळे दिपवून टाकत आहे.

'स्वामी तिन्ही जगाचा...भिकारी' या सिनेमाच्या प्रत्येक गाण्यात दिग्दर्शक गणेश आचार्य यांचा स्पेशल टच दिसून येत असल्यामुळे, 'ये आता' हे प्रेमगीत देखील त्याला अपवाद नाही. छायाचित्रकार महेश लिमये यांच्या कॅमे-यात चित्रबद्ध झालेल्या या गाण्यातील दृश्य लंडन येथे चित्रित करण्यात आली असून, यात स्वप्नील आणि रुचाची एक वेगळीच केमिस्ट्री रसिकांना पाहायला मिळत आहे.

गुरु ठाकूर यांनी शब्दबद्ध केलेल्या या गाण्याला विशाल मिश्रा यांनी संगीत दिले असून, स्वप्नीलचे बोल खुद्द विशाल मिश्रा यांनीच गायले आहेत. तसेच हिंदीची सुप्रसिद्ध गायिका सुनिधी चौहानने रुचाचे बोल गात, हे गाणे अधिकच सुमधुर केले आहे. आई आणि मुलाच्या भावनिक नात्यावर भाष्य करणारा हा सिनेमा येत्या 4 ऑगस्टला संपूर्ण महाराष्ट्रात प्रदर्शित होत आहे. यात स्वप्नील जोशी आणि रुचा इनामदार या जोडीसोबतच कीर्ती आडारकर, गुरु ठाकूर, सयाजी शिंदे, मिलिंद शिंदे आणि प्रदीप काबरा ह्या कलाकारांचीदेखील विशेष भूमिका असणार आहे.
Page 1 of 41
Open Chat
1
Close chat
Hello! Thanks for visiting us. Please press Start button to chat with our support :)

Start