27 Apr 2017
क्रांतिवीर बिरसा मुंडा आदिवासी सामाजिक संघटनेची मागणी 
 
एमपीसी न्यूज - राज्यात शेतकरी आत्महत्येचे प्रमाण दिवसेंदिवस वाढत आहे. याला पूर्णतः सरकार जबाबदार असून ज्या मंत्र्यांना कृषी खात्याची काहीच माहिती नाही, अशांना कृषिमंत्री करण्यात आले आहे. शेतक-यांचे काहीही झाले तरी आपली खुर्ची शाबूत ठेवण्याच्या दृष्टीने प्रयत्न संबंधित मंत्र्यांकडून होत आहे. शेतकरी आत्महत्येची नैतिक जबाबदारी स्वीकारून राज्याचे कृषिमंत्री पांडुरंग खुंडकर व सदाभाऊ खोत यांनी राजीनामे द्यावे व कृषी खाते पूर्णतः मुख्यमंत्र्यांनी स्वतःकडे ठेवावे, अशी मागणी क्रांतिवीर बिरसा मुंडा आदिवासी सामाजिक संघटनेने पत्रकाद्वारे केली आहे. 
 
दररोज कितीतरी शेतकरी बायकांचे कुंकू पुसले जात आहे, बांगड्या फोडल्या जात आहेत. शेतक-यांचे संसार उध्वस्त होऊन शेतकरी धुळीस मिळत आहेत. असे अजून किती आया-बहिणींचे संसार हे सरकार उध्वस्त करणार आहे, असा खोचक सवालही सरकारला यामध्ये करण्यात आला आहे. 
 
मुख्यमंत्र्यांनी ज्याप्रमाणे गृहखाते आपल्याकडे ठेवले आहे, त्याप्रमाणे कृषी खाते देखील आपल्याकडे ठेवावे, म्हणजे मुख्यमंत्र्यांना शेतक-यांच्या समस्या समजतील. कदाचित मुख्यमंत्र्यांना शेतक-यांच्या समस्यांचे ज्ञान असावे म्हणूनच त्यांनी ही जबाबदारी स्वतःकडे घेतली नाही, असा चिमटाही यामध्ये काढण्यात आला आहे. काही नेते आपण शेतकऱ्यांसोबत असल्याचे फुके बार मारतात. दिल्लीत जाऊन पंचपक्वान्नाचा पाहुणचार घेतात, परंतु ज्या शेतक-यांचे प्रश्न मांडण्यासाठी अट्टहास केला जातो तो शेतकरी मात्र उपाशीच राहतो आहे. 
तुरीच्या खरेदीबाबत शेतकरी चिंता'तुर' 
 
 
पंतप्रधानांनी आपल्या मन की बात मध्ये डाळी आणि कडधान्यांचे उत्पादन शेतक-यांनी वाढवावे याबाबत आवाहन केले होते. त्या मन की बात चा मान राखत शेतकऱ्यांनी तुरीचे विक्रमी उत्पादन घेतले, परंतु सरकारकडून त्याच्या खरेदीबाबत काहीच प्रतिक्रिया देण्यात आली नाही. मध्यंतरी तूर खरेदी करण्यात आली ती केवळ व्यापा-यांकडून शेतक-यांच्या तोंडाला मात्र कोरडी पानेच पुसण्यात आली. सरकारने शेतकऱ्यांची तूर योग्य भावाने खरेदी न केल्यास शेतकऱ्यांचा मोठा भ्रमनिरास होईल, असेही पत्रकात म्हटले आहे.
27 Apr 2017

एमपीसी न्यूज - येत्‍या शैक्षणिक वर्षात पालक-शिक्षक समितीच्या मान्यतेशिवाय शाळेने शुल्‍कवाढ करू नये. ही शुल्‍कवाढ 15 टक्‍क्‍यांपेक्षा अधिक नसावी. याबाबत तक्रारी आल्‍यास संबंधित शाळांवर कायदेशीर कारवाई केली जाईल, असा इशारा शिक्षण मंत्री विनोद तावडे यांनी राज्‍यातील शाळांना दिला आहे.

 

शालेय शिक्षण विभाग व श्यामची आई फाऊंडेशन यांच्या संयुक्त विद्यमाने तयार करण्यात आलेल्या www.mahacareermitra.in या पोर्टलचे तसेच mahacareermitra या मोबाईल अॅपचे उद्‌घाटन मुख्यमंत्री देवेंद्र फडणवीस यांच्या हस्ते झाले. त्यावेळी तावडे बोलत होते.

 

राज्य शिक्षण मंडळाचे अध्यक्ष गंगाधर मम्हाणे, श्यामची आई आई फाऊंडेशनचे अध्यक्ष भारत देसडला, संचालिका शितल बापट आदी उपस्थित होते.

 

राज्य सरकारने दहावीतील विद्यार्थ्यांसाठी सुरु केलेल्या कल चाचणीचे चांगले परिणाम दिसून येत आहेत. यामुळे पालकांना आपल्या मुलाचा कल कोणत्या अभ्यासक्रमाकडे आहे, याची माहिती होते. यातून मुलांना चांगल्या अभ्यासक्रमाला प्रवेश घेता येतो. विद्यार्थ्यांना चांगले करिअर घडविता येते, असे तावडे म्हणाले.

 

या वेबपोर्टलमुळे विद्यार्थी, पालक यांना कल अहवालानुसार त्या त्या क्षेत्रातील व्हीडीओज पाहून तज्ज्ञांचे मार्गदर्शन व लेख वाचून अधिक माहिती मिळू शकते. राज्यातील 19 हजार पेक्षा अधिक शैक्षणिक संस्था, 83 हजार अभ्यासक्रम उपलब्ध करुन देण्यात आले आहेत. त्यानुसार जिल्ह्यातील शासनमान्य महाविद्यालयातून विद्यार्थ्यांना अभ्यासक्रमासाठी प्रवेश घेता येतो, अशी माहितीही तावडे यांनी दिली.

26 Apr 2017

एमपीसी न्यूज -  केंद्र व राज्य सरकारच्या चांगल्या कामामुळे महापालिका, जिल्हा परिषदेच्या निवडणुका जिंकल्या आहेत. जगात सर्वाधिक सदस्य असणारा भाजप एकमेव पक्ष असून 17 राज्यात भाजपाची सत्ता आहे. यामध्ये 13 मुख्यमंत्री भाजपचे आहेत. तर देशात 70 टक्के भूभागावर भाजपची सत्ता आहे. तरीही पक्षवाढीसाठी सर्वांनी प्रयत्न करणे गरजेचे असल्याचे, भाजपचे प्रदेशाध्यक्ष रावसाहेब दानवे म्हणाले.

 

चिंचवड येथील प्रा. रामकृष्ण मोरे सभागृहात भाजपच्या कार्यकारिणी समितीच्या दोन दिवसीय अधिवेशनात ते बोलत होते.

 

महापालिका, जिल्हा परिषद, नगरपालिका निवडणुकीत नोटबंदी, कर्जमाफी असे अनेक मुद्दे होते. विरोधकांनी या प्रश्नांवरून कोंडी करण्याचा प्रयत्न केला होता. परंतु, मुख्यमंत्र्यांनी हे प्रश्न व्यवस्थित हाताळले. त्यामुळे महापालिका, जिल्हा परिषदेत भाजपला विजय मिळाला आहे, असे दानवे म्हणाले.

 

स्वातंत्र्यानंतर कोणत्याही पक्षाला एवढे घवघवीत यश मिळाले नाही. तेवढे यश भाजपला मिळाले आहे. देशात सर्वांत जास्त खासदार, आमदार, महापौर, जिल्हा परिषद अध्यक्ष, नगराध्यक्ष भाजपचे जास्त असून 13 राज्यात भाजपचा मुख्यमंत्री आहे. ज्या ठिकाणी ताकद नव्हती तिथे ताकद दिली. पक्षाला आणखी पल्ला गाठायचा आहे. निवडणुकी संपल्या तरी संघटनेची कामे करायची आहेत. तसेच संघटना वाढीसाठी 'विस्तार' योजना सुरू करण्यात आली असल्याचेही, दानवे यांनी सांगितले.

 

आमदार लक्ष्मण जगताप म्हणाले की, पिंपरी-चिंचवड महापालिका आशिया खंडात सर्वात श्रीमंत महापालिका म्हणून ओळखली जात होती. परंतू, गेल्या काही दिवसांत या महापालिकेत उतरती कळा लागली होती. या महापालिकेचे गतवैभव परत आणण्यासाठी भाजप सर्वतोपरी प्रयत्न करेल, अशी ग्वाही त्यांनी दिली.

26 Apr 2017

भाजपच्या स्वच्छ कारभाराचे धिंडवडे



एमपीसी न्यूज - भय, भूक, भ्रष्टाचारापासून सर्वसामान्य जनतेची सुटका करून स्वच्छ, पारदर्शक कारभाराची हमी देऊन सत्तेवर आलेल्या भाजपचे हात भ्रष्टाचाराने बरबरटलेले असल्याचे उघड झाले आहे. मुख्यमंत्र्यांच्या खास मर्जीतील आयुक्त दिनेश वाघमारे यांचे स्वीय सहाय्यक शिर्के 12 लाख रुपयांची लाच घेताना रंगेहाथ पकडले गेले. हे भाजपच्या भ्रष्ट कारभाररुपी हिमालयाचे केवळ एक टोक आहे, अशी खरमरीत टीका माजी महापौर व नगरसेविका मंगला कदम यांनी केली आहे.


पिंपरी-चिंचवड महापालिका आयुक्त दिनेश वाघमारे यांचे स्वीय सहाय्यक व लघुलेखक शिर्के एका बांधकाम व्यावसायिकाकडून 12 लाख रुपयांची लाच घेताना रंगेहाथ पकडले गेले. या पार्श्वभूमीवर मंगला कदम यांनी ही प्रतिक्रिया दिली.



स्वच्छ कारभाराची हमी देणा-या भाजपच्या दुटप्पी वर्तनावर बोट ठेवत कदम यांनी भाजपवर सडकून टीका केली आहे. लाचखोर शिर्के यांचा गॉडफादर कोण आहे सगळ्यांनाच माहित आहे. आयुक्त दिनेश वाघमारे यांना मुख्यमंत्री  देवेंद्र फडणवीस यांच्या मर्जीतला माणूस समजले जाते. महापालिका सार्वत्रिक निवडणूकीसाठी त्यांची खास नेमणूक येथे करण्यात आली होती. व भाजपला हवे ते साध्य करुन झाल्यावर त्याचे बक्षीस म्हणून त्यांची पुन्हा एका वर्षातच पदोन्नतीवर बदली करण्यात आली ती पदोन्नती या लाचखोर प्रकरणामुळे  रद्द करुन त्याची चौकशी चालू करावी, अशी मागणीही मंगला कदम यांनी केली आहे. तसेच या मर्जीतल्या माणसाचा खरा चेहरा या प्रकरणातून उघडा झाला असून भाजपचे स्वत:चेच हात स्वच्छ कारभाराआड भष्ट्राचाराने बरबरटलेले आहेत, असेही मंगला कदम म्हणाल्या आहेत.


पिंपरी-चिंचवड शहरात राष्ट्रवादी काँग्रेसने केलेल्या विकास कामांचे श्रेय लाटणा-या भाजपने महापालिका निवडणुकांपासूनच अत्यंत नियोजनबद्धरितीने स्वत:ची कार्यपद्धती राबवायला सुरुवात केली होती. भाजपला अनुकूल व फायदेशीर ठरेल अशाच पद्धतीने प्रभाग रचना त्यांच्याकडून करून घेतली.

 

आयुक्त दिनेश वाघमारे यांनी भाजपला विजयी करण्यासाठी आपली सारी शक्ती, प्रतिष्ठा पणाला लावली होती. सर्वसामान्य जनतेला आपले गोंडस रूप दाखवून भुलवणा-या भाजपचा बीभत्स चेहरा आता उघड झाला आहे. शिर्के यांच्या रुपाने भाजपचा भ्रष्ट कारभारच चव्हाट्यावर आला आहे.  भाजपचा खरा चेहरा जनतेसमोर आणल्याशिवाय राष्ट्रवादी काँग्रेस गप्प बसणार नाही, असा इशाराही मंगला कदम यांनी दिला आहे.

26 Apr 2017

मी म्हणून पक्ष असल्याच्या भ्रमात राहू नका; लाटेत भुईसपाट व्हाल

 

एमपीसी न्यूज - महाराष्ट्रातील निवडणुकीत भाजपला अभूतपूर्व यश मिळाले. या विजयाचा सगळ्यांना आनंद आहे. विजय नम्रपणे स्वीकारून काम केले पाहिजे. प्रतिकूल काळात मान, सन्मान, प्रतिष्ठेचा विचार न करता कार्यकर्त्यांनी पक्ष संघटन वाढविले असून त्यांच्या कष्टातून हे यश मिळाले आहे. त्यांची आठवण ठेवली पाहिजे, असा सल्ला केंद्रीय परिवहन मंत्री नितीन गडकरी यांनी भाजपच्या पदाधिका-यांना दिला. तसेच मी म्हणून पक्ष संघटना असल्याच्या भ्रमात राहू नका, नाहीतर लाटेत भुईसपाट व्हाल, असेही ते म्हणाले.

 

चिंचवड येथील प्रा. रामकृष्ण मोरे सभागृहात भाजपच्या कार्यकारिणी समितीच्या दोन दिवसीय अधिवेशनाच्या उद्‌घाटन प्रसंगी गडकरी बोलत होते.

 

पूर्वीचा काळ कठिण होता. कार्यालयावरील फलक काढून नेले जात होते. तशा परिस्थितीत संघर्ष करत राहिलो. भाजपला विजय मिळण्याची शक्यता नव्हती. एखादा विजय मिळाला तर मोठा आनंद व्हायचा. अनेक निवडणुकीत अनामत रक्कम जप्त झाली. तशाच परिस्थितीत संघर्ष केला असून हा त्याचा विजय आहे. विजयात आत्मविश्वास वाढला पाहिजे. विजय मिळाल्यावर उन्माद करू नये. पराभव झाल्यावर निराश होऊ नये, असे सांगत गडकरी म्हणाले,  प्रवाहाच्या विरोधात लढण्यासाठी कार्यकर्त्यांनी अनेक परिश्रम घेतले आहे. त्यांनी परिश्रम घेतले नसते तर हा विजय पाहता आला नसता.

 

विजयातून आत्मपरीक्षण करत असताना संकल्प करणे गरजेचे आहे. विजय नम्रपणे स्वीकारला पाहिजे. डोक्यात हवा जाऊ देऊ नका. निवडून आलेल्या लोकांनी स्वत: ठरवून पाच गोष्टींचा संकल्प केला पाहिजे. संकल्प केल्यावर कोणतेही काम होते, असे सांगत गडकरी म्हणाले. इंदिरा गांधी जनतेच्या मनावर राज्य करणा-या लोकनेत्या होत्या. जनतेने इंदिरा गांधी यांचा देखील पराभव केला आहे. विजयामध्ये आत्मविश्वास वाढला पाहिजे. अंहकार नसला पाहिजे. आत्मविश्वास आणि अहंकारामध्ये खूप कमी अंतर आहे, असेही ते म्हणाले.

 

विरोधकांपेक्षा वेगळे काम करून दाखवावे लागणार आहे. त्यांच्यासारखेच काम केले तर, जनता आपल्यालाही माफ करणार नाही. निवडून आलेल्या लोकांबरोबर लोकांचा मोठा घोळका असतो. कौतुक सोहळा होत असतो. पंरतु, सत्तेत नसताना कोणीही जवळ येत नाही.

 

प्रत्येक खासदार, आमदार नेत्याला आपणच चांगले काम करत असल्याचे वाटते. आपल्यासारखे कोणीच काम करत नाही, असे वाटणारे हवेतील नेते आपल्या पक्षात कमी नाहीत. या नेत्यांनी हवेत न राहता जनतेची कामे करावीत. नाहीतर निवडणुकीत जनता 'बॅण्ड' वाजविल्याशिवाय राहणार नाही. नेत्यांचे फलक, सत्कार जनतेला बिलकूल आवडत नाहीत. जनता समोर बोलत नाही, पंरतु पाठीमागे बोलते असेही गडकरी म्हणाले.

 

पक्षात नवीन आलेल्या लोकांचे स्वागत करा. नवीन लोक पक्षात घेतल्याशिवाय पक्ष वाढणार नाही. काँग्रेस-राष्ट्रवादीची मते कमी झाली पाहिजेत. नवीन लोकांना पक्षात घेऊन स्वीकारले पाहिजे. फोटो लावणारे नेते बनत नाहीत, असेही ते म्हणाले. अनेक नेत्यांना पक्ष आपल्यामुळेच असल्याचे वाटत आहे. मी सांगेल त्यालाच पदे द्या. नाहीतर वेळ आल्यावर बघून घेऊ, असे सांगतात. जनतेने पक्षाला मते दिली आहे. कमळाचे चिन्ह घेईल तो निवडून येईल, अशी परिस्थिती आहे. मी पणा करणारे या लाटेत भुईसपाट झाल्याशिवाय राहणार नाहीत, असेही गडकरी म्हणाले.

 

सत्तेत असल्याची जाणीव असू द्या!

 

भाजप अनेक वर्ष विरोधात होता. आंदोलन, धरणे, सत्यागृह, निदर्शने हा आमच्या नेत्यांचा आवडीचा विषय आहे. सत्तेत असल्याचे नेते समजून घ्यायला तयार नाहीत. सत्ता येऊनही विरोधकांसारखेच वागत आहेत. आता सत्तेत असल्याची जाणीव ठेवून जनतेची कामे करण्याचा सल्ला, त्यांनी नेत्यांना दिला.

 


आमच्या पक्षात वाल्याच्या वाल्मिकी होतो!

 

पक्षात गुंडाना प्रवेश दिल्याचे आमच्यावर आरोप केले जात आहेत. नागपुरात अनेक गुन्हेगारी पार्श्वभूमीचे लोक आम्ही पक्षात घेतले. ते सगळे सुधारले असल्याचे सांगत गडकरी म्हणाले गुन्हेगार जरी आमच्या पक्षात आले तरी ते वाल्याचा वाल्मिकी झाल्याशिवाय राहणार नाहीत. गुणदोष असलेल्या लोकांना स्वीकारले पाहिजे. त्यांचे गुणदोष काढणे संघटनेचे कर्तव्य आहे. मी कधीच गुन्हेगारांची बाजू घेतली नाही. वाईट लोकांना चांगले केल्यावर समाज चांगला होईल.

26 Apr 2017

एमपीसी न्यूज - पुणे महापालिकेत ज्या प्रकारे मागील आठवड्यात तोडफोड झाली. ती निषेधार्ह बाब असून जी नुकसान भरपाई थेट महापौरांकडे देण्यात आली. ती चुकीची बाब आहे. या पुढील काळात देखील अशा तोडफोडीच्या घटना घडतील आणि महापौरांकडे धनादेश दिला जाईल. यातून भाजप काय संदेश देत आहे. हे पाहणे जरुरीचे ठरणार आहे. संबंधित आरोपीवर कारवाई झाली पाहिजे. तसेच त्यांनी न्यायालयासमोर नुकसान भरपाई द्यावी, अशी मागणी देखील राष्ट्रवादीच्या शहराध्यक्ष वंदना चव्हाण यांनी केली.

 

पुणे महापालिकेतील भाजपच्या दोन्ही कार्यालयाची आणि इतर वस्तूंच्या तोडफोडीची नुकसान भरपाई म्हणून काल भाजपच्या गणेश घोष यांनी महापौर मुक्ता टिळक यांच्याकडे 51 हजार रुपयांचा धनादेश दिला. याच्या निषेधार्थ आज पुणे महापालिकेत राष्ट्रवादी काँग्रेस पक्षाच्या वतीने शहर अध्यक्ष आणि खासदार वंदना चव्हाण, विरोधी पक्षनेते चेतन तुपे यांच्या नेतृत्वाखाली आंदोलन करण्यात आले. या आंदोलना वेळी त्यांनी ही मागणी केली. 

 

मागील आठवड्यात स्वीकृत नगरसेवक उमेदवारीवरून महापालिकेच्या मुख्य इमारतीमध्ये भाजपच्या गणेश घोष आणि गणेश बिडकर यांच्यात वादाचा प्रकार घडला. यामध्ये गणेश घोष यांच्यासह कार्यकर्त्यांनी महापालिकेतील भाजपच्या दोन्ही कार्यलायाची आणि यामध्ये इतर वस्तूची देखील तोडफोड केली. या घटनेत साडेपाच लाख रुपयांचे नुकसान झाल्याचे पोलिसांच्या पंचनाम्यात स्पष्ट झाले. याची नुकसान भरपाई कोण देणार अशी चर्चा राजकीय वर्तुळात रंगली होती. तेव्हा महापौर मुक्ता टिळक यांनी भाजप पक्ष याची नुकसान भरपाई देईल, अशी घोषणा केली होती. या प्रकरणी शिवाजीनगर पोलीस स्टेशन येथे गुन्हा दाखल करण्यात आला होता. या घटनेमुळे शहरात पक्षाची प्रतिमा मलिन झाल्याने महापालिकेचे नुकसान भरपाई म्हणून काल गणेश घोष यांनी महापौर मुक्ता टिळक यांच्याकडे 51 हजार रुपयांचा धनादेश दिला.

 

यावेळी चव्हाण यांनी महापौरांनी कोणत्या गोष्टीच्या आधारावर धनादेश स्वीकारला आहे, असा प्रश्न देखील उपस्थित केला. न्याय प्रविष्ठ घटना असताना संबंधित व्यक्तीने न्यायालयासमोर नुकसान भरपाई द्यावी, अशी मागणी त्यांनी केली. भाजप आरोपीला पाठीशी घालत आहे. पुणेकर जनतेने सत्ता दिली असताना आम्ही गुंडगिरी खपवून घेणार नाही, अशी घोषणाबाजी देखील यावेळी करण्यात आली.

26 Apr 2017

कै.श्रीमती लक्ष्मीबाई दगडूशेठ हलवाई दत्तमंदिर ट्रस्टतर्फे वासंतिक पुष्पोत्सव



एमपीसी न्यूज -  विविध रंगीबेरंगी फुलांनी साकारलेली आकर्षक आभूषणे... सुवासिक फुलांनी सजलेला मुकुट... शोभिवंत फुलांची आरास... आणि मोगरा, गुलाब, झेंडू, चाफा, लिलीसारख्या नानाविध फुलांनी सजलेल्या दत्तमंदिरात वासंतिक पुष्पोत्सव मोठया उत्साहात साजरा झाला. चैत्र अमावस्येला दत्तमहाराजांकरिता केलेली फुलांची आरास पाहण्याकरिता मोठया संख्येने भाविक उपस्थित होते.

 

 

कै.श्रीमती लक्ष्मीबाई दगडूशेठ हलवाई दत्तमंदिर ट्रस्टतर्फे संस्थापिका लक्ष्मीबाई दगडूशेठ हलवाई यांच्या पुण्यतिथीनिमित्त पुष्पोत्सवाचे आयोजन करण्यात आले. यावेळी ट्रस्टचे अध्यक्ष अंकुश काकडे, कार्यकारी विश्वस्त अ‍ॅड. शिवराज कदम जहागिरदार, खजिनदार बी.एम.गायकवाड, उत्सवप्रमुख शिरीष मोहिते, उप उत्सवप्रमुख चंद्रशेखर हलवाई, विश्वस्त अ‍ॅड.एन.डी.पाटील, युवराज गाडवे, उल्हास कदम, नंदकुमार सुतार आदी उपस्थित होते. 

 

 

पुष्पोत्सवाबाबत माहिती देताना उत्सवप्रमुख शिरीष मोहिते म्हणाले, 5 लाख मोगरा, 50 हजार लिली, 25 हजार गुलाब, 10 हजार  झेंडू, 5 हजार चाफा आणि अशोकाच्या पानांनी पुष्पोत्सवात सजावट करण्यात आली. सुभाष सरपाले आणि सहका-यांनी ही आरास साकारली.

 

 

श्रीपाद श्रीवल्लभ, नृसिंह सरस्वती, श्रीमत् वासुदेवानंद टेंभेस्वामी महाराज आणि श्रीमाणिकप्रभू महाराज या दत्तमहाराजांच्या चार अवतारांच्या प्रतिमा देखील फुलांनी सजविण्यात आल्या होत्या. सकाळी ट्रस्टचे उपउत्सवप्रमुख चंद्रशेखर हलवाई आणि कुटुंबीयांच्या हस्ते लघुरुद्र करण्यात आला.

26 Apr 2017
सिंचन क्षेत्र वाढल्याशिवाय शेतक-यांच्या आत्महत्या थांबणार नाहीत  
 
एमपीसी न्यूज -  महाराष्ट्रातील शेतक-यांच्या आत्महत्या चिंताजनक आहेत. काँग्रेस-राष्ट्रवादीच्या सरकारने शेतक-यांसाठी काहीच केले नाही. त्यांनी शेतक-यांचे शोषण केले. शेतक-यांच्या आत्महत्येसाठी आघाडीचे सरकारच जबाबदार आहे. महाराष्ट्रात जोपर्यंत 50 टक्के सिंचन होत नाही, तोपर्यंत शेतक-यांच्या आत्महत्या थांबणार नाहीत, असे मत केंद्रीय दळणवळण मंत्री नितीन गडकरी यांनी आज (बुधवारी) चिंचवड येथे केले. तसेच महाराष्ट्राचा कृषी विकास दर वाढविला पाहिजे, अशी सूचना मुख्यमंत्र्यांना केली.  
 
चिंचवड येथील प्रा. रामकृष्ण मोरे सभागृहात भाजपच्या कार्यकारिणी समितीच्या दोन दिवसीय अधिवेशनाचे गडकरी यांच्या हस्ते उद्‌घाटन झाले. त्यावेळी ते बोलत होते. मुख्यमंत्री देवेंद्र फडणवीस, प्रदेशाध्यक्ष रावसाहेब दानवे, केंद्रीय मनुष्यबळ विकासमंत्री प्रकाश जावडेकर, संरक्षण राज्यमंत्री डॉ. सुभाष भामरे, गृहराज्यमंत्री हंसराज अहिर, महाराष्ट्राचे प्रभारी सरोज पांडे, सह प्रभारी राकेश सिंह, राष्ट्रीय संघटनमंत्री व्ही. सतिश, श्याम जाजू, महसूलमंत्री चंद्रकांत पाटील, शिक्षणमंत्री विनोद तावडे, युवा मोर्चाच्या अध्यक्षा पुनम महाजन, ग्रामविकास मंत्री पंकजा मुंडे, पुण्याचे पालकमंत्री गिरीश बापट, माजी मंत्री एकनाथ खडसे, राज्य महिला आयोगाच्या अध्यक्षा विजया रहाटकर, राज्य मंत्रिमंडळातील मंत्री, सर्व खासदार, आमदार, भाजपचे महापौर, जिल्हा परिषदेचे अध्यक्ष आदी पदाधिकारी उपस्थित होते.
 
 
 
आगामी काळात पाण्याचा प्रश्न गंभीर बनणार आहे. 70 टक्के पाणी समुद्रात वाहून जाते. पाणी साठवून ठेवण्यासाठी प्रयत्न करणे गरजेचे आहे. 15 टक्के पाणी साचवून ठेवले तर 50 टक्के क्षेत्र पाण्याखाली येईल, असे सांगत गडकरी म्हणाले की, विरोधक आता संघर्ष यात्रा काढत आहेत. सत्तेत असताना त्यांनी शेतक-यांसाठी काहीच केले नाही. शेतक-यांचे शोषण केले. शेतक-यांच्या आत्महत्येला काँग्रेस -राष्ट्रवादीच जबाबदार आहे. 
 
आघाडी सरकारच्या काळात राज्याचा कृषी विकासाचा दर निच्चांक पातळी होता. भाजप-शिवसेना सरकारच्या गेल्या अडीच वर्षाच्या काळात कृषी विकासाचा दर 12.50 टक्के झाला आहे. पुढील दोन वर्षात कृषी विकासाचा दर आणखी वाढला पाहिजे. 20 टक्के दर झाला पाहिजे, अशी सूचना गडकरी यांनी मुख्यमंत्री देवेंद्र फडणवीस यांना केली. तसेच मध्यप्रदेशचा कृषी विकास दर 25 टक्के असल्याचेही, त्यांनी सांगितले. 
 
सरकारने शेतक-यांसाठी जलयुक्त शिवार सारखी महत्वपूर्ण योजना सुरू केली आहे. या योजनेचा शेतक-यांना फायदा होणार आहे. सरकाराने शेतक-यांसाठी विविध योजना सुरू केल्या आहेत. कार्यकर्त्यांनी त्या योजना शेतक-यांपर्यंत पोहचविल्या पाहिजेत. ग्रामीण विकास, कृषी, औद्योगिक क्षेत्रात महाराष्ट्र पुढे जात आहे, असेही गडकरी म्हणाले.
...काय होतास तू काय झालास तू!
 
काँग्रेस-राष्ट्रवादीचे नेते सत्तेत असताना गाडीची काच खाली करत नव्हते. सत्तेत असताना शेतक-यांसाठी काहीच केले नाही. आता विरोधात गेल्यावर शेतक-यांसाठी आंदोलन करत आहेत. संघर्ष यात्रा काढत आहेत. हे नेते माईकवर बोलताना हसू येत असल्याचे सांगत गडकरी म्हणाले काय होतास तू काय झालास तू ...
26 Apr 2017

बिडी कामगारांना सरकारच्या योजनेनुसार घरकुल देण्याची मागणी

 

एमपीसी न्यूज - भारत सरकारच्या इंटिग्रेटेड हाऊसिंग स्किम फॉर बिडी वर्कर्स या योजनेनुसार बिडी कामगारांच्या घरकुलासाठी जमीन उपलब्ध करून द्यावी या मागणीसाठी जिल्हाधिकारी कार्यालयासमोर उपोषण करण्यात आले. यावेळी पुणे जिल्ह्यातील सर्व बिडी कामगार सहभागी झाले होते. यावेळी भारतीय मजदूर संघाच्या वतीने निवासी जिल्हाधिकारी राजेंद्र मुठे यांना निवेदन देण्यात आले.

 

यावेळी नरेश पासकंटी, उमेश विश्वाद, अर्जुन चव्हाण, सचिन मेंगाळे, राजाराम येमुल, वासंती तुम्मा, रेणुका इराबत्तीन, अनिता बेत, विजया पासकंटी, विजयालक्ष्मी कोंगे, रुकैय्या शेख, गीता नागुल, रेणुका श्रीमल, गीता वल्लाकट्टी आदी उपस्थित होते.

 

बिडी कामगारांना घरकुल मिळावे यासाठी अनेक अंदोलने करण्यात आली परंतु अद्याप घरे मिळाली नाहीत.  कामागरांच्या घरकुलासाठी लोहगाव येथील सेक्टर नंबर 35 मधील जमीन देण्याच्या मागणीचा प्रस्ताव शासनाकडे दिला होता. हा प्रस्ताव मंजूर करून कामगारांना त्यांची हक्काची घरे देण्यात यावी यासाठी हे उपोषण करण्यात आले होते.

 

यावेळी निवासी जिल्हाधिकारी यांनी बिडी कामगारांच्या जमिनीकरिता पालकमंत्री यांच्यासमवेत बैठक घेऊन संघटनेचे पत्र देण्यात येईल. तसेच बिडी कामगारांना लवकर जमीन मिळण्यासाठी शासन प्रयत्न करेल, असे आश्वासन दिले. शासनाने 31 मे पर्यंत योग्य निर्णय घ्यावा अन्यथा आंदोलन तीव्र करण्याचा ईशारा भारतीय मजदूर संघटनेच्या वतीने यावेळी देण्यात आला.

26 Apr 2017

एमपीसी न्यूज - चापेकर स्मारक समीतीच्या गुरुकुलममध्ये नव्या आणि जुन्या पारंपारिक शिक्षणाची सांगड घालून नवी पिढी तयार करण्याचे काम कौतुकास्पद असल्याचे शालेय शिक्षण मंत्री विनोद तावडे यांनी सांगितले. विनोद तावडे यांनी आज (बुधवार) चिंचवड येथील पुनरुत्थान समरसता गुरुकुलमला भेट दिली, यावेळी त्यांनी हे गौरोवोद्गार काढले.

 


यावेळी पिंपरी-चिंचवड जिल्हा कार्यवाह विलास लांडगे, चाफेकर स्मारक समीतीचे अध्यक्ष गिरीश प्रभुणे, सहकार्यवाह रवी नामदे, चाफेकर स्मारक शिक्षण समिती अध्यक्ष नितीन बारणे, शकुंतला बन्सल, हरी भारती, गतीराम भोईर, राजू सराफ, सिद्धेश्वर इंगळे आदी उपस्थित होते.

 


चापेकर स्मारक समीतीच्या गुरुकुलममध्ये दिल्या जाणा-या शिक्षणाची माहिती गिरीश प्रभुणे यांनी विनोद तावडे यांना दिली. विनोद तावडे यांनी गुरुकुलममधील संगणक विभाग, मूर्तीकाम विभाग, शिवण विभाग आदी विभागांना भेट देऊन गो-शाळा आणि प्रयोग शाळेची माहिती घेतली. यावेळी मल्लखांब करणा-या विद्यार्थ्यांचे विशेष कौतुक त्यांनी केले.

 


चापेकर स्मारक समीतीच्या गुरुकुलममध्ये आधुनिक आणि पारंपारिक शिक्षण येथील विद्यार्थ्यांना देण्यात येते ही आनंदाची बाब आहे. सध्याच्या शिक्षण पद्धतीनुसार मुलांना शिक्षण दिले जात आहे त्याच बरोबर या ठिकाणी मुलांना इतरही शिक्षण दिले जात आहे. या ठिकाणी मिळत असलेल्या शिक्षणामुळे एक चांगली नवी पिढी तयार होत आहे. आणि ही पिढी तयार करण्याचे काम पुनरुत्थान समरसता गुरुकुलमचे गिरीश प्रभुणे उत्तमरित्या करत असल्याचे विनोद तावडे यांनी सांगितले.

Page 1 of 93