• 1.JPG
  • PhotoGraphy-School-1.jpg
  • punenews.jpg
22 May 2017
एमपीसी न्यूज - स्थानिक स्वराज्य संस्थात स्त्री-पुरुष समानतेसाठी महिलांना आरक्षण मिळून दोन दशके लोटल्यानंतर आजही नगरसेविकांऐवजी त्यांचे पती आणि मुलेच अधिक सक्रिय असल्याचे चित्र आहे. पिंपरी महापालिकेतील अनेक नवनिर्वाचित नगरसेविकांते पती आणि मुले आपणच कारभारी असल्याच्या थाटात हस्तक्षेप करीत असल्याचे दिसून येत आहे. यामुळे पालिकेतील अधिकारी हैराण झाले आहेत. 
 
महिलांना आरक्षण देण्यामागील समानतेच्या हेतूला हरताळ फासून बहुतेक नगरसेविकांचे पती आणि मुले आपण स्वत:च नगरसेवक असल्याच्या थाटात महापालिकेत वावरत आहेत. पिंपरी महापालिकेत भाजपची सत्ता आहे. अनेक नगरसेवक, नगरसेविका प्रथमच निवडून आल्या आहेत. काही नगरसेविकेचे पती आणि मुलांचा मोठ्या प्रमाणात कामात हस्तक्षेप आहे. नगरसेविकेचे पतीच विविध मागण्यांचे निवेदन आयुक्तांना देताना दिसत आहेत. 
 
आई, पत्नी नगरसेवक असल्याचा फायदा उठवित काही मंडळी थेट अधिका-यांच्या कक्षात जाऊन अरेरावी करीत असल्याची तक्रार केली जात आहे. काही नगरसेविकांच्या कुटुंबातील व्यक्तीच बैठक घेऊन जाब विचारत आहेत, अशा वेळी काय करावे, असा प्रश्न  अधिका-यांना पडत आहे. 
 
प्रभागात कोणती कामे होणार, काही कामांना प्राध्यान्य द्या, असे वेगवेळया सूचना वजा सल्ले दररोज अधिका-यांना मिळत आहे. पालिकेच्या कामाची माहिती नसल्यामुळे सुरुवातीचे काही दिवस त्यांच्या कुटुंबातील व्यक्ती त्यांना माहिती करुन देण्यासाठी येत असतील असे वाटत होते. लवकरच हा प्रकार बंद होईल अशी, शक्यता वर्तविली जात होती. परंतु, महिला सभांसदाऐवजी त्यांचे पती, मुले सतत कार्यालयमध्ये येऊन जाब विचारत असल्याने कोणाकडे दाद, मागायची, असा प्रश्न अधिका-यांना पडला आहे.
21 May 2017

नातेवाईकांनी फिरवली पाठ; वृद्धाश्रमानेच केले अंत्यसंस्कार

एमपीसी न्यूज - ज्येष्ठ चित्रपट निर्माते राजेश नंदा यांचे काल (दि.20) रात्री आठच्या सुमारास आकुर्डी येथील वृद्धाश्रमात निधन झाले. ते 80 वर्षांचे होते. गेल्या काही वर्षांपासून नंदा यांचा त्यांच्या नातेवाईकांशी संपर्क पूर्णपणे तुटला होता. त्यांच्या निधनाची बातमी नातेवाईकांना कळवली. मात्र, कोणीही त्यांच्या अंत्यसंस्काराला येण्याची तसदी घेतली नाही. त्यामुळे  वृद्धाश्रमाच्या कर्मचा-यांनीच त्यांच्यावर अंत्यविधी केला.

राजेश नंदा यांनी 1969 मध्ये नतीजा हा हिंदी चित्रपट दिग्दर्शित केला. ज्यामध्ये विनोद खन्ना, जुनियर मेहमूद, बिंदु यांनी काम केले होते. तर 1971 मध्ये बेहरुपिया हा चित्रपट दिग्दर्शित केला ज्यामध्ये हेलन, धीरज कुमार यांनी काम केले होते. याबरोबरच त्यांनी 1962 पीक पॉकेट तर 1965 साली संत तुकाराम या चित्रपटाचे दिग्दर्शन केले होते. राजेश नंदा हे 80 वर्षाचे होते.

त्यांना वर्षभरापूर्वी प्रसिद्ध गझलकार अशोक खोसला यांनी आकुर्डी येथील संत बाबा मोनी साहेब वृद्ध आनंदाश्रम येथे आणले. अशोक खोसला हे वृद्धाश्रमाचे संचालक आहेत. याविषयी खोसला यांच्याशी संपर्क साधला असता खोसला एमपीसी न्यूजशी बोलताना म्हणाले की, मला प्रसिद्ध कवी सुधीर शर्मा यांचा फोन आला होता. त्यांनी मला सांगितले की दिग्दर्शक नंदा हे एका रुग्णालयात दाखल आहेत. त्यांच्यावर उपचार चालू आहेत. मात्र, त्यांचे कोणी नातेवाईक त्यांच्याजवळ नाही तसेच त्यांना ते सांभाळत नाहीत. यावेळी त्यांच्या नातेवाईकांशी आम्ही संपर्क साधला. मात्र, तो होऊ शकला नाही. तर एकाने त्यांना ओळखण्यास नकार दिला. त्यानंतर मी त्यांना आकुर्डी येथे घेऊन आलो व शेवटपर्यंत त्यांची काळजी घेतली.

यावेळी सुधाकर शर्मा यांच्याशीही संपर्क साधला. यावेळी त्यांनीही आम्ही त्यांना 15 वर्षापासून सांभाळत होतो. मात्र, त्यांचे कोणी नातेवाईक आम्हाला भेटले नाहीत व नंदा यांनीही कधी आम्हाला काही सांगितले नाही. त्यानंतर आम्ही त्यांना खोसला यांच्याकडे पाठवले.

 

नंदा यांची मोजकीच माहिती वृद्धाश्रमाकडे आहे. ते फक्त एक भाऊ व भाच्चीने माझी सर्व संपत्ती लुटली, असे बोलताना सांगत. त्यांचे काल निधन झाले. त्यावेळीही नातेवाईकांशी संपर्क साधला. मात्र, त्यांनी यावेळीही हात वर केले. त्यानंतर वृद्धाश्रम प्रशासनाने नंदा यांच्यावर अंत्यसंस्कार केले.

21 May 2017
एमपीसी न्यूज -  बोपखेल हे गाव तस छोटस..पण  21 मे 2015 च्या घटनेनंतर ते महाराष्ट्राच्या काना कोप-यात पोहचले... कारण आजच्या दिवशी बोपखेल वासियांनी  हक्काच्या रसत्यासाठी चक्क संरक्षण खात्याशीच दोन हात केले होते. 

 
दापोडी येथील कॉलेज ऑफ मिलिटरी इंजिनिअरिंगच्या (सीएमई) हद्दीतील बोपखेलसाठी जाणारा रस्ता संरक्षण विभागाने सुरक्षेच्या कारणावरुन 12 मे 2015 रोजी बंद केला. यासाठी 21 मे 2015 रोजी गावक-यांनी आंदोलन छेडले. ज्याला हिंसक वळण लागले, दगडफेक झाली, यात एका पोलीस कर्मच्या-याचा मृत्यूही झाला.
 

दापोडी ते बोपखेल असा सीएमईमधून जाणारा 3 किमी रस्ता  आता  18 किमीचा झाला होता. दैनंदिन व्यवहारासाठी रोजच आजही एवढी पायपीट करावी लागत आहे.  अन्यथा शहराजवळ असूनही संपर्क तोडावा लागणार होता. यावर उपाय म्हणून मुळा नदीवर खडकीच्या बाजूने तरगंता पुल एक महिन्याने सुरू करण्यात आला. मात्र सुरक्षेचा मुद्दा पुढे करत  6 जून 2016 ला तो पूलही  काढून टाकण्यात आला. तो आजतागायत बसवण्यात आलेला नाही.

 
यासाठी तत्कालीन संरक्षण मंत्री पर्रिकर,आमदार, खासदार, जिल्हाधधिकारी, संरक्षण खात्याचे इतर अधिकारी नागरिक यांच्या वारंवर बैठकाही झाल्या. मात्र यावर अजून तरी उपाय निघालेला नाही. जिल्हाधिकारी आणि आयुक्तांनी तीन रस्त्यांचे पर्याय ठेवले होते. त्यामध्ये सध्या बंद केलेल्या रस्त्याच्या बाजूने उंच सिमाभिंत बांधणे, सीएमईच्या आणि मुळा नदीच्याकडेने नवीन रस्ता तयार करणे आणि खडकीच्या बाजूने अ‍ॅम्यूनेशन फॅक्टरीकडे निघण्यासाठी नदीवर पुल उभारावा आणि खडकीतील गवळीवाडा येथे मुख्य रस्ताला जोड द्यावा. त्यातील तिसरा पर्याय मान्य करून त्यावर या दोन वर्षात चर्चा सुरु आहे.

 
यासाठी पिंपरी-चिंचवडचे  तीन आयुक्तही आत्तापर्यंत बदलले, नागरिकांनी उपोषणे केली, नगरसेवकांनी आश्वासने दिली मात्र अजून  तरंगता पुल तरी देणार का असा सवाल नागरिक करत आहेत. आजही पिंपरी-चिंचवड महापालिकेसमोर नागरिकांचे तरंगत्या पुलासाठी उपोषण चालू आहे. यावर महापालिका आयुक्त श्रावण हार्डीकर यांनी सकारात्मक प्रतिसाद दिला आहे. मात्र ठोस आश्वासन ना शासानाकडून मिळाले, संरक्षण खात्याने दिले, राजकीय नेत्यांनी दिले ना महापालिकेने दिले. त्यामुळे दोनवर्षानंतर तरी आम्हाला हक्काचा रस्ता मिळेल का असा सवाल बोपखेलकर करत आहेत.
21 May 2017
एमपीसी न्यूज -  पिंपरी वाघेरे येथील डेअरी फार्मजवळ रेल्वे उड्डाण पूल  बांधण्यात यावा अशी मागणी नगरसेवक संदीप वाघेरे यांनी आयुक्त श्रवण हर्डीकर यांच्याकडे लेखीनिवेदनांद्वारे केली आहे
 
 
दिलेल्या निवेदनात त्यांनी म्हटले आहे की, पिंपरी-चिंचवड महापालिकेच्या ड प्रभाग कार्यालयामार्फत पिंपरी वाघेरे येथील डेअरी फार्मजवळ रेल्वे उड्डाण पूल बांधण्यात यावा. ही कार्यवाही मागील दोन ते तीन वर्षापासून सुरु आहे. पण अद्यापर्यंत त्याची निविदा काढलेली नाही.
 
 
 
प्रभाग स्तरावर विषयांकित कामासाठी पुरेसा वेळ देऊन पाठपुरावा होत नसल्यामुळे पिंपरी-चिंचवड महानगरपालिकेतील विविध  प्रकल्पांची कामे करणा-या स्थापत्य मुख्यालय स्तरावरील पूल प्रकल्प  विभागाकडे सदर रेल्वे उड्डाण पुलाचे काम त्वरीत वर्ग करावे, असे त्यांनी निवेदनात म्हटले आहे.
21 May 2017
पीएमपी संचालक सिद्धार्थ शिरोळे  यांचे प्रतिपादन ; सजग सक्रिय बस प्रवाशांचा सन्मान 
   
एमपीसी न्यूज  - पीएमपी अधिक सक्षम करण्यासाठी पीएमपीतील समस्येच्या मूळापर्यंत जायला हवे. पीएमपीकरीता मिळणा-या पैशांची तरतूद योग्य पद्धतीने व्हायला हवी. पुढील ५ वर्षाच्या दृष्टीने विचार करताना पीएमपीची अर्थव्यवस्था ही प्रवासी केंद्रीत असायला हवी. त्यामुळे पुढील एक वर्षात या दृष्टीने पीएमपीच्या सुधारणेसाठी चांगल्या पद्धतीने काम करण्यात येईल, असे प्रतिपादन पीएमपीचे संचालक सिद्धार्थ शिरोळे यांनी केले. 
 
पीएमपी प्रवासी मंचातर्फे नवी पेठेतील इंद्रधनुष्य सभागृह येथे आयोजित मासिक प्रवासी मेळाव्यामध्ये पीएमपीकडे सर्वाधिक सूचना व तक्रारी नोंदविणा-या सजग सक्रिय बस प्रवाशांचा विशेष सन्मान करण्यात आला. त्यावेळी ते बोलत होते. मंचाचे अध्यक्ष जुगल राठी, सतिश चितळे, संजय शितोळे आदी उपस्थित होते. 
मंचातर्फे मासिक, साप्ताहिक, दैनिक पास सर्वाधिक तक्रारी नोंदविणा-या प्रवाशांना प्रोत्साहनपर प्रायोजित करण्यात आले. यामध्ये एका महिन्यात २५ पेक्षा जास्त तक्रारी देणा-यांना एक दिवसाचा पास, ७५ पेक्षा जास्त तक्रारींकरीता एक आठवडयाचा पास आणि १५० पेक्षा जास्त तक्रारी करणा-यांना मासिक पास देण्यात आला. सु.बा.फडके, जयदीप साठे, रोहन निघोजकर, रणजीत घुले, अशोक बराटे, अ‍ॅड. शीला परळीकर, विपुल पाटील, रविराज चव्हाण यांना मोफत बस पास देऊन गौरविण्यात आले. 
 
सिद्धार्थ शिरोळे म्हणाले, लोकशाहीचे चार स्तंंभ एकत्र आले तर प्रवासी केंद्रीत पीएमपी निर्माण होऊ शकते. नागरिकांकडून पीएमपी संदर्भात अनेक तक्रारी येत असतात, अशा जागृत नागरिकांच्या अनुभवामुळे पीएमपीचे प्रश्न सोडविण्यास मदत होईल. प्रशासन आणि लोकसहभागातून पीएमपी अधिक सक्षम आणि सुरक्षित होण्यास प्रयत्न व्हायला हवा, असेही त्यांनी सांगितले.  
 
जुगल राठी म्हणाले, स्वच्छ, सुरक्षित, पीएमपी सेवा देण्यासाठी प्रशासन व लोकप्रतिनिधिंची इच्छाशक्ती कमी पडत आहे. प्रवाश्यांच्या अडचणी सोडविण्यासाठी, बसची वारंवारता वाढविण्यासाठी आणि प्रवासी केंद्रीत निर्णय होण्यासाठी स्थानिक प्रशासनाचा सहभाग वाढायला हवा. स्वस्त बस सेवा, प्रभावी, पारदर्शी हेल्पलाईन, डिजिटल फलक, सर्व बस थांब्यावर शिस्त, पांढरे पट्टे , प्रवासी सहभाग प्रोत्साहन योजना यासाठी काम होणे आवश्यक असल्याचे त्यांनी सांगितले. 
 
ते पुढे म्हणाले, पीएमपी हेल्पलाईन क्रमांक (०२०) २४५०३३५५ याक्रमांकावर फोन द्वारे आणि ९८८१४९५५८९ या क्रमांकावर एसएमएस किंवा व्हॉटस् अ‍ॅप द्वारे आपली तक्रार नोंदवावी. पीएमपी प्रवासी मंचातर्फे आयोजित या योजना व उपक्रमात सहभागी होण्याकरीता ९८५०९५८१८९, ९४२२०१७१५६ या क्रमांकावर संपर्क साधावा, असेही त्यांनी सांगितले. सतीश चितळे यांनी आभार मानले. 
20 May 2017

एमपीसी न्यूज - पिंपरी-चिंचवड महापालिकेने प्रधानमंत्री आवास योजनेंतर्गत शहराच्या विविध भागातील 10 ठिकाणी 9 हजार 458 सदनिका बांधण्याचे नियोजन केले आहे. त्यासाठी 885 कोटी 12 लाख रुपये खर्च येणार आहे. गृहयोजनेच्या ठिकाणी विविध मुलभूत सुविधा पुरविण्यासाठी 50 कोटी 15 लाख रुपये खर्च होणार आहे. या दोन्ही खर्चाला प्रशासकीय मान्यता देण्याचा प्रस्ताव शहर सुधारणा समितीसमोर आला आहे. घर नसणा-या आणि 3 लाखांपर्यंत वार्षिक उत्पन्न असणा-यांना गृहयोजनेचा लाभ घेता येणार आहे.

महापालिकेने प्रधानमंत्री आवास योजनेसाठी नागरिकांकडून अर्ज मागविले आहेत. शहराच्या विविध भागात 10 ठिकाणी 9 हजार 458 सदनिका बांधण्याचे नियोजन आहे. त्यानुसार च-होली येथे 1442, रावेतमध्ये 1080, डुडुळगावमध्ये 896, दिघीत 840, मोशी-बो-हाडेवाडीमध्ये 1400, वडमुखवाडीत 1400, चिखलीमध्ये 1400, पिंपरीत 300, पिंपरीतच आणखी 200 आणि आकुर्डीमध्ये 500 सदनिका उभारण्याचे प्रस्तावित आहे.

यातील काही जागा महापालिका मालकीच्या, काही जागा सरकारी गायरान आहेत. बहुतांश जागा महापालिकेच्या ताब्यात आल्या असून, ताब्यात न आलेल्या जागांचे संपादन करण्याची कार्यवाही सुरू आहे. सरकारी गायरानाच्याही जागा जिल्हाधिकारी कार्यालयाकडून ताब्यात घेण्याची कार्यवाही सुरू आहे.  9 हजार 458 सदनिका बांधण्यासाठी 6 टक्के भाववाढ आणि इतर शुल्कासह एकूण 885 कोटी 12 लाख रुपयांचा खर्च अपेक्षित आहे. या व्यतिरिक्त गृहयोजनेच्या ठिकाणी विविध मुलभूत सुविधा पुरविण्यासाठी 6 टक्के भाववाढ व इतर शुल्कासह एकूण 50 कोटी 15 लाख रुपये खर्च येणार आहे. या योजनेसाठी अडीच चटईक्षेत्र निर्देशांक (एफएसआय) मंजूर आहे. गृहयोजनेतील प्रति सदनिकेचे क्षेत्र 322 चौरस फूट कार्पेट एरिया आणि 545 चौरस फूट बिल्टअप एरिया आहे.

प्रत्येक सदनिकेच्या बांधकामासाठी 8 लाख 27 हजार 446 रुपये खर्च येणार आहे. त्यासाठी केंद्र सरकार दीड लाख रुपये आणि राज्य सरकार एक लाख रुपये अनुदान देणार आहे. उर्वरित हिस्सा लाभार्थ्यांकडून घेण्याचे नियोजन आहे. महापालिका स्वहिस्सा न वापरता गृहप्रकल्पासाठी जागा मोफत उपलब्ध करून देणार आहे. लाभार्थ्यांकडून जागेची किंमत, बांधकाम परवाना विकास शुल्क आणि प्रीमिअम शुल्काची आकारणी महापालिका करणार नाही. जागांची किंमत व विविध शुल्क मिळून एकूण 151 कोटी 1 लाख रुपयांची आकडेमोड होते.

यामध्ये 14 मजली उंच इमारती उभारण्याचे प्रस्तावित असून तळमजला वाहनतळासाठी राखीव असेल. प्रत्येक मजल्यावर 16 सदनिका आणि दोन लिफ्ट असतील. त्यातील एक लिफ्ट स्ट्रेचर लिफ्ट असेल. इमारतींच्या ठिकाणी अग्निशमन व्यवस्था, जमिनीखाली व इमारतीवर आवश्यक क्षमतेच्या पाण्याच्या टाक्या, प्रत्येक इमारतीला सोलर हिटर सुविधा, इमारतीच्या वाहनतळात स्वच्छतागृहासह सोसायटीचे कार्यालय असेल. बांधकाम करणा-या ठेकेदाराला तीन वर्षापर्यंत इमारत देखभाल - दुरूस्ती, पाच वर्षापर्यंत लिफ्टची आणि मैलाशुद्धीकरण केंद्राची देखभाल-दुरुस्ती करावी लागणार आहे.

20 May 2017

एमपीसी न्यूज - कर्नाटक राज्यातील सिंधूनगर नगरपरिषदेच्या पदाधिकारी, नगरसेवक आणि अधिका-यांनी पिंपरी-चिंचवड महापालिकेला भेट देऊन विविध विकास प्रकल्पांची माहिती जाणून घेतली.

महापालिकेचे कार्यकारी अभियंता प्रवीण लडकत यांनी या शिष्टमंडळाचे स्वागत केले. या अभ्यास दौ-यातील सदस्यांनी निगडी येथील जलशुद्धी केंद्र (स्काडा प्रकल्प), आकुर्डी येथील मैलाशुद्धीकरण केंद्र तसेच मोशी येथील घनकचरा व्यवस्थापन प्रकल्पांना भेट देऊन तेथील माहिती जाणून घेतली.

या अभ्यास दौ-यामाध्ये सिंधुनगर नगरपरिषदेच्या अध्यक्षा मंजुळा पाटील,  उपाध्यक्षा अन्वर बेगम, स्थायी समिती सभापती नबी साहेब, नगरसेवक व्यंकटेश, जफरअली जागीरदार, के. मरीयप्पा, सय्यद हाजीमस्तान, चंद्रशेखर सिदप्पा, शारदा जगदीश, अनिथा सिद्ररमेश, प्रभूराज मनोहर स्वामी, अयेशा बेगम ननुसा, पी.एस.वेराभद्रप्पा विरण्णा, हुसेनबी मोसीन साहब, यथामरी, कैसरंबेगम अलीसाब, सुमंगल मलिकार्जून गौडा, आशाबी अब्दुल सत्तार, मुबारक बेगम, श्रेरनाबसवा एन. पाटील, एम मेहबूब रशिदा महमदअली, मल्लाकाअर्जुन पाटील, अहमद इकबाल, लक्ष्मी रमेश के, नगप्पा यंकप्पा गयनप्पा, एस नरसप्पा, महमद शकुदिन नवाब, बसवराज नादगौडा, शेखरप्पा गिनीवर तसेच स्वीकृत सदस्य अहेमद खान, विजय कुमार, शिवकुमार जावली, वेकोंब बंगी, नवीन छाजद, कार्यकारी अभियंता जी. प्रभूशंकर, शामला, एच.आर. मुरलीधर, गिरीष नाईक, शरण बसवरात गुरुप्रसाद, कार्यालय अधिकारी जि.के. पाटील, सी.नागराज, शांता मुथैया, उमेश, विरपाक्षी,शंकरप्पा, सुनील गिरद्दी यांचा समावेश होता.

20 May 2017

एमपीसी न्यूज - नागरिकांनी वाहन चालविताना मोबाईलवर बोलू नये तसेच वाहतुकीचे नियम पाळावे याबाबत जनजागृती करण्यासाठी वाहतूक पोलीस व लायन्सक्लब ऑफ पुणे स्मार्ट सिटी यांच्या संयुक्त विद्यमाने यमराजासोबत सेल्फी हा अनोखा कार्यक्रम घेण्यात आला. हा कार्यक्रम आज (शनिवार) अलका टॉकीज चौक येथे सकाळी दहा ते दुपारी बाराच्या दरम्यान पार पडला.

कार्यक्रमात वाहतूक परिमंडळ एकच्या सहाय्यक पोलीस आयुक्त जयश्री गायकवाड, पोलीस निरीक्षक विवेकानंद खरे, व्ही.व्ही. बाजारे, सहाय्यक पोलीस निरीक्षक महेशकुमार सरतापे, पाटील तसेच लायन्स क्लब ऑफ पुणे स्मार्ट सिटी संस्थापक अध्यक्ष अॅड डोंगरे, माळवदे, पळीवाले, खैरे, मोहळ आदी सहभागी झाले होते.

वाहतूक नियमांचे उल्लंघन करणा-या चालकांना यावेळी दस्तूर खुद्द यमराज व चित्रगुप्त यांनीच नियमांचे महत्व सांगितले. तसेच त्यांच्याकडून नियम पाळण्याचे आश्वासनही घेतले. यावेळी यमराज व चित्रगुप्त यांनी चालकांसोबत सेल्फी घेतले. यावेळी वाहनचालकांनी वाहन चालवताना मोबाईलवर बोलू नये याकरिता प्रबोधन करण्यात आले. तसेच नियम पाळणा-या चालकांचे गुलाबपुष्प देऊन स्वागत करण्यात आले.

या अनोख्या कार्यक्रमात अप्पा लवांदे यांनी यमराजाची तर सोमेश सपाटापाटील यांनी चित्रगुप्तची भूमिका साकारली. हा कार्यक्रम शहरात अपघातात घट होण्यासाठी व नागरिकांनी वाहतुकीचे नियम पाळावे हा संदेश देण्याकरिता राबविण्यात आला. 

या अभियानाला पुणे पोलीस आयुक्त रश्मी शुक्ला, सहपोलीस आयुक्त रवींद्र कदम, पोलीस उपायुक्त वाहतूक अशोक मोराळे यांचे मार्गदर्शन मिळाले.  

20 May 2017

एमपीसी न्यूज - हजेरी लावण्यासाठी लाच स्वीकारल्या प्रकरणी पिंपरी-चिंचवड महापालिकेच्या सहाय्यक आरोग्य निरीक्षकावर आज (शनिवारी) निलंबनाची कारवाई करण्यात आली आहे. तसेच त्याची खातेनिहाय चौकशी करण्याचे आदेश आयुक्त श्रावण हर्डीकर यांनी दिले आहेत.

तानाजी होनाजी दाते (रा. काकडे पार्क, तानाजीनगर, चिंचवड), असे निलंबित केलेल्या सहाय्यक आरोग्य निरीक्षकाचे नाव आहे.

दाते हे महापालिकेच्या भोसरी येथे असणा-या 'इ' प्रभागात सहाय्यक आरोग्य निरीक्षक पदावर कार्यरत आहेत. आरोग्य विभागातील कर्मचा-याची हजेरी लावण्यासाठी संबंधित कर्मचा-याकडून दहा हजार रुपयांची लाच घेतना लाच लूचपत प्रतिबंधक पथकाने (एसीबीने) दाते याला शनिवारी (दि.13) महापालिकेच्या प्रवेशद्वारसमोर रंगेहाथ पकडले होते. 

महाराष्ट्र महापालिका अधिनियमातील कलम 56 (1) व 56 (2) (फ) मधील तरतूदींच्या अधिन महाराष्ट्र नागरी सेवा (शिस्त व अपिल) नियम 1979 च्या नियम 4 (1) (अ) व (क) मधील तरतूदीनुसार सहाय्यक आरोग्य निरीक्षक तानाजी दाते याला अटकेच्या दिनांकापासून निलंबित करण्यात आले आहे. तसेच त्यांची खातेनिहाय चौकशी करण्याचे आदेश आयुक्त श्रावण हर्डीकर यांनी दिले आहेत. निलंबन काळात दाते याला अटी शर्तींच्या अधीन निर्वाह भत्ता देण्यात येणार आहे.

20 May 2017

एमपीसी न्यूज - पिंपरी-चिंचवड महापालिकेच्या अतिक्रमण विभागाने चिखली, जाधववाडी परिसरातील अनधिकृत पत्राशेडवर शनिवारी (दि.20) हातोडा चालविला. 

'फ' क्षेत्रिय कार्यालया अंतर्गत प्रभाग क्रमांक 5 चिखली, जाधवाडी परिसरात अनधिकृत पत्राशेड होते. गट नंबर 596 जाधववाडी चिखली येथील सरपंचवस्ती येथील 12 गाळ्यांचे पत्राशेड बांधकामावर (क्षेत्रफळ अंदाजे 1000 चौरस मीटर आणि गट नंबर 244 जाधववाडी चिखली येथील 16 गाळ्यांचे पत्राशेड (क्षेत्रफळ अंदाजे 4320 चौरस मीटर) जमीनदोस्त करण्यात आले.

कार्यकारी अभियंता पी.पी. पाटील यांच्या मार्गदर्शनाखाली उपअभियंता, कनिष्ठ अभियंता व बीट निरीक्षक यांचे सोबत महापालिका अतिक्रमण पथकातील पोलिस उपनिरीक्षक, पोलिस कर्मचारी आणि दोन जेसीबी, दोन डंपर, महापालिका कर्मचारी व 10 मजुरांच्या साहाय्याने ही कारवाई करण्यात आली.

Page 2 of 127
Open Chat
1
Close chat
Hello! Thanks for visiting us. Please press Start button to chat with our support :)

Start