• 1.JPG
  • PhotoGraphy-School-1.jpg
  • punenews.jpg
20 May 2017

एमपीसी न्यूज - पुण्याचे सूपुत्र किशोर धनकुडे यांनी आज (शनिवारी) सकाळी साडेसहा वाजता दुस-यांदा जगातील सर्वोच्च एव्हरेस्ट शिखर सर केले. 2014 मध्ये त्यांनी उत्तर म्हणजेच चीनच्या दिशेने एव्हरेस्ट सर केले आणि यावर्षी दक्षिण म्हणजेच नेपाळच्या दिशेने एव्हरेस्ट सर केले. अशा प्रकारे दोन्ही बाजूंनी एव्हरेस्ट शिखर सर करणारे महाराष्ट्रात पहिलेच ठरले आहेत.

स्वभावाने धाडसी आणि जिद्दी असणा-या किशोर यांनी 15 मे रोजी एव्हरेस्टच्या बेस कॅम्पपासून सुरुवात केली. कुम्बू ग्लेशिअर, आईसफॉल यांसारखे अडथळे त्यांनी पार केले आणि डेथझोन गाठला. या डेथझोनवर ऑक्सिजन अत्यल्प असतो तर वारे प्रचंड वेगात वाहत असते. डेथझोनवरील वारे साधारणतः 200 ते 250 किलोमीटर प्रति तास एवढ्या वेगाने वाहत असते. अशा वातावरणातून निभावून जाणे म्हणजे अत्यंत जोखमीचे काम. ही जोखीमही त्यांनी पार करत आज सकाळी साडेसहा वाजता एव्हरेस्ट या जगातील सर्वात उंच शिखरावरील सर्वात उंच ठिकाण गाठले.

पिंपरी-चिंचवड माउंटेरिंग असोसिएशनने किशोर धनकुडे यांना काही तांत्रिक बाबींसाठी मदत केली आहे. 2014 साली पहिल्यांदा एव्हरेस्टच्या उत्तर दिशेने सर केले. लगेच दुस-या वर्षी दक्षिण दिशेने एव्हरेस्ट सर करण्याचा किशोर यांचा विचार होता, परंतु 2015 मध्ये एव्हरेस्टच्या भागात भूकंप आणि नैसर्गिक आपत्तीमुळे नेपाळ सरकारने एव्हरेस्टच्या चढाईवर बंदी आणली. त्यामुळे किशोर यांना आपली इच्छा दाबून ठेवावी लागली. परंतु यावर्षी तिला मूर्त रूप देता आल्याने धनकुडे परिवारात आनंदाचे वातावरण पसरले आहे.

महाविद्यालयात असतानाच त्यांना ट्रेकिंगची आवड होती. शिक्षण पूर्ण केल्यानंतर व्यवसायामुळे आवडीसाठी ते वेळ देऊ शकत नव्हते. परंतु आवड आणि जिद्द स्वस्थ बसू देत नसल्याने त्यांनी धनकुडे कन्स्ट्रक्शनचा व्यवसाय थांबवून आवड जोपासण्याचा निर्णय घेतला. मागील वर्षी दक्षिण अफ्रिका येथे झालेल्या कॉमरेड्स मॅरेथॉनमध्ये त्यांनी ब्राँझ पदक मिळविले आहे. यंदा 7 जून रोजी ही मॅरेथॉन होणार असून त्यातही किशोर सहभागी होणार आहेत. त्यामुळे एव्हरेस्ट सर केल्यानंतर देखील न थकता आणि न थांबता ते मॅरेथॉन धावणार आहेत. तसेच त्यांनी आपला 42 वा वाढदिवस 42 वेळा सिंहगड किल्ला चढून साजरा केल्याचे त्यांच्या पत्नी नूतन धनकुडे सांगतात.

20 May 2017

एमपीसी न्यूज - पिंपरी-चिंचवड महापालिकेच्या अंदाजपत्रकाची प्रभावी आणि शंभर टक्के अंमलबजावणी व्हावी, यासाठी अधिका-यांनी प्रयत्न करावेत. तसेच होणा-या कामांनाच प्राधान्य देण्याचे आणि कामांची निविदा प्रक्रिया 30 जूनपूर्वी पूर्ण करण्याच्या सूचना स्थायी समितीच्या अध्यक्षा सीमा सावळे यांनी अधिका-यांना दिल्या आहेत.  

महापालिकेचे अंदाजपत्रक दरवर्षी तयार केले जाते. त्यामध्ये विविध विकासकामांची तरतूद असते. मात्र, अंदाजपत्रकात उल्लेख असलेली सर्वच विकासकामे मार्गी लावली जात नाहीत. दरवर्षी 40 टक्के अंदाजपत्रक अखर्चिक राहते. अंदाजपत्रकात कामांची तरतूद करूनही नियोजनाअभावी ती मार्गी लागत नसल्याचे चित्र आहे.

महापालिकेत निवडून आलेल्या नगरसेवकांपैकी बहुतांश नगरसेवक नवीन आहेत. या नवीन नगरसेवकांना आपल्या प्रभागातील कोणत्या कामांचा अंदाजपत्रकात समावेश करण्यात आला आहे, याची पूर्ण माहिती व्हावी यासाठी सहा क्षेत्रीय कार्यालयनिहाय सर्वपक्षीय नगरसेवक आणि अधिका-यांची बैठक सावळे यांनी घेतली.

प्रभागाच्या सर्व नगरसेवकांना विश्वासात घेऊन त्यांच्या प्रभागासाठी अंदाजपत्रकात तरतूद रक्कम शंभर टक्के खर्ची टाकण्याचे नियोजन अधिका-यांनी  करावे. तसेच अंदाजपत्रक शंभर टक्के खर्ची पडावे, यासाठी कामांच्या निविदांचे नियोजन होणे आवश्यक आहे. त्यामुळे निविदा काढण्याचे तातडीने नियोजन करावे. सर्व कामांची निविदा प्रक्रिया 30 जूनपूर्वी पूर्ण करण्यात याव्यात, अशा सूचना सावळे यांनी केल्या आहेत.

20 May 2017

एमपीसी न्यूज - भाजप हा इतर राजकीय पक्षापेक्षा वेगळा पक्ष आहे. आपल्या पक्षाला निश्चित वैचारिक बैठक आहे. सत्ता हे समाज परिवर्तनाचे साधन आहे, असे मत भाजपचे शहराध्यक्ष व आमदार लक्ष्मण जगताप यांनी व्यक्त केले.

पिंपरी येथे विस्तारक योजनेसंदर्भात नगरसेवकांच्या आयोजित बैठकीत ते बोलत होते. यावेळी गटनेते एकनाथ पवार, सरचिटणीस प्रमोद निसळ आदी पदाधिकारी उपस्थित होते.

भाजपची जिथे ताकद कमी आहे. त्या ठिकाणी आणि सरकारच्या निर्णयांची माहिती देण्यासाठी पक्षाने पंडित दीनदयाळ उपाध्याय विस्तारक योजना सुरू केली आहे. त्याअंतर्गत पिंपरी महापालिकेतील भाजपचे सर्व पदाधिकारी, नगरसेवक 26 मे ते 10 जून दरम्यान विस्तारक म्हणून कार्य करणार आहेत.

या योजनेअंतर्गत अनुप मोरे यांची पिंपरी विधानसभा, राजू दुर्गे यांची भोसरी विधानसभा आणि अरुण पवार यांची चिंचवड विधानसभा मतदार संघाचे पालक म्हणून नियुक्ती करण्यात आली आहे. भाजपचे पालिकेतील पदाधिकारी, सर्व नगरसेवक व पक्षाचे 300 पदाधिकारी 26 मे ते 10 जून या काळात पूर्ण वेळ विस्तारक म्हणून काम करणार आहेत.

20 May 2017
एमपीसी न्यूज - पिंपरी-चिंचवड शहराच्या मध्यभागातून जाणा-या जुन्या पुणे-मुंबई महामार्गासह पालखी मार्गावरील सर्व दारू दुकाने पुन्हा एकदा सुरू करण्यासाठी पालिका प्रशासन प्रयत्नशिल होते. दारू विक्रेत्यांच्या दबावापुढे झुकत तत्कालीन आयुक्त दिनेश वाघमारे यांनी राष्ट्रीय मार्ग - महामार्गाचे वर्गीकरण महापालिका हद्दीत करण्याचे मनसुभे रचले होते. त्याबाबतचा प्रस्ताव महासभेपुढे सादरही केला होती. परंतु, विविध स्तरातून होणारी टीका, आरोपानंतर नवनियुक्त आयुक्त श्रावण हर्डीकर यांनी  रस्ते वर्गीकरणाचा विषय मागे घेतला आहे.
 
रस्ते वर्गीकरणाचा विषय तत्कालीन आयुक्त दिनेश वाघमारे यांनी सर्वसाधारण सभेसमोर ठेवला होता. एप्रिल महिन्यातील सभेत सत्तारुढ पक्षाने हा विषय तहकूब ठेवला होता. त्यानंतर मे महिन्याच्या विषयपत्रिकेवर विषय आला होता. हा विषय मागे घेतल्याचे प्रशासनाने सांगितले.
 
पुणे - मुंबई रस्ता (दापोडी ते निगडी), औंध-रावेत रस्ता (मुकाई चौक ते राजीव गांधी पूल) देहू-आळंदी रस्ता आणि दिघी-आळंदी रस्ता हे महापालिका हद्दीतून जाणारे राष्ट्रीय-राज्य महामार्ग आहेत. यांची देखभाल - दुरुस्ती, विकसन आणि सुधारणा कामे महापालिकेमार्फत करण्यात येतात.
 
सार्वजनिक बांधकाम विभागाने 7मार्च 2017 रोजी हे रस्ते महापालिकेकडे हस्तांतरीत केले आहेत. तर, नाशिक फाटा ते मोशी रस्ता आणि किवळे - मामुर्डी ते वाकड येथील मुळा नदीवरील पूलापर्यंतचा रस्ता (पश्चिम बाह्यवळण मार्ग) हे दोन राष्ट्रीय महामार्ग महापालिकेकडे हस्तांतरित केले नाहीत.
 
सर्वोच्च न्यायालयाने राष्ट्रीय आणि राज्य महामार्गालगत 500 मिटरच्या आत दारू विक्रीला मनाई केली आहे. या पार्श्वभूमीवर सार्वजनिक बांधकाम विभागाने तत्परतेने पुणे-मुंबई रस्ता, औंध-रावेत रस्ता हे दोन राष्ट्रीय महामार्ग, देहू ते आळंदी रस्ता आणि दिघी ते आळंदी रस्ता हे दोन राज्यमार्ग महापालिकेकडे हस्तांतरित केले आहेत.
 
नाशिक फाटा ते मोशी इंद्रायणी नदीपर्यंतचा रस्ता व किवळे मामुर्डी ते वाकड मुळा नदीवरील पुलापर्यतचा रस्ता (पश्चिम बाह्य वळण मार्ग) हे दोन रस्ते हस्तांतरीत करणेबाबतचा प्रस्ताव प्रशासनाने तयार केला होता. या प्रस्तावारुन विविध स्तरातून पालिका प्रशासानावर टीका, आरोप होत होते. नाशिकफाटा ते मोशी इंद्रायणी नदीपर्यंतचा रस्ता राष्ट्रीय महामार्ग प्राधिकरणाच्या (एनएचए) ताब्यात आहे. तथापि, हा रस्ता पिंपरी- चिंचवड महापालिकेच्या ताब्यात घेण्याचा प्रस्ताव महापालिका सभेसमोर आहे.
 
महामार्गाच्या दुतर्फा सुरु असलेली दारू दुकाने पुर्ववत सुरु करण्यासाठी हा खटाटोप सुरु आहे. महामार्ग वर्गीकरणाच्या प्रस्तावास शिवसेनेचा विरोध असून महापालिकेने नाशिकफाटा ते मोशी इंद्रायणी नदीपर्यंतचा रस्ता कदापी वर्गीकृत करु नये, अशी मागणी शिवसेना खासदार शिवाजीराव आढळराव पाटील यांनी केली होती. तसेच  शिवसेनेचे माजी नगरसेवक मारुती भापकर, मानव कांबळे यांनीही  हा विषय फेटाळण्याची  मागणी केली होती.
20 May 2017
एमपीसी न्यूज - पिंपरी-चिंचवड नवनगर विकास प्राधिकरणाच्या अतिक्रमण विभागाने आज (शनिवारी) सकाळी काळेवाडी, रहाटणी परिसरातील रिंग रोडवरील अनधिकृत बांधकामावर धडक कारवाई सुरु केली आहे.
 
प्राधिकरणाने रस्ते मोकळे करण्याचे धोरण हाती घेतले आहे. त्याअंतर्गत ही कारवाई सुरु आहे. काळेवाडी, रहाटणी परिसरात प्राधिकरणाच्या रिंग रोडवर मोठ्या प्रमाणात अनधिकृत बांधकाम झाले आहेत. त्यामध्ये रहिवाशी घरे, शाळा, दुकाने, गोडावून आहेत.
 
रहाटणी येथील सर्व्हे नंबर 25 फेज 1 येथून शनिवारी सकाळी नऊ वाजल्यापासून कडक पोलीस बंदोबस्तात रिंग रोडवरील अनधिकृत बांधकामे पाडण्यास सुरुवात केली असल्याचे, प्राधिकरणाचे उपअभियंता वंसत नाईक यांनी 'एमपीसी न्यूज'शी बोलताना सांगितले.
 
तीन पोकलेन, दोन जेसीबी, प्राधिकरणाचे पोलीस, वाकड ठाण्याचे पोलीस यांच्या सहकार्याने ही कारवाई सुरु आहे. प्राधिकरणाचे मुख्य कार्यकारी अधिकारी सतिश खडके, उपमुख्यकार्यकारी अधिकारी अहिरराव यांच्या मार्गदर्शनाखाली उपअभियंता वंसत नाईक यांचे पथक ही कारवाई करत आहे
 
 
20 May 2017
एमपीसी न्यूज - पिंपरी-चिंचवड महापालिका शिक्षण मंडळाचे सन 2017-18 चे सुमारे 151 कोटी रुपयांचे अंदाजपत्रक महापालिका सभेने लांबणीवर टाकले आहे. जून महिन्यात शिक्षण मंडळ बरखास्त होणार आहे. त्यामुळे मंडळाचे हे अखेरचे अंदाजपत्रक होते. परंतु, महासभेने ते लांबणीवर टाकले आहे.
 
या अंदाजपत्रकाला आयुक्तांनी सुचविलेल्या कपाती नाकारुन स्थायी समितीने शिक्षण मंडळ सदस्यांनी मांडलेले अंदाजपत्रक मंजुरीसाठी सर्वसाधारण सभेसमोर मांडले होते. महापालिका स्वहिस्सा सुमारे 105 कोटी रुपये देणार आहे. तर, एक लाख रुपये शिलकीचे बजेट आहे. महापालिका निवडणुकीपूर्वी हे अंदाजपत्रक सादर केले होते.
 
शिक्षण मंडळाने सुमारे 151 कोटी रुपयांचे अंदाजपत्रक सादर केले होते. त्यामध्ये आयुक्तांनी सुमारे 25 कोटी रुपयांची कपात करत 125 कोटी रुपयांच्या बजेटला मंजुरी दिली होती. तथापी, स्थायी समितीने आयुक्तांचे बजेट नाकारत शिक्षण मंडळाने सुचविलेले अंदाजपत्रकच अंतिम केले आहे. सर्वसाधारण सभेसमोर मंजुरीसाठी अंदाजपत्रक ठेवले होते. परंतु, महासभेने हा विषय तहकूब ठेवला आहे.
 
या अंदाजपत्रकात धन्वंतरी योजनेसाठी 1 कोटी 50 लाख, विद्यार्थी गणवेश 72 लाख 50 हजार, पी.टी गणवेश 52 लाख, खेळ शाळा गणवेश 28 लाख, स्काउऊटगाईड गणवेश 5 लाख, स्वेटर खरेदी 2 कोटी 20 लाख, विद्यार्थी पादत्राणे व मोजे 1 कोटी 15 लाख, विद्यार्थी पी.टी. शुज 85 लाख, विद्यार्थी दप्तरे व पाट्या 80 लाख, पावसाळी साधने 1 कोटी 55 लाख, शालेय साहित्य 95 लाख, आधुनिक फळे 15 लाख, क्रीडा साहित्य 15 लाख, वॉटर बॉटल 45 लाख, टॅब खरेदी व प्रशिक्षण 50 लाख, फिल्टर 50 लाख, सीसीटीव्ही कॅमेरे 1 कोटी सर्वांगीण शैक्षणिक गुणवत्ता व विकास 70 लाख, व्यवसाय स्वाध्यायमाला 1 कोटी,  ई-लर्निंग स्कूल 2 कोटी, विजरोधक यंत्रणा 25 लाख, आगरोधक यंत्रणा 50 लाख, मोठी कचरा पेटी 20 लाख आदींचा प्रामुख्याने अंदाजपत्रकात समावेश आहे.
 
शिक्षण मंडळाचे सभापती, उपसभापतींसह सर्व सदस्य राष्ट्रवादी, काँग्रेसचे आहेत. महापालिकेत सत्तांतर होवून भाजपची सत्ता आली आहे. जून महिन्यात शिक्षण मंडळाची मुदत संपणार असून शिक्षण समिती अस्तित्वात येणार आहे. त्यामुळे शिक्षण समिती अस्तित्वात येईपर्यंत सत्ताधा-यांनी अंदाजपत्रक लांबणीवर टाकला आहे.
 
याबाबत बोलताना शिक्षण मंडळाचे सभापती निवृत्ती शिंदे म्हणाले, शिक्षण मंडळ आणि शिक्षण समितीच्या विषयामध्ये गोरगरिब विद्यार्थी त्यांना मिळणा-या सवलीतींपासून वंचित राहू नयेत. जून महिन्यात मंडळाची मुदत संपणार आहे. सत्ताधा-यांनी समितीची स्थापना करावी. कायद्याने होणा-या निर्णयाला शिक्षण मंडळाचा पाठिंबाच असणार आहे. समिती स्थापन झाल्यावर शिक्षण मंडळाचे जे काही अधिकार आहेत, ते लगेच हस्तांतरित केले जातील.
20 May 2017
पाणी द्यायचे असेल तर कायमस्वरुपी व मोफत द्या
 
एमपीसी न्यूज - पिंपरी-चिंचवड शहरात पाण्याची मोठी समस्या निर्माण झाली आहे. शहराच्या अनेक भागात पाणी कमी दाबाने येत आहे. शहरात पाणी पुरवठ्याचा प्रश्न गंभीर बनला आहे. शहरात पाणी कपात करुन आळंदीला पाणी कशासाठी देण्यात आले?, असे सवाल नगरसेवकांनी उपस्थित केले. तसेच आळंदीला पाणी देण्यास विरोध नाही. परंतु, शहरातील पाणी पुरवठा सुरळीत करा. पाणी द्यायचे असेल तर कायमस्वरुपी आणि मोफत द्या, असेही नगरसेवक म्हणाले.
 
तिर्थ क्षेत्र आळंदीला सोमवारपासून  (दि. 15) पिंपरी-चिंचवड महापालिकेने दिवसाआड दोन लाख लीटर पाणी देण्यास सुरुवात केली आहे. त्यासाठी एक हजार लिटरला अडीच रुपये दराने शुल्क आकारण्यात येणार आहे. या विषयाला कार्योत्तर मान्यता देण्याचा विषय सर्वसाधारण सभेसमोर ठेवण्यात आला होता.
 
या विषयावर चर्चेला सुरुवात करताना  नगरसेवक दत्ता साने म्हणाले, आळंदीकरांना पाणी देणे गरजेचे आहे. परंतु, पिंपरी-चिंचवड शहरातील पाणीपुरवठा अगोदर सुरळीत करणे गरजेचे आहे. शहरात पाण्याचा प्रश्न गंभीर बनला आहे. अनेक भागात पाणी कमी दाबाने येत आहे. शहरातील पाणी पुरवठा सुरळीत केल्यानंतरच आळंदीला पाणी देण्यात यावे. आळंदीला पाणी देण्यास आमचा विरोध नाही. एक महिना पाणी देऊन त्यांना आशा लावू नका. कायमस्वरुपी पाणी देण्यासाठी प्रयत्न करा, असेही साने म्हणाले.
 
माजी महापौर व ज्येष्ठ नगरसेविका मंगला कदम म्हणाल्या, पवना धरणात पाणीसाठा मुबलक आहे. जुन महिना जवळ आला आहे. तरीही, पाणी कपात केली आहे. एकदिवसाआड शहराला पाणीपुरवठा केला जात आहे. शहराच्या अनेक भागात कमी दाबाने पाणीपुरवठा होत आहे. त्यामुळे नागरिक त्रस्त आहेत.  जेवढे पाणी देणार आहेत, तेवढे अधिक दाबाने पाणी दिले पाहिजे.
 
आळंदीला दरवर्षी पिंपरी महापालिका पाणी देत आहेत. तसेच आळंदीला पाणी देण्यास राष्ट्रवादीचा विरोध नसल्याचेही त्या म्हणाल्या. वर्तमानपत्रातून टँकर लॉबीचा बातम्या वाचयला मिळत असून त्याचे काय गौडबंगाल आहे, ते पारदर्शक कारभार करणा-यांनी बघून घ्यावे, अशी टिप्पणीही त्यांनी केली. 
 
विरोधी पक्षनेते योगेश बहल म्हणाले की, आळंदीकरांकडून पाण्यासाठी पैसे घेणे योग्य नाही. त्यांनी मोफत पाणी दिली पाहिजे.
20 May 2017

मुंबई-पुणे एक्सप्रेस वेवर टँकर मधून आँईल सांडल्याने पुण्याकडे जाणार्‍या मार्गावर मोठी वाहतुक कोंडी झाली होती. आज सकाळी सव्वानऊच्या सुमारास खंडाळा घाटातील अमृतांजन पूल परिसरात ही घटना घडली.

 
मिळालेल्या माहितीनुसार मुंबईहून पुण्याच्या दिशेने जाणार्‍या एका टँकर मधून खंडाळा घाटातील अमृतांजन पुल दरम्यान मोठ्या प्रमाणात आँईल रस्त्यावर सांडले होते.
 
सुरक्षेच्या कारणास्तव काही काळ वाहतुक रोखून धरण्यात आली होती. यामुळे मार्गावर  4 ते 5 किलोमीटर अंतरावर वाहनांच्या रांगा लागल्या होत्या. घटनेची माहिती समजताच घटनास्थळी दाखल झालेले आयआरबीचे कर्मचारी यांनी रस्त्यावरील ऑइल हटविण्याचे काम तसेच आँईलवर माती व भुस्सा टाकण्याचे काम युद्ध पातळीवर करत साडेदहाच्या सुमारास वाहतुक पुर्ववत केली.
 
आज शनिवार असल्याने सकाळपासूनच एक्सप्रेस वेवर पुण्याच्या दिशेने येणार्‍या वाहनांची संख्या जास्त असल्याने वाहतुक संथ असताना ही वाहतुक कोंडी झाल्याने नागरिकांचे हाल झाले.

 

20 May 2017

एमपीसी न्यूज - पुणे शहराचे उपमहापौर नवनाथजी कांबळे यांच्या निधनामुळे स्वारगेट येथील कै. केशवराव जेधे चौकातील हडपसरकडून सारसबाग़कडे जाणाया ग्रेड सेपरेटर मार्गाचे अनौपचारिक उदघाटन पालकमंत्री गिरीश बापट यांच्या हस्ते काल (शुक्रवारी) करण्यात आले.यामुळे गेल्या कित्येक दिवसापासून उद्घाटनाच्या प्रतिक्षेत असलेल्या या ग्रेड सेपरेटर प्रवाशासाठी खुला करण्यात आल्याने स्वारगेट चौकातील वाहतूक कोंडी दुर होण्यास मदत होणार आहे.

 


यावेळी महापौर मुक्ता टिळक, सभागृह नेते श्रीनाथ भिमाले, आमदार माधुरी मिसाळ, आधिकारी आणि नगरसेवक उपस्थित होते.

स्वारगेट चौका जवळील आयकर भवन ते सारसबाग़ येथील धम्म विपश्यना केंद्रापर्यंत ग्रेड सेपरेटर करण्यात आला असून 445 मीटर लांबीचा हा रस्ता आहे. या कामास 20 कोटी रुपयांचा खर्च आला आहे. तसेच या मार्गावर पावसाळयामध्ये पाणी साचता कामा नये.याची विशेष दक्षता घेण्यात आली असून या पार्श्वभूमीवर पावसाळी लाईन टाकण्यात आली आहे.

पुणे शहरातील नागरिकांना स्वारगेट चौकातील ग्रेड सेपरेटर सुरु झाल्याने निश्चित आनंद झाला असून स्वारगेट एस टी स्थानकातील बसमुळे चौकात गर्दी होत होती. याचा फटका सर्व सामान्य प्रवासी वर्गाला बसला होता.मात्र आता ग्रेड सेपरेटर मुळे हडपसरच्या दिशेने येणाया वाहन चालकांना प्रवास आधिक सुखकर आणि वाहतूक कोंडी मुक्त झाला आहे.

19 May 2017

निविदा प्रक्रियेची होणार चौकशी

एमपीसी न्यूज - सुभद्राज् एज्युकेशन सोसायटीला पिंपरी-चिंचवड महापालिकेच्या ताब्यातील 4754 चौरस मीटर जागा 30 वर्षासाठी भाड्याने देण्याचा विषय सर्वसाधारण सभेने दप्तरी दाखल केला आहे.

महापालिकेच्या विकास योजनेतील आरक्षण क्रमांक 1/ 33 यामध्ये शाळेचे 1800 चौरस मीटर आरक्षण आहे. या क्षेत्रापैकी 4754 चौरस मीटर क्षेत्र हे पालिकेने ताब्यात घेतले आहे. उर्वरीत क्षेत्राचा ताबा सुभद्राज् एज्युकेशन सोसायटीकडे आहे. आरक्षण संपूर्ण क्षेत्र माध्यमिक शाळा आरक्षण तरतुदीन्वये विकसित करण्यासाठी पालिकेच्या ताब्यातील 4754 चौरस मीटर जागा दोन कोटी 52 लाख 74 हजार रुपयाच्या भाड्याने 30 वर्षांसाठी देण्याचा विषय होता.

हा विषय अपूर्ण माहितीच्या आधारे आणला आहे. त्यामुळे तो फेटाळण्याची मागणी नगरसेविका प्रियंका बारसे यांनी केली. नगरसेवक राहुल जाधव यांनी हा विषय कायमचा फेटाळण्याची मागणी केली.

 

विरोधी पक्षनेते योगेश बहल म्हणाले, साधक-बाधक चर्चा करून हा विषय सर्वसाधारण सभेसमोर आला आहे. सुभद्राज् एज्युकेशन सोसायटीचे आम्हाला काही देणे घेणे नाही. महापालिका शाळेची अवस्था दयनीय आहे. त्यामुळे इंग्रजी माध्यमांच्या शाळांची गरज आहे. त्या जागेचे दोन तुकडे झाले आहेत. 80 टक्के जागा खासगी झाली असून 20 टक्के जागा महापालिकेकडे राहिली आहे. त्यामुळे याबाबत चर्चा करून निर्णय घेण्यात यावा.

 

सत्तारूढ पक्षनेते एकनाथ पवार म्हणाले, महापालिकेतील विद्यार्थ्यांना चांगले शिक्षण मिळाले पाहिजे. पालिकेच्या शाळेतच इंग्रजी माध्यमाच्या शाळा सुरू करणे गरजेचे होते. हा विषय 6 ऑगस्ट 2016 पासून तहकूब केला जात आहे. एखादा विषय एवढे दिवस तहकूब का केला जातो याचा विचार करणे गरजेचे आहे. या निविदा प्रक्रियेत घोळ झाला आहे. त्यामुळे हा विषय दप्तरी दाखल करण्याची सूचना केली. तसेच निविदा प्रक्रियेची आणि निविदेत घोळ करणा-या अधिका-यांची चौकशी करावी, असेही ते म्हणाले.

महापौर काळजे यांनी या प्रकरणाची सखोल चौकशी करण्याचे आदेश प्रशासनाला दिले आणि विषय दप्तरी दाखल केला.

Page 3 of 127
Open Chat
1
Close chat
Hello! Thanks for visiting us. Please press Start button to chat with our support :)

Start