• 01.jpg
  • 1250x200.jpg
  • MPC_news.JPG
  • PhotoGraphy-School-1.jpg
  • sujit.JPG
21 Jun 2017

एमपीसी न्यूज - चिंचवड येथील चापेकर स्मारक समिती, सोहम योग साधना, आपले चिंचवड व्यासपीठ यांच्या संयुक्त विद्यमाने आज (बुधवारी) आंतरराष्ट्रीय योग दिनानिमित्त आयोजित योग प्रशिक्षण कार्यक्रमाला नागरिकांचा भरघोस प्रतिसाद मिळाला.  यामध्ये चिंचवड गाव येथील सुमारे 350 साधक सहभागी झाले होते.

चापेकर वाडा येथे सकाळी सहा ते सात या कालावधीत या कार्यक्रमाचे आयोजन करण्यात आले होते. याप्रसंगी उपस्थितांना योग शिक्षक दिगंबर उचगावकर, अनुजा उचगावकर यांनी  योगाचे धडे दिले. यावेळी राष्ट्रीय स्वंयसेवक संघाचे संदीप जाधव, पिंपरी-चिंचवड महापालिकेचे  सत्तारुढ पक्षनेते एकनाथ पवार, आपले चिंचवड व्यासपीठचे अध्यक्ष गजानन चिंचवडे, क्रांतीवीर चापेकर समितीचे अध्यक्ष गिरीश प्रभुणे, कार्यवाहक अॅड. सतिश गोरडे, सहकार्यवाहक रवी नामदे, सदस्य नितीन बारणे आदी उपस्थित होते.

यावेळी उचगावकर यांनी पुरक हालचालीमध्ये ताडासन, अर्धचक्रासन, त्रिकोणासन, बैठक स्थितीमध्ये भद्रासन, शेषांकासन, वक्रासन, विपरीतशय स्थितीत मकरासन, भुजंगासन, पवनमुक्तासन,  शवासन, प्राणायाममध्ये कपालभारती, ब्राम्हरी प्राणायाम, ध्यान आदी प्रकार घेतले. यावेळी 350 साधकांनी याचा लाभ घेतला. यावेळी उचगावकर यांनी योगाची माहिती व फायदे उपस्थितांना सांगितले.

तर संदीप जाधव यांनी आपले मतव्यक्त करताना म्हटले की, योग ही भारताची प्राचीन संस्कृती आहे. त्यामुळे मानसिक व शारीरिक आरोग्य निट राहण्यास मदत होते. गेल्या तीन वर्षामध्ये पंतप्रधान नरेंद्र मोदी यांच्यामुळे ही कला व व्यायाम प्रकार जगभर परसला व त्याला प्रसिद्धी मिळाली, असेही जाधव यांनी सांगितले.

यावेळी कार्यक्रमाचे प्रास्ताविक सतिश गोरडे यांनी केले तर सूत्रसंचालन गजानन चिंचवडे यांनी केले. तसेच आभार रवी नामदे यांनी मानले.

chaphekar yoga din

21 Jun 2017


एमपीसी न्यूज - पिंपरी-चिंचवड महापालिकेच्या विधी समितीच्या रिक्त झालेल्या एका जागेवर  भाजपचे नगरसेवक सचिन चिंचवडे यांची निवड करण्यात आली. याबाबतची अधिकृत घोषणा महापौर नितीन काळजे यांनी मंगळवारी (दि.20) झालेल्या सर्वसाधारणत सभेत केली.

पिंपरी महापालिकेत पाच समित्या आहेत. स्थायी समिती, विधी, महिला व बालकल्याण, शहर सुधारणा, क्रीडा, कला, साहित्य व सांस्कृतिक या पाच समित्या आहेत. त्यापैकी स्थायी समितीवर 16 सदस्यांची निवड केली जाते. बाकीच्या समित्यांवर प्रत्येकी 9 नगरसेवक सदस्य म्हणून निवडले जातात. संख्याबळानूसार भाजप पाच, राष्ट्रवादी तीन आणि शिवसेनेच्या एका नगरसेवकाची निवड करण्यात आली आहे.

विधी समितीवर भाजपतर्फे शितल शिंदे यांची निवड करण्यात आली होती. परंतु, त्यांनी प्रभागात काम करण्यासाठी समिती सदस्यपदाचा स्वखुशीने राजीनामा दिला होता. त्यामुळे विधी समितीची एक जागा रिक्त होती. त्यांच्या जागी सचिन चिंचवडे यांची नियुक्ती करण्यात आली.

सचिन चिंचवडे यांच्या निवडीबद्दल महापौर काळजे यांच्या हस्ते पुष्पगुच्छ देऊन त्यांचे स्वागत करण्यात आले.

21 Jun 2017


एमपीसी न्यूज - पालखी सोहळ्यासाठी योग्य त्या व्यवस्था न केल्याच्या कारणावरून महापौर टिळक व प्रशासनाचा निषेध व्यक्त करत शिवसेना व काँग्रेसने आज (बुधवार) पुणे महापालिकेच्या सर्व साधारण सभेचा त्याग केला.

ज्ञानेश्वर महाराज आणि तुकाराम महाराजांच्या पालख्या पुण्यामध्ये मुक्कामाला असताना वारकऱ्यांच्या सोई सुविधेकडे दुर्लक्ष करण्यात आल्याचा प्रश्न शिवसेना गटनेते संजय भोसले यांनी मुख्यसभेत उपस्थित केला. यानंतर काँग्रेस, राष्टवादीच्या सभासदांनी देखील प्रशासनाचा निषेध व्यक्त करत वारक-यांना पिण्याच्या पाण्याची शौचालयाची, राहण्याची अत्यंत तोकडी व्यवस्था प्रशासनाने केली असल्याचे निदर्शनास आणून दिले याबाबत प्रशासनाला खुलासा मागितला.

प्रशासनाकडून वारक-यांची व्यवस्था योग्य पद्धतीने केली असल्याचा खुलासा केल्यानंतर सभागृत गोंधळाचे वातावरण निर्माण झाले. प्रशासन योग्य खुलासा देत नसल्याने प्रशासनाचा निषेध करण्यात आला तसेच महापौर मुक्ता टिळक या प्रशासनास पाठीशी घालत आहेत, असा आरोप करत शिवसेना व काँग्रेसने सभात्याग केला. मात्र ऐनवेळी राष्टवादी काँग्रेसचे नगरसेवक बाळासाहेब चांदोरे यांनी सभा त्याग करण्यास विरोध केल्याने राष्टवादीने मात्र सभा त्याग केला नही. यानंतर काही वेळातच सभा तहकूब करण्यात अली.

यावर विरोधी पक्षनेते चेतन तुपे म्हणाले गेल्या 60 वर्षात पालखीची इतकी गैरव्यवस्था झाली नव्हती. महापालिकेने मांडव नव्हेतर झोपड्या उभारल्या होत्या. मागच्या वर्षी महापालिकेने पालखी सोहळ्यासाठी 1 कोटी 74 लाखांची तरतूद केली होती. ती तरतूद 58 लाखांवर आणण्यात आली आहेत. त्याचा परिणाम पालखी व्यवस्थेवर झाला आणि वारकऱ्यांना समस्यांना तोंड द्यावे लागले.

काँग्रेस गट नेते अरविंद शिंदे म्हणाले की महापालिकेकडून पालखी व्यवस्थेचे अत्यंत ढिसाळ नियोजन करण्यात आले होते. याबाबत प्रशासनाला खुलासा मागितला असता प्रशासन खुलासा देत नाही आणि सत्ताधारी चर्चा करण्याची संधी देत नाही. त्यामुळे आताचे सभागृह हे अत्यंत दुर्दैवी पद्धतीने चालवण्यात येत आहे.

21 Jun 2017


पिंपरी पालिकेत नगरसेवकांसाठी मेट्रोचे सादरीकरण

एमपीसी न्यूज - दर्जेदार वाहतुकीसाठी मेट्रो प्रकल्पाची आवश्यकता आहे. परुंतु मेट्रो निगडीपर्यंत असावी. अन्यथा मेट्रोला काही अर्थ राहणार नाही. पुणे महामेट्रोने पहिल्याच टप्यात निगडीपर्यंत मेट्रो न्यावी, अन्यथा काम होऊ देणार नाही, अशी भूमिका नगरसेवकांनी घेतली आहे. तसेच मेट्रोचे नाव पुणे, पिंपरी-चिंचवड मेट्रो करण्याची मागणीही नगरसेवकांनी केली आहे. दरम्यान, पुढील काही दिवसांत नगरसेवकांसाठी पुन्हा मेट्रो संवादचे आयोजन करण्यात येणार आहे.


पुणे मेट्रो रेल कॉर्पोरेशनच्या वतीने पिंपरी-चिंचवड महापालिकेत नगरसेवकांना मेट्रो प्रकल्पाची माहिती व्हावी, त्यांच्या शंकांचे निरसन व्हावे यासाठी मंगळवारी (दि. 21) ‘मेट्रो संवाद’चे आयोजन करण्यात आले होते. महामेट्रोच्या सल्लागार समितीचे शशिकांत लिमये, पिंपरी- चिंचवड महापालिकेचे आयुक्त श्रावण हार्डीकर, महापौर नितीन काळजे, उपमहापौर शैलजा मोरे, विरोधी पक्षनेते योगेश बहल, सभागृह नेते एकनाथ पवार, पुणे मेट्रोचे प्रकाश कदम, श्रीनिवास कुलकर्णी या बरोबर पिंपरी- चिंचवड महापालिकेतील नगरसेवक उपस्थित होते.

मेट्रोचे सादरीकरण करण्यात आले. त्यानंतर महामेट्रो रेल कॉर्पोरेशनच्या स्ट्रॅटेजिक प्लॅनिंग विभागाचे व्यवस्थापकीय संचालक रामनाथ सुब्रमण्यम् यांनी माहिती दिली.

मेट्रोने छापलेल्या पुस्तकावर पुणे मेट्रो असा उल्लेख केला आहे. त्याच्यावर पिंपरी-चिंचवड मेट्रो असा उल्लेख का? केला नाही, असा प्रश्न उपस्थित करत माजी महापौर व नगरसेविका मंगला कदम म्हणाल्या, पुस्तकावर पिंपरी-चिंचवडचा उल्लेख असणे गरजेचे आहे. पुणे, पिंपरी-चिंचवड मेट्रो असे मेट्रोचे नाव करण्याची मागणी त्यांनी केली.

मेट्रो गहुंजेपर्यंत करण्याची मागणी राष्ट्रवादी काँग्रेसने केली होती. गहुंजे येथे किक्रेटचे मैदान आहे. गहुंजेपर्यंत मेट्रो केली असती तर त्याचा पुण्यातील नागरिकांना देखील फायदा झाला असता. परंतु, पहिल्या टप्यात पिंपरीपर्यंतच मेट्रो करण्यात येणार आहे. निगडीतील भक्ती-शक्तीपर्यंत मेट्रो असल्याशिवाय मेट्रोचा फायदा होणार नाही. यामुळे पहिल्या टप्यात निगडीपर्यंत मेट्रो नेण्यात यावी. तसेच पिंपरी-चिंचवड महापालिकेच्या हद्दीत येणा-या प्रत्येक स्टेशनवर मुलभूत सुविधा देण्याची मागणीही कदम यांनी केली.

विरोधी पक्षनेते योगेश बहल म्हणाले,  मेट्रोने  पिंपरी-चिंचवड शहरातील ऐतिहासिक वारस्याचे जतन करावे. तसेच मेट्रो निगडीपर्यंत नेण्यात यावी. अन्यथा काम बंद पाडण्यात येईल. नगरसेविका डॉ. वैशाली घोडेकर म्हणाल्या, मेट्रो प्रकल्प चांगला आहे. परंतु, मेट्रो निगडीपर्यंत नेण्यात यावी.

नगरसेविका मीनल यादव म्हणाल्या, बीआरटीसारखी मेट्रो फसवी तर होणार नाही ना? बीआरटीचा मोठ्या प्रमाणात गाजावाजा केला होता. परंतु, अद्यापही बीआरटीचे काही मार्ग सुरू झाले नाहीत. मेट्रोचेही तसे होऊ नये. पहिल्या टप्यात पिंपरीपर्यंत मेट्रो करण्यात येणार आहे. परंतु, याला काही अर्थ राहणार नाही. निगडीला जाणा-या नागरिकाने पिंपरीपर्यंत येऊन पुढे रिक्षाने जायचे का? मेट्रो निगडीपर्यंत नेण्यात यावी. अन्यथा काम बंद करण्यात येईल.

सचिन चिखले म्हणाले, मेट्रो निगडीपर्यंत व्हावी. रुपीनगर, तळवडे या भागातील नागरिकांनाही मेट्रोची सुविधा मिळाली पाहिजे. निगडीपर्यंत मेट्रो नेण्यासाठी मोठे आंदोलन करण्यात येईल.

सभागृह नेते एकनाथ पवार म्हणाले, मेट्रो निगडीपर्यंत नेण्याची भाजपचीही मागणी आहे. मेट्रो निगडीपर्यंत नेण्यासाठी प्रयत्न करणार असल्याचेही, त्यांनी सांगितले. तसेच मेट्रोबाबत अधिक चर्चा होणे गरजेचे आहे. त्यासाठी पुढील सात ते आठ दिवसांत नगरसेवकांसाठी पुन्हा 'मेट्रो संवाद'चे आयोजन करण्यात येणार आहे.

21 Jun 2017

एमपीसी न्यूज - छत्रपती शिवाजी महाराजांनी अफझल खानाचा कोथळा काढला हे सत्य आहे. परंतु अफझल खान शत्रू होता म्हणून त्याचा कोथळा काढला, तो मुसलमान होता म्हणून नाही. छत्रपतींची लढाई मुस्लिमांच्या विरोधी होती असे म्हणणं चुकीचे आहे.असे मत राष्ट्रवादीचे ज्येष्ठ नेते शरद पवार यांनी व्यक्त केले.ते पुण्यात आयोजित छत्रपती शिवाजी महाराज सचित्र पुस्तक प्रकाशन कार्यक्रमात बोलत होते.

ते पुढे म्हणाले, तेव्हा ज्ञान देण्याचे काम एका विशिष्ट समाजाकडे होते. त्यामुळे त्यांच्या पद्धतीने इतिहास लिहिण्याच काम झाले आहे. वास्तविक पाहता इतिहास हा वास्तवतेच भान ठेवून लिहिला पाहिजे. चुकलेल्या व्यक्तीला शिक्षा देण्याचे काम महाराजांनी केले आहे. मग तो कोणत्याही जातीचा असो. तेव्हा ज्ञान काही लोकांनी आपल्याला चुकीचा इतिहास शिकवला आणि शिवाजी महाराजांचा संघर्ष मुसलमाना पुरता मर्यादित ठेवला. 

महात्मा फुलेंनी, बाबासाहेबांनी सांगितलेले शिवाजी महाराज खरे आहेत. महात्मा फुलेंनी सांगितल्याप्रमाणे महाराज हे सर्व कुळांचे प्रतिपालक आहेत. त्यांच्या सैन्यात महत्वाच्या जागेवर सगळ्याच जातीचे लोक होते.

21 Jun 2017

विद्यार्थ्यांना वेळेत साहित्य देण्याची नगरसेवकांची मागणी

एमपीसी न्यूज - पिंपरी-चिंचवड महापालिका शिक्षण मंडळाचे सन 2017-18 चे सुमारे 151 कोटी रुपयांच्या अंदाजपत्रकाला मंगळवारी (दि.20) सर्वसाधारण सभेत एकमताने मंजुरी देण्यात आली. शिक्षण मंडळ बरखास्त झाले असून शिक्षण समिती अस्तित्वात येणार आहे. 

शिक्षण मंडळाने सुमारे 151 कोटी रुपयांचे अंदाजपत्रक सादर केले होते. त्यामध्ये आयुक्तांनी सुमारे 25 कोटी रुपयांची कपात करत 125 कोटी रुपयांच्या बजेटला मंजुरी दिली होती. तथापि, तत्कालीन स्थायी समितीने आयुक्तांचे बजेट नाकारत शिक्षण मंडळाने सुचविलेले अंदाजपत्रकच अंतिम केले आहे. त्याच्यावर सर्वसाधारण सभेत शिक्कामोर्तब करण्यात आले.

या अंदाजपत्रकात धन्वंतरी योजनेसाठी 1 कोटी 50 लाख, विद्यार्थी गणवेश 72 लाख 50 हजार, पी.टी गणवेश 52 लाख, खेळ शाळा गणवेश 28 लाख, स्काउऊटगाईड गणवेश 5 लाख, स्वेटर खरेदी 2 कोटी 20 लाख, विद्यार्थी पादत्राणे व मोजे 1 कोटी 15 लाख, विद्यार्थी पी.टी. शुज 85 लाख, विद्यार्थी दप्तरे व पाट्या 80 लाख, पावसाळी साधने 1 कोटी 55 लाख, शालेय साहित्य 95 लाख, आधुनिक फळे 15 लाख, क्रिडा साहित्य 15 लाख, वॉटर बॉटल 45 लाख, टॅब खरेदी व प्रशिक्षण 50 लाख, फिल्टर 50 लाख, सीसीटीव्ही कॅमेरे 1 कोटी सर्वांगीण शैक्षणिक गुणवत्ता व विकास 70 लाख, व्यवसाय स्वाध्यायमाला 1 कोटी, ई-लर्निंग स्कूल 2 कोटी, विजरोधक यंत्रणा 25 लाख, आगरोधक यंत्रणा 50 लाख, मोठी कचरा पेटी 20 लाख आदींचा प्रामुख्याने अंदाजपत्रकात समावेश आहे. 

यावर विरोधी पक्षनेते योगेश बहल, माजी महापौर मंगला कदम, नगरसेविका माया बारणे, सचिन चिखले, दत्ता साने यांनी चर्चा केली. पालिका शाळेतील विद्यार्थ्यांना दर्जेदार आणि वेळेत साहित्य देण्याची मागणी नगरसेवकांनी केली.

21 Jun 2017

एमपीसी न्यूज - पिंपरी-चिंचवड महापालिकेत पहिल्यांदाच सत्ताधीश झालेल्या भाजपकडून पैशाची उधळपट्टी सुरू झाली आहे. पदाधिका-यांसाठी व्हिजींटीग कार्ड, लेटरहेड, शिफारस पत्र यावर तब्बल 15 लाख रूपये खर्च करण्यात येणार आहेत. तीन ठेकेदारांकडून हे वेगवेगळे साहित्य खरेदी करण्यात येणार आहे. 

पिंपरी-चिंचवड महापालिकेतील राष्ट्रवादीची सत्ता उधळवून भाजपने एकहाती सत्ता काबीज केली आहे. सत्तेत आल्यानंतर भाजपने पैशाची नाहक उधळपट्टी थांबविणार असल्याची घोषणा केली होती. मात्र, सत्तेत येऊन काही महिने उलटत नाहीत तोच भाजपनेही आता राष्ट्रवादीच्या पावलावर पाऊल ठेवून उधळपट्टी सुरू केली आहे. 

महापालिकेतील पदाधिकारी आणि विविध विभागांसाठी निमंत्रण पत्रिका, व्हिजीटींग कार्डस, लेटरहेड, शिफारसपत्र आणि पाकीटे छपाई खरेदी करण्यात येणार आहे. हे छपाई साहित्य खरेदीसाठी इच्छूक ठेकेदांराकडून निविदा मागविण्यात आल्या. त्यामध्ये आकुर्डीतील गणराज प्रिंटर्स यांनी सात प्रकारच्या साहित्यासाठी 12 लाख 17 हजार रूपये, चिंचवड येथील आशिष एंटरप्रायजेस यांनी एका साहित्यासाठी 1 लाख 80 हजार रूपये आणि पुण्यातील जयगणेश ऑफसेट यांनी चार प्रकारच्या साहित्यासाठी 1 लाख 71 हजार रूपये लघुत्तम दर सादर केला. 

या तीनही ठेकेदारांचे दर इतर ठेकेदारांपेक्षा कमी असल्याने त्याच्यासमवेत करारनामा करण्यात येणार आहे. हा प्रस्ताव महापालिका स्थायी समिती सभेसमोर मान्यतेसाठी ठेवण्यात आला आहे.

20 Jun 2017


एमपीसी न्यूज - पिंपरी-चिंचवड महापालिकेची सर्वसाधारण सभा संपल्यानंतर महापौर नितीन काळजे आणि स्थायी समितीच्या अध्यक्षा सीमा सावळे यांच्यात जोरदार खडाजंगी झाली. सभाशास्त्र आणि महापौरांची नवीन मोटार खरेदी या विषयावरुन 'वाद' विकोपाला गेल्याची जोरदार चर्चा पालिका वर्तुळात रंगली आहे.

पिंपरी-चिंचवड महापालिकेची जून महिन्याची सर्वसाधारण सभा मंगळवारी (दि.20) पार पडली. महापौर नितीन काळजे यांच्यासह पदाधिकारी आपल्या कार्यालयात गेले. त्यानंतर सभाशास्त्र आणि महापौरांच्या नवीन मोटार खरेदीवरुन महापौर काळजे आणि स्थायी समितीच्या अध्यक्षा सीमा सावळे यांच्यात जोरदार खडाजंगी झाल्याची माहिती, अत्यंत विश्वसनीय सूत्रांनी दिली.

पिंपरी महापालिकेच्या वृक्ष प्राधिकरण समितीवर संख्याबळानुसार 13 सदस्यांची निवड करण्यात आली आहे. वृक्ष प्राधिकरण समितीवर सदस्य निवडीवरुन सकाळपासूनच भाजपमध्ये खदखद सुरु होती. भोसरीतील नगरसेविका प्रियंका बारसे यांची समितीवर नियुक्ती करण्यास एका गटाने विरोध केला होता, असे सूत्रांनी सांगितले.

परंतु, दुस-या गटाने बारसे यांचे नाव लावून धरत त्यांची वृक्ष प्राधिकरण समितीवर वर्णी लावली. त्यामुळे भाजपचा एक गट कमालीचा नाराज झाला होता. त्यातून आणि महापौरांच्या नवीन मोटार खरेदीवरुनच महापौर काळजे आणि स्थायी समिती अध्यक्षा सावळे यांच्यामध्ये खडाजंगी झाल्याचे सूत्रांनी सांगितले.

महापालिकेतील भाजप पदाधिका-यांमध्ये टोकाचे मतभेद निर्माण झाल्याची स्थिती आहे. महापौर काळजे आणि सभागृह नेते एकनाथ पवार हे दोघे एकत्र तर स्थायी समिती अध्यक्ष सावळे स्वतंत्र कामकाज करत असल्याचे पालिकेत चित्र आहे. कचरा विलिनीकरण मोहिमेच्या पत्रकार परिषदेला कार्यालयात असतानाही सावळे यांनी येणे टाळले होते. त्यावेळी निमंत्रण न दिल्याच कारण पुढे करत सभागृह नेत्यांनी अधिका-यांनाच फैलावर घेतले होते.

पिंपरी पालिकेत प्रथमच भाजपची सत्ता आली आहे. अपक्ष आमदार महेश लांडगे यांनी आपले कट्टर समर्थक नितीन काळजे यांनी महापौरपदी विराजमान केले. महापौर निवडीवरुन भाजपमध्ये संघर्ष उफळा होता. आमदार लक्ष्मण जगताप यांच्या कट्टर समर्थक अशी ओळख असलेल्या सीमा सावळे यांची स्थायी समिती अध्यक्षपदी वर्णी लागली. स्थायी समिती अध्यक्ष निवडीवेळी आमदार महेश लांडगे यांनी शहरात असूनही त्याकडे पाठ फिरवली होती. तेव्हापासून त्यांच्यात संघर्ष असल्याची चर्चा आहे.

याबाबत महापौर नितीन काळजे यांच्याशी संपर्क साधला असता असेही काहीही झाले नसल्याचे सांगत त्यांनी सारवा-सारव करण्याचा प्रयत्न केला. तर, सीमा सावळे यांच्याशी संपर्क होऊ शकला नाही. 

20 Jun 2017

एमपीसी न्यूज - शहरासाठी राबविण्यात येणा-या चोवीस तास समान पाणीपुरवठा योजनेसाठी दोन हजार 264 कोटींचे कर्जरोखे उभारण्याचा निर्णय नुकताच पुणे महापालिकेने घेतला आहे. या निर्णयावर राज्य सरकारनेही परवानगीची मोहोर उमटवली होती. त्यानंतर महापालिकेच्या वतीने दोनशे कोटींचे कर्जरोखे मुंबई शेअर बाजारात उभारण्यात आले.  ते पालिकेच्या तिजोरीत जमा झाले आहेत. ऑनलाईन बोलीमध्ये या कर्जरोख्यांना गुंतवणूकदारांचा भरघोस प्रतिसाद मिळाला होता.

चोवीस तास समान पाणीपुरवठा योजनेसाठी महापालिकेतर्फे मुंबई शेअर बाजारात उभारण्यात आलेल्या कर्जरोख्यांचे दोनशे कोटी रुपये मंगळवारी पालिकेच्या तिजोरीत जमा झाले.  या कर्जरोख्यांसाठी सोमवारी शेअर बाजारात तब्बल 21 जणांनी ऑनलाईन बोली लावली होती. त्यापैकी एका वित्तीय संस्थेने महापालिकेच्या कर्जरोख्यांसाठी 7.59 टक्के किमान व्याजदर देत दोनशे कोटींची रक्कम पालिकेकडे जमा केली आहे.
20 Jun 2017


एमपीसी न्यूज - पिंपरी-चिंचवड महापालिकेने प्रधानमंत्री आवास योजनेंतर्गत शहराच्या विविध भागातील 10 ठिकाणी 9 हजार 458 सदनिका बांधण्याचे नियोजन केले आहे. त्यासाठी 885 कोटी 12 लाख रुपये खर्च येणार आहे. गृहयोजनेच्या ठिकाणी विविध मुलभूत सुविधा पुरविण्यासाठी 50 कोटी 15 लाख रुपये खर्च होणार आहे. या प्रस्तावाला सर्वसाधारण सभेने आज (मंगळवारी) मंजूरी दिली.

पिंपरी-चिंचवड महापालिकेची जून महिन्याची सर्वसाधारण सभा आज (मंगळवारी) पार पडली. सभेच्या अध्यक्षस्थानी महापौर नितीन काळजे होते.

महापालिकेने प्रधानमंत्री आवास योजनेसाठी नागरिकांकडून अर्ज मागविले आहेत. शहराच्या विविध भागात 10 ठिकाणी 9 हजार 458  सदनिका बांधण्याचे नियोजन आहे. त्यानुसार च-होली येथे 1442, रावेतमध्ये 1080, डुडुळगावमध्ये 896, दिघीत 840, मोशी - बो-हाडेवाडीमध्ये 1400, वडमुखवाडीत 1400, चिखलीमध्ये 1400, पिंपरीत 300, पिंपरीतच आणखी 200 आणि आकुर्डीमध्ये 500 सदनिका उभारण्याचे प्रस्तावित आहे.

यातील काही जागा महापालिका मालकीच्या, काही जागा सरकारी गायरान आहेत. यापैकी च-होली आणि रावेत येथील जागा महापालिकेच्या ताब्यात आल्या आहेत. तर, ताब्यात न आलेल्या जागांचे संपादन करण्याची कार्यवाही सुरू आहे. सरकारी गायरानाच्याही जागा जिल्हाधिकारी कार्यालयाकडून ताब्यात घेण्याची कार्यवाही सुरू आहे.

9 हजार 458 सदनिका बांधण्यासाठी 6 टक्के भाववाढ आणि इतर शुल्कासह एकूण 885 कोटी 12 लाख रुपयांचा खर्च अपेक्षित आहे. या व्यतिरिक्त गृहयोजनेच्या ठिकाणी विविध मुलभूत सुविधा पुरविण्यासाठी 6 टक्के भाववाढ व इतर शुल्कासह एकूण 50 कोटी 15 लाख रुपये खर्च येणार आहे. या योजनेसाठी अडीच चटईक्षेत्र निर्देशांक (एफएसआय) मंजूर आहे. गृहयोजनेतील प्रति सदनिकेचे क्षेत्र 322 चौरस फूट कार्पेट एरिया आणि 545 चौरस फूट बिल्टअप एरिया आहे.

प्रत्येक सदनिकेच्या बांधकामासाठी 8 लाख 27 हजार 446 रुपये खर्च येणार आहे. त्यासाठी केंद्र सरकार दीड लाख रुपये आणि राज्य सरकार एक लाख रुपये अनुदान देणार आहे. उर्वरित हिस्सा लाभार्थ्यांकडून घेण्याचे नियोजन आहे. महापालिका स्वहिस्सा न वापरता गृहप्रकल्पासाठी जागा मोफत उपलब्ध करून देणार आहे. लाभार्थ्यांकडून जागेची किंमत, बांधकाम परवाना विकास शुल्क आणि प्रीमिअम शुल्काची आकारणी महापालिका करणार नाही. जागांची किंमत व विविध शुल्क मिळून एकूण 151  कोटी 1 लाख रुपयांची आकडेमोड होते.

14 मजली उंच इमारती उभारण्याचे प्रस्तावित असून तळमजला वाहनतळासाठी राखीव असेल. प्रत्येक मजल्यावर 16 सदनिका आणि दोन लिफ्ट असतील. त्यातील एक लिफ्ट स्ट्रेचर लिफ्ट असेल. इमारतींच्या ठिकाणी अग्निशमन व्यवस्था, जमिनीखाली व इमारतीवर आवश्यक क्षमतेच्या पाण्याच्या टाक्या, प्रत्येक इमारतीला सोलर हिटर सुविधा, इमारतीच्या वाहनतळात स्वच्छतागृहासह सोसायटीचे कार्यालय असेल. बांधकाम करणा-या ठेकेदाराला तीन वर्षांपर्यंत इमारत देखभाल - दुरूस्ती, पाच वर्षापर्यंत लिफ्टची आणि मैलाशुद्धीकरण केंद्राची देखभाल - दुरुस्ती करावी लागणार आहे. या विषयाला सर्वसाधारण सभेने मंगळवारी सर्वानुमते मंजूरी दिली.

यावर विरोधी पक्षनेते योगेश बहल, नगरसेवक दत्ता साने, अजित गव्हाणे, भाऊसाहेब भोईर, राहुल कलाटे, नामदेव ढाके, सचिन चिखले, स्वीनल म्हेत्रे, डॉ. वैशाली घोडेकर, माई ढोरे, उषा मुंढे यांनी चर्चा केली.

Page 6 of 183
Open Chat
1
Close chat
Hello! Thanks for visiting us. Please press Start button to chat with our support :)

Start