23 Apr 2017
एमपीसी न्यूज  - पिंपरी-चिंचवडमध्ये पहिल्यांदाच सत्ता आलेल्या भाजपची चिंचवड येथे राज्यस्तरीय बैठकीचे आयोजन करण्यात आले. या दरम्यान राष्ट्रवादी पक्षासह विरोधी पक्ष एकत्रित उपोषण करण्याच्या तयारीत असताना स्थायी समिती सदस्य प्रा. उत्तम केंदळे यांनी हे उपोषण म्हणजे निव्वळ प्रसिद्धिसाठी स्टंट असल्याची टीका केली आहे.
 
आघाडी सरकारच्या काळातच शेतकरी जास्त देशोधडीला लागला, शेतकरी आत्महत्या व पिकांना योग्य भाव हे आघाडी सरकार सोडवू शकले नाहीत, अनधिकृत बांधकामाचा प्रश्न, शास्तीकर हे प्रश्न गेल्या कित्येक वर्षांपासून ते सोडवू शकले नाहीत आणि आज तेच सत्ता गेल्यामुळे जीवाचा आटापिटा करत असल्याचे दिसत आहे.
 
शेतकऱ्यांना कर्जमाफी पेक्षा कर्जमुक्ती करून सक्षम करण्याचे सरकारचे धोरण आहे, कर्जमाफी केल्यास त्याचा फायदा फक्त सहकारी संस्थानाच होणार आहे याचीही दक्षता सरकार घेत आहे. भाजप सरकारने सत्तेत आल्यापासून कित्येक कल्याणकारी योजना अस्तित्वात आणल्या त्यात जलयूक्त शिवार, मागे त्याला शेततळे, पिकांना योग्य भाव, शेतकऱ्यांना पेन्शन योजना, पिकांचा विमा अशा काही प्रमुख बाबींचा समावेश आहे.
 
त्यामुळे विरोधक फक्त स्टंटबाजी करत असून त्याचा कुठलाही फायदा त्यांना होणार नसून महाराष्ट्राच्या जनतेने निकालातून दाखवून दिले आहे की, भाजप सरकार जनतेसाठीच काम करत आहे, असे केंदळे यांनी दिलेल्या पत्रकात म्हणले आहे.
23 Apr 2017

सांगवीत संयुक्त जयंती महोत्सव

 

एमपीसी न्यूज - भारतरत्न डॉ. बाबासाहेब आंबेडकर यांनी सांगितलेल्या ‘शिका, संघटीत व्हा’ या विचारांच्या आचरणानेच समाजातील उपेक्षित घटकाला सन्मानपूर्वक जीवन जगता येईल. डॉ. आंबेडकरांना अभिप्रेत असणारे समानतेचे ध्येय अद्याप बाकी आहे. त्यासाठी आणखी संघर्ष करणे आवश्यक आहे. तरच समाजातील विषमता कमी होऊन समतेचे राज्य स्थापित होईल, असे मार्गदर्शन विशेष पोलीस महानिरीक्षक चंद्रकांत दैठणकर यांनी सांगवी येथे केले.

 

जुनी सांगवी, नवी सांगवी, पिंपळेगुरव, औंध कॅम्प, बोपोडी, दापोडी परिसरातील 42 बौद्ध विहार, विविध सामाजिक, धार्मिक, संस्था, संघ, बचतगटांच्या वतीने छत्रपती शिवाजी महाराज यांचे 387वी, क्रांतीसूर्य महात्मा जोतीबा फुले 190 वी, भारतरत्न डॉ. बाबासाहेब आंबेडकर यांची 126 वी जयंतीनिमित्त शुक्रवारी (दि. 21) पोलीस महानिरीक्षक दैठणकर यांच्या हस्ते संयुक्त जयंती महोत्सवाचे उद्‌घाटन कांबळे मैदान, पीडब्ल्यूडी ग्राऊंड सांगवी, पुणे येथे झाले. यावेळी प्रमुख पाहुणे माजी आमदार आण्णा बनसोडे, अप्पर पोलीस उपायुक्त दीपक हुंबरे, संयुक्त जयंती महोत्सव समितीचे अध्यक्ष अमरसिंग आदियाल, कार्याध्यक्ष राहुल काकडे, ॲड. राजेश नितनवरे आदी उपस्थित होते.

 

इतिहास लेखक कोकाटे म्हणाले की, भारतरत्न डॉ. बाबासाहेब आंबेडकर यांनी उत्तरेच्या नद्या दक्षिणेकडे वळवून पठारावरील जमीनीला पाणी द्यावे, खोती पद्धत बंद करावी यासाठी काम केले. पृथ्वी गोल आहे हे विज्ञानाने सिद्ध केले आहे. दिशा काल्पनीक आहेत. दैनंदिन व्यवहारासाठी कॅलेंडर आले. सर्व दिशा, सर्व दिवस शुभच असतात, वास्तुशास्त्र, राशीभविष्य हे थोतांड आहे. घराचे प्रवेशद्वार कोणत्या दिशेला असावे या पेक्षा घरात राहणा-या व्यक्तीच्या मनात आणि मेंदूत सामर्थ्य हवे. याच्या बळावरच छत्रपती शिवाजी महाराजांनी स्वराज्याची स्थापना केली. उपवास, व्रत वैकल्य करण्यापेक्षा भगवान गौतम बुद्धांनी सांगितल्याप्रमाणे जिथे जे उपलब्ध असेल ते खावे. गौतम बुद्ध बुद्धीप्रामाण्यवादी होते. व्यक्ती कोणत्या विचारांची, संस्कृतीची आहे यावर त्यांचे कर्तृत्व ठरते. स्वर्ग, नर्क, पुर्नजन्म या कल्पना गरीबांच्या शोषणासाठी तात्कालिन समाज व्यवस्थेत निर्माण झाल्या.

 

तिर्थस्थळी जाऊन मुक्ती मिळत नाही ‘आई-वडील तुझपाशी, कशाला करतो काशी’, हे तुकाराम महाराजांनी सांगितले आहे. प्राथमिक, माध्यमिक उच्च शिक्षण आता भांडवलशाहीच्या हातात जाण्याचा धोका निर्माण झाला आहे, असे झाले तर ग्रामीण भागातील शेतक-यांच्या, भटक्या विमुक्तांच्या, दलितांच्या, अल्पसंख्यांकांच्या मुलांना शिक्षणापासून वंचित रहावे लागेल. बुवा, बापू, महाराजांच्या विचारांचे लोक क्रांती करू शकत नाहीत. तर गौतम बुद्ध, छत्रपती शिवाजी महाराज, संत तुकाराम महाराज, डॉ. बाबासाहेब आंबेडकरांच्या विचारांचे पाईकच प्रबोधनाच्या माध्यमातून समाजक्रांती घडवू शकतात. जगाला जसा ईसीस आणि तालिबान्यांपासून धोका आहे तसाच या देशाला आरएसएस आणि त्यांच्या विचारांमुळे धोका आहे. जगाला दहशतवादापासून मुक्ती हवी असल्यास तथागत गौतम बुद्धांचे विचारच वाचवू शकतात. विद्वत्तेचा, ज्ञानाचा सन्मान म्हणूनच डॉ. आंबेडकरांचे जगभर पुतळे उभारण्यात आले आहेत, असेही कोकाटे यांनी सांगितले.

 

राहुल काकडे यांनी स्वागत केले. महादेव रोकडे यांनी सूत्रसंचालन केले. अमरसिंग आदियाल यांनी आभार मानले.

23 Apr 2017


एमपीसी न्यूज - शासनाने निवडणूकीच्या दरम्यान टोल मुक्ती करण्याचे आश्वासन दिले होते. परंतु टोलमुक्ती करण्याऐवजी ऐप्रिल पासून टोलच्या रक्कमेत वाढ केली आहे. भाजप शासन नागरीकांची फसवणूक करत असून टोल वाढ रद्द करुन टोल मुक्ती द्यावी यासाठी पुणे-मुंबई द्रुतगतीर्गावर आम आदमी पार्टीच्या वतीने टोल वाढी विरोधात आंदोलन करण्यात आले. किवळे फाटा येथे आज सकाळी आंदोलन करण्यात आले. यावेळी भाजप सरकारच्या विरोधात आम आदमी पार्टीच्या वतीने घोषणाबाजी करण्यात आली.

 

पुणे-मुंबई द्रुतगतीवर आणि जुन्या माहामार्गावरील कंत्राटदारांची अपेक्षीत टोल रक्कम जमा झाली असताना देखील या ठिकाणी सक्तीने टोल वसुली केली जात आहे. हि टोल वसुली थांबवण्यात यावी यासाठी आज आंदोलन करण्यात आले आहे.


महाराष्ट्र राज्य रस्ते विकास महामंडळाने 918 कोटींची बोली लावणा-या आय.आर.बी. या क्रंत्राटदाराशी द्रुतगती आणि जुन्या महामार्गावर टोल वसूलीचे करार करण्यात आले होते. दोन्ही महामार्गावर आय.आर.बी कडून सक्तीने टोल वसूली करण्यात येत आहे. करारानुसार आय.आर.बी. ला  चार हजार 330 कोटींचे पथकर कर वसुल करण्याची परवानगी देण्यात आली होती. यामध्ये दोन हजार 869 कोटी द्रुतगती महामार्गावर आणि एक हजार 461 कोटी जुन्या माहामार्गावर कर वसुली करणे आपेक्षीत होते. परंतु आय.आर.बी.ने जानेवारी 2017 पर्य़ंत चार हजार 507 कोटींचा टोल वसुल केला आहे.

 

महामार्ग खर्चाची रक्कम, कार्य़ालयीन खर्च, दुरुस्ती, देखभाल, सुविधा खर्च या सर्व बाबींशिवाय पुढील दोन वर्षांचा देखभाल हा खर्च करार करताना समाविष्ट करण्यात आली होती. त्यानुसार आयआरबीला चार हजार 330 कोटी रुपयांची टोल वसुली करण्यास परवानगी देण्यात आली होती. करारानुसार जेवढी रक्कम वसुल करायची होती त्यापेक्षा जास्त रक्कम वसुल करण्यात आली असून अद्यापही टोल वसुली सुरु आहे. तसेच एप्रील पासून टोल वाढवून नागरीकांची फसवणूक करण्यात आली असल्याचा आरोप आम आदमी पार्टीने केला आहे.

 

शासनाने टोल वाढवून नागरीकांची फसवणूक केली आसून हि टोल वाढ कोण्याच्या फायद्यासाठी करण्यात आली आहे असा सवाल आम आदमी पार्टीच्या वतीने करण्यात आला आहे. निवडणूकी दरम्यान भाजप सरकारने टोल माफीचे आश्वासन दिले होते. परंतु टोल बंद करण्याऐवजी टोलच्या रक्कमेत वाढ करून जनतेची पिळवणूक करण्यात येत आहे. टोल रक्कम कमी करण्याचा अधिकार महाराष्ट्र राज्य रस्ते विकास महामंडळाला असतानाही शासन नागरीकांची फसवणूक करत आहे.

22 Apr 2017

विभागीय आयुक्तपदी चंद्रकांत दळवी, किरण गिते पीएमआरडीएचे नवे सीईओ

 

एमपीसी न्यूज - पिंपरी-चिंचवड महापालिकेचे आयुक्त दिनेश वाघमारे यांची बदली झाली असून त्यांच्या जागी नागपूर महापालिकेचे आयुक्त श्रवण हर्डीकर यांची नियुक्ती करण्यात आली आहे. पुणे महसूल विभागाच्या विभागीय आयुक्तपदी चंद्रकांत दळवी यांची तर पुणे महानगर क्षेत्रीय विकास प्राधिकरणाच्या (पीएमआरडीए) मुख्य कार्यकारी अधिकारीपदी किरण गिते यांची नियुक्ती करण्यात आली आहे.

 राज्यातील 60 सनदी अधिकाऱ्यांच्या आज बदल्या करण्यात आल्या असून त्याबाबतचा आदेश राज्य शासनाने काढला आहे. त्यात पिंपरी-चिंचवड महापालिकेचे आयुक्त दिनेश वाघमारे यांचा समावेश आहे. स्वतः वाघमारे यांनीही बदलीच्या वृत्तास दुजोरा दिला.

 आयुक्त दिनेश वाघमारे यांनी 3 मे 2016  रोजी पिंपरी-चिंचवड महापालिकेच्या आयुक्त पदाचा पदभार स्विकारला होता.  वाघमारे यांनी फक्त अकरा महिने 20 दिवस महापालिकेत काम केले. एका वर्षांच्या आतच त्यांची राज्य सरकारने मंत्रालयात समाज कल्याण  विभागात  सचिव पदावर  पदोन्नतीवर बदली केली आहे. पिंपरी-चिंचवड महापालिकेच्या आयुक्तपदी नागपूर महापालिकेचे आयुक्त श्रावण हर्डीकर यांची नियुक्ती करण्यात आली आहे. तर नवे आयुक्त हार्डीकर  हेही मुख्यमंत्री देवेंद्र फडणवीस यांच्या अत्यंत विश्वासातले मानले जातात.

 दरम्यान, आयुक्त वाघमारे हे पिंपरी-चिंचवड महापालिकेत काम करण्यास सुरूवातीपासून इच्छुक नसल्याचे म्हटले जात होते. त्यांनी आपल्या अकरा महिने 20 दिवसांच्या काळात एकही ठोस काम केले नाही. वाघमारे यांचे कुंटुंब मुंबईत राहत असल्यामुळे त्यांनीही राज्य सरकारकडे सातत्याने आपल्या बदलीसाठी पाठपुरावा केला होता.

 राजीव जाधव यांच्या बदलीनंतर 3 मे 2016 ला दिनेश वाघमारे यांनी पिंपरी-चिंचवड महापालिकेच्या आयुक्तपदाची सूत्रे स्वीकारली होती. त्यांच्यावर सर्वपक्षीय नगरसेवकांकडून निष्क्रियतेची टीका होत होती. महापालिकेच्या निवडणुका त्यांच्या काळात झाल्या. अखेर मुदतीपूर्वी त्यांची समाजकल्याण विभागाचे सचिव म्हणून बदली झाली आहे.

 श्रवण हर्डीकर हे 2005 च्या बॅचचे महाराष्ट्र केडरचे आयएएस अधिकारी आहेत. नागपूर महापालिकेचे आयुक्त म्हणून ते सध्या कार्यरत आहेत. पिंपरी-चिंचवड महापालिकेत भाजपची सत्ता आल्यानंतर मुख्यमंत्री देवेंद्र फडणवीस यांच्या नागपूरमधील अधिकारी हर्डीकर यांची पिंपरी-चिंचवड महापालिकेच्या आयुक्तपदी नियुक्ती झाल्याने तो राजकीय वर्तुळात चर्चेचा विषय झाला आहे.

 श्रावण हर्डीकर यांचे शिक्षण आणि बरेचसे वास्तव्य मुंबई-पुण्यासारख्या शहरी वातावारण झाले आहे. पुण्याच्या शासकीय अभियांत्रिकी महाविद्यालयात इन्स्ट्रुमेंटेशन विषयात त्यांनी अभियांत्रिकीची पदवी घेतली. हर्डीकर यांना वाचनाची विशेष आवड आहे. याशिवाय प्राणी आणि पक्षी निरीक्षणाचीही त्यांना आवड आहे.

 2005 साली हर्डीकर आयएएस झाले आणि त्यानंतर ते कोल्हापूरला सहाय्यक जिल्हाधिकारी म्हणून रुजू झाले तेव्हा किंवा रत्नागिरी जिल्ह्यात दापोली उपविभागात सहायक जिल्हाधिकारी म्हणून काम. अशातच जानेवारी 2008 मध्ये नंदुरबार जिल्हा परिषदेमध्ये मुख्य कार्यकारी अधिकारी म्हणून त्यांची नियुक्ती झाली. हर्डीकर यांनी जिल्हाधिकारी म्हणून उल्लेखनीय कामगिरी केली. वाळूघाटाची ई-निविदा काढणारे ते पहिले अधिकारी होय. यवतमाळात त्यांनी हा उपक्रम यशस्वीपणे राबविला

 विभागीय आयुक्त एस. चोकलिंगम यांची सेटलमेंट कमिशनर म्हणून बदली झाली आहे. सहकार आयुक्त चंद्रकांत दळवी यांची पुणे विभागीय आय़ुक्त म्हणून नेमणूक करण्यात आली आहे.

 पीएमआरडीच्या स्थापनेपासून सीईओपदाची धुरा सांभाळणारे महेश झगडे यांची नाशिकचे विभागीय आयुक्त म्हणून बदली झाली आहे. त्यांच्या जागी सध्या आमरावतीचे जिल्हाधिकारी असणाऱ्या किरण गिते यांची निुक्ती करण्यात आली आहे.

22 Apr 2017
केंद्रीय मंत्री नितीन गडकरी यांच्या हस्ते होणार उद्‌घाटन 
एमपीसी न्यूज - भाजप प्रदेश कार्यकारिणीची येत्या 26 व  27 एप्रिलला दोन दिवसांची बैठक होणार आहे. त्यासाठी मुख्यमंत्री देवेंद्र फडणवीस, राज्यातील केंद्रीय मंत्री, प्रदेशाध्यक्ष रावसाहेब राज्य मंत्रिमंडळातील मंत्रीगण, खासदार, आमदार आणि प्रत्येक जिल्ह्याचे अध्यक्ष असे आठशे ते एक हजार मान्यवर उपस्थित राहणार आहेत, अशी माहिती पुण्याचे पालकमंत्री गिरीश बापट यांनी आज (शनिवारी) पत्रकार परिषदेत दिली.
 
यावेळी महापौर नितीन काळजे, भाजपचे शहराध्यक्ष व आमदार लक्ष्मण जगताप, सत्तारुढ पक्षनेते एकनाथ पवार, उपमहापौर शैलजा मोरे, स्थायी समिती अध्यक्षा सीमा सावळे, महिला शहराध्यक्षा शैला मोळक, माजी खासदार गजानन बाबर, माजी महापौर आझम पानसरे, प्रदेश सदस्या उमा खापरे, सरचिटणीस सारंग कामतेकर, बाबू नायर, प्रमोद निसळ आदी उपस्थित होते.
 
चिंचवड येथील प्रा. रामकृष्ण मोरे सभागृहात 26, 27 एप्रिलला राज्यस्तरीय बैठक होणार आहे. 26 एप्रिलला केंद्रीय दळनवळण मंत्री नितीन गडकरी यांच्या हस्ते उद्‌घाटन होणार आहे. यावेळी केंद्रीय मनुष्यबळ विकास मंत्री प्रकाश जावडेकर, उर्जामंत्री पियुष गोयल, रेल्वेमंत्री सुरेश प्रभु, गृहराज्यमंत्री हंसराज आहिर आदी उपस्थित राहणार आहेत.
 
या बैठकीत विविध ठराव मांडले जाणार आहेत. त्याचबरोबर सरकारने अडीच वर्षात घेतलेल्या निर्णयांची जनजागृती देखील करण्यात येणार आहे. तसेच जाहीर सभा घेण्याचेही, नियोजन सुरु असल्याचे, पालकमंत्री बापट यांनी सांगितले.
 
या राज्यस्तरीय बैठकीमुळे कार्यकर्त्यांमध्ये उत्साह येईल. राज्याच्या विविध भागातून आलेल्या कार्यकर्त्यांचा, नेत्यांचा परिचय होईल. यातून राज्यातील कार्यकर्त्यांना वेगळी दिशा मिळणार असल्याचेही, त्यांनी सांगितले. 27 एप्रिलला दुपारी बैठकीचे सांगता होणार आहे.
 
पिंपरी-चिंचवड महापालिकेत आजपर्यंत काँग्रेस, राष्ट्रवादीची सत्ता होती. 2017 च्या निवडणूकीत राष्ट्रवादीला धूळ चारत भाजपने महापालिका ताब्यात घेतली. त्यानंतर भाजपच्या प्रदेश कार्यकारिणीची बैठकही शहरात होत आहे. त्यामुळे भाजपने पिंपरी-चिंचवड शहरावर जास्तच लक्ष दिले आहे. 35 वर्षानंतर प्रथमच शहरात भाजपची बैठक होणार आहे.
 
या बैठकीसाठी राज्यातून सुमारे आठशे ते एक हजार पदाधिकारी,  मान्यवर उपस्थित राहणार आहेत. त्यासाठी शहरातील बहुतेक मोठी हॉटेल्स आरक्षित करण्यात आली आहेत. शहरात येणा-या व्हीआयपी नेत्यांची व्यवस्था व त्यांच्यासाठी पोलीस बंदोबस्त, आवश्यकतेनुसार रस्ते वाहतुकीतील बदल करण्यात येणार आहेत.
22 Apr 2017
 
एमपीसी न्यूज - विरोधी पक्षाच्या नगरसेवकांनी त्यांचे प्रश्न लोकशाही मार्गाने सभागृहात मांडले पाहिजेत. त्यांच्या प्रश्नाकडे सभागृहाचे लक्ष केंद्रीत करणे गरजेचे आहे. मात्र, लोकशाहीला काळीमा फासण्याचे काम सभागृहात करु नये, असे मत पुण्याचे पालकमंत्री गिरीश बापट यांनी व्यक्त केले. तसेच राष्ट्रवादीच्या नगरसेवकांच्या निलंबनाचे त्यांनी समर्थन केले.
 
पिंपरीत पत्रकारांशी ते बोलत होते. पिंपरी-चिंचवड महापालिकेच्या सर्वसाधारण सभेत गैरवर्तन केल्याचा ठपका ठेवत महापौर नितीन काळजे यांनी विरोधी पक्षनेते योगेश बहल, माजी महापौर मंगला कदम, नगरसेवक दत्ता साने, मयुर कलाटे यांचे निलंबन केले आहे.
 
अनेक वर्ष मी विरोधी पक्षात काम केले आहे. आमच्या प्रश्नांकडे सभागृहाचे लक्ष वेधण्यासाठी लोकशाही मार्गाने अनेकदा आंदोलन केले. पंरतु, असे करताना नियमांचे कधीच उल्लंघन केले नाही, असे सांगत बापट पुढे म्हणाले काँग्रेस-राष्ट्रवादी सारखे आम्ही वागत नाही. सगळ्यांना सभागृहात बोलून दिले जाते.
 
आपल्या प्रश्नांवर आवाज उठविण्यासाठी विरोधकांनी आंदोलन करावे. सभागृहातील हौदात धाव घ्यावी. परंतु, सभागृहाचा अवमान होईल, असे वर्तन करु नये. लोकशाहीला काळीमा फासणारे कृत्य केल्यास निलंबन करणे गरजेचे आहे, असेही ते म्हणाले. राष्ट्रवादीला जनतेने नाकारले आहे. महापालिकेत परिवर्तन झाले असून राष्ट्रवादीच्या नगरसेवकांनी त्याचे भान ठेवले पाहिजे. त्यांनी विरोधक झाल्यासारखे काम करावे.
 
राष्ट्रवादीच्या नगरसेवकांचे निलंबन कायद्यानुसारच केले आहे. ज्यांना कायद्याचे उल्लंघन केल्याचे वाटत असेल त्यांनी न्यायालयात जावे, असेही बापट म्हणाले.
22 Apr 2017

अनंत ​वाघमारे​ यांची बेकायदेशीर​पदोन्नती ​केली ​तुकाराम मुंढे​ यांनी रद्द​

एमपीसी न्यूज - पीएमपीएमएलच्या प्रथम श्रेणीच्या वाहतूक व्यवस्थापकपदी असलेले अनंत वाघमारे यांची पदोन्नती बेकायदेशीर असल्याचे उघकीस आल्यानंतर अध्यक्ष तुकाराम मुंढे यांनी त्यांची रवानगी थेट तृतीय श्रेणीच्या पदावर केली आहे. त्यांना आता भांडार विभागाचे प्रमुख पंकज गिरी यांच्या नियंत्रणाखाली काम करण्याचे आदेश दिले आहेत.


अनंत वाघमारे पीएमपीएमएलमध्ये ​22​वर्षांपूर्वी ​गुणवत्ता नियंत्रक​या तृतीय श्रेणीच्या पदावर नियुक्त झाले होते. ते सध्या प्रथम श्रेणीचे वाहतूक व्यवस्थापक आणि सरव्यवस्थापक ही पदे सांभाळत होते​,​ परंतु​तृतीय श्रेणीच्या पदावरून त्यांची  सिनीअर वर्क्स मॅनेजर, मुख्य अभियंता आणि संचलन वाहतूक व्यवस्थापकपदी  बेकायदेशीर पदोन्नती झाल्याचे आढळल्याने तुकाराम मुंढे यांनी त्यांना पदावरून हटवल्याची चर्चा सध्या कामगार वर्गात सुरू आहे.


सध्या वाघमारे​ यांच्या पदाचा कार्यभार​सुनील गवळी यां​च्याकडे सोपविण्यात आला आहे.  या​पूर्वी गवळी हे वाहतूक व्यवस्थापकपदी नियुक्त होते. त्यांच्याकडे आता वाहतूक विभागाचे संचालन आणि व्यावसायिक या दो​न्ही विभागांची जबाबदारी दिली आहे​.​

22 Apr 2017

एमपीसी न्यूज -  शेतक-यांच्या प्रश्नाकडे लक्ष वेधण्यासाठी आणि त्यांना कर्जमुक्ती देण्याच्या मागणीसाठी पुण्यातील तृतीयपंथी येत्या 2 मे रोजी जिल्हाधिकारी कार्यालय येथे एक दिवशीय अन्नत्याग आंदोलन करणार आहेत, या आंदोनाला खासदार राजू शेट्टी यांनी पाठिंबा दिला आहे.

यासंबंधीचे निवेदन देण्यासाठी काही तृतीपंथीयांनी आज खासदार शेट्टी यांची पत्रकार भवन येथे भेट घेतली, तेव्हा ते बोलत होते. यावेळी बोलताना ते म्हणाले तृतीयपंथीयांना देखील आता शेतक-यांच्या व्यथा समजत आहे, परंतू सरकारला त्याचे काहीच वाटत नाही. शेतक-यांवर आलेली आपत्ती ही नैसर्गिक आहे. शेतकरी जास्त बोलत नसला तरी तो मनातून अस्वस्थ आहे. त्यामुळे सरकारने त्यांना मदत करणे क्रमप्राप्त आहे.

या आंदोलनाला माझा पाठिंबा असून येत्या 2 मे रोजी मी त्यांची आंदोलनाच्या ठिकाणी जाऊन भेट घेणार असल्याचे त्यांनी यावेळी सांगितले.

22 Apr 2017

एमपीसी न्यूज - शेतीच्या प्रश्नाविषयी पंतप्रधान नरेंद्र मोदी यांच्यापेक्षा जेष्ठ नेते शरद पवार यांना अधिक जाण असल्याचे वक्तव्य  खासदार राजू शेट्टी यांनी केले. पुणे शहरात आज परिवर्तन युवा परिषदेचे उद्घाटन झाले, त्यानंतर झालेल्या तरूणांना राजकारणात का यावे यावे? परिसंवादात ते बोलत होते. यावेळी माजी मुख्यमंत्री पृथ्वीराज चव्हाण उपस्थित होते. यावेळी दोन्ही नेत्यांनी विचारलेल्या प्रश्नांची दिलखुलास उत्तरे दिली.

 

या कार्यक्रमात शेतीच्या प्रश्नांविसयी पंतप्रधान नरेंद्र मोदी आणि शरद पवार या दोघांपैकी कोणाला अधिक जाण असल्याचे विचारले असता खासदार राजू शेट्टी यांनी शरद पवार यांना अधिक जाण असल्याचे सांगताच सभागृहात हशा पिकला. राजु शेट्टी यांनी आज अचानक शरद पवार यांचे कौतुक केल्याने राजकीय क्षेत्रात तर्कविर्तक लढवले जात आहेत.

 

यावेळी बोलताना राजू शेट्टी म्हणाले, विद्यार्थीदशेपासून शेतक-याच्या प्रश्नासाठी  लढत असून हा लढा शेवटपर्यंत राहणार आहे. शेतक-यासाठी ऋणमुक्ती अभियान हाती घेतले  आहे. त्याअंतर्गत आगामी 1 मे पासून शेतक-यांचा सातबारा कोरा करम्यासाठी सरकारविरोधात तीव्र लढा उभारणार आहे.

 

तरुणांचा राजकारणाकडे पाहण्याच्या दृष्टीकोनात बदल होणे गरजेचे आहे. त्यासाठी जास्तीत-जास्त तरुणांनी राजकारणात येण्याची आवशक्यता आहे. जे नागरिक मतदान करत नाहीत ते ख-या अर्थाने देशाचे गुन्हेगार आहेत. जर त्या नागरिकांनी मतदान केले तर देशाच्या राजकारणात सक्षम पर्याय उपलब्ध होण्यास मदत होईल.

22 Apr 2017
 
एमपीसी न्यूज - पिंपरी-चिंचवड शहरातील शास्तीकराच्या निश्चित बांधकामाच्या आकडेवारीसाठी जीआययस मॅपिंग (Geographic Information Systems) प्रणालीद्वारे याचे सर्वेक्षण करण्याची, मागणी स्थायी समिती सदस्य प्रा.उत्तम केंदळे यांची प्रशासनाकडे केली आहे.
 
पिंपरी-चिंचवडमधे अनधिकृत बांधकामापाठोपाठ शास्तीकराचा मुद्दाही शहरातील नागरिकांच्या जिव्हाळ्याचा प्रश्न आहे. त्याच्या ठोस मर्यादा नसल्यामुळे शास्तीकर कमी करण्यास खुप अडचणी निर्माण झाल्या आहेत. त्यामुळे आता डिजिटल प्रणालीच्या सहाय्याने जीआययस मॅपिंगद्वारे शास्तीकराच्या कक्षेत बसणा-या सर्व बांधकामाची उंची व लांबी निश्चित करता येईल, असेही केंदळे यांनी म्हटले आहे.
 
जीआययस मॅपिंग प्रणाली राबविली तर शहरातील सर्वच भागाची भौगोलिक माहिती मिळेल. त्याचा भविष्यात फायदाच होणार असल्याचे त्यांनी प्रशासनाच्या निदर्शनास आणून दिले आहे. यासाठी प्रशासनाने देखील सहमती दर्शवली आहे.
Page 6 of 93