• 01.jpg
  • 1250x200.jpg
  • MPC_news.JPG
  • PhotoGraphy-School-1.jpg
  • sujit.JPG
20 Jun 2017


एमपीसी न्यूज - पुणे आणि पिंपरी-चिंचवड शहरात होत असलेली मेट्रो ही जागतिक दर्जाची करण्याबरोबरच नागरिकांसाठी सुसह्य, पर्यावरणपूरक आणि शहराचा ऐतिहासिक वासरा प्रतिबिंबीत करणारी असेल. यासाठी आम्ही प्रयत्नशील असू, अशी माहिती महामेट्रो रेल कॉर्पोरेशनच्या स्ट्रॅटेजीक प्लॅनिंग विभागाचे व्यवस्थापकीय संचालक रामनाथ सुब्रमण्यम यांनी आज (मंगळवारी) दिली.

पुणे मेट्रो रेल कॉर्पोरेशनच्या वतीने पिंपरी-चिंचवड महापालिकेत नगरसेवकांना मेट्रो प्रकल्पाची माहिती व्हावी, त्यांच्या शंकांचे निरसन व्हावे यासाठी मेट्रो संवादचे आयोजन करण्यात आले होते. त्यावेळी ते बोलत होते. महामेट्रोच्या सल्लागार समितीचे शशिकांत लिमये, महापालिकेचे आयुक्त श्रावण हर्डीकर, महापौर नितीन काळजे, उपमहापौर शैलजा मोरे, स्थायी समिती अध्यक्षा सीमा सावळे, विरोधी पक्षनेते योगेश बहल, भाजपा पक्षनेते एकनाथ पवार, पुणे मेट्रोचे प्रकाश कदम, श्रीनिवास कुलकर्णी नगरसेवक उपस्थित होते.

यावेळी बोलताना रामनाथ सुब्रमण्यम म्हणाले की, पिंपरी-चिंचवड महापालिका ते शिवाजीनगर असा पुणे मेट्रोचा पहिला टप्पा सुरू झाला असून यापैकी सहा स्टेशन्स ही पिंपरी-चिंचवड महापालिकेच्या हद्दीत येणार आहेत. या मार्गाच्या कामाला सुरूवात झाली असून येत्या काळात वाहतुकीचा प्रश्न सोडविण्यासाठी आम्ही प्रयत्नशील आहोत. याबरोबरच भविष्यात मेट्रो प्रकल्प हा पर्यावरणपूरक करण्यासाठी देखील आम्ही पाऊले उचलीत आहोत व एका झाडामागे 10 झाडे लावण्यास आम्ही कटिबद्ध आहोत.

20 Jun 2017
एमपीसी न्यूज- शाळांना पुरवण्यात येणाऱ्या बससेवेचे दर दुपटीने वाढवताना संचालक  मंडळाला विश्वासात घेणे आवश्यक होते, मात्र पीएमपीएमएलचे व्यवस्थापकीय संचालक व अध्यक्ष तुकाराम मुंढे  पीएमपीएमएलचे मालक असल्यासारखे वागत असल्याची टीका स्थायी समिती अध्यक्ष मुरलीधर मोहळ यांनी आज (मंगळवार) केली.

पुणे शहरामध्ये शाळांना पीएमपीएमएलकडून पुरवण्यात येणाऱ्या बससेवेचा दर 61 वरून 141 रुपये करण्यात आला असून हा निर्णय घेताना मुंढे यांनी संचालक मंडळाला विश्वासात घेतले नाही. हा निर्णय धोरणात्मक नसून प्रशासकीय असल्याचे सांगत मुंढे यांनी या  निर्णयापासून लोकप्रतिनिधींना दूर ठेवले, मात्र यामुळे नागरिकांच्या प्रश्नांना लोकप्रतिनिधींना तोंड द्यावे लागत आहे, अशी आगपाखडही मोहळ यांनी केली.

मोहळ म्हणले की, मुंढे यानी निर्णय घेताना लोकप्रतिनिधींना विश्वासात घेतले पाहिजे. महापालिकेच्या सभांना सुध्दा ते येत नाहीत. आपण पीएमपीएमएलचे मालक असल्यासारखे ते वागत आहेत. महापालिका आणि पीएमपीएमएल यांच्यामध्ये समन्वय असला पाहिजे. महापालिका पीएमपीएमएल कंपनीमध्ये भागधारक आहे. महापौर, स्थायी समिती अध्यक्ष, महापालिका आयुक्त हे संचालक मंडळाचे सभासद आहेत. त्यामुळे त्यांना सुध्दा महत्वाच्या निर्णयामध्ये सहभागी करुन घेतले पाहिजे.

मुंढे यांनी अचानकपणे शाळांच्या बस बंद केल्या. शाळा सुरु झाल्या असून मुलांचे हाल होत आहेत. अचानक पैसे वाढवल्यामुळे शाळांना पर्यायी व्यवस्था सुध्दा करता आली नाही. मनमानी पध्दतीने मुंढे काम करत असल्याचा आरोप मोहळ यांनी केला आहे.

शाळांच्या बस भाडेवाढ करण्याचा निर्णय प्रशासकीय असल्याचे त्यांचे म्हणणे आहे. वास्तविक त्यांना संचालक मंडळाच्या बैठकीमध्ये विषय आणायचा नसल्यास त्यांनी याबाबतची चर्चा करणे आवश्यक होते. कंपनीला तोटा होत असल्याच्या नावाखाली तडकाफडकी असे निर्णय घेणे योग्य नाही. लोकप्रतिनिधींचे म्हणणे सुध्दा ते ऐकून घेत नसल्याचा आरोप मोहळ यांनी केला आहे.
20 Jun 2017


एमपीसी न्यूज - स्मार्ट सिटी अभियान शहरात राबविण्यासाठी विशेष उद्देश वाहन (स्पेशल पर्पज व्हेइकल) कंपनी स्थापन करण्याची प्रक्रिया सध्या सुरू आहे. या कंपनीवर संचालक म्हणून मनसेचे गटनेते सचिन चिखले आणि शिवसेनेचे नगरसेवक प्रमोद कुटे यांची आज (मंगळवारी) नियुक्ती करण्यात आली. महापौर नितीन काळजे यांनी याबाबतची घोषणा केली.

सर्वसाधारण सभेत स्पेशल पर्पज व्हेईकल कंपनी स्थापन करण्यास मंजुरी मिळाली आहे. त्यादृष्टीने प्रशासनाच्या हालचाली सुरू झाल्या आहेत. एसपीव्ही कंपनीचे अध्यक्ष म्हणून नगरविकास विभागाचे प्रधान सचिव नितीन करीर हे कामकाज पाहतील. कंपनीवर महापालिकेच्या सहा संचालकांमध्ये महापौर नितीन काळजे, स्थायी समिती अध्यक्षा सीमा सावळे, सभागृह नेता एकनाथ पवार आणि विरोधी पक्षनेता योगेश बहल अशा चार सदस्यांचे नामनिर्देशन राज्य सरकारच्या नगरविकास विभागाने केले आहे.

या कंपनीवर व्यापक राजकीय प्रतिनिधित्व देण्यासाठी राष्ट्रीय, राज्य मान्यताप्राप्त राजकीय पक्षांच्या  संख्याबळाच्या उतरत्या क्रमानुसार मनसेचे सचिन चिखले आणि शिवसेनेचे प्रमोद कुटे यांची नियुक्ती करण्यात आली आहे.

20 Jun 2017

एमपीसी न्यूज - पिंपरी-चिंचवड महापालिकेच्या वृक्ष प्राधिकरण समितीवर राजकीय पक्षाच्या तौलाणिक संख्याबळानुसार 13 नगरसेवकांची आज (मंगळवारी) सर्वसाधारण सभेत नियुक्ती करण्यात आली.

भाजपचे नगरसेवक शितल शिंदे, विलास मडिगेरी, तुषार हिंगे, तुषार कामठे, संतोष लोंढे, प्रियंका बारसे, वसंत बो-हाटे, राष्ट्रवादीचे भाऊसाहेब भोईर, श्याम लांडे, वैशाली घोडेकर, शिवसेनेचे अॅड. सचिन भोसले, अपक्ष नवनाथ जगताप आणि साधना मळेकर यांची नियुक्ती करण्यात आली असल्याची, घोषणा महापौर नितीन काळजे यांनी सर्वसाधारण सभेत केली.

पिंपरी-चिंचवड महापालिकेची सार्वत्रिक निवडणूक झाल्याने पूर्वीची वृक्ष प्राधिकरण समिती संपुष्टात आली आहे. त्यामुळे नव्याने समितीची स्थापना करण्यात येणार आहे. पाच वर्षासाठी स्थापना करण्यात येणा-या या समितीचे महापालिका आयुक्त हे पदसिद्ध अध्यक्ष असणार आहेत. अतिरिक्त आयुक्त कार्याध्यक्ष तर मुख्य उद्यान अधिक्षक हे वृक्ष अधिकारी असणार आहेत.

फेब्रुवारी 2017 मध्ये पिंपरी-चिंचवड महापालिकेची सार्वत्रिक निवडणूक झाली. त्यामुळे पुर्वीची वृक्ष प्राधिकरण समिती संपुष्टात आली आहे. महाराष्ट्र (नागरी क्षेत्र) झाडांचे संरक्षण व जतन अधिनियमानुसार वृक्ष प्राधिकरणाची स्थापना करणे आवश्यक होते.
20 Jun 2017

एमपीसी न्यूज - हिंदुस्थान अॅन्टीबायोटिक्स (एचए) या  कंपनीची 59 एकर जागा सार्वजनिक सुविधांसाठी  पिंपरी-चिंचवड महापालिका घेणार आहे. 'बहुउद्देशिय सार्वजनिक मैदान' या प्रयोजनासाठी येथील 59 एकर जागा आरक्षित करण्याचा आणि त्यासाठी कलम 37 अन्वये फेरबदल करण्याचा प्रस्ताव पालिका आयुक्तांनी मांडला होता. त्याला सर्वसाधरण सभेत एकमताने मंजूरी देण्यात आली.

पिंपरी-चिंचवड महापालिकेची जून महिन्याची सर्वसाधारण सभा आज (मंगळवारी) पार पडली. सभेच्या अध्यक्षस्थानी महापौर नितीन काळजे होते.

पिंपरीत 70 एकर जागा एचए कंपनीच्या ताब्यात आहे. गेल्या अनेक वर्षांपासून कंपनी तोट्यात व कर्जबाजारी आहे. त्यामुळे कंपनीने आपल्या मालकीची जमीन खुल्या बाजारात विक्री करण्याची परवानगी सरकारकडे मागितली होती. 59 एकर जमीन जिल्हाधिका-यांना योग्य वाटतील अशा सशर्त अटी-शर्तीवर विकण्यास परवानगी देण्यात आली आहे.त्यानुसार जमीन विकण्याची प्रक्रिया सुरु आहे. ही जागा सार्वजनिक सुविधांसाठी पिंपरी महापालिका घेणार आहे. 

ही जागा मंजूर विकास योजनेत 'बहुउद्देशिय सार्वजनिक मैदान' म्हणून आरक्षित केल्यास नागरिकांना विविध सोई पुरविणे शक्य होणार आहे. प्रदर्शन भरवणे, सर्कस, लोक उपक्रमांसाठी, क्रीडा स्पर्धा, सांस्कृतिक, धार्मिक, व्याख्यानमाला, संगीत रजनी, राजकीय सभा, शैक्षणिक, सामाजिक उपक्रम, स्नेहसंमेलन, वाहनतळ, हेलिपॅड आदींसाठी उपयोग करता येईल.

10 टक्के क्षेत्र पालिकेचे प्रशासकीय कार्यालय, सभागृह, उपहारगृह, दुकाने, गाळे, स्वच्छतागृह, गेस्ट हाऊस, कर्मचारी वसाहत, अग्निशामक केंद्र, बँक एटीएम, तातडीचे वैद्यकीय सेवा केंद्र, व्यायामशाळा, वाचनालय आदींसाठी सोयीसूविधा निश्चित करता येतील. या आरक्षणाचे 90 टक्के क्षेत्र कायमस्वरुपी खुले राहण्याच्या हेतूने वर नमूद केल्यानुसार विविधोपयोगी सोयीसुविधांसाठी आयुक्त ठरवतील, अशा कालावधीकरिता तात्पुरती परवानगी देता येवू शकणार आहे. या विषयाला सर्वानुमते मंजूरी देण्यात आली.
20 Jun 2017


विश्व हिंदू परिषद, बजरंग दलतर्फे डेक्कन पोलिसांना निवेदन

एमपीसी न्यूज -  आषाढीवारीनिमित्त निघणा-या संतश्रेष्ठ ज्ञानेश्वर महाराज व जगद्गुरु तुकाराम महाराज यांचा पालखी सोहळा हा संपूर्ण भारताचा अभिमानाचा मानबिंदू आहे. त्यामुळे दरवर्षीप्रमाणे यंदाही शिव प्रतिष्ठानचे संस्थापक संभाजीराव भिडे गुरुजी व हजारो धारकरी संत श्रेष्ठांच्या चरणी लीन होण्यासाठी या सोहळ्यात सामिल झाले होते. जाज्वल्य धर्माभिमान व संत श्रेष्ठांप्रती आदर असलेल्या धारकरी बांधवांनी जाणून बुजून गोंधळ घालणे शक्य नाही. त्यामुळे संभाजीराव भिडे गुरुजी आणि शिव प्रतिष्ठानच्या कार्यकर्त्यांवरील गुन्हे मागे घ्यावे, अशी मागणी विश्व हिंदू परिषद, बजरंग दल पुणेतर्फे करण्यात आली आहे.

डेक्कन पोलीस स्टेशनचे वरिष्ठ पोलीस निरीक्षक यांना याबाबतचे निवेदन विश्व हिंदू परिषद, बजरंग दलाच्या कार्यकर्त्यांनी दिले. यावेळी महानगर मंत्री किशोर चव्हाण, संयोजक राजाभाऊ कु-हाडे, सहसंयोजक नितीन महाजन यांसह कार्यकर्ते उपस्थित होते.

राजाभाऊ कु-हाडे म्हणाले, वास्तविक पाहता संभाजीराव भिडे गुरुजी यांच्यासारखे व्यक्तिमत्त्व हजारो तरुणांचे प्रेरणास्थान आहे. आदर्श तरुणांची संस्कारित पिढी घडविण्याचे काम ते अनेक वर्षांपासून करीत आहेत. त्यामुळे पालखी आगमनाच्यावेळी झालेला हा प्रकार गैरसमजातून झालेला असून त्यांच्यावरील गुन्हे त्वरीत मागे घेण्यात यावे. गुरुजींना एकेरी भाषेत संबोधणा-या सर्व लोकांचा निषेधही विश्व हिंदू परिषद करीत असल्याचे त्यांनी सांगितले.

20 Jun 2017

एमपीसी न्यूज - महापालिका क्षेत्रातील वीज ग्राहक व वितरण कंपनी यांच्यात सुसंवाद व समन्वय राहावा यासाठी तसेच ग्राहकांना उत्तम व दर्जेदार सेवा पुरवण्यासाठी जिल्हा व तालुका स्तराप्रमाणे महापालिका क्षेत्रातही विद्युत वितरण संनियंत्रण समित्या गठित होणार आहेत. शासनाने तसा अद्यादेशही जारी केला आहे.

वीज पुरवठा ही अत्यंत महत्वाची बाब असून महापालिका क्षेत्रात अशा नियंत्रण समित्या गठित केल्या तर ग्राहक व महावितरण यांच्यात सुसंवाद राहील व ग्राहकांच्या समस्या लवकर सोडविण्यात येतील. विद्युत वितरण सनियंत्रण समिती गठित झाल्यावर या समितीच्या बैठका दर तीन महिन्यांनी होणार असून बैठकीतील निर्णयांची माहिती शासनाला करावयाच्या शिफारसी संदर्भात मुख्य अभियंत्यामार्फत शासनाला कळविण्यात येणार आहे.

राज्य शासनाने काढलेल्या अद्यादेशानुसार मनपा क्षेत्रातील या समितीचे गठन मनपा आयुक्तांना करता येणार आहे. समिती गठीत करण्यापूर्वी अशासकीय सदस्यांच्या नियुक्तीला पालकमंत्र्यांची सहमती घ्यावी लागणार असून ही नियुक्ती महिनाभरात करण्यात येणार आहे. या समितीमध्ये असणा-या कोणत्याही अशासकीय व शासकीय सदस्यांना प्रवास खर्च व भत्ते देण्यात येणार नाहीत.

या समितीच्या अध्यक्षपदी विधानसभा सदस्य, सहअध्यक्ष, संबंधित क्षेत्रातील विधानसभा सदस्य व त्या क्षेत्रातील महावितरणचे कार्यकारी अभियंता, सदस्य म्हणून त्या-त्या विधानसभा मतदारसंघातील सर्व झोन सभापती, विधानसभा मतदारसंघातील 10 नगरसेवक आणि उद्योग, शिक्षण, घरगुती ग्राहक, वितरण क्षेत्रात उत्कृष्ट काम कारणा-या दोन अशासकीय संस्थांचा एक प्रतिनिधी यांचा समावेश असणार आहे.

20 Jun 2017


एमपीसी न्यूज - पुणे कॅन्टोन्मेंट बोर्डाच्यावतीने संत ज्ञानेश्वर माऊली व जगतगुरू संत तुकाराम महाराज पालखी स्वागताकरीता पुलगेट येथे स्वागत कक्ष उभारुन दोन्ही पालख्यांचे स्वागत करण्यात आले. यावेळी पालखीतील वारकरी बांधवाना फराळांचे पाकीट आणि पाण्याच्या बाटल्यांचे वाटप करण्यात आले. दोन्ही पालख्यांचे आदरतिथ्य झाल्यानंतर दोन्ही पालख्या पंढरपूरकडे रवाना झाल्या.

संत ज्ञानेश्वर माऊली व जगतगुरू संत तुकाराम महाराज पालखी स्वागताकरीता पुलगेट येथे पुणे शहर पोलीस आयुक्त रश्मी शुक्ला, सहाय्यक पोलीस आयुक्त रविंद्र कदम, अतिरिक्त पोलिस आयुक्त रविंद्र सेनगावकर, पोलिस उपायुक्त डॉ.प्रविण मुंड़े, बसवराज तेली, अशोक मोराळे, सहाय्यक पोलिस आयुक्त निलेश मोरे, शिवाजी पवार, लष्कर पोलिस ठाण्याचे वरिष्ठ पोलिस निरीक्षक वसंत कुवर व पुणे कॅन्टोन्मेंट शांतता कमिटीचे सदस्य बापूसाहेब गानला, इसाक जाफर, प्रविण गाडे, विकास भांबुरे, दिलीप भिकुले, विजय भोसले, प्रकाश अरगडे, विनय भगत आदी उपस्थित होते.

पुणे कॅन्टोन्मेंट बोर्डाने दोन्ही पालख्यांचे स्वागत कक्ष उभारून स्वागत करण्याचे यंदाचे पहिलेच वर्ष आहे. यावेळी स्वागत कक्षात पुणे कॅन्टोन्मेंट बोर्डाचे मुख्य कार्यकारी अधिकारी डॉ. डी. एन. यादव , पुणे कॅन्टोन्मेंट बोर्डाचे उपाध्यक्ष अतुल गायकवाड, नगरसेवक विनोद मथुरावाला, माजी उपाध्यक्ष बापूसाहेब गानला, अभियंता सुखदेव पाटील, विद्युत अभियंता विजय चव्हाण, महसूल अधिकारी संजय मकवाना, अभियंता अभिजित तावडे, पुणे कॅन्टोन्मेंट बँकेचे संचालक संजय फटके, पोपट गायकवाड, निलेश कणसे, जितेंद्र शिंदे, विक्रम मोरे आदी उपस्थित होते.


पोलिस मित्र लष्कर पोलिस ठाण्याच्यावतीने पालखी सोहळ्यात कायदा सुव्यवस्था राखण्यासाठी  सकाळी मुस्लिम युवकांनी आपल्या पवित्र रमजान महिन्याची सकाळची सहेरी उरकून पोलिसांना सहकार्य केले. यामध्ये मयुरेश जाधव, अरमान शेख, नायाब खत्री, फरहान सय्यद, अतिक आत्तार, ताबिन शेख, सिराज बंगाली, मनाली घाडगे, विलाक्षी झुंबरे आदींनी पोलिस मित्र म्हणून पोलिस बांधवाना विशेष सहकार्य केले.

आषाढी वारीमधील वारकरी बांधवाना समता सामाजिक संस्थेच्यावतीने पुणे लष्कर भागात उपवासाचा फराळ, राजगिरा लाडू वाटप समता सामाजिक संस्थेचे अध्यक्ष विजय भोसले यांच्याहस्ते करण्यात आले. यावेळी विकास भांबुरे, दिलीप भिकुले, अनिकेत भोसले, संजय काळे, भारती अंकलेल्लू व ललिता काळे आदींनी फराळ वाटपासाठी सहकार्य केले. तसेच मुळे सायकल मार्टच्या वतीने हेमंत मुळे यांनी वारकरी बांधवाना फराळ वाटप केले.

tilak palkhi
palkhi 1
palkhi 2


20 Jun 2017

दिलीप कांबळे, बाळा भेगडे, महेश लांडगे, विजय काळे, भीमराव तापकीर सूचक

एमपीसी न्यूज ;  राष्ट्रीय लोकशाही आघाडीचे (एनडीए) राष्ट्रपतिपदाचे उमेदवार रामनाथ कोविंद यांच्या उमेदवारी अर्जावर महाराष्ट्रातील भाजपच्या 25 आमदारांनी आज सूचक म्हणून स्वाक्षऱ्या केल्या आहेत त्यातील पुण्यातील पाच आमदारांचा समावेश आहे.

राष्ट्रपतिपदाच्या निवडणुकीसाठी पुढील 23 जून रोजी कोविंद हे अर्ज दाखल करण्याची शक्‍यता आहे. त्यासाठी भाजपकडून जय्यत तयारी सुरू आहे. या अर्जावर अनुमोदक म्हणून 50 आमदार किंवा खासदार आणि सूचक म्हणूनही तितक्‍याच संख्येने आमदार किंवा खासदार सूचक म्हणून आवश्‍यक असतात. यामध्ये पुण्यातून राज्यमंत्री दिलीप कांबळे, आमदार बाळा भेगडे, भीमराव तापकीर, विजय काळे, महेश लांडगे हे पाच जण गेले होते. राज्याच्या इतर भागातूनही आमदार आले होते.

केंद्रीय संसदीय कामकाजमंत्री अनंतकुमार यांच्या मार्गदर्शनाखाली विशेष गट भाजपने या निवडणुकीसाठी सक्रिय केला आहे. यात राज्यमंत्री मुक्तार अब्बास नक्वी आणि सरचिटणीस भूपेंद्र यादव यांचा समावेश आहे. 
 म्हणजे एका अर्जावर शंभर जणांच्या स्वाक्षऱ्या आवश्‍यक असतात. भाजपकडून चार अर्ज दाखल केले जाणार आहेत. त्यासाठी प्रत्येक राज्यातील खासदार आणि आमदारांना आज दिल्लीत बोलविण्यात आले होते. महाराष्ट्रातील भाजप आमदारांनी सहप्रभारी राकेशसिंग यांच्या निवासस्थानी जाऊन या अर्जावर सह्या केल्या आहेेेत. 
20 Jun 2017


दारुविक्रीसाठी हॉटेलचालकांची नामी शक्कल, 50 मीटरचे झाले 500 मीटर!

एमपीसी न्यूज - सर्वोच्च न्यायालयाने राष्ट्रीय आणि राज्य महामार्गावरील दारू विक्री करणाऱ्या दुकानांवरील बंदी कायम ठेवतानाच त्यामध्ये हॉटेल-रेस्टॉरंट आणि परमीट रूम-बारवरही बंदी असल्याचे स्पष्ट केले आहे, मात्र अनेक हॉटेलचालकांनी नामी शक्कल लढवीत सर्वोच्च न्यायालयाच्या आदेशालाही वाटाण्याच्या अक्षता लावण्याचे काम चालविले आहे. सरकारी अधिकाऱ्यांना दक्षिणा देऊन तसेच हॉटेलला मोठी प्रदक्षिणा मारायला लावून ग्राहकांना सोमरसाचे तीर्थ खुलेआम उपलब्ध करून देण्यात येत आहे. पैशांच्या जोरावर सर्वोच्च न्यायालयाच्या आदेशालाही गुंडाळून ठेवणाऱ्या या हॉटेलचालकांवर शासन काय कारवाई करते, याकडे सर्वसामान्य नागरिकांचे लक्ष लागले आहे.

राष्ट्रीय महामार्गापासून 500 मीटरच्या आत दारु विक्री करण्यास सर्वोच्च न्यायालयाने बंदी घातल्यानंतर पिंपरी-चिंचवडमध्ये अनेक हुशार हॉटेल चालकांनी नामी शक्कल लढवत त्यातूनही पळवाट शोधून काढली आहे. वाकड येथे महामार्गालगत असलेल्या सयाजी हॉटेलने तर अजबच प्रताप केला आहे. शासकीय अधिकाऱ्यांना दक्षिणा देण्याबरोबरच ग्राहकांना हॉटेलला चक्क मोठी 'प्रदक्षिणा' घालयला लावून महामार्गापासून अवघ्या 50 मीटर अंतरावर असलेल्या हॉटेलचे प्रवेशद्वार 500 मीटर लांब करुन करून दाखविण्याची किमया केली आहे. 'सयाजी' प्रमाणेच शहरातील महामार्गालगतच्या अनेक हॉटेलचालकांनी असेच अंतर वाढविण्याची केले आहे.

मद्यप्राशन करून वाहने चालविल्यामुळे होणारे अपघात रोखण्यासाठी सर्वोच्च न्यायालयाने राष्ट्रीय व राज्य महामार्गापासून 500 मीटर अंतराच्या आत दारु विक्रीस बंदी घातली आहे. तसेच राष्ट्रीय व राज्य महामार्गावर मद्याचे चिन्ह किंवा मद्य उपलब्ध असल्याबाबत जाहिरातींवरही निर्बंध घालण्यात आले आहेत.

पिंपरी-चिंचवडमध्ये महामार्गालगत अनेक हॉटेल आहेत. अनेक हुशार हॉटेल चालकांनी त्यातूनही पळवाट काढली आहे. त्यासाठी विविध नामी शक्कल लढविल्या जात आहेत. महामार्गालगतच्या काही हॉटेल चालकांनी तर हॉटेलच्या आजूबाजूची जागा खरेदी केली अथवा भाड्याने घेतली आहे. त्या जागेत वळणावळणाचा रस्ता बनवून हॉटेलचे प्रवेशद्वार महामार्गापासून 500 मीटरपेक्षा जास्त अंतरावर असल्याचे दाखविण्यात येत आहे. त्यामुळे कायदा काहीही केला तरी हॉटेल व्यासायिक त्यातून पळवाट काढत असतात, मात्र या पळवाटेमुळे चक्क सर्वोच्च न्यायालयाच्या आदेशामागील हेतूलाच हरताळ फासण्यापर्यंत या मंडळींची हिंमत वाढल्याचे पहायला मिळत आहे.

देहूरोड -कात्रज बायपास राष्ट्रीय महामार्गावर अलिशान सयाजी हॉटेल आहे. हे अगदी महामार्गालगत आहे. या हॉटेलचे गेट महामार्गापासून जेमतेम 50 मीटर अंतरावर होते. हॉटेल महमार्गापासून 500 मीटरच्या आत असल्याने नियमाप्रमाणे हॉटेलमध्ये दारु विक्री बंद करावी लागणार होती. पंरतु, हॉटेल चालकाने नामी शक्कल लढवून त्यातूनही मार्ग काढल्याचे दिसून येत आहे. त्यामुळे अंतर लांब व्हावे यासाठी हॉटेलमध्ये प्रवेश करण्यासाठी हॉटेलला पूर्ण वळसा घालणारा  500 मीटर अंतराचा रस्ता बनविला. त्यामुळे महामार्गापासून 500 मीटर मोटार चालविल्याशिवाय सयाजी हॉटेलचे गेट येत नाही.

सर्वोच्च न्यायालयाच्या व शासनाच्या सर्व आदेशांचे आम्ही तंतोतंत पालन केले आहे. आम्ही कोणत्याही प्रकारचे बेकायदेशीर काम केलेले नाही, असा दावा सयाजी हॉटेलच्या व्यवस्थापनाकडून करण्यात येत आहे.

याबाबत उत्पादन शुल्क विभागाचे उपनिरीक्षक सूरज दाभेराव म्हणाले की, सार्वजनिक बांधकाम विभाग आणि भूमी अभिलेख कार्यालय यांच्याकडे हॉटेलची जागा मोजण्याची जबाबदारी आहे. त्यासाठी एक समिती नेमली आहे. त्या समितीने रस्त्याचे अंतर मोजल्यास जिल्हाधिकारी परवानगी देतात. उत्पादन शुल्क विभाग परवानगी देत नाही. परवानगी नसेल तरच उत्पादन शुल्क विभाग संबंधित हॉटेलवर कारवाई करु शकतो.

सरकारी अधिकारी एकमेकांवर जबाबदारी टोलवत आहेत आणि महमार्गालगत राजरोजपणे मद्यविक्री सुरू आहे. राज्य शासनाचे वरिष्ठ अधिकारी देखील त्याकडे सोयीस्कर डोळेझाक करीत आहेत.

Page 7 of 183
Open Chat
1
Close chat
Hello! Thanks for visiting us. Please press Start button to chat with our support :)

Start