• 01.jpg
  • 1250x200.jpg
  • MPC_news.JPG
  • PhotoGraphy-School-1.jpg
  • sujit.JPG
19 Jun 2017


एमपीसी न्यूज - पुणे मेट्रो रेल कॉर्पोरेशनच्या वतीने पिंपरी-चिंचवड पालिकेच्या नगरसेवकांसाठी उद्या (मंगळवारी) ‘मेट्रो संवाद’चे आयोजन करण्यात आले आहे.

महापालिका मुख्यालयाच्या पहिल्या मजल्यावरील यशवंतराव चव्हाण सभागृहात मंगळवारी दुपारी एक वाजता मेट्रो संवाद होणार आहे.

या संवादाअंतर्गत हैद्राबादच्या एल अॅण्ड टी मेट्रो रेल लिमिटेडचे माजी व्यवस्थापकीय संचालक विवेक गाडगीळ, पुणे मेट्रो रेल कॉर्पोरेशनचे रामनाथ सुब्रमण्यम्, महामेट्रोच्या सल्लागार समितीचे शशिकांत लिमये, पिंपरी-चिंचवड महापालिकेचे महापौर नितीन काळजे, आयुक्त श्रावण हर्डीकर उपस्थित राहणार आहेत.

19 Jun 2017


एमपीसी न्यूज - पुण्यात माउलींच्या पालखी सोहळ्यात काही गैरसमजुतीमुळे श्री शिवप्रतिष्ठानचे कार्यकर्ते आणि वारकरी यांच्यात गोंधळ झाल्याचे पोलिसांचे म्हणणे आहे. प्रत्यक्षात पोलीस आणि वारीचे चोपदार यांच्यात वाद झालेला असताना त्याला श्री शिवप्रतिष्ठानच्या धारकर्‍यांना जबाबदार धरून त्यांच्यावर गुन्हा दाखल करणे म्हणजे वड्याचे तेल वांग्यावर काढणे आहे. त्यामुळे महाराष्ट्राचे मुख्यमंत्री देवेंद्र फडणवीस यांनी याची त्वरित दखल घेऊन भिडे गुरुजी आणि त्यांच्या सहकार्‍यांवरील गुन्हे मागे घ्यावेत, अशी मागणी हिंदू जनजागृती समिती या संघटनेने केली.


महाराष्ट्रात वारकरी आणि धारकरी हे एकाच परंपरेचे दोन अविभाज्य भाग आहेत. श्री शिवप्रतिष्ठानचे धारकरी आणि  संभाजी भिडे गुरूजी गेल्या अनेक वर्षांच्या परंपरेनुसार वारीत सहभागी होत आहेत. त्यामुळे त्यांचे वारकर्‍यांशी स्नेहाचे संबंध असल्याचे स्पष्ट होते. तसेच वारकरी संप्रदायाची ओळख शांत, सहिष्णु, पांडुरंगाच्या भक्तीत लीन अशी आहे. त्यामुळे पोलीस यंत्रणेने हा गोंधळ मिटवण्याच्या ऐवजी वयोवृद्ध आणि तपोवृद्ध भिडे गुरुजी अन् श्री शिवप्रतिष्ठानचे कार्यकर्ते यांच्यावर गुन्हा दाखल करणे म्हणजे अधिकाराचा अतिरेक आहे. त्याचप्रमाणे भिडे गुरुजी यांच्यासारख्या एका वयोवृद्ध व्यक्तीवर खोटा गुन्हा दाखल करणार्‍या पोलीस अधिकार्‍याला त्वरित निलंबित करण्यात यावे, अशीही मागणी करण्यात आली आहे.

19 Jun 2017


एमपीसी न्यूज - पुणे शहराला 1685 पासून पालखीची परंपरा असून पुणे हे सांस्कृतिक शहर आहे. या शहरात भिडे गुरुजीच्या समर्थकांनी पालखी सोहळ्या दरम्यान केलेला प्रकार हा निषेधार्थ आहे. तसेच पुढील काळात गणेश उत्सवासारखे आयोजन शहरात होणार असून यामध्ये भिडे गुरुजींमुळे अनुचित प्रकार घडू शकतात. त्यामुळे त्यांना पुणे शहरात येण्यास बंदी घालावी, अशी मागणी काँग्रेस गटनेते अरविंद शिंदे यांनी केली.

भिडे गुरुजी व समर्थकांनी माउलींच्या पालखीच्या मध्येच घोषणा देत घुसण्याच्या घटनेचा निषेध व्यक्त करण्यासाठी पुणे महापालिका विरोधी पक्ष नेते चेतन तुपे, काँग्रेस गटनेते अरविंद शिंदे, शिवसेना गटनेते संजय भोसले यांनी संयुक्त पत्रकार परिषद घेतली. यावेळी ही मागणी करण्यात आली.

काल रात्री पुण्यात ज्ञानोबा माउली आणि तुकोबांच्या पालखी मार्गात वादावादी झाली होती. फर्ग्युसन रस्त्यावरून माउलींची पालखी मार्गक्रमण करीत असताना, संभाजी भिडे गुरुजींचे काही समर्थक दिंडीच्या पुढे येऊन मार्गक्रमण करू लागले. यावर दिंडीतील प्रमुखांनी आक्षेप घेतल्याने वाद निर्माण झाला होता. त्यामुळे माउलींची पालखी गुडलक चौकात एकाच जागी थांबून राहिली. ही पालखी थांबल्यामुळे माउलींच्या पालखीला पुण्यातील मुक्कामाच्या ठिकाणी पोहोचायला उशीर झाला. या विरोधात भिडे गुरुजी आणि समर्थकांनी विरोधात गुन्हा दाखल करण्यात आला आहे. मात्र, हा झालेला प्रकार पुणे या संस्कृतिक शहराच्या वैभवला काळीमा फासणारा असल्याचे सांगत पुढील काळात, असा प्रकार घडू नये यासाठी भिडे गुरुजींना पुण्यात बंदी घालण्याची मागणी केली.

तसेच पोलिसांनीही या प्रकरणी हलगर्जीपणा केला आहे. पालखी सोहळ्यात मानाच्या दिंड्यांमध्ये संभाजी भिडेंचे कार्यकर्ते अचानक तलवारी घेऊन शिरताना पोलीस काय करत होते, असा सवालही काँग्रेसचे गटनेते अरविंद शिंदे यांनी उपस्थित केला. 

19 Jun 2017


एमपीसी न्यूज - राष्ट्रवादी काँग्रेसने ठेकेदारांना पोसण्याचे काम केले आहे. परंतु, आम्ही ठेकेदारांना पोसणार नाहीत. पारदर्शक कारभार करण्याचा प्रयत्न करत असून सर्वसामान्यांना न्याय देण्यासाठी काम करत आहोत. आम्ही काय करायचे ते योगेश बहल यांनी आम्हाला सांगण्याची गरज नाही. राष्ट्रवादी काँग्रेस अद्यापही पराभवाच्या गर्तेतून सावरली नसल्याची, टीका सभागृह नेते एकनाथ पवार यांनी आज (सोमवारी) पत्रकारपरिषदेत केली. तसेच आम्ही कोणाच्याही रिमोट कंट्रोलनुसार काम करत नसल्याचेही, पवार म्हणाले.


राष्ट्रवादी काँग्रेसने पत्रकार परिषदेत घेऊन भाजप पदाधिका-यांवर गंभीर आरोप केले. त्यानंतर लगेच पत्रकार परिषद घेऊन पवार यांनी राष्ट्रवादीच्या आरोपांना उत्तर देताना आपला बचाव करत राष्ट्रवादीवर टीकेचा सूर कायम ठेवला.

एकनाथ पवार म्हणाले की, राष्ट्रवादीने अर्थसंकल्प चांगल्या पद्धतीने मांडला असता तर सगळे खर्च झाला असता. अर्थसंकल्पाला मुळातच उशीर झाला होता. त्यामुळे कोणाच्याही उपसूचना न स्वीकारण्याचा निर्णय भाजपने घेतला होता. उपसूचना स्वीकारल्या असत्या तर त्यासाठी आणखी दोन दिवसांचा जास्त अवधी लागला असता.

अर्थसंकल्पामध्ये जे विषय होते. ते सर्व विषय सर्वसाधारण सभेच्या विषयपत्रिकेवर आहेत. सत्तेचा वापर चुकीच्या पद्धतीने करणार नाही, असेही पवार म्हणाले. तसेच ताडपत्री घोटाळ्यात जे अधिकारी दोषी आढळतील त्यांच्यावर योग्य ती कारवाई करणार असल्याचेही, त्यांनी ठामपणे सांगितले.

19 Jun 2017


एमपीसी न्यूज - पिंपरी-चिंचवड महापालिका निवडणुकीनंतर सत्तेत आलेल्या भाजप पदाधिका-यांनी 1,59 कोटी रुपयांची 1 हजार 480 बिले रोखून धरली आहेत. या रकमेतून भाजप पदाधिका-यांना 'पठाणी' वसुली करायची असल्याचा घणाघाती आरोप, विरोधी पक्षनेते योगेश बहल यांनी आज (सोमवारी) पत्रकार परिषदेत केला. तसेच महापौर व सभागृह नेते कळसुत्री बाहुले असून पालिकेचा कारभार सत्ताबाह्य केंद्र चालवत असल्याचेही, ते म्हणाले.


यावेळी माजी महापौर व नगरसेविका मंगला कदम, वैशाली घोडेकर, नगरसेविका वैशाली काळभोर, सुलक्षणा शिलवंत, नगरसेवक नाना काटे, श्याम लांडे आदी उपस्थित होते.

योगेश बहल म्हणाले की, पिंपरी पालिकेचा तब्बल 5 हजार 150 कोटी रुपयांचा अर्थसंकल्प भाजपने कायदे व नियमांना तिलांजली देऊन मंजूर केला आहे. मुंबई महानगरपालिका अधिनियम 100 नुसार अर्थसंकल्पीय अंदाजाची अंतिम स्वीकृतीचा अधिकार महासभेच्या असताना देखील या अधिनियमाला वाटाण्याच्या अक्षता लावत अगोदर अर्थसंकल्प मंजूर करून घेतल्यानंतर चर्चा करण्याचा अजभ कारभार भाजपच्या सत्तेत सुरू झाला आहे.

आर्थिक वर्ष संपल्याचे कारण पुढे करत 31 मार्च 2017 नंतर ठेकेदारांची बिले स्वीकारली नाहीत. आजपर्यंत 31 मार्चनंतरही बिले स्वीकारली जात होती. परंतु, निवडणुकीनंतर सत्तेत आलेल्या भाजपने ठेकेदारांची 1,59 कोटी रुपयांची 1 हजार 480 बिले थांबविली आहेत. राष्ट्रवादीच्या काळात मंजूर झालेल्या कामाचा मलिदा भाजप पदाधिका-यांना लाटायचा असल्याचा, आरोप बहल यांनी केला आहे.

भाजपने दादागिरी करू नये. यापुढे विरोधाला विरोध न करता चुकीच्या कामांना विरोध करणार आहे. भाजपने राष्ट्रवादीने केलेल्या सर्व कामांची चौकशी करावी, असेही बहल म्हणाले.

भाजपचे आपल्याच नगरसेवकांना अज्ञान ठेवण्याचे डावपेच आहेत. स्थायी समितीकडे 500 उपसूचना आल्या होत्या. त्यापैकी 19 उपसूचना स्वीकारल्या आहेत. या उपसूचना नेमक्या कोणत्या आहेत, हे जाहीर का केले नाही. तसेच या उपसूचना कोणत्या आहेत हे स्थायी समितीच्या सदस्यांना देखील माहिती नसल्याचे, मंगला कदम म्हणाल्या.

19 Jun 2017


राष्ट्रपती पदासाठी रामनाथ कोविंद यांना पाठिंबा देण्याचे आवाहन

एमपीसी न्यूज - भारतीय जनता पक्षाने राष्ट्रपती पदासाठी रामनाथ कोविंद यांना उमेदवारी दिल्याने दलित समाजाच्या व्यक्तीला पुन्हा एकदा सर्वोच्च पदावर जाण्याची संधी मिळणार आहे. त्यामुळे विरोधकांनी राष्ट्रपती पदासाठी उमेदवार उभा करू नये, असे आवाहन केंद्रीय सामाजिक न्यायमंत्री रामदास आठवले यांनी केले. पुण्यात आयोजित पत्रकार परिषदेत ते बोलत होते.


यावेळी बोलताना आठवले म्हणाले, नरेंद्र मोदी आणि अमित शाह यांनी दलित व्यक्तीला राष्ट्रपती पदासाठी उमेदवारी देऊन भारतीय जनता पक्ष दलितांच्या आणि आरक्षणाच्या विरोधात नसल्याचे स्पष्ट केले आहे. हा निर्णय क्रांतिकारक असून  यामुळे भाजप सरकार दलित आणि मागासवर्गीय समाजाच्या उत्कर्षासाठी भूमिका मांडत असल्याचे सिद्ध झाले आहे.

विरोधकांचा समाचार घेताना ते म्हणाले, रामनाथ कोविंद यांना उमेदवारी दिल्याने विरोधकांची तोंडे बंद झाली आहेत. विरोधकांना भलत्याच नावाची अपेक्षा होती. जेणेकरून त्यांना सरकारला विरोध करण्याची संधी मिळाली असती. परंतु प्रत्यक्षात घडले भलतेच. त्यामुळे विरोधकांनी आता राष्ट्रपती पदासाठी उमेदवार न देता कोविंद यांना पाठिंबा द्यावा.

19 Jun 2017


रामनाथ कोविंद यांना उद्धव ठाकरेसुध्दा पाठिंबा देतील..

एमपीसी न्यूज - सर्वांना आश्चर्याचा धक्का देत ज्याप्रमाणे नरेंद्र मोदी आणि अमित शाह यांनी दलित समाजातील रामनाथ कोविंद यांना राष्ट्रपती पदासाठी उमेदवारी दिली त्यावरून भारतीय जनता पक्ष दलितांच्या आणि आरक्षणाच्या विरोधात नसल्याचे स्पष्ट झाले आहे, अशा शब्दात केंद्रीय सामाजिक न्याय राज्यमंत्री रामदास आठवले यांनी आपल्या भावना व्यक्त केल्या.


रामनाथ कोविंद यांची राष्ट्रपती पदासाठी निवड झाल्यानंतर अभिनंदन करण्यासाठी पुणे शहरात घेतलेल्या पत्रकार परिषदेत ते बोलत होते. यावेळी रिपब्लीकन पार्टी ऑफ इंडियाच्या कार्यकर्त्यांनी एकमेकांना पेढे भरवून आणि फटाके वाजवून आनंद साजरा केला.

यावेळी पुढे बोलताना ते म्हणाले, सरकारचा हा निर्णय क्रांतीकारी असून या निर्णयामुळे भारतीय जनता पार्टी दलित, मागासवर्गीय लोकांच्या उत्कर्षासाठी काम करत असल्याचे सिद्ध झाले आहे. इतर पक्षांनीही विरोधाचे राजकारण न करता दलित उमेदवाराला साथ द्यावी, असे आवाहन त्यांनी केले.

उद्धव ठाकरेसुध्दा पाठिंबा देतील...

दिवंगत बाळासाहेब ठाकरे यांनी जेव्हा शिवशक्ती-भिमशक्ती एकत्र यायला पाहिजे, अशी भूमिका घेतली होती. तेव्हा मी विलंब न करता त्यांना पाठिंबा देण्याचे ठरवले होते. त्यामुळे जर एखादा दलित व्यक्ती उच्च पदावर जाणार असेल तर शिवसेना त्याला विरोध करणार नाही, असे सांगत रामदास आठवले यांनी राष्ट्रपती पदासाठी उद्धव ठाकरे रामनाथ कोविंद यांना पाठिंबा देतील, असा विश्वास व्यक्त केला.

19 Jun 2017


एमपीसी न्यूज - नानापेठमधील निवडुंग विठोबा मंदिरात संत तुकाराम महाराजांची आणि भवानी पेठेत पालखी विठोबा मंदिरात संत ज्ञानेश्वर महाराजांच्या पालख्या विसावल्या असून पुण्यात दोन रात्र एक दिवसात मुक्काम असल्याने वारकरी काहीसे निवांतपणा आल्याने वारकऱ्यांनी पुणे दर्शनाचा बेत आखला आहे. शहरातील लाल महाल, सारसबाग, शनिवारवाडा, दगडूशेठ गणपती मंदिर अशा ठिकाणांना वारकरी भेट देत आहेत.


तर पुणेकर नागरिक माऊली संत ज्ञानेश्वर महाराज आणि तुकाराम महाराज यांच्या पालख्या विसाव्याच्या ठिकाणी दर्शनासाठी गर्दी करत आहेत. विसाव्यासाठी आलेल्या वारकऱ्यांच्या जेवण खाण्याची जबाबदारी मात्र भवानी पेठेतील रहिवासी मोठ्या आनंदाने उचलताना दिसत आहेत. वारीच्या काळात सारी कामे बाजूला ठेवून वारकऱ्यांच्या सेवेत हा सारा परिसर तल्लीन झाला आहे. सार्वजनिक मंडळांसह घराघरातही जेवणाच्या पंगती सुरू आहेत. या भागातल्या प्रत्येक लहान मोठ्या घरात हे अन्नदान सुरू होते. केवळ घरांमध्येच नाही तर विविध गोडाऊनच्या बाहेरही अशा पंक्ती उठवल्या जात आहेत.

वारकऱ्यांसाठी खास पिठलं-भाकरीचा बेत

दिवसरात्र चालून आणि बाहेरच खाऊन कंटाळलेल्या वारकऱ्यांसाठी या भागात खास पिठलं भाकरीचा बेत केला जातो. या सोबत वरण-भात, ठेचा, वांग्याची भाजी असेही पदार्थ केले जातात. वर्षभराने येणाऱ्या या लाडक्या पाहुण्यांसाठी जिलेबी, लापशी, शिरा असे गोड पदार्थ जेवणात ठेवले जातात.

19 Jun 2017


गायीचे दूध 27 रुपये तर म्हशीचे 36 रुपये लीटर

एमपीसी न्यूज - राज्य सरकारने दूध खरेदीमध्ये तीन रुपयांनी वाढवण्याचा निर्णय घेतला आहे. त्यानुसार गायीचे दूध 27 रुपये लिटर तर म्हशीचे दूध 36 रुपये दरांनी खरेदी केले जाणार आहे. मात्र, दुधाच्या विक्रीच्या दरात कोणतीच वाढ करण्यात आलेली नाही.


पशू, दुग्ध व मत्स्य विभागाच्या सचिवांच्या अध्यक्षतेखाली गठीत करण्यात आलेल्या प्रदत्त समितीने या खरेदी दरातील वाढीला मान्यता दिला आहे. त्यामुळे 24 रुपये लीटरने खरेदी केले जाणारे गायीचे दूध 27 रुपये लिटरने तर 33 रुपये लीटरने खरेदी कले जाणारे म्हशीचे दूध 36 रुपये लीटरने खरेदी केले जाणार आहे. मात्र, नागरिकांचे हित लक्षात घेता विक्री दरात सरकारने कोणतीही वाढ केलेली नाही. विशेष म्हणजे यापुढे महागाई निर्देशांक लक्षात घेऊन राज्यातील दूध खरेदी आणि विक्री दराबाबत प्रदत्त समितीची वर्षातून किमान एकदा बैठक आयोजित केली जाणार आहे. या बैठकीत दूध खरेदी आणि विक्री दर निश्चित करण्यात येणार आहे.

यापूर्वीही 11 एप्रिल 2017 रोजी दूध खरेदीमध्ये राज्य सरकारने 2 रुपयांनी वाढ केली होती. त्यानुसार गायीचे दूध 22 रुपयांवरून 24 रुपये तर म्हशीचे दूध 31 रुपयांवरून 33 रुपये लीटरने खरेदी केले जात होते.

19 Jun 2017


एमपीसी न्यूज -   व्यसन हे वाईट असते. व्यसनाच्या आहारी जाऊ नका, असा संदेश लोकप्रतिनिधी जनतेला ज्या ठिकाणावरून देतात, राज्य सरकारच्या महत्वाच्या बैठका होतात, नेत्यांची सततची वर्दळ जेथे असते त्या पुणे स्टेशन येथील नवीन शासकीय विश्रामगृहाच्या आवारात बिअर आणि दारुच्या बाटल्यांचा खच पाहायला मिळाल्याने सगळीकडे बाटल्यांमागचे तळीराम कोण, या प्रश्नावर एकच चर्चा रंगली आहे. दारुच्या या बाटल्या नवीन शासकीय इमारतीच्या प्रवेशद्वाराच्या आतील डाव्या बाजूस असणा-या झाडाखाली आढळल्या. 

पुणे स्टेशन येथील नवीन शासकीय विश्रामगृह या ठिकाणी लोकप्रतिनिधी, प्रशासनातील अधिकारी आणि पोलीस कामानिमित्त येत असतात. या इमारतीच्या आवारात सर्व सामान्य नागरिकाला आत जायचे म्हटले तरी देखील कोणी बोलावले काय काम आहे, अशा प्रश्नांना प्रवेशद्वारावरील पोलिसांच्या प्रश्नाचा सामना करावा लागतो. ही एवढी सक्षम यंत्रणा असताना दारुच्या बाटल्या आल्या कोठून या बाटलीचे खरे तळीराम कोण, असा प्रश्न उपस्थित झाला आहे.

एका बाजूला व्यसन करू नका ते केल्याने आजाराचा सामना करावा लागतो आणि संसार उद्धवस्त होतात, असा सल्ला देणा-या राजकीय नेते व प्रशासकीय अधिकारी विश्रामगृहत हा प्रकार घडल्याने दिव्या खालीच अंधार असल्याचे स्पष्ट होत आहे. तर या तळीरामांवर कोण कारवाई करणार, असा प्रश्न निर्माण झाला आहे.

Page 9 of 183
Open Chat
1
Close chat
Hello! Thanks for visiting us. Please press Start button to chat with our support :)

Start