20 Apr 2017

उर्जामंत्री बावनकुळे यांचा आरोप

 

एमपीसी न्यूज - पुणे महापालिका आयुक्त शहरातील महावितरणच्या कामात आडकाठी निर्माण करत आहेत. जर त्यांनी वेळीच महावितरणच्या कामाला परवानगी दिली नाही तर भविष्यात पुणेकरांना लोडशेडींगला सामोरे जावे लागू शकते, असे उर्जामंत्री चंद्रशेखर बावनकुळे यांनी सांगितले.

 

ते म्हणाले की, पुणे शहरात महावितरणच्या कामासाठी 600 कोटी रुपयांची तरतूद आहे. याकरिता शहरात केबल टाकण्याची कामे प्रलंबित आहेत. यासाठी रस्ते खोदण्यासाठी महावितरणने प्रशासनाकडे परवानगी मागितली आहे. परंतू प्रशासनाने यावर अजूनही उत्तर दिले नाही, असे नगरसेवकांसोबत केलेल्या चर्चेतून समजल्याचे त्यांनी सांगितले. जर प्रशासनाने असेच आमच्या प्रश्नाकडे दुर्लक्ष केले तर 600 कोटींची ही तरतूद अन्यत्र वळवली जाईल. यामुळे नुकसान पुणेकरांचेच होईल. ही कामे जर वेळेत पूर्ण नाही झाली तर भविष्यात त्यांना लोडशेडिंगला सामोरे जावे लागू शकते.

 

प्रशासनाने महावितरणसोबत करार करून रस्ते खोदण्यासाठी परवानगी द्यावी. रस्ते खोदल्यानंतर आम्ही ते पूर्ववत करून देऊ आणि खोदलेल्या खड्डे पूर्ववत झाल्यानंतर प्रशासनाचे समाधान झाल्याशिवाय संबंधित ठेकेदारांचे बील देणार नाही. त्यामुळे प्रशासनाने लवकर परवानगी द्यावी, असे आवाहन त्यांनी केले.

20 Apr 2017

एमपीसी न्यूज - 'व्हीव्हीआयपी' संस्कृतीला चाप लावण्यासाठी केंद्रीय मंत्रिमंडळाने लोकप्रतिनिधींच्या 'लाल', 'अंबर' दिव्यांच्या वाहनांना प्रतिबंध घालण्याचा निर्णय घेतला आहे. परंतु, आपल्याला असा निर्णय झाल्याचे माहितच नसल्याचे पिंपरी-चिंचवडचे महापौर नितीन काळजे यांनी सांगतिल्याने या निर्णयाबाबत ते अनभिज्ञ असल्याचे दिसून आले.

 

व्हीव्हीआयपी संस्कृतीला चाप लावण्यासाठी पंतप्रधान नरेंद्र मोदी यांच्या पुढाकाराने बुधवारी केंद्रीय मंत्रिमंडळाच्या बैठकीत लाल दिव्यांच्या वाहनांना प्रतिबंध घालण्याचा  ऐतिहासिक निर्णय घेण्यात आला. हा निर्णय 1 मेपासून लागू होणार आहे.

 

शहराचे प्रथम नागरिक असलेल्या महापौर नितीन काळजे यांच्या वाहनावर 'अंबर' दिवा आहे. केंद्र सरकारने लोकप्रतिनिधींच्या वाहनांवरील दिवा हटविण्याचा नियम केल्याने महापौरांना देखील त्यांच्या वाहनावरील दिवा काढावा लागणार आहे. याबाबत महापौर काळजे यांना विचारले असता असा नियम झाल्याचे आपल्याला माहितच नसल्याचे ते म्हणाले.

 

बाजूला बसलेले सत्तारुढ पक्षनेते एकनाथ पवार यांनी महापौरांच्या कानात सांगितल्यानंतर योग्यवेळी आपण मोटारीवरील दिवा काढू असे सांगत, त्यांनी सारवा सारव करण्याचा प्रयत्न केला.

 

....महापालिकेचे वाहनही वापरणार नाही?

 

शहराचा प्रथम नागरिक असल्याने विविध कार्यक्रमांना मला जावे लागते. त्यामुळे पालिकेचे वाहन वापरत आहे. पालिकेचे वाहन न वापरण्याबाबत आपण विचार करत असल्याचेही, ते म्हणाले.

20 Apr 2017
मुख्यमंत्र्यांना आश्वासनांचे आठवण करून देण्यासाठी करणार तीव्र आंदोलन
एमपीसी न्यूज - शेतकरी कर्जमुक्ती, अनधिकृत बांधकामांचे नियमितीकरण, शास्तीकर माफी यासाह जनतेला दिलेल्या विविध आश्वासनांची मुख्यमंत्री व सत्तारूढ भाजपला आठवण करून देण्यासाठी चिंचवड येथे 26 व 27 एप्रिलला होणाऱ्या भाजपच्या प्रदेश कार्यकारिणी बैठकीच्या वेळी दोन दिवसांचे उपोषण करण्याचा निर्णय सर्व विरोधी पक्षांच्या संयुक्त बैठकीत आज घेण्यात आला.
 
 
बैठकीस भारिप बहुजन महासंघाचे देवेंद्र तायडे, स्वराज अभियानचे मानव कांबळे, राष्ट्रवादी काँग्रेसचे फजल शेख, विजय लोखंडे, आनंदा यादव, शिवसेनेचे मारुती भापकर, एआयएमआयआयचे सम्राट साळवे, शब्बीर शेख, काँग्रेसचे मनोज कांबळे, आरपीआय कवाडे गटाचे रामदास ताटे, समाजवादी पक्षाचे रफिक कुरेशी, शेतकरी कामगार पक्षाचे हरीश मोरे, मराठा सेवा संघाचे प्रकाश जाधव, संभाजी ब्रिगेडचे अभिमन्यू पवार, नागरी हक्क सुरक्षा समितीचे प्रदीप पवार, वीर भगतसिंग विद्यार्थी परिषदेचे नकुल भोईर, भारतीय मायनॉरिटीज सुरक्षा महासंघाचे अमित कांबळे, ओबीसी संघर्ष समितीचे विशाल जाधव आदी विविध पक्ष व संघटनांचे पदाधिकारी उपस्थित होते.

 

मनसेचे शहराध्यक्ष सचिन चिखले यांनीही या निर्णयाला पाठिंबा जाहीर केला आहे. शिवसेना पदाधिकारी मात्र चर्चेनंतर याबाबतची भूमिका जाहीर करणार आहेत, असे यावेळी स्पष्ट करण्यात आले.

 

राज्यातील शेतकऱ्यांना कर्जमुक्ती मिळालीच पाहिजे, शेतीमालाला हमीभाव मिळाला पाहिजे, अनधिकृत बांधकामे नियमितीकरणाच्या निर्णयाबाबत स्पष्टता यावी, सरसकट शास्तीकर माफ करण्यात यावा, मराठी, मुस्लिम व धनगर समाजाला आरक्षण मिळावे, शहरातील गोरगरीबांना किमान शासकीय व महापालिकेच्या योजनेअंतर्गत किमान 500 चौरसफुटांची घरे मिळावीत, न्यायालयात जाऊन झोपडपट्टी पुनर्वसन प्रकल्पातील लाभार्थींना घरांपासून वंचित ठेवण्यास कारणीभूत ठरलेल्या पिंपरी-चिंचवड महापालिकेच्या स्थायी समिती अध्यक्षांनी त्याबाबत जाहीर खुलासा करावा, या मागण्यांसाठी हे आंदोलन करण्यात येणार आहे.
 

भाजप प्रदेश कार्यकारिणी बैठकीच्या निमित्ताने मुख्यमंत्री, केंद्रातील व राज्यातील भाजपचे मंत्री तसेच सर्वच वरिष्ठ नेते चिंचवडला येणार आहेत. निवडणुकीच्या निमित्ताने त्यांनी जनतेला विविध आश्वासने दिली होती. त्यावर विश्वास ठेवून जनतेने त्यांना सत्ता दिली आहे, मात्र त्या आश्वासनांचा भाजपला विसर पडल्याने, त्याची आठवण करून देण्यासाठी बैठकीच्या ठिकाणासमोर दोन दिवसांचे उपोषण करण्याचा निर्णय बैठकीत घेण्यात आला.

20 Apr 2017

एमपीसी न्यूज - राष्ट्रवादीला सत्तेत असताना शास्तीकर, अनधिकृत बांधकामाचे प्रश्न सोडविता आले नाहीत. त्यामुळे शहरातील जनतेने त्यांना नाकारले असून ते पराभवाच्या गर्तेतून अद्यापही बाहेर पडले नसल्याची टीका, सत्तारुढ पक्षनेते एकनाथ पवार यांनी केली.

 

पिंपरी-चिंचवड महापालिकेतील गोंधळानंतर ते पत्रकारांशी बोलत होते. यावेळी महापौर नितीन काळजे, नगरसेवक नामदेव ढाके, केशव घोळवे, चंद्रकांत नखाते आदी उपस्थित होते.

 

राष्ट्रवादी काँग्रेसने गेल्या 15 वर्षांत महापालिका लुटण्याचे काम केले. त्यामुळे त्यांना शहरातील जनतेने नाकारले. गेल्या कित्येक वर्षांपासून शहरातील अनधिकृत बांधकामे, शास्तीकर सारखे जटील प्रश्न प्रलंबित होते. राष्ट्रवादीला हे प्रश्न सोडविता आले नाहीत, असे पवार म्हणाले.

 

भाजप केंद्र, राज्य सरकारच्या मदतीने प्रलंबित प्रश्न सोडविण्याचा प्रयत्न करत आहे. आम्ही जनतेची कामे करत आहोत. जनतेची कामे करण्याचे आमचे उद्दिष्ट असून त्यासाठी आम्ही कटिबद्ध आहोत, असे सांगत पवार म्हणाले, राष्ट्रवादीला पराभव पचविता आला नसून पराभवाच्या गर्तेतून ते अद्यापही बाहेर आले नाहीत.

 

पराभूत झाल्यापासून राष्ट्रवादीने स्टंटबाजी सुरू केली आहे. प्रथम प्रशस्त कार्यालयासाठी आंदोलन केले. त्यानंतर त्यांना मोठे कार्यालय देखील देण्यात आले. तरी देखील त्यांची स्टंटबाजी सुरु असल्याचे, एकनाथ पवार म्हणाले.

 

आपण कोणाच्याही रिमोट कंट्रोल खाली काम करत नाही. महापौर झाल्यापासून आपल्याला एखादे काम करावे, यासाठी कोणाचाही फोन आला नसल्याचे, महापौर नितीन काळजे म्हणाले. राष्ट्रवादीला रिमोट कंट्रोल खाली काम करण्याची सवय असल्याची, टिप्पणीही त्यांनी केली.

20 Apr 2017

नियमाच्या नावाखाली भाजपने भ्रष्टाचाराचे दालन सुरु केल्याचा आरोप

 

महापालिकेच्या इतिहासात पहिल्यांदाच सुरक्षा अधिकारी सभागृहात

 

एमपीसी न्यूज - लोकशाही मार्गाने मतदानाची मागणी केली, असतानाही भाजपने कुटील डाव रचत आमचे निलंबन करत लोकशाहीचा गळा घोटला असल्याची, टीका विरोधी पक्षनेते योगेश बहल यांनी केली. नियमाच्या नावाखाली भाजपने भ्रष्टाचाराचे दालन सुरु केले आहे. निलंबन करणे म्हणजे भाजपचा पळपुटेपणा असून महापालिकेतील आजचा काळा दिवस असल्याचेही, ते म्हणाले.

 

पिंपरी-चिंचवड महापालिकेची सर्वसाधारण सभा पार पाडल्यानंतर घेतलेल्या पत्रकार परिषदेत ते बोलत होते. यावेळी शिवसेनेचे गटनेते राहुल कलाटे, मनसेचे गटनेते सचिन चिखले, नगरसेवक अजित गव्हाणे, विक्रांत लांडे, राजू मिसाळ आदी उपस्थित होते.  



महापौर नितीन काळजे रिमोट कंट्रोलनुसार काम करत असल्याचा आरोप करत योगेश बहल म्हणाले, भाजपची महापालिकेत दादागिरी सुरू आहे. महापौरांना सभा शाखेचे नियम माहित नसून ते सभाशास्त्रानुसार काम करत नाहीत. सत्तारुढ पक्षनेते एकनाथ पवार, सीमा सावळे हे महापौरांवर दबाव आणतात. नगरसचिवांना दमबाजी करत असल्याचा, आरोपही बहल यांनी केला. महापौरांनी सभाशास्त्राचे नियम पाळले पाहिजेत. भाजपकडे बहुमत असतानाही ते मतदान घेण्यास का घाबरत होते? असा प्रश्न बहल यांनी उपस्थित केला.

 

राष्ट्रवादी काँग्रेसने विरोधकांचा नेहमीच सन्मान केला आहे.  परंतु, भाजप आम्ही म्हणू तो कायदा करत आहे. त्यांची दादागिरी सुरू आहे. भाजपने निलंबनाचे कारण सांगावे. शास्तीकर माफ करण्याचा निर्णय घेतल्याबद्दल आम्ही मुख्यमंत्र्यांचे आभार देखील मानले आहेत. परंतु, 31 मार्च 2017 पर्यंतच्या सर्व अवैद्य बांधकामांना 100 टक्के शास्तीकर माफ करण्याची आम्ही मागणी केली होती.

 

भाजपने लोकशाहीचा गळा घोटण्याचे काम केले आहे. महापालिकेच्या इतिहासात प्रथमच सुरक्षारक्षकांना सभागृहात बोलविण्यात आले असून ही खेदाची बाब आहे. भाजपच्या पदाधिका-यांना मनमानी पद्धतीने काम करायचे आहे. अंदाजपत्रकावर बोलू नये म्हणून आमचे निलंबन करण्यात आले आहे. लाटेमध्ये निवडून आलेल्यांना नियम, कायदा, धोरण काहीच कळत नाही. दोन, तीन नगरसेवकांना माहीत असून ते सभागृह डोक्यावर घेण्याचा प्रयत्न करत असल्याचेही, बहल म्हणाले.

 

पोलीस संरक्षणात महापालिकेची लुटमार करण्याचे काम करण्यासाठी भाजपला अधिका-यांची साथ मिळणार असल्याचेही, ते म्हणाले. नियमाच्या नावाखाली भाजपने भ्रष्टाचाराचे दालन सुरू केले आहे. आम्हाला ठेकेदारांची दलाली करतो म्हणणारे ब्लॅकमेलिंग, कोर्टात जाण्याचे काम करत असल्याची टिप्पणीही, बहल यांनी केली.

 

राहुल कलाटे म्हणाले, 31 मार्च 2017 पर्यंतच्या सर्व अवैद्य बांधकामांना 100 टक्के शास्तीकर माफ करण्याची शिवसेनेची मागणी आहे. जनतेच्या मागणीसाठी आंदोलन करणा-यांना भाजपने निलंबित केले आहे. भाजपची दादागिरी सुरू आहे. ज्येष्ठ नगरसेवकांचे निलंबन करणे निषेधार्थ आहे. भाजपकडे बहुमत असताना निलंबन करण्याची गरज नव्हती. नगरसेवकांचे निलंबन मागे घेण्यात यावे, अशी मागणीही त्यांनी केली.

 

सचिन चिखले म्हणाले की, 100 टक्के शास्तीकर माफ झालाच पाहिजे. नगरसेवकांचे निलंबन करणे निषेधार्थ आहे.

20 Apr 2017

पुणे जिल्ह्यात 1100 कोटींचे वीजबील थकित


एमपीसी न्यूज - महाराष्ट्रातील शेतक-यांकडे व्याज आणि दंडासह 17 हजार कोटींची थकबाकी आहे. यातील व्याज आणि दंड सोडला तर उर्वरीत 14 हजार कोटीची थकबाकी शेतक-यांनी दीड वर्षाच्या कालावधीत पाच हप्त्याच्या स्वरुपात द्यावी. या थकबाकीच्या स्वरुपात मिळालेल्या पैशातून नवीन शेतक-यांना वीजजोड देण्यात येतील. शेतक-यांसाठीच महावितरणची इतर कामे केली जातील, असे सांगत कुठल्याही परिस्थितीत शेतकऱ्यांना वीजबिलात माफी मिळणार नसल्याचे उर्जामंत्री चंद्रशेखर बावनकुळे यांनी स्पष्ट केले. पुण्यातील विधानभवन येथे आयोजित केलेल्या पत्रकार परिषदेत ते बोलत होते.

 

राज्यसरकारला वीजनिर्मितीसाठी प्रत्येक युनिटमागे सहा रुपये खर्च येतो. तीच वीज शेतक-याला 1.10 पैसे दराने दिली जाते. त्यामुळे चोवीस तास वीज पाहिजे असेल तर त्यासाठी वेळेत वीजबील भरणे गरजेचे असल्याचे त्यांनी सांगितले. शेतक-यांनी रात्री ऐवजी दिवसा वीजेची मागणी केली आहे. त्यामुळे अशा शेतक-यांच्या मोटारी एकत्र करून त्यांच्यासाठी सौरउर्जेचा प्रकल्प स्थापन करण्यात येणार असून त्याद्वारे त्यांची वीजेची मागणी पूर्ण करणार असल्याचे त्यांनी सांगितले.

20 Apr 2017

एमपीसी  न्यूज  - शिक्षण क्षेत्रातील अग्रगण्य संस्था असलेल्या प्रोग्रेसिव्ह एज्यूकेशन सोसायटीच्या वतीने दिला जाणारा 'पिंपरी-चिंचवड समाजभूषण' पुरस्काराची घोषणा करण्यात आली. यंदा भोसरी विधानसभा मतदार संघाचे आमदार महेश लांडगे यांना हा पुरस्कार जाहीर झाला आहे. फुलगांव आश्रम येथील प. पू. स्वामी स्वरुपानंद सरस्वती यांच्या हस्ते या पुरस्काराचे वितरण करण्यात येणार आहे.

 

 

प्रोग्रेसिव्ह एज्यूकेशन सोसाटी, पुणे संचलित निगडी-यमुनानगर येथील मॉडर्न शैक्षणिक संकूलात येत्या रविवारी (दि.23) सायंकाळी 6.00 वाजता पुरस्कार प्रदान कार्यक्रमाचे आयोजन करण्यात आले आहे. तसेच, संस्थेच्या वतीने दरवर्षीप्रमाणे वसंत व्याख्यानमालेचा सांस्कृतिक उपक्रमही सुरू आहे. यामध्ये दिलीप हल्याळ, स्मिता ओक, प्रकाश ऐदलाबादकर, विश्‍वास मेहेंदळे, मिलिंद जोशी, गणेश शिंदे, माणिक गुट्टे,  प्रा. अरुण घोडके आदी मान्यवर विविध विषयांवर विचारमंथन करणार आहेत.

20 Apr 2017

पंतप्रधान नरेंद्र मोदी यांना एमआयटी स्कूल ऑफ गव्हर्नमेंटचे आवाहन



एमपीसी न्यूज - देशाती राजकारणाला नवी दिशा देण्यासाठी संपुर्ण भारतात इंडियन इन्स्टिट्यूट ऑफ पॉलिटेक्नीकल लीडरशिप अॅण्ड गव्हर्नन्स (आयआयपीएलजी) सुरू कराव्यात. अशा संस्था संबंधीत राज्याच्या विधानसभा, लोकसभा, राज्यसभा, भारत सरकार आणि खाजगी शिक्षण संस्थांच्या एकत्रीत सहभागाने चालवल्या गेल्या पाहिजे. याकरीता देशाचे पंतप्रधान नरेंद्र मोदी यांना एमआयटी स्कूल ऑफ गव्हर्नमेंटने पत्र पाठवून आवाहन केले आहे, अशी माहिती माईर्स एमआयटी शिक्षणसंस्था समुहाचे उपाध्यक्ष प्रा.राहूल कराड यांनी पत्रकार परिषदेत सांगितले.

 

यावेळी कम्युनिस्ट पक्षाचे अजिक अभ्यंकर, क्रीडा पत्रकार सुनंदन लेले, पंडीत वसंतराव गाडगीळ, नगरसेवक सिध्दार्थ शिरोळे, पुणे इंटरनॅशनल लिटररी फेस्टीव्हलच्या मंजिरी प्रभु, अॅड.असिम सरोदे आदी उपस्थित होते.

 

ते पुढे म्हणाले की, भारतातील राजकीय नेतृत्व आणि प्रशासनाचे शिक्षण देणारी इंडियन इन्स्टिट्यूट ऑफ पॉलिटेक्नीकल लीडरशिप अॅण्ड गव्हर्नन्स ही संस्था गुणवत्तेच्या दृष्टीने आयआयटी आणि आयआयएम यांच्या धर्तीवर असावी असा प्रस्ताव आहे.देशातील प्रत्येक राज्यात राष्ट्रीय दृष्टया महत्वाची म्हणून या संस्थेची स्थापना करावी.

 

कराड पुढे म्हणाले की, जगातील सर्वात मोठ्या लोकशाही देशाचे रुपांतर महान लोकशाहीमध्ये करण्यासाठी देशात प्रक्रिया चालू आहे.मात्र अशा वेळी राजकारण आणि राजकिय नेते यांच्याबद्दल शिक्षीत तरुणांमध्ये औदासिन्य आणि भ्रमनिरास कुप मोठ्या प्रमाणात आहे.आजकाल सुशिक्षीत तरूण हा राजकिय प्रक्रियेपासून विन्मुख आहे. तरुणांनी राजकीय वृत्ती विकसीत करण्यासाठी काही दुरगामी स्वरुपाचे प्रयत्न जाणीवपुर्वक आणि सुनियोजीत दिशेने करण्यासाठी संस्थात्मक यंत्रणा उभी करणे आवशक्य आहे.

20 Apr 2017

‘फरांदे करंडक’ क्रिकेट स्पर्धा


एमपीसी न्यूज - फरांदे क्रिकेट अ‍ॅकॅडमी आयोजित ‘फरांदे करंडक’ क्रिकेट आंतर अ‍ॅकॅडमी (16 वर्षाखालील) स्पर्धेत एचके बाऊंस अ‍ॅकॅडमी आणि व्हिजन क्रिकेट अ‍ॅकॅडमी या संघांनी आपापल्या प्रतिस्पर्धी संघांचा पराभव करून स्पर्धेत विजयी सलामी दिली.

 

विधी महाविद्यालयाच्या मैदानावर सुरू असलेल्या या स्पर्धेत फरांदे क्रिकेट क्लब संघाने पहिल्यांदा फलंदाजी करताना 20.3 षटकात 10 गडी बाद 131 धावा केल्या. फरांदे संघाचे फलंदाज ठराविक अंतराने बाद होत गेल्याने त्यांना 130 धावांवर समाधान मानावे लागले. कुणाल तारटे (41 धावा), हर्षल हाडके(26 धावा), अव्देत नवले (15), ओंकार सोंडकर (13), शिवम होलमाने (20) यांनी संघाच्या डावाला आकार दिला. एचके संघाच्या अखिलेश पंडीत याने 22 धावात 5 गडी टिपत फरांदे संघाचा निम्मा संघ बाद केला. त्याला चेतन राजपुत (3-23) याने चांगली साथ दिली. हे आव्हान एचके बाऊंस अ‍ॅकॅडमीने 25 षटकात व 2 गडी राखून पूर्ण केले. सुधांत एस. (38), आदिनाथ देशपांडे(22), मोहीत दहीभाते (19) व अनिकेत सहाणे (10) यांनी संघाला विजय मिळवून देण्यात मोलाचा वाटा उचलला. सामनावीर हा किताब अखिलेश पंडीतला देण्यात आला.

 

प्रणय महाले याने केलेल्या अर्धशतकी खेळीच्या जोरावर व्हिजन क्रिकेट अ‍ॅकॅडमीने डॉमनिक क्रिकेट अ‍ॅकॅडमीचा 8 गडी राखून सहज पराभव केला. पहिल्यांदा फलंदाजी करताना डॉमनिक संघाचा डाव 18.3 षटकात व 85 धावांवर संपुष्टात आला. प्रताप जोरी (4-14) व  हृषीकेश शेकद्रा (3-4) यांनी सुरेख गोलंदाजी करून डॉमनिक संघाचा डाव आटोपता घेतला. हे आव्हान व्हिजन क्रिकेट अ‍ॅकॅडमी संघाने10.5 षटकात व केवळ 2 गडी गमावून पूर्ण केले. विजयाचा शिल्पकार ठरलेल्या प्रणय महाले याने 22 चेंडत 54 धावा केल्या. तर, तुशार राईकर (21 धावा) याने त्याला योग्य साथ देत संघाचा विजय सुकर केला.

 

स्पर्धेचा सविस्तर निकालः गटसाखळी फेरीः 1) फरांदे क्रिकेट क्लबः 20.3 षटकात 10 गडी बाद 131 धावा (हर्षल हाडके 26 (11, 3 चौकार), अव्देत नवले 15, ओंकार सोंडकर 13, कुणाल तारटे 41 (20, 4 चौकार), शिवम होलमाने 20 (11, 4 चौकार), अखिलेश पंडीत 5-22, चेतन राजपुत 3-23) पराभूत वि. एचकेबाऊंस अ‍ॅकॅडमीः 25 षटकात 8 गडी बाद 132 धावा (सुधांत एस. 38 (21, 5 चौकार), आदिनाथ देशपांडे 22 (15, 2 चौकार), मोहीत दहीभाते 19 (8, 3 चौकार), अनिकेत सहाणे 10, कृष्णा छचलानी 2-15); सामनावीरः अखिलेश पंडीत;

 

2) डॉमनिक क्रिकेट अ‍ॅकॅडमीः 18.3 षटकात 10 गडी बाद 85 धावा (कार्तिक सिंग 14, ऋषभ खुडे 9, प्रताप जोरी 4-14, हृषीकेश शेकद्रा 3-4) पराभूत वि. व्हिजन क्रिकेट अ‍ॅकॅडमीः 10.5 षटकात 2 गडी बाद 86 धावा (प्रणय महाले 54 (22, 9 चौकार, 1 षटकार), तुशार राईकर 21 (12, 2 चौकार), चैतन्य वर्पे 1-24); सामनावीरः प्रणय महाले

20 Apr 2017
शास्तीकर माफीच्या मागणीवरून सभागृहात गोंधळ घातल्याचा ठपका
 
भाजप - राष्ट्रवादी नगरसेवकांमध्ये जोरदार घोषणाबाजी
 

एमपीसी न्यूज - पिंपरी महापालिका सर्वसाधारण सभेत 31 मार्च 2017 पर्यंतच्या सर्व अवैध बांधकामांना 100 टक्के शास्तीकर माफ करावा या मागणीसाठी राष्ट्रवादीने महापौरांपुढील हौद्यात धाव घेतली. सभा कामकाज रोखून धरले. त्यामुळे संतप्त झालेल्या महापौरांनी विरोधी पक्षनेते योगेश बहल, माजी महापौर मंगला कदम यांच्यासह राष्ट्रवादीच्या चार नगरसेवकांचे निलंबन केले. यामुळे राष्ट्रवादीसह शिवसेना, मनसेच्या नगरेसवकांनी सभात्याग करत भाजपचा निषेध केला.

 

पिंपरी-चिंचवड महापालिकेची सर्वसाधरण सभा गुरुवारी पार पडली. महापौर नितीन काळजे सभेच्या अध्यक्षस्थानी होते. एप्रिल महिन्याच्या विषय पत्रिकेवर सात प्रस्ताव होते. त्यापैकी चार विषय मंजूर करण्यात आले असून तीन विषय तहकूब करण्यात आले.

 

शास्तीकराच्या मुद्यावर चर्चेला शिवसेनेचे गटनेते राहुल कलाटे यांनी सुरुवात केली. अनेक सदस्यांनी 100 टक्के शास्तीकर माफ करण्याची मागणी केली. नगरसेविका माई ढोरे यांनी 1000 फुटापर्यंतच्या अनधिकृत घरांचा शास्तीकर माफ करण्याची उपसूचना मांडली. त्यांच्या उपसूचनेसह विषय मंजूर करण्यात आला. त्यानंतर राष्ट्रवादीच्या नगरसेविका वैशाली घोडेकर यांनी उपसूचना मांडली. त्यावर महापौर काळजे यांनी मंजूर की नामंजूर न सांगताच कामकाजाला सुरुवात केली.

 

विरोधी पक्षनेते योगेश बहल यांनी  2017 पर्यंतच्या घरांसह 100 टक्के शास्तीकर माफ करण्याची आणि त्यावर मतदान घेण्याची मागणी केली. त्यानंतरही महापौर काळजे यांनी कामकाज सुरू ठेवल्यानंतर राष्ट्रवादीचे सर्व नगरसेवक मतदान घेण्याच्या मागणीसाठी महापौरांच्या आसनासमोर गेले आणि घोषणाबाजी सुरू केली. राष्ट्रवादीचे नगरसेवक दत्ता साने यांनी झाडाच्या कुंड्या महापौरांसमोरील आसनावर ठेवल्या. सभागृहात गोंधळ सुरू झाल्याने महापौरांनी सभा 10 मिनिटांसाठी तहकूब केली.    

                                              

सभासुरू झाल्यानंतरही गोंधळ सुरू होता. भाजपच्या नगरसेविका सीमा सावळे यांनी राष्ट्रवादीच्या नगरसेवकांना निलंबित करण्याची मागणी केल्यानंतर महापौर काळजे यांनी विरोधी पक्षनेते योगेश बहल, माजी महापौर मंगला कदम, दत्ता साने, मयुर कलाटे यांना पुढील तीन सर्वसाधारण सभेसाठी निलंबित करण्याची घोषणा केली. निलंबित केलेले सदस्य सभागृबाहेर जात नसल्याने सीमा सावळे यांनी सुरक्षा अधिका-याला आवाज देत सदस्यांना बाहेर काढण्याचे सांगितले. त्यानंतर राष्ट्रवादी, शिवसेना, मनसेच्या नगरसेवकांनी सभात्याग करत भाजपचा निषेध केला.

 

त्यानंतर राष्ट्रवादी, भाजपच्या नगरसेवकांनी एकमेकांच्या विरोधात जोरदार घोषणाबाजी केली. त्यामुळे महापालिकेत तणावाचे आणि गोंधळाचे वातावरण निर्माण झाले होते.


 

palika andolan

Page 10 of 93