• 1.JPG
  • PhotoGraphy-School-1.jpg
  • punenews.jpg
16 May 2017
एमपीसी न्यूज -  पुणे महापालिकेचे उपमहापौर नवनाथ कांबळे (वय 48 ) यांचे हृदयविकाराच्या तीव्र झटक्याने आज निधन झाले मॉर्निंग वॉकसाठी निघाले असताना त्यांना हृदयविकाराचा झटका आला. त्यानंतर त्यांना उपचारासाठी रुबी रुग्णालयात दाखल करण्यात आले. मात्र उपचारादरम्यानच त्यांचे निधन झाले. 
 
नवनाथ कांबळे हे रिपाइंचे ज्येष्ठ कार्यकर्ते असून दलित पँथरमध्येही त्यांचा सक्रिय सहभाग होता. सन 1997 मध्ये ते प्रथम नगरसेवक म्हणून निवडून आले. त्यानंतर सन 2002 मध्ये झालेल्या त्रिदस्यीय प्रभाग पद्धतीमध्ये प्रभाग क्रमांक चौदा (किलरेस्कर न्यूमॅटिक कंपनी) या प्रभागातून ते विजयी झाले होते. निवडून आल्यानंतर शहर सुधारणा समितीचे अध्यक्षपदही त्यांनी भूषविले होते. रिपाइंचे शहराध्यक्ष म्हणूनही त्यांनी काम पाहिले होते.
 
भाजपने पुण्यात एकहाती सत्ता मिळाल्यानंतर मित्रपक्ष आरपीआयला (आठवले गट) उपमहापौर दिले. आरपीआयकडून उपमहापौर म्हणून नवनाथ कांबळे यांच्या नावावर शिक्कामोर्तब करण्यात आले. फेब्रुवारीमध्ये झालेल्या निवडणुकीत कांबळे कोरेगाव मतदार संघातून भाजपच्या चिन्हावर निवडून आले होते. त्यानंतर महापालिका निवडणुकीत भाजपसोबत युती करण्याचा निर्णय आरपीआयने घेतला होता. शहरातील 162 जागांपैकी दहा जागांवर आरपीआयला उमेदवारी देण्यात आली होती. दहापैकी पाच जागांवर आरपीआयचे उमेदवार निवडून आले.
 
कांबळे यांचा जन्म 5 मार्च 1969 रोजी झाला होता. त्यांचे शालेय शिक्षण कोरेगाव पार्क येथील संत गाडगे महाराज विद्यालयातून झाले. वाडीया महाविद्यालयातून बी.ए.ची पदवी पूर्ण केली. नुकत्याच झालेल्या महापालिका निवडणुकीत पुण्यात भाजप बरोबर युती केल्यानंतर रिपब्लिकन पक्षातर्फे त्यांना उपमहापौर पदाची संधी मिळाली होती. आंबेडकरी चळवळीतील कार्यकर्ते असलेले नवनाथ कांबळे रामदास आठवले यांचे निकटचे स्नेही होते. दोन महिन्पूर्वीच ते उपमहापौर पदावर विराजमान झाले होते.

 

कांबळे यांची अंत्यायात्रा ते राहत असलेल्या घोरपडे गावातील भीमनगर येथील निवासस्थानापासून सायंकाळी 5 वाजता निघणार असून सायंकाळी सहा वाजता त्यांच्यावर कोरेगाव पार्क पोलीस चौकी शेजारील स्मशानभुमीत अंत्यसंस्कार करण्यात येणार आहेत. 
 
 

 

नवनाथ कांबळे यांच्या कारकिर्दीवर एक नजर...


1977 - मध्ये त्यांनी दलित पँथरमधून सामाजिक कार्यास सुरूवात केली.

1979 - मध्ये भारतीय विद्यार्थी संसदेच्या माध्यमातून विद्यार्थी संघटनेत सक्रीय

1980 - मध्ये भारतीय विद्यार्थी संसदेचे पुणे शहराध्यक्ष

1982 - नामांतर आंदोलनात सहभाग, रामदास आठवले यांच्या नेतृत्वाखाली पुणे ते मुंबई लॉँग मार्च मोर्चा

1983 - नामांतर लढ्यातील तीव्र आंदोलनात अग्रभागी

1983-1985 - भारतीय दलित पँथर, पुणे शहर

1984 - नामांतर आंदोलनातील सहभागामुळे ठाणे येथे कारावास

1986-1989 भारतीय दलित पँथरचे पुणे शहर सरचिटणीस

1990-1996 - रिपब्लिकन पार्टी ऑफ इंडियाचे पुणे शहराध्यक्ष

1997-2002 - पुणे महानगरपालिकेत प्रथम नगरसेवक म्हणून विजयी

1997 - स्थायी समिती सदस्य म्हणून कामकाज

1998 - हडपसर प्रभाग समिती अध्यक्ष म्हणून पदभार

2002 - पुणे महापालिकेत निवडणुकीत दुस-यांदा विजय

2003 - शहर सुधारणा समिती अध्यक्षपद

2005-2009 - रिपब्लिकन पार्टी ऑफ इंडिया पश्चिम महाराष्ट्र सरचिटणीस

2008-2009 - रिपब्लिकन पार्टी ऑफ इंडियाचे दुस-यांदा पुणे शहर अध्यक्ष

2011 - पुणे शहरातील रिपब्लिकन पक्षाचा राज्यस्तरीय निर्धार मेळाव्याच्या आयोजनामध्ये प्रमुख सहभाग

2017 - पुणे महापालिकेच्या निवडणुकीत तिस-यांदा विजयी

15 मार्च 2017 - उपमहापौरपदी निवड

 

15 May 2017

उत्तम चौधरी सरचिटणीस तर कार्याध्यक्षपदी सतिश काकडे

एमपीसी न्यूज - टाटा मोटर्स एम्प्लॉईज युनियनच्या अध्यक्षपदी विष्णू नेवाळे यांची निवड करण्यात आली आहे. तर उत्तम चौधरी यांची सरचिटणीस म्हणून नेमणूक करण्यात आली आहे.

पिंपरी-चिंचवड उद्योगनगरीचा आर्थिक कणा समजल्या जाणाऱ्या टाटा मोटर्स कामगार संघटनेच्या कार्यकारिणीची निवड आज (सोमवारी) पार पडली.

कामगार संघटनेचे अध्यक्ष समीर धुमाळ, कार्याध्यक्ष संजय काळे, सरचिटणीस सुरेश जासूद यांच्या जागी, शिक्षण मंडळ सदस्य विष्णू नेवाळे यांच्याकडे कामगार संघटनेच्या अध्यक्षपदाची धुरा सोपविण्यात आली आहे. तर कार्याध्यक्षपदी सतिश काकडे व सरचिटणीसपदी उत्तम चौधरी यांची नेमणूक करण्यात आली आहे. ही निवड बिनविरोध झाल्याचा दावा उत्तम चौधरी यांनी केला आहे.

15 May 2017

एमपीसी न्यूज - पिंपरी-चिंचवड महापालिकेच्या क्षेत्रिय कार्यालयाच्या कार्यक्षेत्रातील कचरा संकलित करून कचरा डेपोपर्यंत वाहतूक करण्याच्या कामाच्या निविदा प्रक्रियेला विलंब करणार्‍या अधिका-यांवर कारवाई करण्याची मागणी माजी नगरसेवक मारुती भापकर यांनी महापालिकेकडे केली आहे.

भापकर यांनी महापालिका आयुक्त श्रावण हर्डीकर यांना दिलेल्या निवेदनात म्हटले आहे की, पिंपरी-चिंचवड महापालिकेच्या क्षेत्रीय कार्यक्षेत्रातील कचरा गोळा करून त्याची कचरा डेपोपर्यंत वाहतूक करण्याच्या कामासाठी 'ब' व 'फ' क्षेत्रीय कार्यालयांतर्गत घरोघरीचा कचरा गोळा करून तो मोशी येथील कचरा डेपोपर्यंत वाहतूक करण्यासाठी ठेकेदार 'बीव्हीजी'ला पालिकेने 2011-12 मध्ये पाच वर्षांसाठी काम दिले होते.

प्रथम वर्षासाठी प्रतिटन 714 रुपये व त्यापुढील प्रत्येक वर्षासाठी पाच टक्के दरवाढीस मान्यता देण्यात आली होती. या कामाची मुदत 2 जानेवारी 2017 रोजी संपूष्टात आली होती. तत्कालीन स्थायी समितीने 3 जानेवारी 2017 ते 30 एप्रिल 2017 पर्यंत मंजूर दराने मूदत वाढ दिली होती. सदर कामाची मुदत 30 एप्रिल 2017 रोजी संपूष्टात आली होती.

त्यामुळे कचरा संकलित करणे प्रति टन 911 रुपये व कॉम्पॅक्टरसाठी  637 रुपये, ट्रकसाठी 764 रुपये  बीव्हीजी आणि क्षितीज वेस्ट मॅनेजमेंट सर्व्हिसेस प्रा. लि. यांना 1 मे 2017 ते 31 ऑगस्ट 2017 पर्यंत अथवा नवीन निविदा कार्यवाही पूर्ण होईपर्यंत मुदतवाढ देण्यास व याकामी येणार्‍या अंदाजे  4 कोटी 55 लाख 23 हजार रुपये खर्चास स्थायी समितीने एकमताने मंजुरी दिली असल्याचे भापकर यांनी निवेदनात म्हटले आहे.

कचरा समस्या ही शहरातील नागरिकांच्या आरोग्याशी, जीविताशी संबंधित समस्या आहे. या कामाच्या निविदा प्रक्रिया काढायला, विलंब होतोच कसा? अशा प्रश्न उपस्थित करत या निविदा प्रक्रियेला विलंब करणा-या अधिका-यांवर कडक कारवाई करण्याची मागणी, भापकर यांनी केली आहे.

15 May 2017

एमपीसी न्यूज - मागील दोन दिवस पुणे, पिंपरी-चिंचवडमध्ये मुसळधार वळीवाचा पाऊस पडला आहे. त्यानंतर तापमानात चांगलीच घट झाली आहे. आज (सोमवारी) शहराचे कमाल तापमान 35.9 अंश सेल्सिअस इतके नोंदवण्यात आले. तर लोहगावचे तापमान 36.8 अंश सेल्सिअस इतके खाली आले आहे.   


महिन्याच्या सुरुवातीपासून शहराचे तापमान 40 अंशाच्या आसपास होते. त्यामुळे नागरिक उकाड्याने चांगलेच हैराण होत होते. मात्र, मागील दोन दिवसांपासून पुणे, पिंपरी-चिंचवड परिसरात वळीवाच्या पावसाने हजेरी लावल्यानंतर वातावरणात गारवा निर्माण झाला. त्यामुळे नागरिकांना दिलासा मिळाला आहे.

सकाळपासून ढगाळ वातावरणामुळे हवेत थोडा गारवा जाणवला. परंतु ब्रम्हपुरीचा पारा 46.5 अंशावर गेला असून आज राज्यातील सर्वाधिक तापमान म्हणून ब्रम्हपुरीची नोंद करण्यात आली आहे. तर महाबळेश्वर येथे 19.2 अंश इतकी राज्यात सर्वात कमी तापमानाची नोंद झाली आहे. 

काल (रविवारी) दुपारी मान्सून अंदमान बेटावर दाखल झाला असून 5 जूनपर्यंत कोकणात येण्याचे संकेत हवामान खात्याकडून वर्तविण्यात आले आहेत. लवकर सुरू झालेल्या पावसामुळे नागरिकांमध्ये आनंदाचे वातावरण तयार झाले आहे.

15 May 2017

एमपीसी न्यूज - चिंचवड, थरमॅक्स चौकातील पाण्याच्या पाईपलाईनचा आज (सोमवारी) नट बोल्ट लुझ झाल्यामुळे 'एअर' वॉल तुटल्याने हजारो लीटर पाणी वाया गेले. 'एअर' वॉल बसविण्याचे काम सुरू असल्याचे महापालिकेच्या अधिका-यांनी सांगितले.


आकुर्डीतील खंडोबामाळ चौक ते थरमॅक्स चौकादरम्यान असलेल्या पाईपलाईनचे नट बोल्ट लुझ झाल्यामुळे 'एअर' वॉल तुटला होता. त्यामुळे हजारो लीटर पाणी वाया गेले आहे. एकीकडे पिंपरी-चिंचवड शहरात महापालिकेने 2 मे पासून पाणीटंचाई सुरू केली आहे. तर दुसरीकडे मात्र पाण्याची पाईपलाईन फुटून हजारो लीटर पाणी वाया जात आहे.


त्यामुळे आधीच पाणी टंचाईच्या झळा सोसणार्‍या शहरवासीयांना डोळ्यांदेखत पाणी वाया गेल्याचे पाहून दुष्काळात तेरावा महिना म्हणण्याची वेळ आली आहे.

15 May 2017

एमपीसी न्यूज - भ्रष्टाचा-यांना पकडून देण्याचे नागरिकांचे काम आहे. भ्रष्टाचा-यांना पकडलेच पाहिजे. त्याची सुरुवात झाली आहे. भ्रष्टाचार करणा-यांना प्रशासन पाठिशी घालणार नाही. गैरप्रकार, भ्रष्टाचार खपवून घेतले जाणार नसल्याचे आदेश सर्व विभागप्रमुखांना दिले आहेत. महापालिकेत कोणत्याही प्रकारचा भ्रष्टाचार खपवून घेतला जाणार नसून भ्रष्टाचा-यांना शिक्षा झालीच पाहिजे, असे स्पष्ट मत पिंपरी-चिंचवड महापालिकेचे आयुक्त श्रावण हर्डीकर यांनी व्यक्त केले.

पिंपरी-चिंचवड श्रमिक पत्रकारसंघातर्फे आयुक्त हर्डीकर यांच्याशी पत्रकारांच्या वार्तालाप कार्यक्रमाचे आयोजन केले होते. पत्रकारांनी विचारलेल्या प्रश्नांना उत्तर देताना ते बोलत होते. यावेळी पिंपरी-चिंचवड श्रमिक पत्रकार संघाचे अध्यक्ष सुनील लांडगे, उपाध्यक्ष अनिल कातळे, सरचिटणीस दीपेश सुराणा आदी पदाधिकारी उपस्थित होते.

महापालिकेचे अंदाजपत्रक नागरिकांसाठी असते. अंदाजपत्रकात नागरिकांचा सहभाग असला पाहिजे. पुढील वर्षीच्या बजेटमध्ये नागरिकांचा सहभाग घेतला जाईल, असे सांगत हर्डीकर म्हणाले, एमआयडीसी, प्राधिकरण, सैनिक आणि महापालिका यांची एकत्रित बैठक घेण्यात येईल.

महापालिका प्रशासन कार्यक्षम करणार आहे. अधिका-यांनी वेळेत निर्णय गरजेचे आहे. दररोजची कामे दररोज पूर्ण केली पाहिजेत. पॉलिशच्या निर्णयासाठी उशीर होऊ शकतो. दररोजच्या कामात दिरंगाई खपवून घेतली जाणार नाही. नागरिकांच्या तक्रारींची दखल घेणे गरजेचे आहे. नोंदणी करणे, दखल घेणे आणि त्याच्यावर उचित कारवाई प्रशासन करत आहे. नागरिकांनीही नावे बदलून तिच निवेदने देऊ नयेत, असेही ते म्हणाले.

मी रुजू होण्याअगोदर पाणी कपातीचा निर्णय घेतला होता. एकदिवसाआड पाणी पुरवठा केला असून केवळ 20 टक्केच पाणी कपात केली आहे. येत्या एक दोन दिवसात पाणीपुरवठ्याच्या तक्रारी कमी होतील. शहरातील कच-याचा प्रश्न गंभीर होत आहे. जिथे कचरा निर्माण होते. तिथेच कचरा वेगळा करणे गरजेचे आहे. कच-याची समस्या उद्भवू नये, यासाठी तांत्रिक बाबी करण्यात येतील, असेही आयुक्त हर्डीकर यांनी सांगितले.

ओला आणि सुका कचरा वेगळा करावा, यासाठी 5 जूनपासून महापालिका उपक्रम हाती घेणार आहे. या उपक्रमाची जनजागृती करण्यात येणार आहे. कचरा डेपोसाठी पुनावळे येथील आरक्षित जागा ताब्यात घेण्यासाठी निश्चित योग्य पाऊले उचली जातील, असेही त्यांनी सांगितले.

कार्यक्रमाचे प्रास्ताविक संघाचे अध्यक्ष सुनिल लांडगे यांनी केले. उपाध्यक्ष अनिल कातळे यांनी सूत्रसंचालन केले. तर, खजिनदार संदेश पुजारी यांनी आभार मानले.

15 May 2017

एमपीसी न्यूज - नगर येथील श्रीरामपूर तालुक्यातील गळनिंब गावातील अनिल कुलकर्णी यांनी स्वतःचे घर कारवाईपासून वाचावे यासाठी आत्महदन केले होते. त्यांना न्याय मिळावा त्यांच्या  मारेक-यांना  शिक्षा व्हावी यासाठी  पिंपरी-चिंचवड अखिल भारतीय  ब्राह्मण महासंघातर्फे नायब तहसीलदार संजय भोसलेद्वारा मुख्यमंत्री फडणवीस यांना आज (दि. 15 मे) निवेदन दिले.


हे निवेदन संजय भोसले यांच्या तहसीलदार कार्यालयात देण्यात आले. यावेळी महासंघाचे अध्यक्ष दिलीप कुलकर्णी, उपाध्यक्ष पुष्कराज गोवर्धन, सुदास पोकळे, राजन बुडुख, सरचिटणीस सुनील देशपांडे, महेश बारसावडे, चिटणीस दिलीप गोसावी, उज्वला केळकर, अविनाश नाईक, महिला अघाडी अध्यक्षा माधुरी ओक, स्नेहल देशपांडे, रेणुका बारसावडे, नरेश कुलकर्णी, अनंत कुलकर्णी, प्रशांत कुलकर्णी, अमृता वैद्य, उषा गर्भे, मनिषा कुलकर्णी, सुहास जऊळकर गोपाळ कळमळकर, मधुकर रामदासी, शंकर कुलकर्णी, शामकांत कुलकर्णी, कोषाध्यक्ष मुकुंद कुलकर्णी, महिला राष्ट्रीय सरचिटणीस संजिवनी पांडे, प्रदेश सरचिटणीस जितेंद्र कुलकर्णी, शहर प्रवक्ता अशोक पारखी, उपेंद्र पाठक, जयदीप कुलकर्णी, संदीप बेलसरे, पियुष आवटी, वैभव गोडसे, अजित देशपांडे, नंदू गोगावले, प्रवीण कुलकर्णी, शशिकांत जुन्नरे, धुंडिराज ओक आदी उपस्थित होते.


या निवेदनात  म्हटले आहे की, अनिल कुलकर्णी यांच्या घरावर द्वेषापोटी सरपंच व ग्रामपंचायत सदस्य यांनी 11 मे रोजी तहसीलदाराला हाताशी धरून कारवाई करण्यात आली होती. यावेळी घर वाचविण्यासाठी अनिल कुलकर्णी यांनी अधिका-यांसमोर हात जोडले, कारवाई थांबविण्याची विनंती केली. मात्र कारवाई न थांबवल्याने कुलकर्णी यांनी आत्मदहन केले. यात त्यांचा मृत्यू झाला.

त्यामुळे हुकुमशाही पद्धतीने कारवाई करत न्याय आयुधांचा वापर करू दिला गेला नाही. ही घटना राज्यासाठी लज्जास्पद आहे. त्यामुळे मुख्यमंत्री या नात्याने जातीने लक्ष घालत पुढील मागण्या मान्य कराव्यात.

1) अनिल कुलकर्णी यांच्या मारेक-यांवर आत्महत्येस चिथावणी देण्याचा गुन्हा दाखल केला आहे. मात्र, असे न करता दोषींवर सदोष मनुष्यवधाचा गुन्हा दाखल करावा.

2 ) कुलकर्णी यांच्या मृत्यूस जबाबदार असणा-या तहसीलदार व ग्रामसेवक व इतर सरकारी अधिका-यांना तातडीने निलंबित करण्यात यावे.

3) गुन्ह्याचा तपास सीआयडीकडे देऊन खटला द्रुतगती न्यायालयात चालवावा

4) अनिल कुलकर्णी हे कुटुंब प्रमुख होते. त्यामुळे त्यांचे सारे कुटुंब त्यांच्यावर अधारीत होते. याचा विचार करता राज्य शासनाने भरपाई म्हणून 10 लाख रुपये द्यावेत.

अशी मागणी करणारे निवेदन राज्याच्या प्रत्येक तालुक्यातून मुख्यमंत्र्यांना दिले गेले आहे. त्याचप्रमाणे पिंपरी-चिंचवड अखिल भारतीय ब्राह्मण महासंघातर्फे मुख्यमंत्री देवेंद्र फडणवीस यांना नायब तहसीलदार संजय भोसलेद्वारा मुख्यमंत्र्यांना आज निवेदन देण्यात आले.

15 May 2017

रॅन्समवेअर व्हायरसमुळे एटीएम सिस्टम अपडेट करण्याचे रिझर्व्ह बँकेचे आदेश

एमपीसी न्यूज - रॅन्समवेअर व्हायरसच्या भीतीमुळे रिझर्व्ह बँकेने सर्व बँकांना एटीएमच्या सुरक्षेसाठी सिस्टम अपडेट करण्याच्या सूचना दिल्या आहेत. याबाबत केंद्र सरकारने कालच रिझर्व्ह बँकेला आदेश दिले होते. त्यामुळे  एटीएम सिस्टम अपडेट करण्यासाठी दिवसातील दोन ते तीन तास एटीएम बंद राहू शकतात. दरम्यान, एटीएम तीन ते चार दिवस बंद राहणार, अशीही चर्चा सध्या सुरु आहे. मात्र एटीएम बंद राहणार नाहीत, तर अपडेशनसाठी दिवसातील काही तास एटीएम सेवा बंद असेल.

नोटांच्या तुटवड्यामुळे राज्यात मोठ्या प्रमाणात एटीएम बंदच आहेत. काही ठिकाणी अद्यापही पैसे काढण्यासाठी नागरिकांना त्रास सहन करवा लागत असताना आता रॅन्समवेअर व्हायरसने सर्वत्र खळबळ माजवली आहे. या व्हायरसच्या भीतीमुळे रिझर्व्ह बँकेने सर्व बँकांना एटीएमच्या सुरेक्षासाठी सिस्टम अपडेट करण्याच्या सूचना दिल्या आहेत. केंद्र सरकारने कालच रिझर्व्ह बँकेला यासंबंधी आदेश दिले होते. त्यानुसार रिझर्व्ह बँकेने सर्व बँकांना आदेश दिले आहेत.

भारताचा अशा 99 देशांमध्ये समावेश आहे, ज्या देशांवर नुकताच सायबर हल्ला झाला आहे. आंध्रप्रदेश पोलिसांचे 102 कम्प्युटर शनिवारी हॅक करण्यात आले. यामध्ये गंभीर बाब म्हणजे भारतातील 70 टक्के एटीएमवर हा सायबर हल्ला करणे शक्य आहे. कारण भारतातील 70 टक्के एटीएम अशा आऊटडेटेड सॉफ्टवेअरचा वापर करतात. ज्यांना सहजपणे हॅक केले जाऊ शकते. खबरदारीचा उपाय म्हणून केंद्र सरकारने रिझर्व्ह बँक ऑफ इंडिया, शेअर बाजार आणि पेमेंट कंपन्यांना अलर्ट जारी केला आहे. भारतातील 70 टक्के एटीएममध्ये आऊटडेटेड विंडोज XP चा वापर केला जातो. याचे संपूर्ण नियंत्रण बँकांना सिस्टम पुरवणाऱ्या कंपनीच्या हातात आहे. मायक्रोसॉफ्टने अगोदरच विंडोज XP ला सपोर्ट करणे बंद केले आहे. 2014 पासूनच मायक्रोसॉफ्ट विंडोज XP ला सेक्युरिटी आणि इतर टूल्सही देत नाही. दरम्यान, इतर देशातील सायबर हल्ल्यानंतर मायक्रोसॉफ्टने विंडोजसाठी अपडेट रिलीज केली आहे.

… म्हणून रॅन्समवेअर व्हायरसचा हल्ला

कॉम्प्यूटर सुरू करण्यासाठी खूप अडचणी येत आहेत. जे कॉम्प्यूटर हॅक झाले आहेत. त्यांच्यावर एक मेसेज दाखवण्यात येत आहे. त्यात असे म्हटले आहे की, फाइल रिकव्हर करायची असल्यास पैसे भरा. या सायबर हल्ल्यासाठी रॅन्समवेअर नावाच्या व्हायरसचा वापर केला असल्याचे म्हटले जात आहे. रॅन्समवेअर हा एक असा व्हायरस आहे की जो तुमच्या कॉम्प्यूटर्स फाइल डिलिट करण्याची धमकी देतो. त्यासोबत अशीही धमकी दिली जाते की, जर तुमच्या फाइल वाचवायच्या असतील तर त्यासाठी पैसे द्या. हा व्हायरस कॉम्प्युटरमधील असणाऱ्या फाइल आणि व्हिडिओ इनक्रिप्ट करतो आणि पैसे दिल्यानंतर पुन्हा तुमच्या फाइल सुरू होतात. सुदैवाने हा व्हायरस अद्याप भारतात पसरलेला नाही. पण याचा धोका कायम आहे.

कॉम्प्यूटर व्हायरसपासून बचाव करण्यासाठी काय करावं?

तुमच्या सिस्टममध्ये एखाद्या चांगल्या कंपनीचा अॅण्टी व्हायरस टाकून घ्या. तसेच अॅण्टी व्हायरसची शेवटची तारीख लक्षात ठेवून ते वेळच्या वेळी अपडेट करा. तसेच तुम्ही तुमच्या कम्प्युटरला जेव्हा कधी मोबाइल, पेन ड्राईव्ह किंवा दुसरे कोणते डिव्हाईस जोडाल तेव्हा ते स्कॅन करून घ्या. कोणत्या ऑनलाईन साइटवरून काही डाऊनलोड करण्याआधी पहिले हे पाहा की ती वेबसाइट नोंदणीकृत आहे का. तसेच तुमची सिस्टम वेळच्या वेळी फॉर्मेट करत जा.

काय आहे रॅन्समवेअर व्हायरस?

अनेक देशात रॅन्समवेअर नावाच्या कॉम्प्यूटर व्हायरसला सायबर हल्ल्यासाठी जबाबदर  मानले जाते. यूजर्सकडून पैसे उकळण्यासाठी या व्हायरसचा वापर केला जातो.

इंडियन कॉम्प्यूटर इमर्जन्सी रिस्पॉन्स संस्थेने सुचवलेल्या खबरदारीच्या उपाययोजना पुढील प्रमाणे-

संगणकाचा नियमित बॅकअप घ्या. सर्व बॅकअप ऑफलाईन स्टोअर करून ठेवावा. अनोळखी इमेल ओपन करू नका. तुमच्या ओळखीच्या व्यक्तीकडून जरी इमेल आला आणि तो तुमच्याशी संबंधित नसेल तर ओपन करू नका. असंबंधित अटॅचमेंट डाऊनलोड करू नका. वेब आणि इमेल फिल्टरचा वापर करा. अँटिव्हायरस अपडेटेड ठेवा. ऑपरेटिंग सिस्टमशी संबंधित पॅच अपडेट करा फायरवॉलचा वापर करा. युएसबी ड्राईव्ह वापरचे धोरण ठरवा. व्हीएपीटी टेस्टिंग करून घ्या. कोणतीही खंडणी देऊ नका. खंडणीची रक्कम दिल्यानंतरही तुमच्या संगणावरील फाईल्स तुम्हाला मिळतील याची काही शक्यता नाही.


अधिक माहिती पुढील लिंकवर उपलब्ध आहे.


http://www.cert-in.org.in/

15 May 2017

श्रीरंग बारणे यांच्या खासदार निधीतून काढला जातोय गाळ

एमपीसी न्यूज - पवना धरणातील पाणीसाठ्यामध्ये जास्तीत-जास्त वाढ व्हावी, यासाठी धरणातील गाळ काढण्याच्या कामाला  आज (सोमवार) पासून सुरुवात झाली आहे. शिवसेना खासदार श्रीरंग बारणे यांच्या विकास निधीतून हा गाळ काढला जात आहे.

पवना धरण परिसरातील पाण्याचासाठा कमी झालेल्या ठिकाणाहून गाळ काढण्याच्या कामाला खासदार श्रीरंग बारणे यांच्या हस्ते सुरुवात झाली. यावेळी पाटबंधारे विभागाचे उपअभियंता नानासाहेब मठकरी, शाखा अभियंता मनोहर खाडे, शिवसेनेचे तालुकाप्रमुख राजू खांडभोर, विभाग प्रमुख अमित कुंभार, नितीन बुटाला आदी उपस्थित होते.

पिंपरी-चिंचवड शहरासह अनेक गावांना पाणीपुरवठा करणा-या पवना धरणातील गाळ गेल्या 50 वर्षात काढला गेलेला नाही. त्यामुळे धरणात मोठ्या प्रमाणावर गाळ जमा झाला आहे. पवना धरणातील अपु-या पाणीसाठ्यामुळे सध्या पिंपरी-चिंचवड शहराला दिवसाआड पाणी दिले जाते. धरण भागात जमा झालेला गाळ काढल्यास पाण्याच्या साठ्यामध्ये लक्षणीय वाढ होणार आहे.

त्यासाठी खासदार बारणे यांच्या पुढाकाराने गेल्या वर्षी पहिल्यांदा 37 हजार क्युबिक मीटर गाळ काढण्यात आला होता. यासाठी बारणे यांणी 10 लाखांचा निधी आपल्या खासदार निधीतून दिला होता. यंदाही बारणे यांच्या माध्यमातून पवना धरणातील गाळ काढण्याच्या कामाला सुरुवात झाली आहे. पावसाला सुरुवात होईपर्यंत पवना धरणातील गाळ काढण्याचे काम सुरू राहणार आहे.

याबाबत बोलताना खासदार श्रीरंग बारणे म्हणाले की, पवना धरणातून पिंपरी-चिंचवड शहराला पाणीपुरवठा केला जातो. धरणात गाळ मोठ्या प्रमाणात साचला आहे. त्यामुळे पाणीसाठा होत नाही. परिणामी, शहरातील नागरिकांना दरवर्षी उन्हाळ्यात पाणीटंचाईला सामोरे जावे लागत आहे. पाण्याची टंचाई भेडसावत आहे. पिंपरी-चिंचवड शहरातील नागरिकांना पाणी टंचाईला सामोरे जाऊ लागू नये यासाठी दरवर्षी गाळ काढण्यात येणार आहे.

पवना धरणातील गाळ काढल्यावर पाणीसाठ्यामध्ये लक्षणीय वाढणार आहे. त्यामुळे शहरातील नागरिकांना पाणीटंचाईला सामोरे जावे लागणार नाही. गाळ काढण्यासाठी जो खर्च येणार आहे, तो आपल्या खासदार निधीतून देणार असल्याचे, बारणे यांनी सांगितले.

पवना धरणातील गाळ काढण्यासाठी जिल्हा परिषदेचे मोलाचे सहकार्य मिळाले आहे. पाटबंधारे विभागाच्या अधिका-यांना सहकार्य करण्याच्या सूचना जिल्हाधिकारी सौरभ राव यांनी दिल्या असल्याचेही, बारणे यांनी सांगतिले. पवना धरणातून पिंपरी-चिंचवड महापालिका पाणी उपसा करते. परंतु, पाणी साठवण करण्याकडे पालिका दुर्लक्ष करत आहे. पाणीसाठा होण्याकरिता महापालिकेनेही गांभीर्याने पहावे, अशी अपेक्षाही त्यांनी व्यक्त केली.

दरम्यान, पाणीसाठा होण्यासाठी राज्य सरकारनेही लक्ष घातले आहे. छोटे तलाव, जिथे पाणीसाठी होते, अशा ठिकाणचा गाळ काढणा-या सामाजिक संस्थांना सहकारी संस्थांनी मदत करण्याचे निर्देश मुख्यमंत्री देवेंद्र फडणवीस यांनी दिले आहेत.

15 May 2017

महाराष्ट्र केसरी विजय चौधरी यांनी साधला शेतक-यांच्या व अनाथ मुलांशी संवाद

एमपीसी न्यूज - कितीही वाईट परिस्थिती आली तरी खचून न जाता धीरोदात्तपणे त्या परिस्थितीला तोंड दिले की शेवटी आपल्याला यश मिळतेच. परिस्थितीवर मात करून पुढे जाणारेच खरे हिरो असतात. त्यामुळे खचायचे नाही, तर त्यातून प्रेरणा घेऊन उभारायचे, असा प्रेरक सल्ला ट्रिपल महाराष्ट्र केसरी विजय चौधरी यांनी भाचे मंडळींना दिला.

अांघोळीची गोळी संस्थेच्या वतीने मराठवाड्यातील शेतक-यांची व अनाथ मुले यांना 'मामाच्या गावाला जाऊया' या उपक्रमांतर्गत पुणे भेट घडवून आणली जात आहे. याच कार्यक्रमात विजय चौधरी यांनी या मुलांशी संवाद साधला. यावेळी संयोजक माधव पाटील, शरद बोदगे आदी उपस्थित होते.

विजय चौधरी म्हणाले की, मलाही पहिल्यांदा खूप कष्ट घ्यावे लागले. परिस्थिती चांगली नसतानाही पुण्यात येऊन कुस्तीत रमलो व घडलो. त्यामुळे गरिबी हा आपल्या यशाचा अडसर होऊच शकत नाही, हेच आपल्या मनावर बिंबवले पाहिजे. आपली कामावरची निष्ठा व जिद्द हेच आपल्याला यशस्वी बनवतात. त्यामुळे कुठल्याही परिस्थितीवर संयमाने मात करायला शिका. मी कुस्तीत नेहमीच सकारात्मक खेळ करत गेलो. कुणालाही कमी न लेखता प्रत्येक प्रतिस्पर्ध्याशी खेळलो. त्यामुळे वेगळा अनुभवही मिळाला. म्हणून कुठल्याही क्षेत्रात यशस्वी होण्यासाठी कष्टाला पर्याय नाही.

यावेळी मुलांनी चौधरी यांना कुस्तीच्या संदर्भात विचारलेल्या विविध प्रश्नांना दिलखुलास उत्तरेही दिली. मुलांनी दिवसभरात पुण्यातील वेगवेगळ्या ठिकाणाला भेटी देऊन पुण्याची सफर अनुभवल्याचा आनंदही त्यांच्या चेह-यावर दिसत होता. यावेळी विद्यार्थ्यांनी पुण्यात आल्यानंतरचे आपले अनुभवही व्यक्त केले.

या अनुभवाविषयी सहारा अनाथालय परिवार बालग्राम, गेवराई जि. बीड येथून आलेला ऋषिकेश नमुनवार म्हणाला, आम्ही पहिल्यांदाच एवढ्या मोठ्या शहरात आलो आणि पुण्यातील सर्व ठिकाणे पाहून आनंद झाला. तसेच पहिल्यांदाच क्रिकेटचे संग्रहालय पाहिले. येथील काही गोष्टी शिकण्यासारख्या आहेत. शिवछत्रपती क्रीडा संकुल हे आम्हाला आवडले. भविष्यात येथे शिकता आले तर आनंदच होईल.

लायन्स क्लबतर्फे आकाशदर्शन

लायन्स क्लब ऑफ पुणे स्मार्ट सिटीतर्फे या मुलांसाठी शिवणे येथे आकाशदर्शनाचा कार्यक्रम आयोजिला होता. उपप्रांतपाल रमेश शहा, किशोर मोहोळकर यांनी संयोजन केले. सकाळी बालेवाडी येथील क्रीडासंकुलाला भेट, सायंकाळी फर्ग्युसन रस्त्यावरील रानडे इन्स्टिट्यूटला भेट, पत्रकार निलेश खरे व अमोल कविटकर यांच्याशी गप्पा रंगल्या. सिनेअभिनेते सुशांत शेलार यांच्याशी गप्पांचा कार्यक्रम रंगला.

Page 10 of 127
Open Chat
1
Close chat
Hello! Thanks for visiting us. Please press Start button to chat with our support :)

Start