26 Apr 2017
एमपीसी न्यूज - सांगवी पोलीस ठाण्यामध्ये गंभीर गुन्हे दाखल असलेल्या गुन्हेगाराला पुणे जिल्ह्यातून दोन वर्षांसाठी तडीपार करण्यात आले होते. तडीपारीचा आदेश असतानाही पिंपळे गुरवमध्ये येऊन आदेशाचा भंग केल्याप्रकरणी अटक केली आहे. ही कारावाई मंगळवारी (दि.25) रात्री नऊच्या सुमारास पिंपळे गुरव येथील पोस्ट ऑफिसजवळ करण्यात आली.
 
 
बाबा शफिक शेख (वय-20, रा. राजीव गांधी नगर, पिंपळे गुरव) असे अटक करण्यात आलेल्या तडीपार गुंडाचे नाव आहे.
 
 
पोलिसांनी दिलेल्या माहितीनुसार, बाबा शेख याच्यावर सांगवी पोलीस ठाण्यात गंभीर गुन्हे दाखल आहेत. जानेवारी 2017 मध्ये त्याला दोन वर्षांसाठी पुणे जिल्ह्यातून तडीपार करण्यात आले होते. तडीपारीचा आदेश असतानाही तो पिंपळे गुरव येथे आला असल्याची माहिती तपासी पथाकाला मिळाली. पोलिसांनी पिंपळे गुरव पोस्ट ऑफिस जवळ सापळा रचून त्याला अटक केली. सांगवी पोलीस ठाण्यात तडीपारीच्या आदेशाचा भंग केल्या प्रकरणी गुन्हा दाखल करण्यात आला आहे. पुढील तपास सांगवी पोलीस करत आहेत.
26 Apr 2017
खराडी येथील घटना
 
 
एमपीसी न्यूज -  महिला शौचालयात जाऊन महिलेचे फोटो काढणा-या आरोपीला चंदन नगर पोलिसांनी अटक केली आहे. ही घटना काल (मंगळवारी ) रात्री पावणे दाहाच्या सुमारास  खराडी येथील वल्ड ट्रेड सेंटर येथील महिलांच्या शौचालयात घडली.
 
राजकमल राजबहादुर यादव (वय 24 रा. ग. नं. 6, 42/2 थिटे वस्ती, खराडी मुळ रा. बिहार) असे अटक करण्यात आलेल्या आरोपीचे नाव आहे. या प्रकरणी एका 26 वर्षीय पीडित महिलेने चंदन नगर पोलीस ठाण्यात फिर्याद दिली आहे. 
 
 
मिळालेल्या माहितीनुसार, पीडित महिला ही खराडी येथील वल्ड ट्रेड सेंटरमधील शौचालयात गेली होती. त्यावेळी आरोपी यादव याने देखील आत प्रवेश करत मोबाईलमध्ये पीडितेचे फोटो काढण्यास सुरुवात केली. ही बाब पीडित महिलेच्या लक्षात येताच तिने प्रसंगावधान दाखवत त्याला विरोध केला. मात्र, आरोपीने महिलेच्या हाताला धक्का देऊन लज्जा उत्पन्न होईल असे वर्तन केले. यानंतर पीडितेने पोलिसांना फोन करुन घटनास्थळी बोलावले. या प्रकरणाचा पुढील तपास चंदन नगर पोलीस ठाण्याचे वरीष्ठ पोलीस निरीक्षक पात्रुडकर करीत आहेत.
25 Apr 2017

एमपीसी न्यूज - जुन्या पुणे-मुंबई महामार्गावर निगडीहून पुण्याच्या दिशेने जाणार्‍या भरधाव वेगातील मद्यपी कार चालकाने काळभोरजवळ दुचाकीवरील दोघांना धडक दिली. धडक एवढी मोठी होती की, दुचाकीवर पाठीमागे बसलेला तरुण ग्रेडसेपरेटरच्या दुभाजकावरून उडून ‘बीआरटी’ मार्गात पडला. तर गाडीवरील महिला फरफटत गेल्याचे प्रत्यक्षदर्शींनी सांगितले. हा अपघात काळभोरनगरजवळ आज (मंगळवारी) सायंकाळी सहाच्या सुमारास झाला. जखमींवर खासगी रुग्णालयात उपचार सुरू आहेत.

 

पुण्याच्या दिशेने भरधाव वेगाने निघालेल्या कारने (एमएच 14 बीएक्स 2920)  दुचाकीला ठोकर दिल्यानंतर दुसर्‍या बाजूच्या दुभाजकाला जाऊन धडक दिली. या कारमधून चार प्रवासी प्रवास करत होते. या चौघांनीही मद्य प्राशन केले असल्याचे पोलिसांनी सांगितले. तसेच गाडीमध्ये दारूच्या बाटल्या आढळून आल्या आहेत.  यामध्ये अ‍ॅक्टिव्हा (एम एच 14 ईआर 6265) गाडी चालवणारी महिला आणि तरुण गंभीर जखमी झाले असून, त्यांना जवळच असलेल्या खासगी रुग्णालयात दाखल करण्यात आले. त्यांची नावे अद्याप समजू शकली नाहीत.

 

दरम्यान, यावेळी बघ्याची मोठी गर्दी झाली होती. अपघातानंतर गाडी रस्त्याच्या मधोमध थांबल्याने  वाहतूक कोंडी मोठ्या प्रमाणात झाली. वाहतूक पोलिसांनी गाडी बाजूला घेऊन वाहतूक सुरळीत केली. नागरिकांनी जखमींना लगेच रुग्णालयात उपचारासाठी दाखल केले. या घटनेत अॅक्टिव्हा गाडीचे आणि कारचे मोठ्या प्रमाणत नुकसान झाले आहे.

25 Apr 2017

एमपीसी न्यूज - धावत्या स्कूल व्हॅनने अचानक पेट घेतल्याने प्रचंड खळबळ उडाली. ही घटना आज (मंगळवार) दुपारी चार वाजण्याच्या सुमारास कात्रज- जांभुळवाडी रस्त्यावर घडली. सुदैवाने या स्कूल व्हॅनमध्ये विद्यार्थी नसल्यामुळे मोठा अनर्थ टळला. घटनास्थळी अग्निशमन दलाला पाचारण करून पेटलेली स्कूल व्हॅन विझविण्यात आली. परंतू या आागीत स्कूल व्हॅन जळून खाक झाली.

 

या स्कूल व्हॅनमधून एका विद्यार्थिनीला शिकवणीसाठी घेऊन जात असताना धावत्या स्कूलबसच्या खालून धूर येत असल्याचे चालकाच्या लक्षात आले. त्यामुळे घाबरलेल्या चालकाने विद्यार्थिनीला खाली उतरवून आग विझविण्याचा प्रयत्न केला. पण, पाहता-पाहता आगीने रौद्र रूप धारण केले. यामध्ये स्कूल व्हॅन संपूर्णपणे जळाली आहे. स्कूल व्हॅनमध्ये लावलेल्या ‘गॅस किट’चा स्फोट होण्याच्या भीतीने कुणीही पुढे येण्यास धजावत नव्हते. त्यामुळे अग्निशमन दलाला पाचारण करण्यात आले.

25 Apr 2017

एमपीसी न्यूज - पिंपरी-चिंचवड महापालिका आयुक्तांचे लघुलेखक राजेंद्र शिर्के याला काल (सोमवार) पालिकेच्या पार्किंगमध्ये बारा लाखांची लाच घेताना रंगेहाथ पकडण्यात आले होते. लाच लुचपत प्रतिबंध विभागाच्या पथकाने पालिका भवनात सापळा रचून ही कारवाई केली होती. आज त्याला न्यायालयात हजर केले असता त्याला पाच दिवसांची पोलीस कोठडी सुनावण्यात आली.


तक्रारदार हे बांधकाम व्यावसायिक असून  त्यांच्या थेरगाव येथील 11 इमारतींचे बांधकाम पूर्ण झाले आहे. यापैकी 7 इमारतींना महापालिकेकडून बांधकाम पूर्णत्वाचा दाखला देण्यात आला आहे. उर्वरित चार इमारतींचा बांधकाम पूर्णत्वाचा दाखला देणे बाकी असून तो देण्यासाठी शिर्के यांनी त्या बांधकाम व्यावसायिकाकडून 12 लाख रुपयांची लाच मागितली होती.  
दाखला आयुक्तांच्या सहीनंतर मिळणार असल्याने लाच देण्याचे तक्रारदाराने कबूल केले.

 

तक्रारदार व्यावसायिकाने याप्रकरणी लाचलुचपत प्रतिबंधक विभागाकडे दि. 12 एप्रिल 2017 रोजी तक्रार दिली. त्यानुसार आज सोमवारी संध्याकाळी पिंपरी महापालिकेच्या पार्किंगमध्ये सापळा रचून ही कारवाई करण्यात आली आहे. शिर्के यांना 12 लाखांची लाच घेताना लाचलुचपत विभागाने रंगेहात पकडले. परंतु, तक्रारदार व्यावसायिकाने शिर्के यांना जाळ्यात ओढण्यासाठी 12 लाख रुपयातील केवळ दोन लाख रुपयांची रक्कम व उरलेले 10 लाखांचे केवळ कोरे कागद नेले होते.

25 Apr 2017

एमपीसी न्यूज - जुना पुणे-मुंबई रोडवरील घोराडेश्‍वर डोंगरावर 32 वर्षीय महिलेचा मृतदेह गुरुवारी (दि.20) आढळून आला होता. या महिलेची ओळख पटली असून या गुन्ह्यातील आरोपीला देहूरोड पोलिसांनी अटक केली आहे. या महिलेचा ओढणीच्या सहाय्याने गळा आवळून खून करण्यात आला होता.


कांचन शिंदे, असे मृत महिलेचे नाव असून बो-या उर्फ गिरीगोसावी (वय-30 रा. लातूर) असे अटक करण्यात आलेल्या आरोपीचे नाव आहे.


गुरुवारी सायंकाळी घोरावडेश्वर डोंगरावर फिरायला जाणा-या नागरिकांना वास येऊ लागल्याने पोलिसांना पाचारण करण्यात आले होते. पोलिसांना डोंगराच्या पायथ्याशी असलेल्या झुडपामध्ये कांचन शिंदेचा मृतदेह आढळून आला होता. मृतदेह सडलेल्या अवस्थेत असल्यामुळे ओळख पटली नाही. देहूरोड पोलिसांनी या गुन्ह्याचा तपास करून बो-या उर्फ गिरीगोसावी याला उस्मानाबाद येथून अटक केली.


मिळालेल्या प्राथमिक माहितीनुसार, कांचन शिंदे आणि गिरीगोसावी हे मुळचे लातुरचे आहेत. कांचन ही काळेवाडी येथे भावाकडे शिकण्यासाठी आली होती. तर तिचे आई वडिलही कामानिमित्त पुण्यात आले होते. दरम्यान, कांचन आणि गिरीगोसावी यांची ओळख होऊन त्याचे रुपांतर प्रेमात झाले. त्यांनी प्रेम विवाह केला होता. लग्नानंतर कांचन ही गिरीगोसावी सोबत चाकण येथे राहत होती. घटनेच्या दिवशी दोघे घोरावडेश्वर डोंगराच्या पायथ्याशी बोलत बसले होते. त्यांच्यामध्ये वाद झाल्याने त्याने कांचनचा ओढणीच्या सहाय्याने गळा आवळून खून केला.


या संदर्भात देहूरोड पोलीस ठाण्याचे पोलीस निरीक्षक अरुण मोरे यांच्याशी संपर्क साधण्याचा प्रयत्न केला असता तो होऊ शकला नाही. तर या गुन्ह्याचे तपासी अधिकारी शिंदे यांचा भ्रमणध्वनी बंद लागत आहे.


देहूरोड पोलीस तपास करीत आहेत.

25 Apr 2017

एमपीसी न्यूज -  पिंपरी-चिंचवडमधील गुन्हेगारीला आळा घालण्यासाठी पोलीस प्रशासन सर्वोतोपरी प्रयत्न करीत आहे. सर्वसामान्य नागरिकांनीही पोलीस कर्मचा-यांना मदत करून शहर गुन्हेगारी मुक्त करावे, असे आवाहन पुणे पोलीस आयुक्त रश्मी शुक्ला यांनी केले आहे. भोसरी विधानसभा मतदार संघाअंतर्गत विविध पोलीस ठाण्यांना आयुक्त रश्मी शुक्ला यांनी आज (मंगळवार) भेट दिली. या दौ-यात चिखली येथील नियोजित पोलीस ठाण्याच्या जागेचीही पाहणी करण्यात आली.

 

यावेळी आमदार महेश लांडगे यांच्यासह महापौर नितीन काळजे, सहपोलीस आयुक्त सुनील रामानंद, अप्पर पोलीस आयुक्त शशिकांत शिंदे, पोलीस उपायुक्त गणेश शिंदे, सहाय्यक पोलीस आयुक्त राम मांडुरके, वरिष्ठ पोलीस निरीक्षक दिलीप कुलकर्णी, पोलीस निरीक्षक अजय भोसले, तसेच क्रीडा समिती सभापती लक्ष्मण सस्ते, नगरसेवक संजय नेवाळे, कुंदन गायकवाड, राहुल जाधव, सारिका बो-हाडे, राजेंद्र लांडगे, सोनाली गव्‍हाणे आदी उपस्थित होते.

 

पोलीस आयुक्त शुक्ला यांनी या पाहणी दौ-यात एमआयडीसी पोलीस ठाणे, दिघी पोलीस ठाण्याची पाहणी केली. शुक्ला म्हणाल्या की, चिखली येथील नियोजित पोलीस ठाण्याचे काम आगामी 10 मे पर्यंत पूर्ण करण्यात यावे. याबाबत पिंपरी-चिंचवड महापालिका प्रशासनाला सूचना दिल्या आहेत. तसेच, 10 ते 15 तारखेच्या दरम्यान मुख्यमंत्री देवेंद्र फडणवीस यांची वेळ घेऊन नवीन पोलीस ठाण्याचे उद्घाटन करण्यात येणार आहे. तसेच, पोलीस ठाण्याचे काम पूर्ण होईपर्यंत लक्ष्मी रोड, चिखली येथील प्रथामिक शाळेची पर्यायी जागा म्हणून पाहणी करण्यात आली आहे.

25 Apr 2017

एमपीसी न्यूज - खंडणी विरोधी पथकाचे पोलीस अधिकारी बंडगार्डन पोलीस ठाण्याच्या हद्दीतील अलंकार चौक, पुणे स्टेशन येथे गस्त घालत असताना त्यांनी पिस्टलसह एका व्यक्तीला ताब्यात घेतले आहे. ही कारवाई सोमवार (24 एप्रिल) रोजी करण्यात आली. खंडणी विरोधी तपास पथकातील पोलीस नाईक सचिन अहीवळे यांना मिळालेल्या माहितीनुसार पोलिसांनी ही कारवाई केली.

 

शशिकांत गंगाप्पा नाईक (वय-23, रा. विष्णुकृपा नगर, शिवाजीनगर), असे अटक करण्यात आलेल्या इसमाचे नाव आहे. त्याच्या ताब्यातून एक लोखंडी पिस्टल व एक जिवंत काडतूस जप्त करण्यात आले. आरोपीवर यापूर्वीही चंदननगर पोलीस ठाण्यात खुनाचा प्रयत्न केल्याप्रकरणी गुन्हा दाखल आहे.

25 Apr 2017

5 दुचाकींसह 14 मोबाईल हस्तगत, चिंचवड पोलिसांची कामगिरी


एमपीसी न्यूज - पिंपरी-चिंचवड शहरातील वेगवेगळ्या भागातील दुचाकी आणि मोबाईल चोरणा-या दोन टोळ्यांचा चिंचवड पोलिसांनी पर्दाफाश केला. यावेळी केलेल्या कारवाईत पोलिसांनी तीन आरोपींना अटक केली. तर पाच अल्पवयीन आरोपींना ताब्यात घेतले. पोलिसांनी केलेल्या चौकशीत बंडगार्डन, पिंपरी, चतु:श्रृंगी, निगडी, वाकड आणि चिंचवड पोलीस ठाण्याच्या हद्दीतील 9 गुन्हे उघडकीस आले असून त्यांच्या ताब्यातून चोरीच्या 5 दुचाकी 14 मोबाईल हस्तगत करण्यात आले आहेत.

 


गोविंद शिवाजी अवतारे (वय-18, रा. दळवीनगर झोपडपट्टी, चिंचवड), विष्णू संजय शिगवण (वय-18, रा.ओटास्कीम, निगडी) आणि अनिल करण भोसले (वय-18, रा. पिंपळे सौदागर, पुणे) अशी अटक करण्यात आलेल्या तिघांची नावे आहेत. यांच्यासोबत गुन्ह्यात सहाय्य करणा-या 5 अल्पवयीन आरोपींनाही पोलिसांनी ताब्यात घेतले आहे.  अटक करण्यात आलेल्या आरोपींना दोन दिवसांची पोलीस कोठडी सुनावण्यात आली आहे तर अल्पवयीन मुलांची बालसुधार गृहात रवानगी करण्यात आली आहे.


पुणे आणि पिंपरी-चिंचवड शहरामध्ये वाहन चोरी आणि मोबाईल चोरीच्या गुन्ह्यांचा तपास करत असातना तपासी पथकातील पोलीस नाईक किसन शिंदे यांना मोबाईल चोरांची माहिती मिळाली. मिळालेल्या माहितीप्रमाणे चिंचवड येथील पांढरकर चाळ येथे पोलिसांनी सापळा रचून तीन अल्पवयीन मुलांना गाडीसह ताब्यात घेतले. त्यांच्याकडे चौकशी केली असता अकरा मोबाईल पोलिसांना आढळून आले. रस्त्याने मोबाईलवर बोलत जाणा-या नागरिकाला धक्का देऊन खाली पाडायचे आणि दुस-याने मोबाईल चोरायचा या पद्धतीने ते मोबाईल चोरी करत असल्याचे चौकशीत उघड झाले.

 

पोलिसांनी त्यांच्याकडून वेगवेगळ्या कंपन्यांचे एक लाख 34 हजार रुपयांचे मोबाईल जप्त केले आहेत. दरम्यान, तपासी पथकाच्या दुस-या टीमला तीन अल्पवयीन मुले ट्रिपलसिट संशयीत रित्या जाताना अढळून आली त्यांच्याकडे चौकशी केल्यावर त्यांनी दोन माबाईल चोरल्याची कबुली दिली. त्यांच्याकडून 62 हजार रुपयांचे दोन मोबाईल जप्त करून वाकड पोलीस ठाण्यात दाखल असलेल्या गुन्हा उघडकीस आणला.

 

दुस-या कारवाईत वाल्हेकरवाडी येथे दोन मुले अॅक्टिव्हा गाडीवर जात असताना पोलिसांना दिसली. गाडीला पुढील नंबर प्लेट नसल्याने पोलिसांना त्यांचा संशय आला. पोलिसांनी गाडी थांबवून गाडीच्या कागदपत्रांची चौकशी केली असता त्यांनी उडवा उडवीची उत्तरे दिली. पोलिसांनी गाडीचा चेसी नंबर तपासून पाहिला असाता ही गाडी सेनापती बापट रोडवरील नवनाथ वारद यांची असून ती चोरीला गेल्याचे समजले. पोलिसांनी अनिल करण भोसले (वय-18 रा. पिंपळे सौदागर) व त्याच्या अल्पवयीन साथीदाराला ताब्यात घेऊन चौकशी केली. या दोघांकडून एक लाख 45 हजार रुपयांच्या तीन दुचाकी जप्त केल्या असून चतुःश्रृंगी आणि निगडी पोलीस ठाण्याचे गुन्हे उघडकीस आले आहेत.

 

चिंचवड पोलिसांनी दोन वेगवेगळ्या कारवाया करून तीन आरोपींना अटक केली तर पाच जणांना ताब्यात घेऊन एकूण पाच मोटार सायकली व 14 मोबाईल जप्त केले. पोलिसांनी बंडगार्डन, पिंपरी, चतुःश्रृंगी, वाकड पोलीस ठाण्याचे प्रत्येकी एक गुन्हा उघडकीस आणला तर निगडी पोलीस ठाण्यातील दोन आणि चिंचवड पोलीस ठाण्यात दाखल असलेले तीन गुन्हे उघडकीस आणले आहे. या कारवाईत तीन लाख 41 हजार रुपयांचा मुद्देमाल जप्त करण्यात आला आहे.

 

ही कारवाई वरिष्ठ पोलीस निरीक्षक विठ्ठल कुबडे, पोलीस निरीक्षक (गुन्हे) विनायक साळुंखे यांच्या मार्गदर्शनाखाली सहाय्यक पोलीस निरीक्षक सतिश कांबळे, पोलीस कर्मचारी जयवंत राऊत, सुधाकर आवताडे, विनोद साळवे, शांताराम हांडे, स्वप्निल शेलार, किसन शिंदे, देवा राऊत, विजय बोडके, दिपक मौराळ, सूरज उबाळे यांनी केली.

25 Apr 2017

एमपीसी न्यूज - भरधाव वेगात जाणा-या पाण्याच्या टँकरची धडक पादचारी महिलेला बसली. यामध्ये गंभीर जखमी झाल्याने महिलेचा मृत्यू झाला. हा अपघात रविवारी (दि.23) सायंकाळी साडेसहाच्या सुमारास रहाटणी येथे घडला.

 

सुगंधार भास्कर देवकर (रा. पिंपळे सौदागर), असे मृत्यू झालेल्या महिलेचे नाव आहे. गजाजन देवकर (वय-22 रा. पिंपळे सौदागर) यांनी वाकड पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, गजानन आणि त्यांची आई सुगंधा पायी जात होते. त्यावेळी पाठीमागून आलेल्या पाण्याच्या टँकरची धडक सुगंधा यांना बसली. यामध्ये गंभीर जखमी झाल्याने त्यांना रुग्णालयात उपचारासाठी दाखल करण्यात आले. परंतु उपचारापूर्वीच त्यांचा मृत्यू झाला. घटनेनंतर कंटेनर चालक घटनास्थळी न थांबता निघून गेला.

 

वाकड पोलीस तपास करीत आहेत.

25 Apr 2017

एमपीसी न्यूज - भोसरी येथील गावजत्रा मैदानजवळ 35 ते 40 वर्षीय तरुणाचा डोक्यात दगड मारून खून करून पुरावा नष्ट करण्याच्या उद्देशाने मृतदेह निर्जनस्थळी टाकल्या प्रकरणी दोघांना अटक करण्यात आली आहे. मोबाईल चोरण्यावरून हा खून करण्यात आला असल्याचे तपासात उघड झाले आहे. हा प्रकार काल (सोमवार) सकाळी सातच्या सुमारास उघडकीस आला असून मृतदेहाची अद्याप ओळख पटली नाही. दरम्यान, तो बाहेरगावचा असून, मजूर काम करणार असण्याची शक्‍यता आहे. त्या दृष्टीने तपास सुरू असल्याची माहिती सहाय्यक पोलीस आयुक्त राम मांडुरके यांनी दिली.

 

सोन्या उर्फ संतोष मधुकर (वय-20, रा. खंडोबा माळ, भोसरी) आणि विकी उर्फ विकास रामचंद्र सोमवंशी (वय -19 रा. दिघी रोड, भोसरी), अशी अटक करण्यात आलेल्या आरोपींची नावे आहेत. याप्रकरणी भोसरी पोलीस ठाण्याचे पोलीस शिपाई राजू साळी यांनी भोसरी पोलीस ठाण्यात फिर्याद दिली आहे.

 

भोसरी येथील कै. अंकुशराव लांडगे सभागृहाजवळ असलेल्या मोकळ्या जागेत एक पत्रावजा शेड आहे. त्या पत्र्याजवळ संबंधित व्यक्तीला मारले. त्यानंतर त्याला फरफटत पुढे नेले. दगडाने त्याला मारहाण करून त्याचा खून करण्यात आला. मयत व्यक्ती याच ठिकाणी झोपण्यासाठी येत होता. अटक करण्यात आलेल्या आरोपींनी रविवारी रात्री मयत इसमाचा मोबाईल चोरण्याचा प्रयत्न केला होता. परंतु त्यावेळी त्यांच्यामध्ये झटापट झाली होती. रात्री एकच्या सुमारास आरोपींनी त्याचा मोबाईल चोरण्याचा प्रयत्न केला. त्यावेळी त्यांच्यामध्ये पुन्हा झटापट झाली. त्यावेळी आरोपींनी त्याच्या डोक्यात दगड मारून त्याचा खून केला, असल्याची माहिती पोलिसांनी दिली.

 

मृत व्यक्तीजवळ त्याची ओळख पटेल, अशी कोणतीच वस्तू आढळून आली नाही. त्याच्याकडे एक तंबाखूची पूडी आणि मोबाईल चार्जर मिळून आला आहे. अटक करण्यात आलेल्या आरोपींनी अद्याप या गुन्ह्याची कबुली दिली नसल्याचे तपासी अधिकारी सोमनाथ नाळे यांनी सांगितले.

 

वय अंदाजे 35 ते 40 वर्षे, अंगात पांढरा शर्ट आणि ग्रे रंगाची मळकट पॅन्ट असे त्या मृतदेहाचे वर्णन आहे. त्या वर्णनावरून तो मजूर काम करीत असल्यामुळे परिसरातील काही जणांकडे चौकशी केली. मात्र, त्याला पसिरात कोणी ओळख नसल्याचे मजुरांनी सांगितले. सर्व पोलीस ठाण्यामध्ये कुठे बेपत्ता नोंद आहे का, याचा शोध पोलिसांनी सुरू केला असल्याची माहिती वरिष्ठ निरीक्षक दिलीप कुलकर्णी यांनी सांगितले.

25 Apr 2017

एमपीसी न्यूज - कोंढव्यात एका आठ वर्षीय विद्यार्थ्यावर त्याच्याच शाळेतील दोन अल्पवयीन विद्यार्थ्यांनी लैंगिक अत्याचार केल्याचा धक्कादायक प्रकार उघडकीस आला आहे. या प्रकरणी कोंढवा पोलीस ठाण्यात एका महिलेने फिर्याद दिली असून दोन अल्पवयीन विद्यार्थ्यांना ताब्यात घेतले आहे.

 

हा धक्कादायक प्रकार नोव्हेंबर 2016 ते एप्रिल 2017 या कालावधीत घडला. दोन अल्पवयीन विद्यार्थ्यांनी वय 11 वर्षे आणि 12 वर्षे ते शिकत असलेल्या शाळेतीलच 8 वर्षीय विद्यार्थ्याला शाळेच्या मागील बाजूस घेऊन जात त्याच्यावर लैंगिक अत्याचार केले. झालेल्या प्रकाराबद्दल वाच्यता केल्यास त्याला जिवे मारण्याची धमकी दिली.


पोलीस उपनिरीक्षक एस.डी.मोरे अधिक तपास करत आहेत.

25 Apr 2017

एमपीसी न्यूज - रायवुड पार्क लोणावळा येथे सायंकाळी नवरा बायकोची भांडणे सोडवायला आला म्हणून दारुच्या नशेत शेजारीच राहणार्‍या सहकारी कामगाराचा आरोपीने मध्यरात्री डोक्यात लोखंडी घणा घालून निर्घुण खून केल्याची घटना आज घडली. 

 

अनिरुध्द नालकर (वय 48, मूळचा राहणार जालना. सध्या राहणार रायवूड पार्क लोणावळा) असे मयत कामगाराचे नाव आहे. याप्रकरणी आरोपी राजु राघू सदावर्ते (वय 35, मूळचा राहणार जालना. सध्या राहणार रायवूड पार्क लोणावळा) याला अवघ्या दोन तासात लोणावळा शहर पोलिसांनी ताब्यात घेत अटक केली.

 

लोणावळा शहर पोलिसांनी दिलेल्या माहितीनुसार, जालना जिल्ह्यातील काही कामगार रायवुड पार्क येथे राहतात. मयत अनिरुध्द हा आरोपी राजु सदावर्ते यांच्या बायकोशी बोलत असल्याने सोमवारी रात्री त्यांच्यात वाद झाले होते. या वादातून मध्यरात्रीच्या सुमारास आरोपीने दारुच्या नशेत झोपेत असलेल्या अनिरुध्द याच्या डोक्यात लोखंडी घणाने घाव घालत त्याचा खून केला. घटनेची माहिती समजताच लोणावळा उपविभागीय पोलीस अधिकारी ज्ञानेश्वर शिवथरे, पोलीस निरीक्षक चंद्रकांत जाधव व लोणावळा शहरच्या पोलीस पथकाने घटनास्थळी धाव घेत तातडीने आरोपीला अटक केली. याप्रकरणाचा अधिक तपास पोलीस निरीक्षक जाधव करत आहेत.

25 Apr 2017

एमपीसी न्यूज - जुना बाजार लोणावळा येथील महावीर गोल्ड या सराफ दुकानात सोनं खरेदीच्या बहाण्याने गेलेल्या तीन महिला व एक इसमाने दुकानातील तब्बल 1 लाख 13 हजारांचा मुद्देमाल लंपास केल्याची घटना रविवारी (दि. 23) दुपारी 1:15 वाजता घडली. याप्रकरणी महाविर गोल्डचे मालक भावेश परमार यांनी लोणावळा शहर पोलीस ठाण्यात चोरीची फिर्याद दिली आहे. 

 

पोलिसांनी दिलेल्या माहितीनुसार, रविवारी दुपारी सव्वाएक वाजण्याच्या सुमारास अंदाजे 25 ते 30 वयोगटातील तीन महिला व एक इसम सोनं खरेदीसाठी महाविर गोल्ड दुकानात आले होते. त्यांनी सोन्यांचे गंठण, पेंडल, टॉप्स अशा वस्तु पाहण्यासाठी मागविल्या व दुकानातील सर्वांचा डोळा चुकवत यामधील 65 हजार रुपये किंमतीचा सोन्याचा गंठण, 22 हजार 500 रुपयांचे व्ही आकाराचे सोन्यांचे पेंडल व 25 हजार 500 रुपयांचे सोन्याचे टॉप्स असा सुमारे 1 लाख 13 हजार रुपये किंमतीचा माल पळविला. याप्रकरणी सदर महिला व इसम या चारही जणांच्या विरोधात भादंवी कलम 380, 34 अंतर्गत गुन्हा नोंदविण्यात आला आहे.

 

दरम्यान, दुकानातील सिसीटीव्ही फुटेज पोलिसांनी ताब्यात घेतले आहे. त्यामध्ये चोरीची घटना कैद झाली असून सदर चोरट्यांचा शोध पोलीस निरीक्षक चंद्रकांत जाधव यांच्या मार्गदर्शनाखाली पोलीस उपनिरीक्षक प्रकाश शितोळे घेत आहेत.

24 Apr 2017

एमपीसी न्यूज - पिंपळे गुरव येथील सृष्टी चौकात एका मोटार कारमध्ये (गाडी क्रमांक MH 14 NB 3274) कुजलेल्या अवस्थेत एक मृतदेह आढळून आला आहे. हा प्रकार आज (सोमवार) संध्याकाळी साडेसातच्या सुमारास उघकीस आला आहे. 

 

नवाब जाफर मुलाणी (वय- 48 मुलाणी चाळ कासारवाडी), असे मयत व्यक्तीचे नाव आहे.

 

पोलिसांनी दिलेल्या माहितीनुसार, सृष्टी चौकाजवळ असलेल्या मैदानात पार्क केलेल्या गाडीतून वास येऊ लागल्याने नागरिकांनी पोलिसांना कळवले. पोलिसांनी घटनास्थळी जाऊन पाहिले असता एका तीस वर्षीय व्यक्तीचा मृतदेह गाडीत सडलेल्या अवस्थेत आढळून आला. दोन ते तीन दिवसांपूर्वी या ठिकाणी इंडिगो गाडी पार्क करण्यात आली होती. मृत व्यक्ती हा चालक असण्याची शक्यता पोलिसांनी वर्तवली आहे. शवविच्छेदन अहवालानंतरच त्याचा मृत्यू कशामुळे झाला हे समजू शकेल असे पोलिसांनी सांगितले.

 


सांगवी पोलीस तपास करीत आहेत.

24 Apr 2017

एमपीसी न्यूज - खराळवाडीतील सुहास हळदणकर खून प्रकरणात बारा जणांना खुनाच्या आरोपाखाली अटक करण्यात आली आहे. अटक करण्यात आलेल्या आरोपींपैकी नऊजणांना विनाकारण गोवण्यात आले आहे. पोलिसांनी चौकशी करण्यासाठी बोलावून त्यांना तुरुंगात डांबून ठेवले आहे. त्यांच्यावर सूडबुद्धीने आरोप लावण्यात आले आहे, असा आरोप माजी नगरसेविका निर्मला कदम यांच्यासह इतरांच्या कुटुंबीयांनी पत्रकार परिषदेत केला आहे.

 

खराळवाडी खून प्रकरणामध्ये पोलिसांना मिळालेल्या सीसीटीव्ही फुटेजमध्ये चारजण दिसत असताना इतर नऊ जणांना गोवण्यात आले आहे. ज्या नऊ जणांना यामध्ये गोवण्यात आले आहे त्यांच्या कुटुंबीयांनी आज पत्रकार परिषद घेऊन आपल्यावर झालेल्या अन्यायाची माहिती पत्रकारांना दिली. खून प्रकरणात ज्यांची नावे आहेत. त्या व्यक्ती घटने दिवशी त्या ठिकाणी नसल्याचे पुरावे देखील पोलिसांना देण्यात आले आहेत. परंतु पोलिसांकडून चौकशी सुरू असल्याचे सांगून पंधरा दिवसापासून त्यांना तुरुंगात ठेवले आहे. पोलिसांनी या प्रकरणाची चौकशी करून अटक करण्यात आलेल्या नऊ जणांना सोडून द्यावे अन्यथा मोर्चा आणि उपोषणाचा मार्ग अवलंबणार असल्याचे कुटुंबीयांनी सांगितले.

 

खराळवाडी येथे 9 एप्रिलला रात्री दहा वाजण्याच्या सुमारास सुहास हळदणकर या तरुणाचा खून झाला. त्या खुनाच्या तपासासाठी पोलिसांनी "सीसीटीव्ही'ची मदत घेतली. त्यामध्ये केवळ चारजण दिसत आहेत. मात्र, पोलिसांनी दबावापोटी अन्य नऊ जणांना गुन्ह्यात विनाकारण गोवले आहे. त्यात प्रतुल घाडगे, सद्‌गुरू कदम, दत्ता उर्फ फेट्या कलापुरे, संतोष उर्फ मुंड्या आरबेकर, प्रविण कदम उर्फ झिंगऱ्या, गणेश जाधव, छोट्या पठाण, संतोष उर्फ बाब्या कदम, सतिश कदम या सर्वांना त्या गुन्ह्यात अडकवण्यात आले आहे. या सर्वांना केवळ तपासाच्या नावाखाली पोलीस घेऊन गेले. मात्र, त्यावर गुन्हा दाखल करून त्यांना कारागृहात पाठवले. त्यांची कोणतीही चूक नसताना त्यांना काही जणांनी विनाकारण गोवले आहे. फिर्यादी घटनास्थळी नसतानाही त्याची फिर्याद घेऊन या सर्वांवर गुन्हे दाखल केले आहेत.

 

ज्यावेळी हा गुन्हा घडला तेव्हा हे सर्वजण अन्य ठिकाणी होते. त्याबाबतचे सर्व पुरावे आम्ही स्थानिक पोलिसांना दिले आहेत. तसेच, पोलिसांना सहकार्य केले आहेत. मात्र, खोटी फिर्याद देण्याऱ्या व्यक्तींवर आणि नावे सांगणाऱ्या प्रवृत्त करणाऱ्यावर कारवाई करावी, अशी मागणी पोलीस उपायुक्त गणेश शिंदे, सहाय्यक आयुक्त राम मांडुरके यांच्याकडे करण्यात आली आहे. तसेच ज्याने फिर्याद दिली आहे त्याची देखील सखोल चौकशी करण्याची मागणी यावेळी कुटुंबीयांनी केली आहे.

24 Apr 2017

एमपीसी न्यूज - पुनावळे किवळे येथील ढवळे पेट्रोल पंपावर काम करणा-या एका कर्मचा-यावर दहा ते बारा जणांच्या टोळक्याने कोयत्याने वार केले आहेत. या घटनेत कर्मचारी गंभीर जखमी झाला असून त्याच्यावर रुग्णालयात उपचार सुरू आहेत. ही घटना साडेसातच्या सुमारास घडली असून मारेकरी फरार झाले आहेत.

 

प्रशांत गपाट, असे गंभीर जखमी झालेल्या कर्मचा-याचे नाव आहे.

 

मिळालेल्या माहितीनुसार, आज संध्याकाळी साडेसातच्या सुमारास प्रशांत हा पेट्रोल पंपावर कामासाठी आला होता. त्यावेळी दहा ते बारा जणांच्या टोळक्याने त्याच्यावर कोयत्याने वार केले. यामध्ये तो गंभीर झाल्याने त्याच्यावर मेडी पॉईन्ट या रुग्णालयात उपचार सुरू असून त्याची प्रकृती गंभीर असल्याचे समजते. हा हल्ला कशामुळे झाला हे अद्याप समजू शकले नसून हिंजवडी पोलीस घटनास्थळी दाखल झाले आहेत. घटनेनंतर हल्लेखोर फरार झाले असून हिंजवडी पोलीस त्यांचा शोध घेत आहेत.

24 Apr 2017

एमपीसी न्यूज - एका बिल्डरला बांधकामाचा पूर्णत्वाचा दाखला देण्याकरिता त्याच्याकडून 12 लाखाची लाच स्वीकारताना पिंपरी-चिंचवड महापालिका आयुक्तांच्या लघुलेखकास सोमवारी संध्याकाळी साडेपाचच्या सुमारास लाचलुचपत प्रतिबंधक विभागाने रंगेहाथ पकडले. यामुळे शहरात एकच खळबळ उडाली आहे. या घटनेमुळे महापालिकेच्या स्वच्छ व पारदर्शी कारभाराची लक्तरे वेशीवर टांगली गेली आहेत.  


 
राजेंद्र सोपान शिर्के (वय-45 रा. संध्यानगरी जगताप डेअरी, पिंपळे-गुरव), असे लाच घेणा-या स्वीय सहाय्यक व लघुलेखकाचे नाव आहे. यासंदर्भात पिंपरी पोलीस ठाण्यात रात्री उशिरापर्यंत गुन्हा दाखल करण्याचे काम सुरू होते.

 

मिळालेल्या माहितीनुसार, तक्रारदार हे बांधकाम व्यावसायिक असून  त्यांच्या थेरगाव येथील 11 इमारतींचे बांधकाम पूर्ण झाले आहे. यापैकी 7 इमारतींना महापालिकेकडून बांधकाम पूर्णत्वाचा दाखला देण्यात आला आहे. उर्वरित चार इमारतींचा बांधकाम पूर्णत्वाचा दाखला देणे बाकी असून तो देण्यासाठी शिर्के यांनी त्या बांधकाम व्यावसायिकाकडून 12 लाख रुपयांची लाच मागितली होती.   

 

दाखला आयुक्तांच्या सहीनंतर मिळणार असल्याने लाच देण्याचे तक्रारदाराने कबूल केले. तक्रारदार व्यावसायिकाने याप्रकरणी लाचलुचपत प्रतिबंधक विभागाकडे दि. 12 एप्रिल 2017 रोजी तक्रार दिली. त्यानुसार आज सोमवारी संध्याकाळी पिंपरी महापालिकेच्या पार्किंगमध्ये सापळा रचून ही कारवाई करण्यात आली आहे. शिर्के यांना 12 लाखांची लाच घेताना लाचलुचपत विभागाने रंगेहात पकडले. परंतु, तक्रारदार व्यावसायिकाने शिर्के यांना जाळ्यात ओढण्यासाठी 12 लाख रुपयातील केवळ दोन लाख रुपयांची रक्कम व उरलेले 10 लाखांचे केवळ कोरे कागद नेले होते.

 

याबाबत बोलताना आयुक्त दिनेश वाघमारे म्हणाले की, एसीबीचा अहवाल आल्यानंतर त्याच्यावर पुढील कारवाई करण्यात येईल.

 

महापालिका आयुक्त दिनेश वाघमारे यांची शनिवारी मंत्रालयात समाजकल्याण विभागाचे सचिव म्हणून बदली झाली आहे. त्यांच्या जागी नागपूर महापालिकेचे आयुक्त श्रावण हार्डीकर यांची नियुक्ती झाली आहे. परंतु, त्यांनी अद्याप पदभार स्वीकारला नाही. वाघमारे आपला पदभार नवीन आयुक्तांकडे सोपविण्याच्या तयारीत असतानाच लाचलुचपत खात्याने त्यांच्या स्वीय सहाय्यकास सोमवारी रंगेहात पकडले. त्यामुळे आता स्वीकारली गेलेली रक्कम नेमकी कोणाकडे जाणार होती, याबाबत तर्कवितर्क लढविले जात आहेत.  

 

ही कारवाई अतिरिक्त पोलीस अधीक्षक दिलीप बोरसटे, उपअधीक्षक सुनील यादव, पोलीस निरीक्षक अरुण घोडके, तपास अधिकारी उत्तरा जाधव यांच्या पथकाने केली.

 

दरम्यान, दि. 21 मार्च 2017 रोजी शाळांना अल्पोपहार आणि भोजन पुरविणा-या ठेकेदाराकडून 5 हजार रुपयांची लाच घेताना पिंपरीच्या शिक्षणाधिकारी अलका कांबळे व क्रीडा प्रबोधिनीचे मुख्याध्यापक बाबासाहेब अंबादास राठोड यांना लाचलुचपत प्रतिबंधक खात्याने रंगेहाथ पकडले होते. त्यानंतर फक्त  33 दिवसात महापालिका आयुक्त दिनेश वाघमारे यांच्या स्वीय सहाय्यकास 12 लाखांची लाच घेताना लाचलुचपत विभागाने पकडल्याने पिंपरी-चिंचवड शहरात एकच खळबळ उडाली आहे.

Page 1 of 24