• 01.jpg
  • 1250x200.jpg
  • MPC_news.JPG
  • PhotoGraphy-School-1.jpg
  • sujit.JPG
22 Jun 2017


एमपीसी न्यूज - एमआयडीसी भोसरी पोलीस ठाण्याच्या तपासी पथकाने दुचाकी चोरास अटक केली आहे. त्याच्याकडून तीन दुचाकी व दोन मोबाईल जप्त करण्यात आले.

दत्ता चतुर्भूज शिनगारे (वय-21 रा. लांडेवाडी झोपडपट्टी, भोसरी) असे आरोपीचे नाव आहे.

संबंधीत आरोपीकडून एमआयडीसी पोलीस ठाण्यातील तीन गुन्हे उघड झाले असून त्याच्याकडून तीन दुचाकी व दोन मोबाईल असा 1 लाख 20 हजार रुपयांचा ऐवज जप्त केला आहे.

या प्रकरणी भोसरी एमआयडीसी पोलीस अधिक तपास करत आहेत.

22 Jun 2017


एमपीसी न्यूज - लाकडाची वाहतूक करणा-या टेम्पोवरील कारवाई टाळण्यासाठी लाचेची मागणी करून तीन हजार रुपयांची लाच स्वीकारणा-या वनरक्षकाला रंगेहात पकडण्यात आले. ही कारवाई आज दुपारी दोन वाजता वाघोलीतील केसनंद फाटा येथे करण्यात आली.

ओमप्रकाश विश्वनाथ पवार (वय 27, रा.कापरे यांचे घर, शेवाळवाडी जकात नाक्याजवळ, हडपसर, पुणे), असे लाच स्वीकारणा-या वनरक्षकाचे नाव आहे. याप्रकरणी एका व्यक्तीने फिर्याद दिली होती.

या प्रकरणी अधिक माहिती अशी की, फिर्यादी यांच्या लाकडाची वाहतूक करण्याचा व्यवसाय आहे. त्यांच्या लाकडाच्या टेम्पोवर कारवाई न करण्यासाठी ओमप्रकाश पवार याने त्यांच्याकडे दर महिन्याला पाच हजार रुपये देण्याची मागणी केली. फिर्यादींनी याची माहिती लाचलुचपत प्रतिबंधक विभागाकडे दिली. त्यानुसार सापळा रचून केसनंद फाटा येथील एका चहाच्या टपरीवर तीन हजार रुपयाची लाच स्वीकारताना त्याला रंगेहात पकडले.

22 Jun 2017


एमपीसी न्यूज - मित्राचा वाढदिवस साजरा करून दुचाकीवर घरी परत येत असताना झालेल्या अपघातात एका युवकाचा मृत्यू झाला. ही घटना बुधवार (21 जून) रोजी रात्री अकरा वाजता कोंढवा येथे घडली. या प्रकरणी कोंढवा पोलीस ठाण्यात फिर्याद दाखल करण्यात आली आहे.


सिद्धार्थ सुनील कदम (वय-19, रा. कासेवाडी, भवानी पेठ, पुणे), असे मयत युवकाचे नाव आहे. या प्रकरणी कमलेश चव्हाण (वय-18, रा. कासेवाडी, भवानी पेठ, पुणे) यांनी फिर्याद दिली असून ट्रक चालक रमेश उमरसिंग राठोड (वय-32, रा. भोसलेवाडी, ता. कराड, जि. सातारा) याला अटक करण्यात आली.

याप्रकरणी अधिक माहिती अशी की, कमलेश चव्हाण आणि सिद्धार्थ यांचा मित्र अनिल अवचित (रा.उंड्री) याचा वाढदिवस होता. त्यामुळे वाढदिवस साजरा करून दुचाकीने परत येत असताना भरधाव वेगातील ट्रकने त्यांच्या दुचाकीस पाठीमागून धडक दिली. यामध्ये गंभीर जखमी झालेल्या सिद्धार्थचा मृत्यू झाला. ट्रक चालक रमेश राठोड याला या प्रकरणी अटक करण्यात आली.

पोलीस हवालदार के.के. कांबळे अधिक तपास करीत आहेत.

22 Jun 2017


एमपीसी न्यूज - रस्त्यावर पार्क केलेली दुचाकी पळवून नेणार्‍या सराईत चोरट्यास न्यायालयाने 24 जूनपर्यंत पोलीस कोठडी सुनावली. विशाल किशोर चौधरी (वय 18, मूळ रा. स.नं. 12, भिलारेवाडी, कात्रज. सध्या रा. मंतरवाडी, ता. हवेली, जि. पुणे), असे त्याचे नाव आहे. याप्रकरणी कालीचरण बजरंग अगरवाल (वय 40, रा. शुक्रवार पेठ) यांनी खडक पोलीस ठाण्यात फिर्याद दिली आहे.

ही घटना 20 मे रोजी दुपारी एकच्या सुमारास घडली. अगरवाल यांनी त्यांची दुचाकी (एम एच 12 एफ एस 2972) घरासमोरील रस्त्यावर पार्क केली होती. या दरम्यान, विशाल चौधरी याने गाडीचे हॅन्डल लॉक तोडून गाडी चोरून नेली. या प्रकरणी खडक पोलीस ठाण्यात गुन्हा दाखल करण्यात आला होता. त्याला अटक करत न्यायालयात हजर करण्यात आले.

विशाल चौधरी हा सराईत आहे. यापूर्वी त्याच्या ताब्यातून सुमारे 40 हजार रुपये किमतीची एक मोपेड दुचाकी जप्त करण्यात आली आहे. तपासा दरम्यान, चोरी केलेल्या गाड्यांच्या नंबर प्लेट बदलून तो वापरत असल्याचे स्पष्ट झाले आहे. त्याने गाडी चोरण्यासाठी वापरलेल्या चावीचा शोध घ्यायचा आहे. ती चावी त्याने कोणाकडून बनवून घेतली आहे. त्याच्या ताब्यातून गुन्ह्यातील मोटारसायकल जप्त करायची असून अधिक तपासासाठी सहाय्यक सरकारी वकीलांनी त्याच्या पोलीस कोठडीची मागणी केली. न्यायालयाने ती मान्य केली.

22 Jun 2017

सुदैवाने कोणीही जखमी नाही

एमपीसी न्यूज - पिंपळे सौदागर येथील शिवार चौकात एका सिमेंट मिक्सरची पुढे जाणा-या ट्रकला धडक बसली. यामध्ये कोणीही जखमी झालेले नाही. ही घटना आज (गुरुवारी) दुपारी दीडच्या सुमारास घडली.

सांगवी वाहतूक विभागाचे पोलीस निरीक्षक कुमार म्हसवडे यांनी एमपीसी न्यूजला माहिती देताना म्हटले की, हा मिक्सर हिंजवडीवरून नाशिक फाट्याकडे जात असताना गाडीमध्ये अचानक तांत्रिक बिघाड झाल्याने हा मिक्सर समोर जाणा-या ट्रकला धडकला. यामध्ये कोणीही जखमी झाले नसून मिक्सरचे मात्र नुकसान झाले आहे. या सिमेंट मिक्सर गाडीचा क्रमांक एम.एच.06 एक्यू 504 असा आहे. क्रेनच्या सहाय्याने गाडीला रस्त्याच्या बाजूला काढले असून वाहतूक सुरळीत आहे, असेही म्हसवडे यांनी सांगितले.

22 Jun 2017


एमपीसी न्यूज - भरधाव वेगातील दुचाकीने पादचारी दाम्पत्याला धडक मारल्याने झालेल्या अपघातात तीन वर्षीय चिमुरडीचा मृत्यू झाला तर अन्य दोघे जखमी झाले आहे. ही घटना रविवार (18 जून) रोजी सायंकाळी साडेसात वाजण्याच्या सुमारास कात्रज ते न-हे बायपास रोडवर घडली.

श्रावणी गोपाल शर्मा (वय-03, रा.आंबेगाव पठार, पुणे), असे मृत्युमुखी पडलेल्या चिमुरडीचे नाव आहे. तर या अपघातात तिची आई स्वाती शर्मा (वय-28) आणि बाळाप्रसाद शर्मा (वय-65) गंभीर जखमी झाले आहेत. याप्रकरणी भारती विद्यापीठ पोलीस ठाण्यात फिर्याद दाखल करण्यात आली आहे.

अधिक माहिती अशी की, बाळाप्रसाद शर्मा आणि स्वाती शर्मा हे श्रावणीला घेऊन संबंधित रस्ता क्रॉस करत असताना हा अपघात झाला. भरधाव वेगात आलेल्या अनोळखी दुचाकीस्वाराने त्यांना जबर ठोस दिली. यामध्ये गंभीर जखमी झालेल्या श्रावणीचा मृत्यू झाला. तर दोघे गंभीर जखमी झाले असून त्यांच्यावर उपचार सुरू आहेत. सहाय्यक पोलीस निरीक्षक एस.आर.शिंदे अधिक तपास करीत आहेत.

22 Jun 2017


गावठी पिस्तूल, जिंवत काडतुसे, सुरा व तलवार जप्त

एमपीसी न्यूज - सांगवी परिसरात दरोड्याच्या प्रयत्नात असलेल्या 4 दरोडेखोरांना सांगवी पोलिसांनी शस्त्रासह अटक केली आहे. त्यांच्याकडून शस्त्र, वाहन व रोख रक्कम, असा एकूण 76 हजार 2010 रुपयांचा मुद्देमाल जप्त करण्यात आला आहे.

रमेश खाजाप्पा अहिवळे (वय 22 रा. इंदिरा कॉलेज पाठीमागे, भूमकर चौक, वाकड) ज्ञानेश्वर भानुदास जगताप (वय 32, रा. वेताळनगर झोपडपट्टी, चिंचवड), आकाश पद्माकर कसबे (वय 21 रा. वेताळनगर झोपडपट्टी, चिंचवड) महेश नंदू पाटोळे (वय 19 रा. मोरया हाऊसिंग सोसायटी वेताळनगर, चिंचवड) तर त्यांचे दोन साथीदार फरार झाले आहेत.

पोलिसांनी दिलेल्या माहितीनुसार, काही लोक पिंपळेसौदागर येथील स्मशानभूमी येथे हत्यारासह येणार असल्याची खबर सांगवी पोलिसांना मिळाली. यावेळी पोलिसांनी सापळा रचत चौघांना पकडले. मात्र, यावेळी दोघे फरार झाले. अटक केलेल्या चौघांकडून एक गावठी पिस्तूल, चार जिवंत काडतुसे, एक रॅम्बो सुरा, 1 तलवार, एक पिस्तोलच्या आकाराचे लायटर व मॅस्ट्रो मोपेड गाडी व रोख रक्कम, असा एकूण 76 हजार 210 रुपयांचा ऐवज जप्त करण्यात आला. चौकशी केली असता हे चौघेही नवी सांगवी परिसरात दरोडा घालण्याच्या तयारीत असल्याचे उघड झाले.

या प्रकरणी सांगवी पोलीस अधिक तपास करत आहेत.

22 Jun 2017


एमपीसी न्यूज -  दोन रूमचे का असेना पण आपले स्वतःचे घर असावे, असे प्रत्येकाला वाटते. त्यासाठी आपण आपल्या आयुष्याची जमापूंजी बिल्डर लोकांच्या हाती देतो. मात्र, ती देत असताना आपल्या जागेची, घराची कागदपत्रे नीट पडताळून पाहणे गरजेचे असते. कारण अशाच प्लॉट विक्रीच्या व्यवहारात मुंबईतील बांधकाम व्यावसायिकाने 5 हजार गुंतवणूकदारांना 300 कोटींचा गंडा घातला आहे.


मुख्य आरोपी टेम्पल रोझ रियल इस्टेट प्रा. लि. या कम्पनीचा संचालक देवीदास गोविंदराम सजनानी याला पोलिसांनी  मुंबई येथून 24 मे रोजी अटक केली. तर  कंपनीचे पुणे येथील सेल्सचे झोनल मॅनेजर रमेश आघीचा याला पुण्यातून 15 जून रोजी अटक करण्यात आली.

याविषयी एमपीसी न्यूजशी बोलताना पुणे आर्थिक गुन्हे शाखेचे पोलीस निरीक्षक राजेश पुराणिक म्हणाले की, ही घटना पुरंदर तालुक्यातील पिंगोरी येथील आहे. येथील वन विभागाची 440 एकर जमीन टेम्पल रोझ रियल इस्टेट प्रा. लि. या कंपनीची असल्याचे भासवून 5 हजार ग्राहकांना हप्त्याद्वारे प्लॉट खरेदी करता येणार असल्याचे आमिष दाखवले. यासाठी 2010 साली 5 हजार प्लॉटची विक्रीही केली. मात्र 2015 साली ही जमीन विक्रीसाठी कायदेशीररित्या योग्य नसून त्यावर प्रस्तावित सर्व्हे नंबरप्रमाणे प्लॉट पाडता आले  नाहीत. हे उघड झाले.

दरम्यान, जानेवारी 2016 साली टेम्पल रोझ रियलइस्टेट  कंपनीचे गुंतवणूकदार शर्मिला जोशी, जिग्नेश चितलिया, दुरीया बहारिनवाला, नारायण परमार, बिमानंद, राजेश गांधी, हुसेन बहारिनवाला, दिलीप कुमार  छाजेड, आश्रम बहारीनवाला, सुरेश  शिवले, प्रवीण थोरवे या 11 गुंतवणूकदारांना परस्पर प्लॉट विक्री करण्यात आली. मात्र, तक्रार कोण करणार तसेच आरोपी गुंतवणुकदरांना व्हॉट्सअॅपवर व्हिडिओ पाठवून तुमचे पैसे व जागा सुरक्षित आहे, असा विश्वास देत होता. तसेच त्याने ग्राहकांना जागेचे वाटप पत्रही दिले होते.  मात्र, 2017 साल उजाडले तरी जमीन आपल्या नावावर नसल्याचे उघड होताच ग्राहकांनी पुरंदर पोलीस ठाण्यात धाव घेतली व हा प्रकार उघडकीस आला.

मुख्य आरोपी देवीदास गोविंदराम सजनानी याला 12 दिवसांची पोलीस कोठडी देण्यात आली होती व आता त्याची  येरवडा कारागृहात रवानगी करण्यात आली आहे. तर दुसरा आरोपी रमेश आघीचा याला 7 दिवसाची पोलीस कोठडी देण्यात आली आहे. तर गुंतवणूक केलेली रक्कम, तसेच आरोपीकडची मालमत्ता बघता फॉरेन्सिक ऑडिटरची नेमणूक करण्यासाठी प्रशासकीय प्रक्रिया सुरू करण्यात आली आहे. पुढे तपास चालू आहे. या प्रकरणात विक्री करताना 1 कोटींपेक्षा जास्त रुपयांना गंडा घातलेल्या दलालांवर आम्ही लक्ष केंद्रीत केले आहे. त्यांच्यावरही लवकरच कारवाई करण्यात येणार आहे, असेही पुराणिक यांनी सांगितले.

त्यामुळे नागरिकांनी घर खरेदी व विक्री करताना  काळजी घ्यावी, खात्री पटल्याशिवाय पैसा गुंतवू नये, असे आवाहन पोलिसांतर्फे करण्यात आले आहे.

22 Jun 2017

तळेगाव राज्य उत्पादन शुल्क विभागाची कारवाई

एमपीसी न्यूज - पुणे - मुंबई जुन्या महामार्गावरील रिलायन्स पेट्रोल पंपाजवळ निरीक्षक राज्य उत्पादन शुल्क तळेगाव दाभाडे विभाग पुणे कार्यालयाच्या पथकाने परराज्य निर्मित अवैध्यरीत्या दारूची वाहतूक करणा-या वाहनावर कारवाई करत सुमारे 2 लाख 68 हजार 960 रुपयांची दारू जप्त केली आहे. ही कारावाई 20 जून रोजी करण्यात आली. 

गस्त घालत असताना संशयास्पद चारचाकी वाहन एम एच 04 ए डब्ल्यू 411 सातेगाव हद्दीतून जात असताना पोलिसांनी त्यांना पकडले. यामध्ये विदेशी मद्याचे 180 मिलीच्या बाटल्यांचे 10 बॉक्स मिळाले.पुढील तपास केला असता दर्पण सोसायटी तळमजला येवलेवाडी पोस्ट कामशेत येथे आरोपींच्या घरातून गोवा निर्मितीचे 180 मिली 12 बॉक्स सीलबंद असलेल्या बाटल्या जप्त करण्यात आल्या. यामध्ये गाडीसह 2 लाख 68 हजार 960 रुपये किंमतीचा माल पकडण्यात आला. ही कारवाई साते गावचे हद्दीत जुना मुंबई - पुणे रोडवर करण्यात आली. यावेळी पोलिसांनी वाहन व दोन आरोपी ताब्यात घेऊन त्यांच्यावर गुन्हा दाखल केला आहे. 

ही कारवाई विभागीय उपायुक्त अर्जुन मोहोळ, अधीक्षक पुणे मोहन वर्दे व उपअधीक्षक सुनील फुलपगार यांच्या मार्गदर्शनाखाली निरीक्षक दीपक परब, उपनिरीक्षक संजय सराफ, नरेंद्र होलमुखे, सहाय्यक दुय्यम निरीक्षक, रवींद्र भुमकर, जवान अतुल बारंगुळे, प्रमोद पालवे, संतोष गायकवाड, शिवाजी गळवे, यांच्या पथकाने केली. फिर्याद उपनिरीक्षक संजय सराफ यांनी दिलेली असून पुढील तपास निरीक्षक दीपक परब करीत आहे.

सर्वोच्च न्यायालयाच्या आदेशानुसार 1 एप्रिल 2017 पासून राष्ट्रीय व राज्य महामार्ग जवळील 500 मीटर अंतराच्या आतील मद्य विक्री केंद्रे बंद करण्यात आलेली आहे. यामुळे अवैद्य रित्या दारू विक्री होऊ नये यावर राज्य उत्पादन शुल्क विभागाची नजर आहे. त्यासाठी जागोजागी गस्त घालण्यात येत आहे.

22 Jun 2017
एमपीसी न्यूज - दिघी येथील दत्तगड डोंगरावर आर्मी फायर रेंजमध्ये एका अज्ञात इसमाचा मृतदेह  19 जून रोजी दिघी पोलिसांना आढळला होता. हा मृतदेह कुजल्यामुळे त्याची ओळख पटली नव्हती, मात्रा शवविच्छेदन अहवालानुसार त्या अज्ञात इसमाची हत्या झाल्याचे उघड झाले आहे.
 
पोलिसांनी दिलेल्या माहितीनुसार, 19 जून रोजी सकाळी  काही मुले या परिसरात फिरायला गेले असता त्यांना हा मृतदेह आढळला. या इसमाचे अंदाजे वय 40 वर्ष असून, उंची 5 फुट 5 इंच आहे. अंगावर निळसर रंगाचा शर्ट व राखाडी पॅन्ट आहे. हा मृतदेह कुजला असून मृत्यू 4 ते 5 दिवसांपूर्वी झाला असावा असा अंदाज पोलिसांचा आहे. त्यामुळे त्याची ओळख पटलेली नाही.
 
शवविच्छेदन अहावालानुसार त्या इसमाच्या डोक्यात वार करण्यात आल्याने त्याचा मृत्यू झाल्याचे समोर आले आहे. मात्र, ही मयत व्यक्ती कोण व त्याचा खून कोणी व का केला असावा हे अद्याप स्पष्ट झालेले नाही. याप्रकरणी अधिक तपास  दिघी पोलीस करत आहेत.
21 Jun 2017

एमपीसी न्यूज - नवी सांगवी येथील गणेश नगर परिसरातील श्रीकल्प बिल्डिंगच्या पार्किंग मधील 4 दुचाकी माथेफिरुने जाळल्या आहेत. ही घटना बुधवारी (दि. 21जून) पहाटे 3 वाजता घडली. 

ओंकार जालिंदर आधाटे (वय. 23 रा. प्रियदर्शनीनगर,नवी सांगवी) असे आरोपीचे नाव असून सांगवी पोलिसांनी त्याला आज सकाळी अटक केली आहे. 

आरोपी व फिर्यादी प्रवीण मधुकर रणवरे (वय 27, रा.श्रीकल्प बिल्डिंग,गणेशनगर, नवी सांगवी) यांच्यात दोन दिवसांपूर्वी भांडण झाले होते. या भांडणाचा राग मनात धरुन आरोपीने फिर्यादीची दुचाकी जाळली. मात्र या गाडी शोजारील गाड्यांनीही पेट घेतल्याने या घटनेत 4 गाड्या जळून खाक झाल्या. यावेळी दुचाकीच्या टँकचा स्फोट झाल्यामुळे रहिवाशी जागे झाले व घटना उघडकीस आली. या घटनेचे कारण अद्याप समजले नसून पोलिसांनी बिल्डिंगच्या सीसीटीव्ही फुटेज वरून आरोपी ला पकडले आहे. याप्रकरणी सांगवी पोलास ठाण्यात गुन्हा दाखल केला असून पोलीस अधिक तपास करत आहेत.

21 Jun 2017


एमपीसी न्यूज - खेड तालुक्यातील मरकळ येथील त्रिवेणी आश्रमातून एका अल्पवयीन मुलाला कोणीतरी अज्ञात इसमाने पळवून नेले आहे, याप्रकरणी संजीव मोहन रावते (वय 45 वर्ष, रा.त्रिवेणी आश्रम, मरकळ) यांनी आळंदी पोलीस ठाण्यात फिर्याद दिली आहे. तर लोणावळ्यातून आळंदी येथे लग्नास आलेली 47 वर्षीय व्यक्ती मंगल कार्यालयातून बेपत्ता आहे. या प्रकरणी प्रकाश माणिक हजारे (वय 40 वर्ष, रा. लोणावळा) यांनी आळंदी पोलीस ठाण्यात फिर्याद दिली आहे.

सुमनचंद डोंगल गुपू (वय 17 वर्ष, रा. त्रिवेणी आश्रम, मरकळ, ता.खेड, मुळगाव पंतनगर, घाटकोपर, मुंबई 75), असे पळवून नेलेल्या मुलाचे नाव आहे. त्याचे वर्णन रंग गोरा, उंची 160 सेमी, हातात प्लास्टिकचे घड्याळ, अंगात निळ्या रंगाचा टी शर्ट व निळ्या रंगाची जीन्स पॅन्ट परिधान केली आहे.

या वर्णनाचा मुलगा कोणास आढळल्यास दूरध्वनी क्रमांक 02135 - 232214 येथे संपर्क साधण्याचे आवाहन आळंदी पोलीस ठाण्याच्या वतीने करण्यात आले आहे. पुढील तपास पोलीस उपनिरीक्षक आर. एस. पाटील करीत आहेत.

व्यंकटेश केरबा हजारे (वय 48 वर्ष, रा. लोणावळा, ता.मावळ, जिल्हा पुणे), असे मंगल कार्यालयातून बेपत्ता झालेल्या व्यक्तीचे नाव आहे.

या गृहस्थांचा रंग गोरा, अंगाने सडपातळ, कपाळ सपाट, केस लहान, उंची पाच फूट आठ इंच, अंगावर लाल रंगाचा चॉकलेटी शर्ट, काळ्या रंगाची जीन्स पॅन्ट परिधान केलेली आहे. या वर्णनाची व्यक्ती कोणास आढळल्यास दूरध्वनी क्रमांक 02135 - 232214 येथे संपर्क साधण्याचे आवाहन आळंदी पोलीस ठाण्याच्या वतीने करण्यात आले आहे.

पुढील तपास पोलीस नाईक एस.जी.सोनवणे करीत आहेत.

21 Jun 2017


एमपीसी न्यूज - लग्न करण्याचे आणि परदेशात नोकरी देण्याच्या आमिषाने एका महिलेची 7 लाख रुपयांनी फसवणूक केल्याचा प्रकार उघडकीस आला आहे. या प्रकरणी एका 29 वर्षीय महिलेने चतु:श्रृंगी पोलीस ठाण्यात तक्रार दिली असून एका विरोधात गुन्हा दाखल करण्यात आला आहे. ही घटना 2013 ते जून 2017 या कालावधीत घडली.

गुलजार अवतारसिंग विरदी (रा. सुप्रिम पाम सोसायटी, बाणेर), असे आरोपीचे नाव आहे.

या प्रकरणी अधिक माहिती अशी की, आरोपी विरदी याने संबंधित महिलेला लग्नाचे आमिष दाखवले आणि तिच्याकडून सात लाख रुपयाची रक्कम उकळली.  नतंर त्याने तिला नोकरीही लावली नाही आणि लग्नही केले नाही. फिर्यादी महिलेने त्याला लग्नासंबंधी विचारले असता तिला शिवीगाळ करत मारहाण केली.

पोलीस निरीक्षक खोदडे अधिक तपास करीत आहेत.

21 Jun 2017


एमपीसी न्यूज - पुणे शहरातील महिलांना फेसबूक, व्हॉट्सअप सारख्या सोशल मीडियावर त्यांची मैत्रीण असल्याचे भासवून त्यांच्या अकाऊंटचा व्हेरिफिकेशन कोड मिळवून त्याआधारे बनावट नावाने महिलांना अश्लिल चॅटींग करण्यास भाग पाडत असे. जर महिलांनी नकार दिला तर त्यांचे मॉर्फ केलेले फोटो आणि अश्लिल मेसेज पोस्ट करत असे. हा प्रकार लक्षात आल्यानंतर सायबर क्राईम सेलने या प्रकाराचा छडा लावून आरोपीला अटक केली.


संदीप हरीबा घोलपे (रा. कारेवाडी, येरोले, उद्गीर, जि. लातूर), असे अटक केलेल्या आरोपीचे नाव आहे.

या प्रकरणी पुणे शहरातील पाच महिलांनी सायबर क्राईमकडे तक्रार दिली होती. आरोपीचा पुणे शहरातील सहा गुन्ह्यातील सहभाग निष्पन्न झाला आहे. पुणे शहरातील अलंकार पोलीस स्टेशन, सिंहगड रोड, चतु:श्रृंगी, मुंढवा आणि हडपसर या पोलीस ठाण्यात गुन्हे दाखल आहेत.

21 Jun 2017


अटक आरोपींकडून 8 तोळे सोने जप्त; 6 गुन्हे उघडकीस

एमपीसी न्यूज - संत ज्ञानेश्र्वर महाराज पालखी दर्शन घेत असताना गर्दीचा फायदा घेऊन सोनसाखळी चोरी करणा-या एका महिलेसह दोन चोरांना पोलीस मित्राने पकडून पोलिसांच्या ताब्यात दिले. आरोपींकडून आठ तोळे सोने जप्त केले आहे. पालखी सोहळ्यात चार ठिकाणी मंगळसूत्र चोरीच्या घटना घडल्या आहेत.

दुर्गा प्रमोद विटेकर (वय 22, रा. देगलूर, नांदेड जिल्हा), विनोद बाळासाहेब भिसे (वय 26) व राजेंद्र रामू माने (वय 27 दोघेही रा. पाथर्डी जि. अहमदगर) यांचा समावेश आहे. सोनसाखळी चोरी झाल्याबद्दल दिनेश महादेव पाटील (वय 24, रा. भेकराईनगर, ता. हवेली, जि. पुणे) यांनी फिर्याद दिली आहे.

हडपसर पोलीस ठाण्याचे वरिष्ठ पोलीस निरीक्षक विष्णू पवार यांनी दिलेल्या माहितीनुसार, संत ज्ञानेश्र्वर महाराजांच्या पालखीचे दर्शन घेत असताना हडपसर ते मंतरवाडी या दरम्यान भेकराईनगर बस थांबा, भारत साडी सेंटर, मंतरवाडी फाटा, पवनी स्वीटस, भेकराईनगर या चार ठिकाणी मंगळसूत्र चोरीच्या घटना घडल्या.

दरम्यान, पोलीस मित्र उबेद असल्म शेख (वय 26, रा. हडपसर) या पोलिस मित्राने भाविक पालखीचे दर्शन घेत असताना महिलांच्या गळ्यातील मंगळसूत्र चोरी करणा-या तिघांचा पाठलाग करून पकडले. त्यांच्याकडून आठ तोळे मुद्देमाल जप्त केला आहे. वानवडी विभागाचे सहाय्यक आयुक्त समीर शेख यांच्या हस्ते सत्कार करण्यात आला.   
                    

एकूण 8 गुन्हे दाखल आहेत. त्यातील 6 गुन्हे उघड झाले.

21 Jun 2017

एमपीसी न्यूज - भोसरी इंद्रायणीनगर येथे एका महिलेने तिच्या चार वर्षांच्या मुलीची हत्या करुन त्यानंतर स्वतः गळफास घेतल्याचा धक्कादायक प्रकार समोर आला आहे. दरम्यान, आत्महत्या करण्यामागचे कारण अद्याप समजू शकलेले नाही. ही घटना आज सकाळी नऊच्या सुमारास उघडकीस आली.

देवश्री इसप्पन (वय 4 ) कौमदी इस्सपन (वय 25 रा. प्रियदर्शनी शाळेसमोर, निर्वाण इमारत, इंद्रायणीनगर, भोसरी ) असे मयत माय-लेकींची नावे आहेत.

पोलिसांनी दिलेल्या माहितीनुसार, इस्सपन कुटुंबीय मुळचे तमिळनाडूचे आहेत. कैमुदी यांचे पती शंकर यांचा चाकण एमआयडीसी येथे उद्योग आहे. पती शंकर हे कामाला गेल्यानंतर कौमुदी यांनी मुलीची गळफास देऊन हत्या केली व त्यानंतर स्वतः गळफास घेतला. त्यांच्या सोबत कौमुदी यांचा मावस भाऊही राहता होता. तर शेजारी त्यांचे इतर नातेवाईकही राहत होते. शेजा-यांनी संशय आल्यानंतर घरी पाहणी केली असता हा प्रकार उघडकीस आला.

पति पत्नीच्या भांडणात चिमुरडीचा बळी 

सकाळी पती कामावर निघून गेल्यानंतर साडे आठ वाजता मुलीला शाळेत सोडायला कौमुदी जाणार होत्या. मात्र नऊ वाजत आले तरी त्या मुलीला सोडायला गेल्या नाहीत. त्यावेळी शेजारच्या नातेवाईकांनी घरी जाऊन पाहिले असता हा प्रकार उघडकीस आला.

कौमदी व त्यांचे पती शंकर यांच्यात कौटुंबिक वाद होते. त्यामुळे कौमुदी या माहेरी निघून गेल्या होत्या. काही दिवसांपुर्वीच त्या पतिच्या घरी आल्या होत्या. त्यामुळे कौमुदी यांनी आत्महत्या केल्याचा अंदाज पोलिसांनी वर्तवला आहे. त्यामुळे पतीपत्नीच्या वादामध्ये बिचा-या चारवर्षाच्या चिमुर्डीला मात्र आपले प्राण गमावावे लागले.

20 Jun 2017


एमपीसी न्यूज - येरवड्यातील पंडीत जवाहरलाल नेहरु उद्योग केंद्रातून शुक्रवारी (16 जून) रात्री अंधाराचा फायदा घेत आठ मुलांनी पळ काढल्याचा प्रकार उघडकीस आला आहे. लाईट गेल्यानंतर लोखंडी दरावाजा तोडून ह मुले पसार झाली आहेत. दरम्यान या घटनेने खळबळ उडाली असून, बालसुधार केंद्रातून सतत मुले पळून जाण्याच्या घटनांमुळे येथील सुरक्षेवर प्रश्न चिन्ह निर्माण झाले  आहेत.

नेहरु उद्योग केंद्रातील काळजी वाहक सचिन शिंदे यांनी पोलिसांकडे मिसींग दाखल केली आहे. त्यानुसार, येरवडा पोलीस ठाण्यात मिसींग दाखल करण्यात आली आहे.

पोलिसांनी दिलेल्या माहितीनुसार, वेगवेगळ्या गुन्ह्यात ताब्यात घेतलेल्या मुलांना बाल न्यायालयाकडे हजर केले जाते. त्यानंतर त्यांना सुधारगृहात पाठवण्यात येते. अशा मुलांना येरवडा परिसरात असणार्‍या पंडीत जवाहरलाल नेहरु उद्योग केंद्रात ठेवले जाते. याठिकाणी पुण्यासह राज्यातील इतर ठिकाणची मुलेही असतात. दरम्यान शहरात शुक्रवारी रात्री मोठा पाऊस आला होता. त्यावेळी येरवडा परिसरातील तसेच केंद्रातील लाईट गेली होती. त्याचाच फायदा घेऊन आठही मुले केंद्रातील लोखंडी तसेच लाकडी दरावाजा तोडून तसेच येथील कर्मचार्‍यांची नजर चुकवून पसार झाली. काळजी वाहक व इतरांनी या मुलांचा शोध घेण्यात आला. मात्र, ते मिळून आले नाही. त्यानंतर त्यांनी पोलिसांकडे या मुलांची मिसींग दाखल केली आहे

20 Jun 2017


एमपीसी न्यूज - गुंतवणूकदारांना कोट्यावधीचा गंडा घातल्याप्रकरणी फडणीस इन्फ्रास्ट्रॅक्‍चरचा संस्थापक आणि मुख्य संचालक विनय फडणीस याच्या पोलीस कोठडीत 22 जूनपर्यंत वाढ करण्याचा आदेश विशेष न्यायाधीश एम.डब्ल्यू.चांदवानी यांनी दिला आहे. फडणीस इन्फ्रास्ट्रॅक्‍चर आणि 19 कंपन्यामध्ये गुंतवणूक केल्यास आकर्षक परतावा देण्याचे अमिषाने 800 ते 900 गुंतवणूकदारांची कोट्यावधीनी फसवणूक केली होती. 2011 ते 22 एप्रिल 2017 या कालावधीत कर्वेनगर भागात ही घटना घडली होती.

या प्रकरणात विनय याची पत्नी अनुराधा (वय 50), बहिण शरयू विनायक ठकार (वय 50, रा. कसबा पेठ), भाग्यश्री सचिन गुरव (वय 50, रा. शिवाजीनगर), एजंट उदय अच्चुत पाटणकर (वय 56, रा. पौड रस्ता) आणि मुलगी सायली फडणीस-गडकरी (वय 27, रा. कर्वेनगर) या पाच जणांवर गुन्हा दाखल करण्यात आला आहे. पोलीस त्यांचा शोध घेत आहेत. गुन्हे शाखेच्या आर्थिक विभागाचे पोलीस निरीक्षक एम.एस.कुंभार या प्रकरणाचा तपास करत आहेत.

आरोपीने 133 गुंतवणूकदारांची 8 कोटी 22 लाख 11 हजार 221 रुपयांची फसवणूक केली असल्याचे पोलीस तपासात निष्पन्न झाले आहे. या प्रकरणात पोलीस कोठडीची मुदत संपल्याने पोलिसांनी फडणीस याला न्यायालयात हजर केले. त्यावेळी गुन्ह्यातील रक्कमेचे काय केले याचा तपास करण्यासाठी आणि फरार आरोपींना अटक करण्यासाठी त्याच्या पोलीस कोठडीत वाढ करण्याची मागणी अतिरिक्त जिल्हा सरकारी वकील सुनील हांडे यांनी केली. ही मागणी ग्राह्य धरत न्यायालयाने फडणीस याच्या पोलीस कोठडीत वाढ केली.

Page 1 of 45
Open Chat
1
Close chat
Hello! Thanks for visiting us. Please press Start button to chat with our support :)

Start