24 Mar 2017

एमपीसी न्यूज - सासरी होत असलेल्या छळास कंटाळून विवाहितेने आत्महत्या केल्याचा धक्कादायक प्रकार पुणे शहरातील पाषाण परिसरातून उघडकीस आला. याप्रकरणी विवाहितेच्या पतीला अटक करण्यात आली. ही घटना 22 मार्चला उघडकीस आली.

निकिता चंदन पुरोहित (वय-30, रा. रेणुका हील्स, फ्लॅट नं.6, सुस रोड, पाषाण, पुणे), असे आत्महत्या केलेल्या विवाहितेचे नाव आहे. याप्रकरणी तिचा पती चंदन कैलेशचंद्र पुरोहित (वय-29) याला अटक केली. मयत विवाहितेचे वडील शंभुदत्त बोडा (वय-56, जोधपूर, राजस्थान) यांनी चतु:श्रृंगी पोलीस ठाण्यात फिर्याद दिली आहे.

याप्रकरणी अधिक माहिती अशी की, फिर्यादी यांची मुलगी सासरी नांदत असताना आरोपी चंदन पुरोहित याने तिचा शारीरिक आणि मानसिक छळ केला. या सर्व प्रकाराला कंटाळून तिने 22 मार्चला राहत्या घरी गळफास घेऊन आत्महत्या केली.

अधिक तपास सहाय्यक पोलीस निरीक्षक एस.एम.बोबडे करीत आहेत.

24 Mar 2017

एमपीसी न्यूज - भांडणे सोडविण्यासाठी गेलेल्या टोळक्याने पोलिसांनाच अपशब्द वापरत लाथा-बुक्यांनी बेदम मारहाण केली. ही घटना बुधवारी (दि. 22) रात्री सव्वादहाच्या सुमारास थेरगाव येथे घडली. याप्रकरणी चार जणांना अटक करण्यात आली आहे.

 

रुपेश शामदास वाघमारे, स्वप्नील साधुराम वाघमारे, सत्यविजय साधुराम वाघमारे, साधुराम वाघमारे यांना अटक करण्यात आली आहे. तर, त्यांचा साथीदार लखन उर्फ प्रवीण बारणे आणि एका महिलेसह 8 ते 10 जणांविरोधात गुन्हा दाखल करण्यात आला आहे. याबाबत वाकड ठाण्याचे पोलीस नाईक विक्रम जगदाळे यांनी फिर्याद दिली आहे.

 

आरोपी साधुराम वाघमारे याचा टेलरिंगचा व्यवसाय आहे. तर, संतोष अशोक सूर्यवंशी यांची खाणावळ आहे. सूर्यवंशी हे आरोपी वाघमारे याला जेवणाचे डबे देतात. वाघमारे यांनी जेवणाचे पैसे धनादेशाद्वारे दिले होते. मात्र, तो धनादेश बाऊन्स झाला. त्यामुळे सूर्यवंशी हे आरोपी वाघमारे याच्याकडे पैसे मागण्यास आले होते, असे पोलिसांनी सांगितले.

 

पैसे देण्यावरून बुधवारी रात्री त्यांच्यात बाचाबाची सुरू झाली. आरोपींकडे लाकडी दांडके, हॉकिस्टिक अशी धारदार हत्यारे होती. त्याचवेळी पोलीस नाईक विक्रम जगदाळे पोलिसांसह हद्दीत पेट्रोलिंग करत होते. त्यांची भांडणे सोडविण्यास गेले होते. त्यावेळी आरोपींनी पोलिसांनाच अपशब्द वापरून लाथा-बुक्यांनी बेदम मारहाण केली. तसेच धमकी दिल्याचे, पोलिसांनी सांगितले. वाकड पोलीस तपास करत आहेत.

24 Mar 2017

एमपीसी न्यूज - सख्या चुलत्यानेच सात वर्षाच्या अल्पवयीन पुतणीवर अत्याचार केल्याची धक्कादायक घटना आज (शुक्रवारी) पिंपरी परिसरात उघडकीस आली. याप्रकरणी चुतल्याला ताब्यात घेण्यात आले आहे. 

याप्रकरणी 28 वर्षीय चुलत्याला पोलिसांनी ताब्यात घेतले आहेत. त्याच्यावर बलात्कार, बाल लैंगिक अत्याचार प्रतिबंधक कायदा (पास्को) नुसार गुन्हा दाखल करण्यात आला आहे.  याबाबत पीडित मुलीच्या आईने पिंपरी पोलीस ठाण्यात फिर्याद दिली आहे.

चुलता आणि मुलीचे आई-वडील एकत्र राहत आहेत. रविवारी मुलीची आई कामावर गेली होती. त्यावेळी मुलगी एकटी घरी असताना चुलत्याने तिच्यावर लैंगिक अत्याचार केला. मुलीने आपल्या आईला आपल्यासोबत घडलेला प्रकार सांगितला.

मुलीच्या आईने आज शुक्रवारी पिंपरी पोलीस ठाण्यात फिर्याद दिली आहे. त्यानुसार चुलत्याला चौकशीसाठी ताब्यात घेण्यात आला आहे. पिंपरी ठाण्याच्या पोलीस उपनिरीक्षक रत्ना सावंत तपास करत आहेत.

24 Mar 2017

तब्बल 14 लाखांच्या चरस सह एक स्विफ्ट कार जप्त

 

गुन्हे शाखेच्या दरोडा प्रतिबंधक पथकाची कारवाई

 


एमपीसी न्यूज - पुणे-नगर रोडवरील फिनिक्स मॉलसमोर अमली पदार्थाच्या तस्करी प्रकरणी 5 जणांना दरोडा प्रतिबंधक पथकाने अटक केली. कारवाईत यामध्ये 13 लाख 80 हजार किमतीचे (3 किलो 450 ग्रॅम) चरस  यासह 6 लाख रुपये किमतीची स्विफ्ट कार जप्त करण्यात आली. काल (गुरुवारी) रात्री पावणेअकरा वाजता ही कारवाई करण्यात आली. अटक करण्यात आलेले पाचही आरोपी अहमदनगर येथील आहेत.

 

समाधान दत्तू गोरे (वय 25 रा. मु. पो. महीम , ता. सांगोला जिल्हा अ.नगर) असाराम गणपत गोपाळघरे (वय 28 रा. मु. पो. नागोबाची वाडी, पोष्ट खर्डा, ता. जामखेड अ. नगर) वैजनाथ रामा सांगळे  (वय 29 रा. मु आनंदवाडी, पोस्ट नायगाव, ता. जामखेड जि. अ. नगर) भास्कर दत्तू गोपाळघरे (वय 27, रा.मु नागोबाची वाडी पो खर्डा, ता. जामखेड जि. अ.नगर ) फिरोज इकबाल पंजाबी (वय 37 रा. जि. अहमदनगर), अशी अटक करण्यात आलेल्या आरोपींची नावे आहेत.

 

पोलिसांनी दिलेल्या माहितीनुसार, दरोडा प्रतिबंधक पथकातील पोलिसांना काल रात्री पुणे-नगर रोडवरील फिनिक्स मॉलसमोर या पाचही आरोपींकडे अमली पदार्थ बाळगले असल्याचे पोलिसांना आढळून आले. त्यामुळे त्यांच्यावर तातडीची कारवाई करीत सर्व माल जप्त करीत त्यांना अटक करून विमानतळ पोलिसांच्या ताब्यात देण्यात आले. विमानतळ पोलीस अधिक तपास करीत आहेत.

 

पोलीस उपायुक्त पी.आर. पाटील, सहाय्यक आयुक्त सुरेश भोसले यांच्या मार्गदर्शनाखाली दरोडा प्रतिबंधक पथकाने केली कारवाई.

24 Mar 2017
एमपीसी न्यूज - बांधकाम सुरु असलेल्या इमारतीच्या चौथ्या मजल्यावरुन पडून कामगाराचा जागीच मृत्यू झाला. ही घटना आज (शनिवारी) सकाळी अकराच्या सुमारास पिंपळे सौदागर येथे घडली. 
 

रवी माने (वय 30) असे मृत्यू झालेल्या कामगाराचे नाव आहे. 
 

पिंपळे सौदागर येथे सुरु असलेल्या एका बांधकाम साईटवर रवी काम करत होता. शनिवारी सकाळी इमारतीच्या चौथ्या मजल्यावर काम करत असताना तो अचानक खाली पडला. त्यात त्याचा जागीच मृत्यू झाला. याप्रकरणी सांगवी पोलीस ठाण्यात गुन्हा दाखल करण्याचे काम सुरु आहे.
 

मृतदेह शवविच्छेदनासाठी पिंपरीतील महापालिकेच्या वायसीएम रुग्णालयात नेण्यात आला आहे.

24 Mar 2017

एमपीसी न्यूज - सहा जणांच्या टोळक्याने एका महिलेला 'तुमच्या घराशेजारची जागा आम्हाला विकली आहे, ती जागा तुम्ही खाली करा. अन्यथा तुमचे राहते घर तोडून टाकण्याची, धमकी दिली. हा प्रकार काळेवाडीतील ज्योतिबानगर येथे बुधवारी (दि.22) सकाळी साडेदहाच्या सुमारास घडला.

 

सचिन नढे (रा. काळेवाडी) याच्यासह सहा जणाविरूद्ध वाकड पोलिसांनी गुन्हा दाखल केला आहे. याप्रकरणी जयराणी पिल्ले (वय 53, रा. ज्योतिबानगर, काळेवाडी) यांनी फिर्याद दिली आहे.

 

सचिन नढे याच्यासह त्याचे पाच साथीदार पिल्ले यांच्या घरासमोर गेले. सचिनने पिल्ले यांना तुमच्या घराशेजारची जागा योगेश कदम यांनी मला विकली असल्याचे सांगितले. त्यामुळे ती जागा तुम्ही खाली करा. घराचा दरवाजा बंद करा.  अन्यथा तुमचे राहते घर तोडून टाकू, अशी धमकी दिल्याचे, फिर्यादीत नमूद केले आहे. वाकड ठाण्याचे सहाय्यक पोलीस निरीक्षक अभिजीत जाधव तपास करत आहेत.

24 Mar 2017

एमपीसी न्यूज - भर दिवसा रस्त्यावर पार्क केलेल्या मोटारीचा दरवाजा उघडून  चोरट्यांनी 18 हजार रुपयांची रोकड चोरून नेली.  ही घटना आज (गुरुवारी) दुपारी एकच्या सुमारास पिंपरी चौकात घडली.

 

याप्रकरणी बिल्वा उदय देव (वय 32, रा. प्राधिकरण, निगडी) यांनी पिंपरी पोलीस ठाण्यात फिर्याद दिली आहे.

 

बिल्वा देव यांनी त्यांची इंडिका मोटार (एमएच 14, एएम 9877) ही गुरुवारी दुपारी पिंपरी चौकात गांधीनगरकडे जाण्याच्या दिशेच्या रस्त्यावर लॉक करून पार्क केली होती. त्यावेळी आलेल्या चोरट्यांनी मोटारीचा दरवाजा उघडून मोटारीतील ठेवलेल्या पर्समधील 18 हजार रुपयांची रोकड आणि महत्वाची कागदपत्रे चोरून नेली. चोरट्यांनी पर्स तिथेच फेकून दिली आहे. दिवसा-ढवळ्या मोटारीचा दरवाजा उघडून रोकड लंपास केल्याने परिसरात घबराट पसरली होती. पिंपरी पोलीस तपास करत आहेत.

 

दरम्यान, मोरवाडी येथे दुपारी एकच्या सुमारास मोटारीची काच फोडून लॅपटॉप आणि रोकड लंपास केल्याची माहिती मिळत आहे. मात्र, पोलिसांनी याला दुजोरा दिला नाही. परराज्यातील टोळी पिंपरी-चिंचवड शहरात आली आहे. मोटारीची काच फोडून रोकड आणि साहित्य चोरून नेत असल्याचे, पिंपरी पोलिसांनी सांगितले.

24 Mar 2017

मुलगा न झाल्याचा रागातून केले कृत्य

 

मृतदेह लपवून केला अपहरणाचा बनाव

 

एमपीसी न्यूज - आपल्याला मुलगा नाही व जावेला आहे. या कारणामुळे तसेच कायम टोचून बोलले जात असल्याच्या रागातून 5 वर्षाच्या सख्या पुतण्याचा गळा आवळून खून करून घराजवळील पाण्याच्या ड्रममध्ये मृतदेह लपवून ठेवणाऱ्या या नराधम महिलेला कोणताही पुरावा नसताना तपास कौशल्य वापरून हडपसर पोलीस ठाण्याच्या तपास पथकाने 24 तासात अटक केली.

 

माणुसकी व नातेसंबंधांना काळिमा फासणाऱ्या या घटनेने हडपसर परिसरात चांगलीच खळबळ उडाली आहे. माऊली विनोद खांडेकर (वय 5, रा. काळेपडळ, हडपसर), असे मृत मुलाचे नाव आहे. याप्रकरणी अनिता खांडेकर (वय 32, रा. काळेपडळ) हिला अटक करण्यात आली आहे.

 

हडपसर पोलिसांनी दिलेल्या माहितीनुसार, अनिता हिला चार मुली आहेत. त्यामुळे सासू तिला टोचून बोलत व रागराग करत. तीन भावांमध्ये फक्त धाकट्या जावेलाच माऊली हा एकटाच मुलगा होता. त्यामुळे त्याचे घरात लाड होत असे तर अनिताच्या मुलींचा लाड होत नसे.

 

या असूया व रागातून थंड डोक्याने तिने माऊलीचा गळा आवळून खून केला. त्यानंतर मृतदेह घरातील कॅाटखाली ठेवला, आणि नंतर घरातील मंडळी आणि पोलीस मुलाच्या शोधात घराबाहेर पडल्याची संधी साधून घरामागील पाण्याच्या ड्रममध्ये तिने मृतदेह टाकला. त्यानंतर माऊली बेपत्ता झाल्याचा बनाव तिने केला. शोधाशोध करूनही माऊली मिळून न आल्याने तो बेपत्ता झाल्याची तक्रार हडपसर पोलीस ठाण्यात गुरुवारी कुटुंबीयांनी दिली. कुटुंबीय व पोलीस माऊलीचा शोध घेत होते.

 

दरम्यान, शेजारील महिलेच्या दोन महिन्यापूर्वी चोरलेल्या सिमकार्डद्वारे अनिताने माऊलीच्या वडिलांना निनावी फोन करून माऊली जेजुरी रेल्वे स्टेशनवर असल्याचे सांगितले. घरातील मंडळी माऊलीला शोधण्यासाठी जावीत व मृतदेहाची विल्हेवाट लावावी हा अनिताचा हेतू होता. अखेर फोन केलेल्या सिमकार्डच्या आधारे पोलीस अनितापर्यंत पोहोचले. या कार्डवरूनच तिने दीड महिन्यापूर्वी भावालादेखील फोन केल्याचे तपासात उघड झाले. त्यामुळे अनितानेच हा खून केला असावा, असा संशय बळावला. त्या आधारे अनिताची चौकशी केली. मात्र, अनिता सुरुवातीला पोलिसांना दाद देत नव्हती. अखेर पोलिसी खाक्या दाखविल्यानंतर तिने आपल्या गुन्ह्याची कबुली दिली. गुन्हे पोलीस निरीक्षक अंजूम बागवान सहाय्यक पोलीस निरीक्षक हेमंत पाटील यांच्या पथकाने 24 तासांत खुनाचा तपास केला.

23 Mar 2017

एमपीसी न्यूज - बालेवाडी क्रीडा संकुल येथे खेळाचे प्रशिक्षण घेणा-या एका 15 वर्षीय अल्पवयीन मुलीवर एका अॅथलेटिक्सचे प्रशिक्षण घेणा-या खेळाडूने अत्याचार केला. ही धक्कादायक घटना आज (गुरुवारी) उघडकीस आली. 

 

याप्रकरणी चंद्रकांत रमेश झगडे (वय 22, रा. बालेवाडी क्रीडा संकुल, मूळ दापोली, रत्नागिरी) याला अटक करण्यात आले आहे. त्याच्यावर बाल लैंगिक अत्याचार प्रतिबंधक कायद्यानुसार (पास्को) गुन्हा दाखल करण्यात आला आहे. याबाबत विजय बापुराव संतान (वय 50, रा. बालेवाडी) यांनी हिंजवडी पोलीस ठाण्यात फिर्याद दिली आहे.

 

आरोपी चंद्रकांत हा बालेवाडी क्रीडा संकुल येथे अॅथलेटिक्स खेळाचे प्रशिक्षण घेत आहे. तर, पीडित 15 वर्षाची मुलगीही दुस-या एका विभागात प्रशिक्षण घेत आहे. चंद्रकांत याने मुलीला तिची इच्छा नसताना स्वत: मोबाईल फोन खरेदी करून दिला. सप्टेंबर 2016 ते 3 मार्च 2017 दरम्यान चंद्रकांत याने दिलेल्या फोनवर फोन लावून तिच्याशी संपर्क वाढविला. तसेच परवानगीशिवाय संकुलाच्या बाहेर घेऊन जात होता, असे फिर्यादीत नमूद केले आहे.

 

हिंजवडी ठाण्याच्या फौजदार अनिता सूर्यवंशी तपास करत आहेत.

23 Mar 2017

बाप-लेकासह सात जणांविरोधात गुन्हा

एमपीसी न्यूज - पाच ते सात जणांच्या टोळक्याने हातामध्ये धारदार हत्यारे घेऊन जाऊन  पिंपरीतील ज्यूडसन शाळेत धुडगूस घातला. वर्गाच्या काचांसह विविध साहित्याची तोडफोड करत दहशत माजविली. ही घटना आज (गुरुवारी) सकाळी अकराच्या सुमारास घडली.

प्रकरणी युसूफ रज्जाक कुरेशी (वय 39) याच्यासह त्याचा आणि भावाचा अल्पवयीन मुलगा, आणि ईस्माईल कुरेशी (वय 23) यांच्यासह त्यांच्या तीन ते चार साथीदारांविरोधात गुन्हा दाखल करण्यात आला आहे. याप्रकरणी ज्युडशन शाळेच्या मुख्याध्यापिका सुजाता विभूती भूषण (वय 57, रा. इंद्रायणीनगर, भोसरी) यांनी पिंपरी पोलीस ठाण्यात फिर्याद दिली आहे.

पिंपरी येथे ज्यूडसन शाळा आहे. आरोपी युसूफ याचा 14 वर्षाचा मुलगा  या शाळेत शिकत आहे. सात ते आठ दिवसांपूर्वी पिंपरीतील तिघांनी त्याच्या मुलाला मारहाण केली होती. पुन्हा बुधवारी आणि आज गुरुवारी पिंपरीतील मुलांनी युसूफ याच्या मुलाला मारहाण केली.

शाळेच्या शिक्षकांनी विद्यार्थ्यांच्या सुरक्षेची काळजी घेणे गरजेचे आहे, असे म्हणत युसूफ हा आपल्या मुलांसह इतर तीन ते चार साथीदारांना घेऊन गुरुवारी सकाळी शाळेत आला. त्यांच्याकडे धारदार हत्यारे होती, असे प्रत्यक्षदर्शींनी सांगितले. आरोपींनी शाळेच्या तळमजल्यांच्या वर्गाच्या काचांची, नोटीस बोर्ड आणि शाळेच्या आवारातील झाडांच्या कुंड्या तसेच फायर एक्स्टँटच्या बकेटची तोडफोड केली.

''अब हम एक एक टिचर को देखते है, अब कैसे स्कूल चलाते हो ये देखेंगे'' असे म्हणत शिवीगाळ केली. शाळेच्या परिसरात दहशत माजविली. आरोपींची गुंडागंर्दी पाहून शाळेतील लहान लहान मुले घाबरून सैरावैरा पळू लागली. दिवसा-ढवळ्या घडलेल्या घटनेने पिंपरी परिसरात एकच खळबळ उडाली होती.

पिंपरी पोलीस तपास करत आहेत.

23 Mar 2017

एमपीसी न्यूज - पोलिसात तक्रार दिल्यास कुटुंबाला जीवे मारण्याची धमकी देत मारहाण केल्याप्रकरणी एकाविरूद्ध वाकड पोलीस ठाण्यात गुन्हा दाखल करण्यात आला आहे. 

 

तात्या सुवरे (रा. पडवळनगर, थेरगाव), असे गुन्हा दाखल केलेल्याचे नाव आहे. याप्रकरणी रमेश गुप्ता (वय 30, रा. जगतापनगर, थेरगाव) यांनी वाकड पोलीस ठाण्यात फिर्याद दिली आहे.

 

रमेश हे त्यांचे मेहुणे अभिषेक गुप्ता, शेजारी रहणारे गौतम गुप्ता यांच्यासह साडू नारायण गुप्ता (रा. क्रांतीवीरनगर, थेरगाव) यांच्याकडे गेले होते. नारायण यांच्या दुकानासमोर ते थांबले असता आरोपी सुवरे त्याठिकाणी आला. 'माझ्याकडे रागाने का पाहतोस, असे म्हणत माझ्या भावाला तडीपार केले असून मलाही येथे राहण्याची इच्छा नाही. तू माझ्या विरोधात पोलिसात तक्रार दिल्यास तुझ्या कुटुंबाला जीवे मारील, अशी धमकी देत रमेशला मारहाण केली.

 

पोलीस हवालदार एच. जी. पानसरे तपास करत आहेत.

23 Mar 2017

एमपीसी न्यूज - गुन्हे शाखा युनिट पाचने केलेल्या कारवाईत हडपसर परिसरातील गोंधळेनगर येथून एका सराईत चोरट्यास जेरबंद केले आहे. त्याच्याकडून आठ घरफोडी आणि पाच वाहनचोरीचे गुन्हे उघडकीस आले असून त्याच्या ताब्यातून चार लाख अडतीस हजाराचा मुद्देमाल जप्त करण्यात आला. आरोपी सराईत गुन्हेगार असून त्याच्यावर यापूर्वीही चोरीचे 25 गुन्हे दाखल आहेत.

 

रफिक हुसेन शेख (वय-22, सय्यदनगर, हडपसर, पुणे) असे जेरबंद केलेल्या चोरट्याचे नाव आहे.

 

याप्रकरणी अधिक माहिती अशी की, गुन्हे शाखा युनिट पाचचे कर्मचारी भेकराई येथे 18 मार्च रोजी झालेल्या घरफोडीचा तपास करत असताना पोलीस हवालार लक्ष्मण शिंदे आणि माणिक पवार यांना संबंधित आरोपी गोंधळेनगर परिसरात चोरी करण्याच्या उद्देशाने येणार असल्याची माहिती मिळाली होती. त्यानुसार पोलिसांनी सापळा रचून त्याला ताब्यात घेतले. यावेळी त्याच्याजवळ असलेल्या बॅगमधून लोखंडी कटावणी, सायकल स्टँड, दोन स्क्रू ड्रायव्हर आणि तीन तुटलेली कुलुपे आढळली.

 

पोलिसांनी त्याला अटक करून त्याच्याकडे अधिक चौकशी केली असता त्याने पुणे शहरातील हडपसर, वानवडी, मुंढवा, कोंढवा, सहकारनगर, भारती विद्यापीठ, लष्कर, फरासखाना, येरवडा या भागात घरफोड्या आणि वाहनचो-या केल्याचे कबूल केले. दिवसा टेहळणी करून त्यानंतर तो घरफोडी करत असे. त्याच्याकडून आतापर्यंत 13 गुन्हे उघडकीस आले आहेत. या गुन्ह्यातील सोन्याचे गंठण, नेकलेस, चैन, कानातील झुमके, टॉप्स, लेडीज अंगठ्या असा एकूण 4 लाख 38 हजार 645 किमतीचा मुद्देमाल जप्त केला आहे. गुन्ह्याचा अधिक तपास गुन्हे शाखा युनिट पाचचे सहाय्यक पोलीस निरीक्षक महादेव वाघमोडे करीत आहेत.

23 Mar 2017
एमपीसी न्यूज - पोलीस हवालदाराची पत्नी मुलांसाठी बिस्कीट आणण्यासाठी दरवाजाला कडी लावून गेली असता अवघ्या पंधरा मिनिटात चोरट्याने घरातील सोन्याचे दागिने आणि 50 हजाराची रोकड, असा सव्वालाख रुपये किमतीचा ऐवज लांबविला.  ही घटना वाकड येथील कावेरीनगर पोलीस वसाहतीत मंगळवारी (दि.21) सायंकाळी सहाच्या सुमारास घडली. 

कैलास केंगले (वय 30, रा. कावेरीनगर वसाहत, वाकड) यांनी वाकड पोलीस ठाण्यात फिर्याद दिली आहे.

 
केंगले हे सांगवी पोलीस ठाण्यात पोलीस हवालदार म्हणून कार्यरत आहेत. 21 मार्च रोजी सायंकाळी सातच्या सुमारास केंगले यांच्या पत्नी दरवाजाला कडी लावून मुलांसाठी बिस्किट आणण्याकरिता जवळच्या दुकानात गेल्या होत्या. पंधरा मिनिटात बिस्कीट घेऊन त्या घरी आल्या असता चोरी झाल्याचे निदर्शनास आले. 

चोरट्याने दरवाजाची कडी उघडून शयनगृहातील कपाटामधील पावणेदोन लाखाचे सोन्याचे दागिने आणि 50 हजाराची रोकड असा सव्वादोन लाख रूपये किमतीचा ऐवज चोरून नेला. वाकड ठाण्याचे  सहाय्यक पोलीस निरीक्षक अभिजीत जाधव तपास करत आहेत.

23 Mar 2017

एमपीसी न्यूज - पिंपळेगुरव, देवकर पार्क येथील साई अंगण या इमारतीच्या तिस-या मजल्यावरील जिन्यावर (गुरुवारी) 10 ते 15 दिवसांची मुलगी सापडली. त्यामुळे परिसरात एकच खळबळ उडाली. दुपारी दोनच्या सुमारास हा प्रकार उघडकीस आला.

 

याप्रकरणी इमारतीमधील रहिवाशी भानुदास रामभाऊ वैद्यकर (वय 48) यांनी सांगवी पोलीस ठाण्यात फिर्याद दिली. त्यानुसार अनोळखी महिलेच्या विरोधात गुन्हा दाखल करण्यात आला आहे.

 

पिंपळेगुरव येथे साई अंगण या नावाने इमारत आहे. दुपारी दोनच्या सुमारास इमारतीच्या तिस-या मजल्यावरील पाय-यांवर एक लहान बाळ रडत असल्याचे वैद्यकर यांच्या लक्षात आले. याबाबत सांगवी पोलिसांना कल्पना दिली. पोलीस त्वरीत घटनास्थळी गेले. त्यांनी 10 ते 15 वर्षाच्या मुलीला पोलीस ठाण्यात नेले आहे. सांगवी पोलीस तपास करत आहेत.

23 Mar 2017

एमपीसी न्यूज - 'तू माझ्या मुलीचे वाटोळे केले आहे', असे म्हणत सासरच्या मंडळींनी घरात घुसून जावयाला शिवीगाळ करत मारहाण केली. ही घटना सोमवारी (दि.20) दुपारी साडेतीनच्या सुमारास यमुनानगर, निगडी येथे घडली.

 

याप्रकरणी सासरे कैलास खंडेराव ठोंबरे, मेव्हुणा अनंत कैलास ठोंबरे, मामा सासरे संभाजी मारुती लांडगे, अतुल भाऊसाहेब बोटे, विकास भाऊसाहेब बोटे आणि सरस्वती बोटे (सर्व रा. चिंचोडी, जिल्हा अहमदनगर) यांच्याविरोधात दंगल माजविल्याप्रकरणी गुन्हा दाखल करण्यात आला आहे. याप्रकरणी वंसत कोल्हे (वय 55, रा. यमुनानगर, निगडी) यांनी निगडी पोलीस ठाण्यात फिर्याद दिली आहे.

 

कोल्हे यांचा मुलगा प्रदीप आणि किर्ती यांचे दोन वर्षापूर्वी लग्न झाले आहे. लग्नानंतर प्रदीप आणि  किर्ती यांची नेहमी किरकोळ कारणावरून भांडणे होत होती. सोमवारी किर्ती यांच्या वडिलांसह माहेरची मंडळी निगडीत आली.

 

'तू माझ्या मुलीचे वाटोळे केले आहे', असे म्हणत कैलास ठोंबरे व सरस्वती बोटे यांनी प्रदीप यांना शिवीगाळ करत मारहाण केली. त्यावेळी प्रदीपची आई भांडणे सोडविण्यासाठी आल्या असता त्यांनाही मारहाण केल्याचे, पोलिसांनी सांगितले. तसेच किर्तीला आपल्यासोबत घेऊन गेले आहेत. निगडी ठाण्याचे सहाय्यक पोलीस निरीक्षक दिलीप साबळे तपास करत आहेत.

 

दरम्यान, यापूर्वी किर्ती यांनी पती प्रदीप हे मारहाण करत असल्याची तक्रार, यमुनानगर पोलीस चौकीत दिल्याचे, पोलिसांनी सांगितले.

23 Mar 2017

एमपीसी न्यूज - भर दिवसा रस्त्यावर पार्क केलेल्या मोटारीची काच फोडून चोरट्यांनी  लॅपटॉप आणि रोकड चोरून नेल्याच्या दोन घटना पिंपरी ठाण्याच्या हद्दीत आज (गुरुवारी) दुपारी घडल्या आहेत.  

 

मोरवाडी येथे दुपारी एकच्या सुमारास मोटारीची काच फोडून लॅपटॉप आणि रोकड लंपास केल्याची माहिती मिळत आहे. पिंपरी महापालिका भवनासमोर पार्क केलेल्या मोटारीतील बॅगमध्ये ठेवलेल्या पॉकेटमधील 18 हजार रुपये चोरून नेले आहेत.

 

चोरट्यांनी बॅग रस्त्यावरच फेकून दिली आहे. दिवसा-ढवळ्या मोटारीची काच फोडून लॅपटॉप आणि रोकड चोरून नेल्यामुळे परिसरात घबराट पसरली आहे. पिंपरी पोलीस घटनास्थळी दाखल झाला असून तपास करत आहेत.

 

परराज्यातील टोळी पिंपरी-चिंचवड शहरात आली आहे. मोटारीची काच फोडून रोकड आणि साहित्य चोरून नेत असल्याचे, पिंपरी पोलिसांनी सांगितले.  

23 Mar 2017
 
एमपीसी न्यूज - एका सराईत तडीपार गुन्हेगाराला निगडी पोलिसांनी दोन पिस्तुलांसह जेरबंद केले. त्याच्याकडून दोन पिस्तूल आणि दोन जिवंत काडतुसे असा 70 हजार रुपयांचा ऐवज जप्त करण्यात आला आहे. ही कारवाई आकुर्डी रेल्वेलाईन जवळ करण्यात आली
 
दत्ता गोवर्धन कटारे (वय 23, रा. दळवीनगर झोपडपट्टी, चिंचवड) असे अटक केलेल्या सराईत गुन्हेगाराचे नाव आहे. 
 
निगडी पोलीस हद्दीत गस्त घालत होते. आरोपी दत्ता याच्याकडे पिस्तूल असून तो आकुर्डी रेल्वे लाईनजवळ आला असल्याची माहिती पोलिसांना मिळाली. त्यानुसार पोलिसांनी सापळा रचून त्याला जेरबंद केले. 
 
दत्ता कटारे हा सराईत गुन्हेगार आहे. चिंचवड पोलीस ठाण्यात त्याच्यावर गंभीर गुन्हे दाखल आहेत. त्याला तडीपार देखील करण्यात आले आहे. तडीपार असूनही तो शहरात फिरत होता, असे पोलिसांनी सांगितले. निगडी पोलीस तपास करत आहेत.
23 Mar 2017

एमपीसी न्यूज - पुणे लष्कर भागातील सेंटर स्ट्रीटवर उत्कर्ष जेम्स अॅण्ड ज्वेलर्स या दुकानातून अज्ञात चोरट्यांनी साडेचार लाख रुपये किमतीच्या सोन्याच्या बांगड्या चोरून नेल्या. ही घटना 20 मार्चला सकाळी 12 वाजण्याच्या सुमारास घडली.

 

याप्रकरणी दुकानाचे मालक उत्कर्ष श्रॉफ यांनी तक्रार दिली असून लष्कर पोलीस ठाण्यात दोघा अज्ञात इसमावर गुन्हा दाखल करण्यात आला.

 

याप्रकरणी अधिक माहिती अशी की, फिर्यादी यांच्या उत्कर्ष जेम्स अॅण्ड ज्वेलर्स या दुकानात सोने खरेदीच्या बहाण्याने दोघे इसम आले होते.  त्यापैकी एकाने दुकानातील कामगाराची नजर चुकवून बारीक हि-याचे खडे असलेल्या आणि नक्षीकाम असलेल्या साडेचार लाख रुपये किमतीच्या दोन बांगड्या चोरून नेल्या.


पोलीस उपनिरीक्षक एस. व्ही. गाडे अधिक तपास करीत आहेत.

Page 1 of 13