23 Apr 2017

'द्या' नामक मुख्य साठेबाजाचा शोध सुरू; एफडीआय व चाकण पोलिसांची कारवाई

 

एमपीसी न्यूज -  गुटखा, तंबाखूसह सुगंधी सुपारी व पानमसाला विक्रीवर बंदी असताना चाकण परिसरात याचा साठा होत असल्याने चाकण पोलिसांनी अन्न व औषध प्रशासन विभागाच्या (एफडीआय) मदतीने खालुंब्रे येथे शनिवारी (दि. 22) दुपारी टाकलेल्या छाप्यातून तब्बल दोन लाख सहा हजारांचा गुटखा, तंबाखू, सुंगधी सुपारी व पानमसाला जप्त करण्यात आला आहे. कारवाईत एकाला ताब्यात घेण्यात आले आहे. रात्री उशिरापर्यंत या भागातील विविध ठिकाणी छापे मारण्यात येत होते.

 

गौरीशंकर भुलचंद दुबे ( वय 19, सध्या रा. खालुंब्रे ता.खेड)

 

वाढत्या व्यसनाधिनतेला आळा घालण्यासाठी सरकारतर्फे गुटखा, तंबाखूसह पानमसाला व सुगंधित सुपारी विक्रीवर बंदी घातली आहे. मात्र, अनेक ठिकाणी या पदार्थांची विक्री होत असल्याचे चित्र सातत्याने समोर येत असल्याने चाकण पोलिसांच्या विशेष पथकाने अन्न व औषध प्रशासन विभागाच्या मदतीने याविरोधात मोहीम हाती घेतली आहे. त्याअंतर्गत शनिवारी दुपारपासून परिसरात केलेल्या तपासणी मोहिमेत 'द्या' नामक ( पूर्ण नाव निष्पन्न नाही) इसमाने खालुंब्रे येथे खूप मोठा अवैध गुटख्याचा साठा केल्याची माहिती पोलिसांना मिळाली होती.

 

खालुंब्रे येथे पोलीस निरीक्षक संतोष गिरीगोसावी यांच्या मार्गदर्शनाखालील उपनिरीक्षक महेश मुंडे, अजय भापकर, सुदाम हरगुडे , संजय जरे, रमेश नाळे, मुश्ताक शेख आदींच्या पथकाने अचानक छापा मारला. यावेळी आरोपी गौरीशंकर याने हा गुटखा, पानमसाला, सुगंधी सुपारी, स्वादयुक्त तंबाखू व तत्सम पदार्थ, असा दोन लाख सहा हजार रुपयांचा मुद्देमाल अवैधरित्या साठवणूक करीत असतानाचे आढळून आले. पोलिसांनी गौरीशंकर दुबे यास ताब्यात घेऊन छाप्यात पकडलेला सर्व अवैध गुटखा अन्न व औषध प्रशासन विभागाचे (एफडीआय) ताब्यात कायदेशीररित्या दिला आहे. औषध प्रशासन विभागाकडून पुढील तपास सुरू करण्यात आला आहे.

 

चोरीचा मामला हळूहळू ...

 

संपूर्ण राज्यात गुटखा बंदी असली तरी त्याचा फायदा मात्र, काही बड्या तस्करांनी उचलला असून दुप्पट चौपट किमती आकारून आणि बनावट गुटखा विक्री करून गेल्या काही वर्षात हे पुरवठादार 'मालामाल' झाले आहेत. अन्न व औषध प्रशासनाने शनिवारी खालुंब्रे मध्ये 2 लाख सहा हजार रुपयांचा गुटखा जप्त केला असला तरी हे हिमनगाचे केवळ टोक आहे. संपूर्ण जिल्हाभर छुप्या मार्गाने मोठ्या प्रमाणावर गुटखा येत असतानाही त्यावर अंकूश ठेवणे अशक्यप्राय बनले आहे.  बनावट गुटखा विक्री करण्याचा गोरखधंदा करणारी मंडळी मालामाल होत आहेत. 'चोरीचा मामला आणि हळूहळू बोंबला' .... प्रमाणे एकूणच स्थिती झाली असून ही गुटखा बंदी लोकांच्या 'भल्या' साठी की तस्करांच्या 'लाभा' साठी, असा प्रश्न निर्माण उपस्थित केला जात आहे.

23 Apr 2017

एमपीसी न्यूज - बहिणीची छेड कढल्याचा जाब विचारल्यामुळे चिडलेल्या सात ते आठ जणांनी भावाला आणि बहिणीला लोखंडी रॉडने बेदम मारहाण केली होती.  ही घटना बुधवार (दि.19) सायंकाळी पावणेआठच्या सुमारास च-होली येथील डी.वाय. पाटील गेटजवळ घडली होती. या गुन्ह्यातील मुख्य आरोपी मयुर खेसे आणि त्याच्या इतर सहा ते सात जणांवर दिघी पोलीस ठाण्यात गुन्हा दाखल करण्यात आला होता. घटनेनंतर मयुर खोसे हा फरार होता.दिघी पोलीस त्याचा तपास घेत होते. परंतु तो मिळून आला नाही. काल मयुर खेसे हा खडकी न्यायालयात हजर झाला होता. त्याने खडकी कोर्टातून जामीन मिळवला होता. काल (शनिवार) शिवराज तापकीर (वय-19, रा. च-होली बुद्रुक) याने त्याच्या साथीदारांसह मयुरच्या घरावर दगडफेक करुन घरातील महिलांचा विनयभंग केला. विमानतळ पोलिसांनी दहा जणांना ताब्यात घेऊन त्यांच्यावर विनयभंग आणि दंगलीचा गुन्हा दाखल केला आहे.


शिवराज हा त्याच्या बहिणीला कॉलेजमधून घरी घेऊ जात होता. त्यावेळी मयुर खेसे आणि त्याच्या इतर साथिदारांनी शिवराजच्या बहिणीची छेड काढली. यावरुन दोघांमध्ये मारहाण झाली होती. शिवराजने दिघी पोलीस  ठाण्यात तक्रर दिली होती. दिघी पोलिसांनी मयुर खेसे आणि त्याच्या इतर साथिदारांना अटक केली होती. काल मयुर खेसे याने कोर्टातून जामिन घेतल्याची माहिती शिवराजला मिळाली.


काल (शनिवार) रात्री सातच्या सुमारास शिवराज आणि त्याच्या इतर साथिदारांनी मयुर खेसे याच्या घरावर हल्ला करुन दगडफेक केली. घरावर दगडफेक करुन घराच्या काचा फोडून घराच्या पार्कींगमध्ये उभ्या असलेल्या पाच गाड्यांचे नुकसान केले. तसेच घराच्या बाजूला उभ्या असलेल्या वाहनांचे नुकसान केले. शिवराज आणि त्याच्या साथिदारांनी मयुर खेसे याच्या घरात घुसुन घरातल्यांना लाकडी दांडक्याने मारहाण करुन जखमी करुन महिलांचा विनयभंग केला. हल्लेखोरांनी महिलांच्या गळ्यातील सोन्याचे मंगळसुत्र आणि इतर सोन्याचे दागिने असा एकूण एक लाख 83 हजार रुपयांचे दागिने हिसकावून नेले.

घटनेची माहिती मिळताच विमानतळ पोलिसांनी घटनास्थळी जाऊन शिवराज बाबासाहेब तापकीर, कुंडलीक तापकीर, गोट्या अरुण तापकीर, प्रणव ताम्हणे, सुमित तापकीर, शशीकांत तापकीर, रजणजित तापकीर, बाबासाहेब तापकीर आणि त्यांच्या इतर 20 ते 25 जणांवर विनयभंग आणि दंगल माजवल्याचा गुन्हा दाखल केला आहे. पोलिसांनी रात्री उशीरा दहा जणांना ताब्यात घेतले आहे.

विमानतळ पोलीस तपास करीत आहेत.

23 Apr 2017


एमपीसी न्यूज -  अंगावरुन डंपर गेल्याने इंद्रायणीनगर येथील औषध विक्रेत्याचा मृत्यू झाला. हा अपघात शनिवारी (दि.22) दुपारी दोनच्या सुमारास एमसीबी कार्यालयासमोरील रोडवर झाला.

चेतन चंद्रकांत वरडीया (वय-31, रा. मोशी प्राधिकरण) असे मृत्यू झालेल्या औषध विक्रेत्याचे नाव आहे. याप्रकरणी डंपर चालक धनराज पांडरुंग सावंत (रा. बालाजी नगर, भोसरी)  याला अटक करण्यात आली आहे. तर उमेश वरडीया (वय-21 रा. मोशी) यांनी भोसरी पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, चेतन यांचे मोशी प्राधीकरणमध्ये औषध विक्रीचा व्यवसाय आहे. काल दुपारी चेतन दुचाकीवरु जात होते. पुणे- नाशिक महामार्गावर भोसरीजवळ रस्ता दुभाजकला त्यांची दुचाकी धडकली. ते काही अंतर रस्त्याने फरफटत गेले. त्याचवेळी पाठिमागून एक वाळूचा डंपर येत होता. चेतन हे दुचाकीसह फरफटत जाऊन डंपरच्या चाकाखाली आले. यामध्ये गंभीर जखमी झाल्याने त्यांचा मृत्यू झाला.

भोसरी पोलीस तपास करीत आहेत.

22 Apr 2017

कोरेगावपार्क यथील एका मुलीचे खंडणीसाठी अपहरण झाल्याची तक्रार पोलिसांकडे शुक्रवारी दाखल झाली होती. त्यानुसार तपास करून पोलिसांनी शनिवारी मुलीची सुटका केली.

याबाबत मुलीच्या वडिलांनी कोरेगावपार्क पोलिसांकडे तक्रार दिली. पोलिसांनी दिलेल्या माहितीनुसार, तक्रारदार हे एका विवाह समारंभासाठी बाहेरगावी गेले होते. त्या ठिकाणी त्यांची २४ वर्षीय मुलगी येणार होती. पण, ती त्या विवाह समारंभाला आली नाही. तक्रादार यांनी फोन केल्यानंतर तिचा मोबाईल लागत नव्हता.

 

त्यामुळे तक्रारदार हे रात्री घरी आल्यानंतर त्यांना घरातील साहित्य अस्ताव्यवस्थ पडल्याचे दिसले. तसेच, त्यांची मुलगी घरी नसल्याचे आढळले. तसेच, घरात त्यांना एक चिठ्ठी मिळाली. त्यामध्ये ५० लाखांची जुळवा-जुळव कर, मुलीचे अपहरण केले असून पोलिसांना कळवू नको असे म्हटले होते. याप्रकरणी कोरेगावपार्क पोलिसांकडे तक्रार दिली होती. पोलिसांनी तरुणीचा माग काढून तिची बंगळुरु-मुंबई मार्गावरुन सुटका केली.

22 Apr 2017

भांडणे पहात असलेल्या व्यक्तीला हाकालल्यामुळे त्याचा राग मनात धरून लाडकी दांडक्याने मारहाण करून एका व्यक्तीचा खून केला. गंज पेठेत शुक्रवारी रात्री साडेनऊच्या सुमारास ही घटना घडली. याप्रकरणी खडक पोलिसांनी दोघांना अटक केली आहे.

साजीद अब्दुलकरीम कुरेशी (रा. गंज पेठ) असे खून झालेल्या व्यक्तीचे नाव आहे. त्याचा खून केल्याच्या आरोपावरून समीर अहमद इनामदार (वय ३०) व अमीर अहमद इनामदार (वय २७, रा. चाँद तारा चौक, गंज पेठ) याना अटक केली आहे. याप्रकरणी मयताचे चुलत भाऊ जमीर कुरेशी (वय ३१, रा. गंज पेठ) यांनी तक्रार दिली आहे.

पोलिसांनी दिलेल्या माहितीनुसार, साजीद कुरेशी व त्यांच्या पत्नीची भांडणे सुरु होती. त्यावेळी ही भांडणे आरोपी समीर इनामदार हा पहात उभा होता. तो सतत महिलांकडे वाईट नजरेने पाहतो, याची माहिती असल्यामुळे साजीद यांनी त्याला घरासमोरून हाकलून दिले. या गोष्टीचा समीर याला राग आला. त्यामुळे शुक्रवारी रात्री समीर व त्याचा भाऊ अमीर हे साजीद यांच्या घरासमोर आले. त्यांनी साजीद यांना लाथा-बुक्या व लाकडी दांडक्याने छाती, पाठीवर जबर मारहाण केली. यामध्ये साजीद हे गंभीर जखमी झाले. त्याचा मृत्यू झाला. याप्रकरणी खडक पोलिसांनी तत्काळ दोन आरोपीला अटक केली आहे. 

22 Apr 2017
लिफ्ट देवून चाकूचा धाक दाखव प्रवाशांना लुटणा-या टोळीतील तिघांना हडपसर पोलिसांनी शनिवार अटक केली. आरोपींकडून चोरीची आंगठी, मोबाईल व गुन्हयात वापरलेली इंडिका मोटार पोलिसांनी जप्त केली आहे.
 
संतोष गेनु तापकीर (वय 41, रा, च-होली बुद्रूक, ता. हवेली), गिरीराज चुंबकलाल चौधरी (वय 27, रा. आळंदी देवाची), ज्ञानेश्र्वर आश्रोबा देवकाते (वय 21, रा. परळी वैजनाथ, बीड) या तिघांचा समावेश आहे. बंटी ठाकूर (वय 20, रा. आळंदी, ता. हवेली) हा फरार आहे. याबाबत वेदराज हिरालाल रावल (वय 32, रा, ससाणेनगर हडपसर) यांनी तक्रार दिली आहे.
 
पोलिस दिलेल्या माहितीनुसार, सातववाडी येथे आरोपींनी रावल यांना निरेला जाण्यासाठी पहाटे पाच वाजता लिफ्ट दिली. आरोपींनी मद्य प्राशन केले होते. दिवेघाटात गेल्यानंतर आरोपींनी चाकूचा धाक दाखवून रावल यांची सोन्याची आंगठी, मोबाईल व दोनशे वीस रूपये लूटले. त्यानंतर दिवेघाटात त्यांना सोडून चोरटे फरार झाले. निळ्या रंगाची इंटीका गाडी एवढया एकाच धाग्यावरून तपास करून सहाय्यक पोलिस निरिक्षक संदीप देशमाने अमित कांबळे, नितीन मुंडे यांनी सापळा रचून आरोपींना अटक केली व त्यांच्याकडील चोरीचा माल जप्त केला. चोरलेले मोबाईल विविध भागातील असून, त्यांच्याकडून प्रवाशां
​​
ना लूटल्याचे अनेक गुन्हे उघडकीस येण्याची शक्यता आहे.
22 Apr 2017

मंगेश शेलारला तीन दिवसाची कस्टडी


लोणावळ्याच्या नगराध्यक्षा सुरेखा जाधव यांच्या घराच्या बाहेर तिरडीचा उतारा व मृत्युयंत्र ठेवल्याच्या आरोपाखाली पोलीसाच्या कस्टडीत असलेला संतोष पिंजण यांने गुरुवारी मध्यरात्री पोलीस कस्टडीत असताना टाँवेलने गळफास घेऊन आत्महत्येचा प्रयत्न केला.

 

मात्र गार्डाच्या कर्मचार्‍याच्या सतर्कतेमुळे ही दुघर्टना ठळली. याप्रकारणी शुक्रवारी दि. 21 रोजी वडगाव पोलीस ठाण्यात पिंजण याच्यावर आत्महत्या करण्याचा प्रयत्न केल्याचा गुन्हा दाखल करण्यात आला आहे. तसेच कस्टडीतील चौकशीत भांगरवाडी येथिल मंगेश शेलार या व्यक्तीने मला वरील कृत्य करायला लावले असल्याचे पिंजण याने सांगितल्याने लोणावळ शहर पोलीसांनी शेलारला अटक केली असून आज त्याला वडगाव न्यायालयाने तिन दिवस पोलीस कोठडीत ठेवण्याचे आदेश दिले आहेत.तर पिंजणला आज जामिन झाला.


दरम्यान पिंजण व शेलार यांच्यात मागील काही वर्षापासून वाद असून ते एकमेकाशी बोलत देखिल नाही. यामुळे जाणिवपुर्वक पिंजण याने शेलार याचे नाव या प्रकरणात गोवले असून खर्‍या मुख्य आरोपीला बगल देण्य‍ाचा हा प्रयत्न सुरु असल्याचा आरोप याप्रकरणातील फिर्यादी नगराध्यक्षा जाधव व उपनगराध्यक्ष श्रीधर पुजारी यांनी करत पोलीसांच्या तपासावर प्रश्नचिन्ह उपस्थित केले आहे.

22 Apr 2017
 
एमपीसी न्यूज - प्रेमप्रकरणातून सांगलीच्या एका तरुणीने चिंचवड स्टेशन येथील लॉजमध्ये फॅनला स्कार्पच्या सहाय्याने गळफास घेऊन आत्महत्या केली. हा प्रकार शुक्रवारी (दि. 21) रात्री साडेदहाच्या सुमारास चिंचवड स्टेशन येथील कोहिनुर लॉजमध्ये उघडकीस आला.
 
आत्महत्या केलेल्या तरुणीचे वय 30 आहे. ती मूळची सांगलीची असून पिंपरी-चिंचवडमध्ये राहत होती. शुक्रवारी ती चिंचवड स्टेशन येथील कोहिनूर लॉजमध्ये आली होती. तिने खोलीमधील फॅनला स्कार्पच्या सहाय्याने गळफास घेऊन आत्महत्या केली. ती बराच वेळ झाला तरी दरवाजा उघडत नव्हती.
 
बाहेरुन दरवाजा ठोठावला असता आतून काहीच प्रतिसाद आला नाही. त्यामुळे पोलिसांना बोलाविण्यात आले. पोलिसांनी दरवाजा तोडला असता तरुणी गळफास घेतलेल्या अवस्थेत आढळून आली. याप्रकरणी निगडी पोलीस ठाण्यात आकस्मित मृत्यूची नोंद करण्यात आली आहे. प्रेमप्रकरणातून तिने आत्महत्या केली असल्याचे, पोलीस सूत्रांनी सांगितले.
22 Apr 2017

एमपीसी न्यूज - शिवाजी नगर येथील बालसुधारगृहामधून पळालेल्या तीन अल्पवयीन सराईत गुन्हेगारांपैकी एकाला  खडकी रेल्वे स्टेशनजवळील झोपडपट्टीतून पोलिसांनी ताब्यात घेतले.

शिवाजीनगर येथील बालसुधारगृहातून आज (दि.22 एप्रिल) सकाळी  सात वाजता तीन सराईत अल्पवयीन गुन्हेगारांनी पळ काढला होता. या मुलांना सकाळी आंघोळीला सोडले जाते. मात्र, पळून गेलेली मुले आंघोळीला न जात त्यांनी रिमांड होमच्या गेटवरुन उड्या मारुन पळ काढला. ही बाब इतर मुलांनी कर्मचा-यांना सांगेपर्यंत ही तिनही मुले तेथून पसार झाली होती.

पोलीस या मुलांच्या शोधात असताना पोलीस उप निरीक्षक कालगुडे यांना यांच्यापैकी एक जण खडकी रेल्वे स्टेशनजवळ असल्याची माहिती मिळाली होती. त्यानुसार पोलिसांनी सदर ठिकाणी धाव घेत 11.45 वाजता त्याला ताब्यात घेतले आणि पुढील कारवाईसाठी शिवाजीनगर पोलिसांच्या ताब्यात दिले आहे.

22 Apr 2017
एमपीसी न्यूज - पत्ता विचारण्याचा बहाणा करत चोरट्यांनी एका तरुणाचा 13 हजार रुपये किमतीचा मोबाईल फोन जबरदस्तीने चोरुन नेला. ही घटना बुधवारी (दि.19) पिंपरीतील, डिलक्स चौकात रात्री साडेअकराच्या सुमारास घडली. 
याप्रकरणी रॉबिन चौधरी (वय 29, रा. चिंचवड) याने पिंपरी पोलीस ठाण्यात फिर्याद दिली आहे. 

पोलिसांनी दिलेल्या माहितीनुसार, रॉबिन हा बुधवारी रात्री साडेअकराच्या सुमारास पिंपरीतील, डिलक्स चौक येथून पायी जात होता. त्यावेळी पाठीमागून आलेल्या दोघांनी पत्ता विचारण्याचा बहाणा करत त्याला थांबविले. रॉबिन याच्याशी झटापट करुन त्याच्याकडील 13 हजार रुपये किमतीचा मोबाईल फोन जबरदस्तीने चोरुन नेला. पिंपरी पोलीस तपास करत आहेत. 

22 Apr 2017
पिंपरीतील भीमनगर येथील घटना
 
एमपीसी न्यूज - पूर्ववैमनस्यातून एका तडीपार गुंडाने आपल्या साथीदारांसह दुस-या एका गुन्हेगारावर चॉपर, लोखंडी रॉडने प्राणघातक हल्ला करुन जीवे ठार मारण्याचा प्रयत्न केला. ही घटना आज (शनिवारी) मध्यरात्री दीडच्या सुमारास पिंपरीतील भीमनगर येथील युगांतर चौकात घडली. 
 
विकास दिलीप कांबळे (वय 24, रा. भीमनगर, पिंपरी) असे मारहाण झालेल्या गुन्हेगाराचे नाव आहे. याप्रकरणी तडीपार गुन्हेगार सनी गिल आणि दगड्या (पूर्ण नाव पत्ता समजू शकले नाही) यांच्यासह त्याच्या सात ते आठ साथीदारांविरोधात खूनाचा प्रयत्न केल्याप्रकरणी गुन्हा दाखल करण्यात आला आहे. याबाबत विकासचा मित्र संदीप कैलास वाल्हेकर (वय 25, रा. बौद्धनगर, पिंपरी) याने पिंपरी पोलीस ठाण्यात फिर्याद दिली आहे. 
 
पोलिसांनी दिलेल्या माहितीनुसार, आरोपी सनी गिल हा सराईत गुन्हेगार आहे. त्याच्यावर पिंपरी पोलीस ठाण्यात विविध गंभीर गुन्हे दाखल आहेत. त्याला पुणे शहर आणि जिल्ह्याच्या हद्दीतून दोन वर्षासाठी तडीपार करण्यात आले आहे. तर, विकास कांबळे ही गुन्हेगार आहे. सनी आणि विकास त्यांच्यात पुर्ववैमनस्य आहे. एका वर्षापुर्वी विकास कांबळे याने सनी गिल याच्यावर गोळीबार केला होता. याप्रकरणी विकास याला अटकही करण्यात आली होती. 
 
विकास कांबळे शनिवारी त्याच्या मित्रांसोबत पिंपरी, भिमनगर येथील युगांतर चौकात क्रिकेट खेळत होता. रात्री एकच्या सुमारास आरोपी सनी गिल, दगड्या आणि त्यांचे सात ते आठ साथीदार धारदार हत्यारे घेऊन तेथे आले. सनी आणि त्याच्या साथीदारांनी विकास याच्यावर चॉपरने, लोखंडी रॉडने वार केले. तसेच दगडांनी आणि लाथा-बुक्यांनी बेदम मारहाण केली आणि पळून गेले. यामध्ये विकास गंभीर जखमी झाला आहे. त्याच्यावर महापालिकेच्या वायसीएम रुग्णालयात उपचार सुरु असल्याचे, पोलिसांनी सांगितले. पिंपरी ठाण्याचे पोलीस उपनिरीक्षक विठ्ठल बडे तपास करत आहेत.
22 Apr 2017
 
एमपीसी न्यूज - दुचाकीवरुन आलेल्या चोरट्यांनी पादचारी महिलेच्या गळ्यातील दीड लाख रुपये किमतीचे मंगळसूत्र हिसकावून नेले. ही घटना शुक्रवारी (दि.21) दुपारी तीनच्या सुमारास देहूरोडच्या विकासनगर भागात घडली. या घटनेमुळे परिसरात भीतीचे वातावरण पसरले आहे.
 
सुरेखा सोनावणे या शुक्रवारी एका कार्यक्रमाहून घरी जात होत्या. विकासनगर येथून जात असताना पाठीमागून दुचाकीवरुन आलेल्या चोरट्यांनी त्यांच्या गळ्यातील दीड लाख रुपये किमतीचे मंगळसूत्र बळजबरीने हिसकावून नेले. काही मुलींनी चोरट्यांच्या पाठलाग करण्याचा प्रयत्न केला. मात्र, त्यात त्यांना यश आले नाही.
 
मंगळसूत्र चोरणारे 'सीसीटीव्ही' कॅमे-यात कैद झाले आहेत. भरदिवसा घडलेल्या या घटनेमुळे महिलांमध्ये भितीचे वातावरण आहे. देहूरोड ठाण्याचे वरिष्ठ पोलीस निरीक्षक अरुण मोरे करत तपास आहे
22 Apr 2017

घर, दुकान, गोडाऊन, अशा विविध ठिकाणी आगीच्या घटना

 

एमपीस न्यूज - उन्हाळ्यामुळे तापमानात वाढ होण्याबरोबरच शहरात आग लागण्याच्या घटनांमध्येही वाढ झाली आहे. पुणे शहरात तापमान वाढीमुळे मागील आठ दिवसात आग लागण्याच्या दीडशेच्यावर घटना घडल्या आहेत. विविध ठिकाणी लागलेल्या आगीत घरे, वाहने, गोडाऊन भस्मसात झाल्याचे अग्निशामक दलाच्या वतीने सांगण्यात आले आहे.

 

उन्हाळ्यात सोसायटी, रस्ता तसेच परिसरात साचलेला झाडा-झुडपाचा कचरा, शेतीतील पाचट, पालापाचोळा, गवत वाळतो. उन्हामुळे या कचर्‍यामध्ये ज्वलनशील वायु तयार होतो. त्यामुळे आगीच्या सान्निध्यात येताच हा कचरा अगदी सहजपणे पेट घेतो. तसेच पंखे, कुलर, फ्रिज, एसी आदी इलेक्ट्रॉनिक वस्तूंचा वापरही वाढतो आणि शॉर्टसर्कीटमुळे आग लागण्याच्या घटनांमध्ये वाढ होते. तापमान वाढीमुळे चालत्या वाहनांमध्ये शॉर्टसर्किट होवून वाहने अचानक पेट घेण्याचे प्रकारही वाढत असल्याचे दिसत आहेत.उष्णतेमुळे आग लागण्यास पोषक वातावरण निर्माण होते आणि त्यामुळे आगीच्या घटनांमध्ये वाढ होते, अशी माहिती अग्निशमन दलाच्या अधिकार्‍यांनी दिली.

 

नागरीकांनीही सहजपणे पेट घेणार्‍या वस्तू (गॅस, ऑईल) सुरक्षित ठिकाणी ठेवाव्यात. उन्हाळ्यात इलेक्ट्रॉनिक वस्तूंचा वापर जपून करावा. घरातील अथवा सोसायटीतील इलेक्ट्रिक वायरिंग तपासून घ्यावे. त्याचबरोबर कचरा कुजल्यास तेथे मिथेन वायू तयार होतो. तो ज्वलनशील असल्याने सहज पेट घेतो. त्यामुळे परिसरात कचरा जमा होवू देवू नये असे आवाहन नागरीकांना करण्यात आले आहे.

22 Apr 2017

चिमुरड्याचा मुत्यू

 

एमपीसी न्यूज - घरगुती वादातून 21 वर्षाच्या विवाहित महिलेने स्वतःच्या दहा महिन्यांच्या मुलासह स्वतः पेटवून घेतले. यामध्ये आपल्या 10 महिन्याचा मुलासह घरात पेटवून घेतले. यामध्ये दहा महिन्यांच्या मुलाचा मृत्यू झाला. तर महिला 95 टक्के भाजली असून तिला ससूनमध्ये उपचारांसाठी दाखल करण्यात आले आहे. लोणी काळभोर ग्रामपंचायत हद्दीतील माळीमळा येथे शुक्रवारी (दि. 21) रोजी पहाटे ही घटना घडली.

 

जयश्री राहुल लोंढे (वय - 21) असे पेटवून घेतलेल्या महिलेचे नाव असून अथर्व राहुल लोंढे (वय 10 महिने ) असे मृत्यू झालेल्या बालकाचे नाव आहे. पत्नीने, मुलासह स्वतःला पेटवले घेतले हे पाहून पती राहुल लोंढे वाचविण्यासाठी गेला. यामध्ये राहुल ही भाजला आहे.

 

याबाबत अधिक माहिती अशी की, जयश्री यांनी त्यांच्या दहा महिन्यांच्या मुलासह सवतःला पेटवून घेतले. ही बाब राहुल याच्या लक्षात येताच त्याने आग विझविण्याचा प्रयत्न केला. त्यावेळी तो देखील भाजला. घटनेनंतर तात्काळ दोघांनाही उपचारांसाठी दवाखान्यात भरती करण्यात आले. मात्र, उपचारादरम्यान अथर्व याचा मृत्यू झाला. तर जयश्री यांची प्रकृती गंभीर असल्याचे डॉक्टरांनी सांगितले. तपास लोणी पोलीस करीत आहेत.

21 Apr 2017

एमपीसी न्यूज - न्यू कोपरे गावातील पुनर्वसनापासून वंचित असलेल्या काही कुटुंबीयांचे गेल्या 16 वर्षांपासून पुनर्वसन न झाल्याने  खासदार संजय काकडे यांच्या कार्यालयासमोर सत्याग्रह आंदोलन करणा-यांवर पोलिसांनी गुन्हे दाखल केले आहेत.

 

नॅशनल डिफेन्स अकॅडमीच्या विस्तारासाठी कोपरे गावाचे पुनर्वसन करण्यात आले. त्यासाठी विकासक म्हणून पुनर्विकासाची जबाबदारी संजय काकडे यांना देण्यात आली होती. यामध्ये 401 गावकऱ्यांपैकी डावललेल्या 15 कुटूंबियांना सोबत घेऊन कुमार सप्तर्षी यांच्या नेतृत्वाखाली हे आंदोलन सुरू होते. गेल्या सोळा वर्षांपासून हा प्रश्न प्रलंबित असून याला सरकार जबाबदार असल्याचे कुमार सप्तर्षी यांचे म्हणणे आहे. त्यामुळे जोपर्यंत न्याय मिळत नाही तोपर्यंत हे सत्याग्रह आंदोलन सुरूच राहील, असे कुमार सप्तर्षी यांनी स्पष्ट केले होते.

 

परंतू आज आंदोलन सुरू असतानाच डेक्कन पोलिसांनी आंदोलनकर्त्यांना ताब्यात घेतले आणि त्यांच्यावर डेक्कन पोलीस ठाण्यात गुन्हा दाखल करण्यात आला आहे.

21 Apr 2017

महिनाभरात स्थलांतर; पोलीस उपायुक्‍त शिंदे यांनी केली पाहणी


एमपीसी न्यूज - गेल्या अनेक वर्षांपासून भाड्याच्या जागेवर सुरू असलेल्या 'एमआयडीसी' पोलीस ठाण्याला हक्काची इमारत मिळाली आहे. महिनाभरात इमारतीचे सर्व काम पूर्ण होऊन तेथे पोलीस ठाण्याचे काम सुरू होईल, दरम्यान, आज इमारतीची पाहणी आणि कामाचा आढावा घेण्यात आला. यावेळी पोलीस उपायुक्त गणेश शिंदे यांनी सूचना केल्या.

 

सहाय्यक पोलीस आयुक्त (पिंपरी विभाग) राम मांडुरके, वरिष्ठ पोलीस निरीक्षक भिमराव शिंगाडे, निरीक्षक दिलीप शिंदे, पी. एन. नागणे ठेकेदार कंपनीचे अधिकारी, नगरसेवक विलास मडिगेरी उपस्थित होते. महिनाभरात काम पूर्ण होऊन त्याचे उद्‌घाटन पालकमंत्री गिरीश बापट यांच्या हस्ते होण्याची शक्‍यता आहे.

 

सध्या भोसरी-एमआयडीसी पोलीस ठाण्याचे कामकाज स्पाईन रस्त्यावरील एका 'रो हाऊस'मध्ये सुरू आहे. येथे जागेची कमतरता, 'रेकॉर्ड' खोलीचा अभाव यामुळे ही जागा अपुरी पडत होती. तसेच, पार्किंग आणि इतर समस्येमुळे वरिष्ठ अधिकारी स्वतंत्र जागेच्या शोधात होते. तेथून जवळ असलेल्या प्राधिकरणाच्या हद्दीत जागा मिळाली आणि 'एमआयडीसी' पोलीस ठाण्याची नवी इमारत पूर्ण झाली आहे. दोन मजली प्रशस्त इमारतीमध्ये सर्व सोई-सुविधा असणार आहे. पोलीस निरीक्षकांची स्वतंत्र खोली, 'रेकॉर्ड रूम', संगणक खोली, तपास कक्ष आदी स्वतंत्र जागा आहे. तसेच, बैठकीसाठी स्वतंत्र खोली करण्यात आली आहे.

 

या इमारतीची पाहणी शुक्रवारी पोलीस उपायुक्त शिंदे यांनी घेतली. त्यावेळी तेथे काही बदल आणि सूचना त्यांनी केल्या. इमारतीचे सुमारे 90 टक्के काम पूर्ण झाले आहे. अखेरची रंग-रंगोटी अणि किरकोळ काम बाकी आहेत. तसेच, फर्निचर आणि काही बदल केल्यानंतर येथे पोलीस ठाण्याचे कामकाज सुरू होईल.

 

दोन कोटीपर्यंत खर्च
प्राधिकरणातील स्पाईन रोड लगत असलेल्या प्लॉट क्रमांक 4 मध्ये भूखंड होता. साधारण अर्धा एकर (22 गुंठे) हा भूखंड महापालिकेडे हस्तांतर करण्यात आला. त्यानंतर महापालिकेने या जागेवर पोलीस ठाण्याच्या प्रस्ताव ठेवला होता. 2015 मध्ये इमारतीचे काम हाती घेण्यात आले. येथे प्रशस्त सहा हजार चारशे चौरस फूट दोन मजली इमारतीचे काम पूर्ण झाले आहे. पी. एन. नागणे या कंपनीला पूर्ण इमारतीचा ठेका दिला होता. इमारतीचे काम पूर्ण झाले आहे. त्यानंतर काही किरकोळ कामे महापालिका करणार आहे.

21 Apr 2017

एमपीसी न्यूज -  पुण्यातील सिंहगड इन्स्टिट्यूटच्या सिंहगड रस्ता, हडपसर, पुणे मुंबई रस्ता येथील कार्यालयांवर सीबीआयच्या पथकाने शुक्रवारी (21 एप्रिल) छापे मारून महत्वाची कागदपत्रे ताब्यात घेतली आहेत. 75 कोटींच्या अफरातफर प्रकरणी सीबीआयने गुन्हा दाखल केला होता.

 

 

सिंहगड इन्स्टिट्यूटचे संस्थापक मारुती नवले यांनी सेंट्रल बँकेकडून घेतलेले 75 कोटी रुपये बेकायदेशीररित्या तसेच अन्यत्र वर्ग करून फसवणूक केल्याप्रकरणी सीबीआयने गुन्हा दाखल केला होता. शुक्रवारी सीबीआयच्या पथकाने छापे मारून महत्वाची कागदपत्रे ताब्यात घेतली. नवले यांच्या घराची झडती घेण्याचे कामही सध्या सुरू आहे. त्यांची बँक खाती आणि लॉकर्सचीही तपासणी करण्यात येणार असल्याचे सूत्रांनी सांगितले.

21 Apr 2017

एमपीसी न्यूज - रिअल इस्टेट एजन्सीमध्ये भागीदारी देण्याच्या आमिषाने एका व्यक्तीची 17 लाख 50 हजार रुपयांनी फसवणूक करण्यात आली. ही घटना सप्टेंबर 2016 पासून ते 20 एप्रिल 2017 या कालावधीत डिएसके विश्व धायरी येथे घडली.

 

याप्रकरणी दिलीपचंद्र मराठे (वय-59, रा.धायरी, पुणे) यांनी फिर्याद दिली असून बाबासाहेब हरीभाऊ दाभाडे (रा.डिएसके विश्व, धायरी, पुणे) यांच्यावर गुन्हा दाखल करण्यात आला आहे.


याप्रकरणी अधिक माहिती अशी की, फिर्यादीची आरोपीसोबत ओळख होऊन त्याने विश्वास संपादन करून तिरंगा रियल एजन्सीमध्ये भागीदारी देण्याचे आमिष, दाखवले. याकरिता फिर्यादीकडून 9 लाख रुपये घेतले. तसेच फिर्यादींच्या भावास घर आणि नोकरी मिळवून देण्याच्या आमिषाने त्यांच्याकडून 8 लाख 50 जार रुपये घेतले. आरोपीने अशाप्रकारे एकूण 17 लाख 50 हजार रुपयांची फसवणूक केली.

 

अधिक तपास पोलीस उप निरीक्षक डी.आर.कोळपे करत आहेत.

Page 2 of 24