• 01.jpg
  • 1250x200.jpg
  • MPC_news.JPG
  • PhotoGraphy-School-1.jpg
  • sujit.JPG
15 Jun 2017


एमपीसी न्यूज - आषाढी वारीला उद्यापासून सुरुवात होणार असून संत श्रेष्ठ तुकोबारायांची पालखी शनिवारी (दि.17) उद्योगनगरीत दाखल होणार आहे. या पालखी सोहळ्यातील सुरक्षिततेसाठी निगडी ते दापोडी या भागात तब्बल 500 पोलीसांचा कडेकोट बंदोबस्त ठेवण्यात येणार आहे, अशी माहिती पोलीस उपायुक्त गणेश शिंदे यांनी दिली.

तुकोबारायाच्या पालखीचा शनिवारी होणारा आगमन सोहळा, तसेच आकुर्डी येथील विठ्ठलमंदिरातील मुक्काम व रविवारी (दि.18) पालखीचे पुण्याकडे होणारे प्रस्थान या एक दिवसाच्या पालखी सोहळ्यासाठी पिंपरी-चिंचवड येथे सुमारे 500 पोलिसांचा फौजफाटा तैनात करण्यात येणार आहे.

यासाठी 1 पोलीस उपायुक्त, 2 सहाय्यक पोलीस आयुक्त, 22 पोलीस निरीक्षक, 56 सहाय्यक पोलीस निरीक्षक, 300 पुरूष तर 90 महिला पोलीस, असे एकूण 500 कर्मचारी असणार आहेत. यामधील बाहेरून मागवलेल्या फौजफाट्यात 11 पोलीस निरीक्षक, 17 पोलीस उपनिरीक्षक, 165 पुरुष तर 60 महिला पोलीस कर्मचारी असणार आहेत.

त्यामुळे उद्योगनगरीत तुकोबांच्या पालखी सोहळ्यासाठी पोलीस यंत्रणा पूर्णपणे सज्ज असून या बरोबरच दंगल काबू नियंत्रक पथक व बॉम्ब शोधक पथकही तैनात केले जाणार आहे. तसेच  वाहतूक व्यवस्थाही पालखी मार्गानुसार बदलण्यात येणार आहे, असेही शिंदे यांनी सांगितले.

15 Jun 2017

एमपीसी न्यूज - भोसरी येथील 30 वर्षीय युवकाने नोकरी-कामधंदा नसल्याच्या नैराश्यातून राहत्या घरात गळफास घेऊन आत्महत्या केली आहे. ही घटना आज (गुरुवारी) पहाटेच्या सुमारास घडली.

विशाल सिताराम गायकवाड (वय 30 रा. गुळवेवस्ती, भोसरी) याने पहाटेच्या सुमारास राहत्या घरात गळफास घेऊन आत्महत्या केली. सकाळी तो उशिरापर्यंत उठला नाही म्हणून खोलीचा दरवाजा उघडला असता हा प्रकार उघडकीस आला.

भोसरी पोलिसांनी दिलेल्या माहितीनुसार, विशाल याला नोकरी किंवा कोणताच कामधंदा मिळत नव्हता. त्यामुळे त्याने नैराश्यातून आत्महत्या केल्याचे प्राथमिक तपासात समोर आले आहे. याबाबत अधिक तपास भोसरी पोलीस करत आहेत.

15 Jun 2017

एमपीसी न्यूज - उप विभागीय कार्यालय मावळ मुळशी उप विभाग पुणे कार्यालयातील वरिष्ठ क्लर्कला 50 हजाराची लाच स्वीकारताना लाचलुचपत प्रतिबंधक विभागाच्या कर्मचा-यांनी पकडले. ही कारवाई आज (15 जून) दुपारी 2.45 वाजता करण्यात आली.

प्रवीण किसन ढमाले (वय-40, रा.सी /405, रविकरण हाइट, रामकृष्ण मंगल कार्यालयामागे, पिंपळे गुरव, पुणे.) आणि  संदीप जयसिंग घाडगे (वय 28 ) या दोघांना ताब्यात घेतले आहे.

याप्रकरणी एका व्यक्तीने दिलेल्या तक्रारीवरून ही कारवाई करण्यात आली. तक्रारदार व त्याच्या मामाच्या एमआयडीसीने संपादित केलेल्या जमिनीची मोबदला तक्रारदाराला मिळाला होता. हे  काम करून दिल्याचा मोबदला म्हणून आरोपीने 50 हजाराची लाच मागितली होती. ती स्वीकारताना त्याला रंगेहात पकडण्यात आले होते.

15 Jun 2017


एमपीसी न्यूज - हिंजवडी फेज 3 येथील टीसीएस कंपनीच्या कंपाउंड जवळ दुचाकीची पाहणी करत असताना दोन सराईत चोरांना हिंजवडी पोलिसांनी अटक केली आहे. अटक करण्यात आलेल्या दोघांकडून 10 लाख रुपयांची 33 चोरीची दुचाकी वाहने जप्त करण्यात आली आहेत.

चंद्रकांत राजेंद्र गायकवाड (वय 29, रा. उस्तुरी, उस्मानाबाद) आणि विठ्ठल अशोक उंबरे (वय 32, रा. उस्मानाबाद), अशी अटक करण्यात आलेल्या आरोपींची नावे आहेत.

हिंजवडी पोलीस ठाण्याच्या तपास पथकातील पोलीस कॉन्स्टेबल ज्ञानेश्वर मुळे यांनी ही कामगिरी केली आहे. मुळे यांना त्यांच्या सूत्रांकडून टीसीएस कंपनीच्या कंपाउंडजवळ अज्ञात तरुण गाड्यांची पाहणी करत आहे, अशी माहिती मिळाली. मुळे यांनी तात्काळ जाऊन दोघांना ताब्यात घेतले. मागील काही दिवसांपासून परिसरात दुचाकी चोरीला जाण्याचे प्रमाण वाढले होते. त्यामुळे त्यांच्याकडे चौकशी केली असता दोघांकडून तब्बल 33 दुचाकी वाहने जप्त करण्यात आली आहेत. जप्त करण्यात आलेल्या वाहनांमध्ये 27 स्प्लेंडर, 1 पल्सर, 1 ग्लॅमर हिरो होंडा, 1 यामाहा आर वन, 1 अॅक्टिवा आणि इतर 2 या वाहनांचा समावेश आहे. ही सर्व वाहने त्यांनी मौजमजेसाठी चोरली असल्याचे पोलिसांच्या तपासात समोर आले आहे.

याविषयी पत्रकारांशी बोलताना पोलीस उपायुक्त गणेश शिंदे म्हणाले की, दोघेही चोर हे अगदी 5 वी व 7 वी शिकलेले आहेत. त्यामुळे ते मजुरीसाठी शहरात आले होते. मात्र, त्यांनी गाड्या चोरण्यास व त्या ग्रामीण भागात नेऊन विकण्यास सुरुवात केली. यामध्ये आयटी कंपनीच्या बाहेर लावलेल्या रस्त्यावरील गाड्या लक्ष करण्यात आल्या होत्या. यामध्ये कंपनीमध्ये हेल्मेट सक्ती असते त्या शिवाय गाडी आत घेत नाहीत. त्यामुळे कंपनीत काम करणारे हेल्मेट नसले की गाडी बाहेर लावत त्यातूनच या गाड्या चोरी होत गेल्या.

हे दोघेही चोरी केलेल्या दुचाकी ग्रामीण भागात नेऊन विकत. यावेळी ते ग्राहकास मला पैशाची खूप गरज आहे, असे सांगून  गाडी देऊन असतील तेवढे रुपये ग्राहकाकाडून घेत. यावेळी ग्राहकाला कागदपत्र नंतर देतो, असे सांगितले जाई. त्यामुळे  या व्यवहारात विश्वासहर्ता कोठेच त्यांनी ठेवली नव्हती. त्यामुळे नागरिकांनीही गाड्या खरेदी करताना सर्व गोष्टींची खात्री करूनच खरेदी करावी, असे आवाहनही शिंदे यांनी केले.

या वाहनांबाबत दोन्ही आरोपींवर चाकण पोलीस स्टेशनमध्ये 7, हिंजवडी पोलीस स्टेशन 6, भोसरी व एमआयडीसी पोलीस स्टेशन प्रत्येकी 4, पिंपरी पोलीस स्टेशन 2, कोंढवा, खडक, देहूरोड व राजगुरूनगर पोलीस स्टेशनमध्ये प्रत्येकी 1 गुन्हे उघडकीस आले आहेत. इतर सहा दुचाकींबाबत पोलिसांचा शोध सुरू आहे.

15 Jun 2017


एमपीसी न्यूज - आषाढी वारीनिमित्त संत ज्ञानेश्वर महाराज पालखी सोहळ्यास शनिवार (दि. 17) पासून सुरुवात होत आहे. पालखीची सुरुवात अलंकापुरी आळंदीतून होत असल्याने वैष्णवांच्या व मंदिराच्या सुरक्षेची जबाबदारी अत्यंत महत्वाची आहे. गर्दीच्या ठिकाणी अतिरेकी कारवाया होऊ नये यासाठी श्वान राधा व बॉम्ब शोधक नाशक हे पाच जणांचे पथक तैनात झाले आहे.


आषाढी वारीनिमित्त आळंदी येथील संत ज्ञानेश्वर मंदिर परिसरात पोलीस बंदोबस्त चोख ठेवण्यात आला आहे. अलंकापुरीत हौशे, नवसे, गवसे असे सर्व प्रकारचे भक्त जमणार आहेत. समाजकंटक व घातपाती वृत्तीच्या लोकांकडून काही अनुचित प्रकार घडू नये यासाठी पुणे घातपात विरोधी पथकाचे बॉम्ब शोधक व नाशक पथक तैनात करण्यात आले आहे.

पथकात पुणे ग्रामीण पोलीस अधीक्षक सुवेझ हक, अतिरिक्त पोलीस अधीक्षक स्वाती सातपुते यांच्या मार्गदर्शनाखाली ए. एस. आय. पी. जी. साईल, पो. ना. आर. एल. बनसोडे, पोलीस हवालदार ए. के. भोसले, पो. ना. एम. आर. बनसोडे, पोलीस कॉन्स्टेबल एस. एल. मुळे व श्वान राधा हे पथक मुख्य माउली मंदिर आणि इंद्रायणी घाटावर सज्ज आहे. पथकाने संपूर्ण मंदिर परिसर, इंद्रायणी घाट, पार्किंग, पान-फुलांची दुकाने पिंजून काढण्याचे काम सुरू आहे. रविवार (दि. 18) पर्यंत ही मोहीम सुरू ठेवण्यात येणार असल्याचे पी. जी. साईल यांनी सांगितले.

15 Jun 2017

एमपीसी न्यूज - बँकेत भरणा करण्यासाठी दिलेली 34 लाख रोख रक्कम बँकेत न भरता चोरून फरार झालेल्या अट्टल चोरट्याला दत्तवाडी पोलिसांनी सापळा रचून काल (बुधवारी) रात्री साडेआठ वाजता अटक केली. घटनेनंतर पोलिसांनी 36 तासांच्या आत चोरट्याच्या मुसक्या आवळण्यात यश आले आहे. 

दिनेश सोपान काळे (रा. कात्रज-कोंढवा रोड, पुणे, मूळ ता. करमाळा जि. सोलापूर), असे अटक करण्यात आलेल्या आरोपीचे नाव आहे.

दिनेश हा चेकमेट्स कंपनीत एक महिन्यापासून कामाला होता. ही कंपनी पुण्यातील मॉल्स, टाटा मोटर्स, एल.आय.सी., पिटर इंग्लंड ब्रॅण्डचे शॉप्स, तसेच विविध दुकाने यांच्याकडून कॅश गोळा करून तिचा बँकेत भरणा करण्याचे काम करते. कंपनीने 12 जूनला दिनेशकडे सिंहगड रोड येथील अॅक्सिस बँकेत भरण्यासाठी 34 लाख 101 रुपये दिले होते. मात्र, बँकेत भरणा न करता रक्कम घेऊन दिनेश फरार झाला होता. या प्रकरणी दत्तवाडी पोलीस ठाण्यात गुन्हा दाखल करण्यात आला होता. तसेच अन्य एका गुन्ह्यात दिनेशचा गुन्हे शाखा युनिट दोनच्या पोलिसांकडूनही शोध सुरू होता.

दाखल गुन्ह्याचा तपास करताना पोलिसांनी कात्रज-कोंढवा परिसरात ठिकठिकाणी सापळे लावले होते. काल दुपारी चारच्या सुमारास दिनेश हा काळ्या रंगाच्या बॅगसह कोंढवा येथील हॉटेलजवळ उभा असल्याचे समजताच पोलिसांनी त्याला सापळा लावून ताब्यात घेतले. त्याची झडती घेतली असता त्याच्या जवळील काळ्या बॅगेत 34 लाखांची रोख रक्कम सापडली. यानंतर रात्री साडेआठ वाजता पोलिसांनी त्याला अटक केली.

15 Jun 2017

एमपीसी न्यूज - खडकी येथील दारुगोळा कारखान्यात स्फोट होऊन झालेल्या अपघातात दोन कामगारांचा रुग्णालयात उपचार सुरू असताना मृत्यू झाला आहे. ही घटना आज (गुरुवारी) सकाळी नऊ वाजून 20 मिनिटांनी घडली.

अशोक काशिनाथ डुबल (वय 48) व मारिया रॉक (वय 50, दोघे रा. खडकी) अशी या दुर्घटनेत मृत्युमुखी पडलेल्या कामगारांची नावे आहे. या दुर्घटनेत अन्य दोन कामगार जखमी झाले असून त्यांच्यावर रुग्णालयात उपचार सुरू आहेत. मयत डुबल याच्या मागे आई, पत्नी, दोन मुले व एक मुलगी, असा परिवार आहे. तर मारिया हे तामिळनाडूचे असून त्यांच्या मागे पत्नी एक मुलगा व एक मुलगी आहे. 

खडकी येथे संरक्षण खात्याचा दारुगोळा कारखाना आहे. या कारखान्यात कामगार नेहमीप्रमाणे स्फोटके दुसरीकडे  नेण्याचेे काम करत होते. अचानक सव्वानऊच्या सुमारास स्फोट झाला. या स्फोटात दोन कामगारांचा मृत्यू झाला, अशी प्राथमिक माहिती मिळत आहे.  खडकी पोलीस घटनास्थळी दाखल झाले आहेत. 

कारखान्यात स्फोटके दुसरीकडे नेण्याचे दररोज करण्यात येणारे काम करण्यात येत होते. त्यावेळी स्फोटके एका ठिकाणाहून दुस-या ठिकाणी नेत असताना ही घटना घडली. यामध्ये दोघांचा भाजल्याने मृत्यू झाला. इमारतीला कोणताही धोका पोहोचलेला नाही. दरम्यान, घटनेनंतर संरक्षण दलाचे स्फोटक तज्ज्ञ घटनास्थळी दाखल झाले असून पुढील तपास करण्यात येत आहे, असे विश्वसनीय सूत्रांकडून सांगण्यात आले आहे. 

14 Jun 2017


एमपीसी न्यूज - ब्राऊन शुगर, गांजा आणि चरस सारख्या अमली पदार्थांची नशा करणार्‍यांची संख्या वाढलेली असताना शहरात ऑईल बाँडचीही नशा केली जात असल्याचा धक्कादायक प्रकार समोर आला आहे. दरम्यान, ऑईल बाँडची नशा करणार्‍या तरुणाला हटकल्याच्या कारणावरून एकावर चाकूने गळ्यावर व पोटावर वार केल्याची घटना कोंढव्यात घडली आहे. यामध्ये तरुण गंभीर जखमी झाला असून, त्याच्यावर खासगी रुग्णालयात उपचार सुरू आहेत. या प्रकरणी कोंढवा पोलिसांनी अटक केली आहे.


मोनूकुमार उर्फ मोनू रामविनोद सिंह (वय 20, रा. काकडे वस्ती, कोंढवा), असे अटक करण्यात आलेल्याचे नाव आहे. याप्रकरणी शाहरुख शेख (वय 23, रा. कोंढवा) यांनी फिर्याद दिली आहे.

पोलिसांनी दिलेल्या माहितीनुसार, मोनूकुमार कोंढव्यात सुरक्षारक्षक म्हणून नोकरी करतो. तर, फिर्यादी शेख याचे दुचाकी व चार चाकीचे गॅरेज आहे. आठ दिवसांपूर्वी शेख हे चारचाकी कार घेऊन अशोका म्यूज सोसायटीजवळ आले होते. त्यावेळी  मोनूकुमार तेथे नशा करत होता. शेख याने येथे येऊन नशा करू नको, असे सांगितले होते. त्यावेळी त्यांच्यात वाद झाला होता. त्यानंतर शेख याने मोनूकुमार याला मारहाण केली. त्यानंतर हा वाद मिटला होता.

मंगळवारी शेख सोसायटीजवळील ओढ्यालगत कार उभीकरून कामानिमित्त बाहेर गेले. त्यावेळी परत मोनूकुमार तेथे आला. तो ऑईल बाँडची नशा करत बसला. तितक्यात शेख हे तेथे आले. त्यांनी पुन्हा मोनूकुमारला येथे येऊन नशा करत असल्याबाबत हटकले. त्यावेळी चिडलेल्या मोनूकुमारने जवळील चाकूने शेख याच्या हातावर वार केले. घाबरून शेख तेथून पळत जवळच्या हॉटेलात जाऊन बसला. मात्र, मोनूकुमारने हॉटेलात जाऊन शेख याच्या गळ्यावर, पोटात आणि हातावर चाकूने वार केले. त्यानंतर तो तेथून पसार झाला. शेख हे रक्ताच्या थारोळ्यात पडले. नागरिकांनी पोलिसांना घटनेची माहिती दिली. यामध्ये शेख हा या हल्यात गंभीर जखमी झाला असून, त्याच्यावर खासगी रुग्णालयात उपचार सुरू आहेत. मोनूकुमार हा तेथे ऑईल बाँडची नशा करत असल्याचे पोलिसांना सांगितले आहे.

14 Jun 2017


एमपीसी न्यूज - अल्पवयीन मुलीचा विनयभंग केल्याप्रकरणी आरोपीला विशेष न्यायाधीश दिलीप मुरुमकर यांनी तीन वर्षे सक्तमजुरी आणि दोन हजार रुपये दंडाची शिक्षा सुनावली आहे. ही घटना 22 ऑक्टोबर 2015 रोजी रात्रीच्या सुमारास घडली होती. याप्रकरणी शिक्रापूर पोलीस स्टेशनमध्ये आरोपीविरुद्ध गुन्हा दाखल करण्यात आला आहे.

प्रसाद बाळासाहेब साकोरे (वय 22, रा. केंदूर, ता. शिरुर) असे आरोपीचे नाव आहे. घटनेच्या दिवशी आरोपी पीडित मुलीच्या घरी त्याच्या दुचाकीवरून आला होता. पीडित मुलगी तेव्हा अंगणात बसली होती. आरोपीने तिच्याजवळ जात तिचा हात धरून लगट करू लागला. तिने त्याला जोरात ढकलून दिले. त्यामुळे तो खाली पडला. त्यानंतर पुन्हा उठून त्याने तिच्याजवळ जावून तिचा हात धरून लज्जास्पद वर्तन केले. तिला शिवीगाळ आणि दमदाटी केली. त्यावेळी ती मोठ्याने ओरडल्यामुळे तिचे आजोबा घरातून बाहेर आले. आरोपीने त्यांनाही शिवीगाळ आणि दमदाटी केली. त्यानंतर तो दुचाकीवरून पळून गेला.

या प्रकरणाचा तपास महिला पोलीस कर्मचारी व्ही. पी. कांबळे यांनी केला. सरकारी वकील प्रेमकुमार अगरवाल यांनी या खटल्याचे कामकाज पाहिले. त्यांनी या प्रकरणात दोन साक्षीदार तपासले. पीडित मुलीच्या आजोबांचे निधन झाल्यामुळे सरकार पक्षाला त्यांची साक्ष नोंदविता आली नाही.

सरकारी वकील प्रेमकुमार अगरवाल यांनी केलेला युक्तीवाद कोर्टाने ग्राह्य धरून आरोपीला शिक्षा सुनावली. पीडित मुलीला झालेल्या मानसिक त्रासाबद्दल तिला लैंगिक अत्याचारापासून बालकांचे संरक्षण कायदा 2012 नुसार नियमांचा विचार करून राज्य सरकारकडून दहा हजार रुपयांची नुकसान भरपाई देण्यात यावी, असा आदेश कोर्टाने दिला आहे.

14 Jun 2017


एमपीसी न्यूज - पिंपळे गुरव येथून 16 वर्षीय मुलगी 30 मे पासून घरातून बेपत्ता झाली आहे. याबाबत तिच्या पालकांनी सांगवी पोलीस ठाण्यात काल (मंगळवारी) अज्ञाताविरुद्ध अपहरणाचा गुन्हा दाखल केला आहे.

ज्योती सिकंदर थोरात (वय 16 वर्ष 11 महिने रा. लोखंडे आनंतनगर, पिंपळे गुरव), असे बेपत्ता मुलीचे नाव आहे. तिचा रंग सावळा उंची 5 फूट, चेहरा गोल, नाक बारीक, डोळे काळे, केस मध्यम वाढलेले, अंगात फिकट पिवळ्या रंगाचा पंजाबी ड्रेस असून तिला हिंदी भाषा येते.

ज्योतीच्या आईने दिलेल्या फिर्यादीनुसार 30 मे रोजी सकाळी त्या कामावर जाण्यापूर्वी ज्योतीने भावाच्या अॅडमिशनसाठी बाहेर जाते, असे विचारले असता आईने मी कामावरून आल्यानंतर जा, असे सांगितले. मात्र, आई दुपारी कामावरून आल्यानंतर ज्योती घरात नव्हती. आसपास विचारपूस करून तिचा शोध घेतला. त्यानंतर नातेवाईक व मित्र परिवाराकडेही ती सापडली नाही.

त्यामुळे तिच्या आईने सांगवी पोलीस ठाण्यात मुलीला फूस लावून पळवून नेल्याचा गुन्हा दाखल केला आहे. या प्रकरणी सांगवी पोलीस अधिक तपास करत आहेत. तसेच संबंधीत मुलगी कोठे अढळल्यास नागरिकांनी सांगवी पोलिसांशी संपर्क करावा, असे आवाहन नागरिकांना केले आहे.

14 Jun 2017


दोन लाखाच्या मुद्देमालासह आरोपी जेरबंद

एमपीसी न्यूज - गरीब महिलांना कर्ज मिळवून देऊन त्याद्वारे एलईडी टिव्ही आणि मोबाईल घेऊन देण्याच्या आमिषाने त्यांची फसवणूक करणा-या एकास गुन्हे शाखा युनिट एकने अटक केले. आरोपीच्या ताब्यातून पोलिसांनी 3 एलईडी टिव्ही आणि दोन मोबाईल फोन आणि रोख 20 हजार असा 2 लाख 21 हजार 680 रपयांचा मुद्देमाल जप्त केला आहे.

सनी शांताराम अवघडे (वय-35, रा.कासेवाडी, भवानी पेठ, पुणे), असे अटक करण्यात आलेल्या आरोपीचे नाव आहे.  आरोपी केईएम हॉस्पीटलजवळ चोरीचा मुद्देमाल विक्रीसाठी येणार असल्याची माहिती मिळाली होती. त्यानुसार पोलिसांनी सापळा रचून त्याला अटक केली.

आरोपी महिलांना विश्वासात घेऊन इलेक्ट्रानिक वस्तू लोणवर मिळवून देतो असे सांगून त्यांच्याकडून कागदपत्रे घ्यायचा. ती कागदपत्रे घेऊन संबंधित महिलेला शहरातील मोठ्या इलेक्ट्रानिक्स दुकानात नेऊन मोबाईल आणि टिव्ही दाखवायचा. कर्ज मंजूर झाल्यानंतर त्या वस्तू तो स्वतः घ्यायचा आणि संबंधित महिलेला त्या वस्तू मिळाल्या, असे खोटे सांगण्यास भाग पाडत असे. त्यानंतर त्या वस्तू तो परस्पर घेऊन विक्री करत असे. आरोपीने अशाप्रकारे कासेवाडी, खडकी, आणि पुणे शहरातील गरीब महिलांची फसवणूक केली आहे. त्याच्यावर यापूर्वीही बिबवेवाडी व येरवडा पोलीस ठाण्यात फसवणुकीचे गुन्हे दाखल असून तीन महिन्यापूर्वी त्याला अटकही करण्यात आली होती.

पथकाने वरिष्ठ पोलीस निरीक्षक नितिन भोसले पाटील, सहाय्यक निरीक्षक धनंजय कापरे, उपनिरीक्षक दिनेश पाटील, सहाय्यक फौजदार संभाजी भोईटे, कैलास गिरी, रवींद्र कदम, प्रकाश लोखंडे, गजानन सोनुने, प्रशांत गायकवाड आदींनी केली.

14 Jun 2017

एमपीसी न्यूज - पिंपरीतील 2016 मध्ये अल्पवयीन मुलीवर बलात्कार प्रकरणी शिवाजीनगर सत्र न्यायालयाने आरोपीला 10 वर्षाची सक्त मजुरीची शिक्षा सुनावली आहे.

मयुर लालासाहेब मोरे (वय 22 रा, नेहरुनगर, पिंपरी), असे आरोपीचे नाव असून त्याला काल (मंगळवारी) शिवाजीनगर सत्र न्यायालयाने 10 वर्ष सक्त मजुरी व 3 हजार रुपयांची शिक्षा सुनावली आहे.

आरोपीने 2016 मध्ये अल्पवयीन मुलीवर अत्याचार केले होते. लग्नाचे आमिष दाखवून पीडितेवर वेळोवेळी आत्याचार केले या प्रकारातून पीडिता गर्भवती राहिल्याने तिने आरोपीकडे लग्नाचा तगादा लावला होता. परंतू त्याने लग्नाला नकार दिल्याने पीडित तरुणीने पिंपरी पोलीस ठाण्यात फिर्याद दिली होती.

या गुन्ह्याचा तपास पोलीस उपनिरीक्षक रत्ना सावंत यांनी केला.

13 Jun 2017

पिंपरीगाव येथे अभियांत्रिकीच्या विद्यार्थ्याची गळफास घेऊन आत्महत्या

एमपीसी न्युज- दहावीचा निकाल घेऊन छोटा घरी आला खरा पण घराचं दार का उघडत नाही म्हणून पाहणी केली तर समोरच प्रकार पाहून त्याच्या पायाखालची जमीनच सरकली. कारण त्याचा दादा छताला गळफास घेऊन लटकत होता.ही घटना पिंपरिगाव येथे आज दुपारी 1 च्या सुमारास घडली.

नॉव्हेल डॅनिअल (वय 20 रा. अशोक थिएटर मागे पिंपरीगाव) असे मयत तरुणाचे नाव असून तो  तळेगाव दाभाडे येथील इंदिरा अभियांत्रिकी महाविद्यालयात शिकत होता.त्याने  नुकतीच संगणक शाखेच्या तिसर्‍या वर्षांची परीक्षा दिली होती.


पोलिसांनी दिलेल्या माहिती नुसार त्याच्या वडिलांचे वर्कशॉप आहे, तर आई नोकरी करते. मंगळवारी त्याचे आई-वडील घराबाहेर गेले होते. आणि छोट्या भावाचा दहावीचा निकाल असल्याने तो निकाल आणण्यासाठी गेला होता. दरम्यान त्याने छताला ओढणीच्या साहाय्याने गळफास घेऊन आत्महत्या केली. त्याचा भाऊ निकाल घेऊन घरी आल्यानंतर हा प्रकार पहिला.त्याने नंतर सर्वाना कळवले.
याप्रकरणी पिंपरी पोलीस अधिक तपास करत आहेत.
13 Jun 2017


एमपीसी न्यूज - किरकोळ कारणातून झालेल्या भांडणाचा राग मनात धरून लोखंडी रॉडने मारहाण केल्या प्रकरणी एकास  15 जूनपर्यंत पोलीस कोठडी सुनावण्यात आली आहे. हा प्रकार 16 एप्रिल 2017 रोजी खडकवासला येथील भारत गॅस एजन्सीजवळ घडला होता.

रुपेश जगतराव वाल्हे (वय 29, किरकटवाडी) असे कोठडी सुनावलेल्या आरोपीचे नाव आहे. याप्रकरणी प्रतीक अनिल मते ( वय 22, खडकवासला, हवेली) यांनी हवेली पोलीस ठाण्यात फिर्याद दिली होती. या घटनेतील आठ आरोपी यापुर्वीच अटक आहेत.

याप्रकरणी अधिक माहिती अशी की, फिर्यादी मित्रांसोबत चुलत बहिणीच्या लग्नाचे नियोजन करत बसले होते. त्यावेळी आरोपी व त्याच्या साथीदारांनी किरकोळ कारणावरून भांडण केले. त्याचा राग मनात धरून फिर्यादीला शिवीगाळ करत लोखंडी रॉड, कोयता, रिव्हॉल्वर अश्या हत्याराने मारहाण केली. तसेच गाडीचे नुकसान केले. यातील अटक आरोपींनी पालघन, रिव्हॉल्वर याबाबत सखोल तपास करणे, हत्यार, कोयते कोठून आणले याबाबत तपास करणे, आरोपींवर आर्म ऍक्टचा गुन्हा दाखल असून पुढील तपासासाठी आरोपीच्या पोलीस कोठडीची मागणी सरकारी वकिलांनी केली, न्यायालयाने ती ग्राह्य धरली.

13 Jun 2017


एमपीसी न्यूज - घराचा दरवाजा उघडा असल्याची संधी साधून सोन्या चांदीचे दागिने चोरल्याप्रकरणी प्रथमवर्ग न्यायदंडाधिकरी पी.टी. गोळे यांनी एका महिलेस  15 जूनपर्यंत पोलीस कोठडीत ठेवण्याचे आदेश दिले.  ही घटना 12 जून रोजी दुपारच्या सुमारास घडली होती.

सारिका सुरेश लगस (वय 20, रा. दत्तमंदिरजवळ, केळेवाडी) असे महिलेचे नाव आहे. याप्रकरणी अनिल तुकाराम रणखांबे (वय 42, गोसाविवस्ती, कर्वे नगर) यांनी वारजे माळवाडी पोलीस ठाण्यात फिर्याद दिली होती.

फिर्यादी दुपारी घराचा दरवाजा उघडा ठेऊन दरात झोपले होते. आरोपीने तिच्या साथीदार योगेश याच्या मदतीने घरात घुसून घरातील सोन्या चांदीच्या दागिन्यांची चोरी केली. चोरीस गेलेल्या दागिन्यापैकी चांदीची अंगठी आरोपीच्या हातात सापडली आहे. आरोपीच्या साथीदाराला अटक करणे, चोरीचा माल हस्तगत करणे, यापूर्वी असे गुन्हे केले आहेत का, याबाबत पुढील तपास करण्यासाठी सरकारी वकिलांनी आरोपीच्या पोलीस कोठडीची मागणी केली. न्यायालयाने ती ग्राह्य धरली.

13 Jun 2017


एमपीसी न्यूज - ज्येष्ठ शास्त्रीय गायिका प्रभा अत्रे यांच्या बंगल्यात चोरी करणाऱ्या एकाला पोलिसांनी अटक केली आहे. अत्रे यांच्या बंगल्यातून त्याने मोबाईल चोरले होते. जंगली महाराज रस्त्यालगत अत्रे यांचा बंगला आहे. त्यांच्या बंगल्यात सध्या कोणी राहायला नाही, अत्रे यांच्या संस्थेकडून तेथे नियमित शास्त्रीय संगीताचे कार्यक्रम घेतले जातात.

बंगल्याच्या आवारात शिरलेल्या चोरट्यांने तेथे ठेवलेले मोबाईल संच लांबविले होते. ही घटना शनिवारी उघडकीस आली. त्यानंतर पोलिसांकडून घटनास्थळाची पाहणी करण्यात आली आहे. पोलिसांकडून अत्रे यांच्या बंगल्याच्या आवारातील सीसीटीव्हीचे चित्रीकरण पडताळण्यात आले. गेल्या 4 दिवसापासून गुन्हे शाखा युनिट 1 चे पोलीस आरोपीच्या शोधत होते. अखेर पोलिसांनी एकाला अटक केली.

12 Jun 2017

एमपीसी न्यूज - समृद्ध जीवन कंपनीचे महेश किसन मोतेवार यांच्या महाराष्ट्रासह इतर राज्यात असलेल्या मालमत्तेवर ईडीने टाच आणली असून 207 कोटी रुपयांची मालमत्ता जप्त केली आहे. त्यामध्ये हेलिकॉप्टर, हॉटेल्ससह स्थावर मालमत्तेचा समावेश आहे.

फसव्या योजनांव्दारे हजारो जणांना गंडा घातल्याप्रकरणी समृद्ध जीवनच्या महेश मोतेवार यांच्यासह संचालक मंडळावर राज्यासह परराज्यात गुन्हे दाखल आहेत. राज्य गुन्हे अन्वेषण विभागाकडून अनेक गुन्हयांचा तपास केला जात आहे. ओरिसा पोलिसांनी महेश मोतेवार यांना सुमारे 2 वर्षांपूर्वी अटक केली आहे. तेव्हापासून ते गजाआड आहेत. त्यांच्या पत्नी लिना मोतेवार यांना देखील पोलिसांनी अटक केली होती. ईडीने जप्त केलेल्या मालमत्तेमध्ये पुण्यातील तीन हॉटेल, सांताक्रुझ एअरपोर्टवरील हेलिकॉप्टर, पुण्यातील प्लॉट, व्यावसायिक जागा आणि अपार्टमेंटचा समावेश आहे. ईडीने सोमवारी समृद्ध जीवनची संपत्ती जप्त केली असून ‘प्रीव्हेंशन ऑफ मनी लाँडरिंग अॅक्ट’ (पीएमएलए) च्या अंतर्गत त्यांची चौकशी गेल्या वर्षीपासून सूरू आहे.

पुण्यातील समृद्धी जीवन फुड्स या कंपनीकडून महाराष्ट्र व इतर राज्यातील गुंतवणूकदारांची फसवणूक केल्याचा गुन्हा डेक्कन पोलीस सन 2014 रोजी दाखल झाला होता. हा गुन्हा भादविचे कलम 420 (फसवणूक), 188 (सरकारी यंत्रणेचा आदेश न पाळणे) आणि 120 बी (कट रचने) यानुसार गुन्हा दाखल झाला होता. हा गुन्हा कंपनीचे चार संचालक महेश मोतेवार, पत्नी लीना मोतेवार, घनश्याम पटेल आणि राजेंद्र भंडारे यांच्याविरुद्ध दाखल झाला होता.

12 Jun 2017

एमपीसी न्यूज - केंद्रीय मंत्री जयंत सिन्हा यांच्या सिग्नलवर उभ्या असलेल्या कारवर दुसरी कार येऊन आदळल्याने अपघात झाला. त्यांच्या कारच्या पाठीमागील कारला अन्य एका कारने धडक दिल्याने हा अपघात झाला. हा अपघात आज (सोमवारी) सायंकाळी रेंज हिल रोडवरील सिग्नलवर झाला. सिन्हा यांच्या कारला अपघात झाल्याची अफवा वार्‍यासारखी पसरल्याने काही काळ गोंधळ उडाला होता. दरम्यान, या कारचालकावर कारवाई करण्याचे काम रात्री उशिरापर्यंत सुरू होते.

याप्रकरणी कार चालकाला चतुःश्रृंगी पोलिसांनी ताब्यात घेतले आहे. पोलिसांनी दिलेल्या माहितीनुसार, केंद्रीय मंत्री जयंत सिन्हा हे सोमवारी पुण्यात काही कार्यक्रमानिमित्त आले होते. हा कार्यक्रम संपवून ते सायंकाळी सहा वाजण्याच्या सुमारास रेंजहिल रोडने औंधकडे जात होते. त्यावेळी रेंजहिल चौकात असणारे सिग्नल लागल्यामुळे त्यांची कार सिग्नलवर उभी होती. तर, त्यांच्या कारमागे अभिजीत बल्लाण (रा. पुणे) यांची होंडा सिटी कार उभी होती. त्यावेळी पाठीमागून भरघाव वेगात आलेल्या मारुती सुझुकीचा कारचालक विनोदकुमार सुरेंद्रसिंग याचे कारवरील नियत्रंण सुटून त्याने बल्लाण यांच्या कारला जोरात धडक दिली. धडक इतकी जोरात होती की, बल्लाळ यांची होंडा सीटी कार पुढे उभ्या असणार्‍या जयंत सिन्हा यांच्या कारवर जाऊन आदळली. यात सुदैवाने कोणीही जखमी झाले नाही. मात्र, यात तीन्ही कारचे किरकोळ नुकसान झाले. 

ही घटना शहरात वार्‍यासारखी पसरली. दरम्यान, या घटनेची माहिती चतुःश्रृंगी पोलिसांना देण्यात आली. तसेच सिन्हा यांच्या कारला अपघात झाल्याचे सांगण्यात आले. त्यानंतर पोलिसांची चांगलीच धावपळ उडाली. चतुःश्रृंगी पोलिसांनी तात्काळ घटनास्थळी धाव घेतली. मात्र, सिन्हा हे तेथून निघून गेले होते. त्यानंतर पोलिसांनी भरधाव वेगातील कार चालक विनोदकुमार याला पोलीस ठाण्यात आणले. त्याच्यावर रात्री उशिरापर्यंत कारवाई करण्याचे काम सुरु होते.

Page 4 of 45
Open Chat
1
Close chat
Hello! Thanks for visiting us. Please press Start button to chat with our support :)

Start