• Bhausaheb_Bhoir.jpg
  • DPU1250x200.jpg
  • Mahesh_Landge.jpg
  • mpc.jpg
  • MPC_news.JPG
  • Nitin_Kalje.jpg
  • PCCO.jpg
  • Sunil_Shelke.jpg
23 Jul 2017

नदीकाठच्या रहिवाशांना सतर्कतेचा इशारा

एमपीसी न्यूज - संततधार पावसामुळे पवना धरण पाणलोट क्षेत्रात कमालीची वाढ झाली आहे. जुलै महिन्यातच धरण पूर्ण भरत आले आहे. सकाळपासून सुरू असलेल्या पावसामुळे धरण 87.95 टक्के भरले आहे. आज रात्री पावसाचा जोर कायम राहिल्यास धरणामध्ये 90 टक्‍क्‍यापेक्षा जास्त पाणीसाठा होण्याची शक्‍यता आहे. त्यामुळे उद्या सोमवार (दि.24)  खबरदारीचा उपाय म्हणून धरणातून पाण्याचा विसर्ग होणार आहे. त्यामुळे नदीकाठच्या रहिवाशांना सतर्कता बाळगावी, असे आवाहन पाटबंधारे विभागाचे शाखा अभियंता मनोहर खाडे यांनी केले आहे.

गेल्या दहा दिवसांपासून शहरासह मावळात पावसाचा जोर कायम आहे. गेल्या 1 जूनपासून आत्तापर्यंत 1 हजार 962 मिलीमीटर पाऊस झाला आहे. रविवारी (दि. 23) सायंकाळी पाच वाजेपर्यंत 42 मिलीमीटर पाऊस झाला. शनिवारी सायंकाळी सहा वाजेपर्यंत धरणातील पाणीसाठा 82. 19 टक्के होता. मात्र, रविवारी सकाळपासून सुरू असलेल्या पावसामुळे तो साठा पाच टक्‍क्‍याहून अधिक वाढला आहे. त्यामुळे तो अंदाज लक्षात घेता सोमवारी सकाळपर्यंत धरणातील पाणीसाठा 90 टक्‍क्‍याहून अधिक होईल. त्यामुळे धरणातून पाण्याचा विसर्ग करण्यात येणार आहे. प्रथम हायड्रो तंत्राद्वारे पाण्याचा समतोल ठेवण्याचा प्रयत्न केला जाईल. मात्र, त्यानंतर काही प्रमाणात पाणी सोडावे लागणार असल्याचे पाटबंधारे विभागाकडून स्पष्ट केले आहे.

रविवारी (दि. 23) रात्री पावसाची शक्यता लक्षात घेता, सोमवारी सकाळीच पाण्याबाबत नियोजन करण्यात येणार आहे. पावसाचा जोर कायम राहिल्यास सकाळपर्यंत धरण पाणलोट क्षेत्रात 90 टक्‍क्‍याहून अधिक भरण्याची शक्‍यता आहे. त्यामुळे सकाळी दहा ते बारा वाजेपर्यंत धरणाच्या दरवाजातून 4 ते 5 हजार क्‍युसेक सोडण्यात येणार आहे. त्यामुळे पवना नदीकाठच्या रहिवाशांना सतर्कतेचा इशारा दिला आहे. तसेच, त्याबाबत महापालिका, आपत्ती विभाग आणि जिल्हाधिकारी कार्यालयात कळवण्यात येणार आहे. पाण्याचा दबाव जास्त असल्याने सकाळी दहा ते साडेदहा वाजता पाणी सोडल्यास शहरामध्ये सायंकाळी पाच वाजेपर्यंत पाणी येऊ शकते. त्यामुळे रात्री उशिरा धावपळ करण्याऐवजी त्या पूर्वीच काळजी घ्यावे, असे आवाहनही करण्यात आले आहे.

23 Jul 2017

एमपीसी न्यूज - गोपाळकाला संपला की वेध लागतात ते लाडक्या गणरायाचे. या काळात महाराष्ट्रातील घरोघरी गणेशमूर्ती बसविण्याची लगबग सुरू असते. नागरिकांनी पर्यावरणपूरक गणेश मूर्तीच घ्याव्यात यासाठी पुण्यातील एक महिला मागील पन्नास वर्षांपासून आग्रही आहेत. त्यासाठी त्या 1967 पासून ते आजतागायत शाडू मातीपासून गणेश मूर्ती तयार करण्याचे काम करतात. पर्यावरणाच्या संवर्धनासाठी प्लास्टर ऑफ पॅरिसऐवजी शाडूच्या मातीपासून गणेशमूर्ती तयार करणे गरजेचे असल्याचे त्यांनी 50 वर्षांपूर्वीच ओळखले होते. आणि त्यावर सुरू केलेले कार्य त्यांनी आजतागायत जोपासले आहे.

मूळच्या अकोट (अकोला) येथील असलेल्या विजयालक्ष्मी यांच्या घरातच मूर्तीकलेचे वातावरण असल्याने बालपणीच त्यांनी ही कला आत्मसात केली. त्यानंतर 1967 साली लग्न होऊन त्या पुण्यातील मूर्तीकार रवींद्र धोंडफळे यांच्या घरात आल्या आणि तेव्हापासून शाडूच्या मातीपासून गणेशमूर्ती तयार करण्याला झालेली सुरुवात आजपर्यंत टिकून आहे. पुण्यातील रास्ता पेठेत असलेल्या त्यांच्या घरातच मूर्त्या तयार करण्याचा कारखाना होता. त्या काळात मोठा वाडा असल्याने अनेक मूर्त्या तयार केल्या जायच्या. परंतू वाढत्या शहरीकरणामुळे रस्त्याच्या कामात मोठया वाड्याचे रुपांतर छोट्या बिल्डींगमध्ये झाले आणि मूर्त्या तयार करण्यावरही मर्यादा आल्या. आजच्या घडीला त्या जास्त संख्येने मूर्तीची निर्मिती करत नसल्या तरी प्लास्टर ऑफ पॅरिसऐवजी शाडू मातीच्याच मूर्ती वापराव्यात यासाठी शाळा, महाविद्यालयीन विद्यार्थ्यांसाठी कार्यशाळा आयोजित करतात.

शाडूच्या मातीपासून तयार केलेलीच मूर्ती का ?

शाडूच्या मातीपासून तयार केलेलीच मूर्ती का, याविषयी सांगताना त्या म्हणतात, शाडूच्या मूर्ती अगदी काही तासांमध्ये पाण्यात विरघळत असल्याने त्यापासून पर्यावरणाचा ऱ्हास होत नाही. त्यामुळे जलप्रदूषणही टाळले जाते. शाडू मातीची मूर्ती विसर्जनानंतर अर्ध्या पाऊण तासात विरघळते. याऊलट प्लास्टर ऑफ पॅरिसपासून तयार होणा-या गणेशमूर्तीची उंची, व रासायनिक रंगाचा अतिवापर यामुळे पाण्याचे प्रदूषण वाढते. शाडू मातीपासून तयार केलेली मूर्ती घरीच बादलीत विसर्जित करता येते. त्यातील रंग विरघळ्यानंतर माती तशीच राहते आणि त्या मातीचा वापरही झाडांबरोबर पुन्हा खेळणी वगैरे बनविण्यासाठी करता येतो.

असा ओळखा प्लास्टर ऑफ पॅरिस आणि शाडूच्या मातीच्या मूर्तीतील फरक

शाडूच्या मातीपासून तयार केलेली गणेशमूर्ती वजनाने जड असते तर याउलट प्लास्टर ऑफ पॅरिसच्या मूर्ती वजनाला हलकी असते, शिवाय शाडूच्या मूर्तीतील आतील भाग हा करड्या रंगाचा असतो तर प्लास्टर ऑफ पॅरिसचा पांढ-या रंगाचा असतो. शाडूची माती ही गुजरातमधील भावनगर येथून मागवली जाते, त्यामुळे या मूर्तीची किंमत जास्त असते.

23 Jul 2017

दगडूशेठतर्फे जय गणेश रुग्ण सेवा अभियानात विनामूल्य शिबिर

एमपीसी न्यूज - एखाद्या देवस्थानाबद्दल अनेकांच्या मनात नानाविध प्रश्नचिन्हे निर्माण होतात. परंतु या सर्व प्रश्नचिन्हांना आपल्या सामाजिक उपक्रमांच्या उद्गार चिन्हातून ट्रस्टने उत्तर दिले आहे. दगडूशेठ गणपती ट्रस्ट वादविवाद नसलेला आणि सर्वांना आदर वाटेल, असा ट्रस्ट आहे. ट्रस्टच्या माध्यमातून सुरू असलेल्या सामाजिक कामांचा पुणेकरांना अभिमान असून देवसेवेपासून ते मानवसेवेपर्यंत ट्रस्टची वाटचाल जगातील कानाकोप-यात पोहोचेल, असे मत अभिनेत्री मृणाल देव-कुलकर्णी यांनी केले.

श्रीमंत दगडूशेठ हलवाई गणपती ट्रस्ट, सुवर्णयुग तरुण मंडळतर्फे ट्रस्टच्या शतकोत्तर रौप्यमहोत्सवी (125) वर्षानिमित्त आयोजित राज्यस्तरीय जय गणेश रुग्ण सेवा अभियानात विनामूल्य शिबिराच्या उद्घाटनप्रसंगी त्या बोलत होत्या. गणेश कला क्रीडा मंच येथे झालेल्या कार्यक्रमात होमिओपॅथिक तज्ज्ञ डॉ.संजीव डोळे, ट्रस्टचे अध्यक्ष अशोक गोडसे, डॉ.बाळासाहेब परांजपे, महेश सूर्यवंशी, सुनील रासने यांसह विश्वस्त उपस्थित होते. अभियानात पुण्यातील नामांकित रुग्णालये व तज्ज्ञ डॉक्टरांचा सहभाग आहे. रविवारी (दि. 6) ऑगस्टपर्यंत दर रविवारी सकाळी 9 ते दुपारी 2 या वेळेत गरजू व गरीब रुग्णांकरिता मोफत आरोग्य शिबिर आयोजित करण्यात आले आहे.

डॉ. संजीव डोळे म्हणाले की, बदलत्या जीवनशैलीमुळे नागरिकांमध्ये विविध आजारांचे प्रमाण दिसून येते. योग्य वेळी उपचार व तज्ज्ञांचा सल्ला न घेतल्याने आजार बळावतात. आरोग्य शिबिरात रक्त व शर्करा तपासणी करीता 90, नियमित तपासणीकरिता 450 विद्यार्थी, इतर तपासण्यांकरिता 650 जणांनी सहभाग घेत आरोग्य सेवांचा लाभ घेतला. या शिवाय प्रामुख्याने आहार, मुद्रा व योगा चिकित्साकरिता 70 जणांनी उपचार घेण्यास सुरुवात केली. संधीवात, दमा आणि स्त्रियांचे विविध आजार यावेळी सहभागी रुग्णांमध्ये दिसून आले. शिबिरात 18 डॉक्टर्सनी सहभाग घेत तपासणी केली.

ट्रस्टतर्फे रविवार, (दि. 30) जुलै रोजी सर्व प्रकारांच्या आजारांवर तपासणी व मोफत शस्त्रक्रिया, उपचार पिंपरी-चिंचवडमधील डी.वाय.पाटील रुग्णालयातर्फे करण्यात येणार आहेत. तसेच रविवार (दि. 6) ऑगस्ट रोजी हृदयरोग तज्ज्ञ डॉ. सुनील साठे हे मोफत हृदयरोग तपासणी आणि सर्व प्रकारच्या हृदयशस्त्रक्रिया अँजिओप्लास्टी या सुविधा उपलब्ध करून देणार आहेत.

पुण्यातील नामांकित रुग्णालांचा या अभियानात सहभाग असून अस्थिरोग तज्ज्ञ डॉ. पराग संचेती हे संचेती हॉस्पिटल येथे मोफत अस्थिरोग तपासणी आणि सवलतीच्या दरात जॉईंट रिप्लेसमेंट शस्त्रक्रिया करणार आहेत. तसेच धनकवडी येथील भारती हॉस्पिटल येथे मोफत अँजिओप्लास्टी शस्त्रक्रिया करून देण्याची सुविधा दि. 5 सप्टेंबरपर्यंत उपलब्ध करून देण्यात आली आहे. अधिक माहितीकरिता मो. 9881418450 या क्रमांकावर संपर्क साधावा, असे आवाहन करण्यात आले आहे.

23 Jul 2017

समाजातील गरजू रुग्णांना मदतीचा हात देण्याचा संकल्प

एमपीसी न्यूज - अखिल म्हसोबा उत्सव मंडई ट्रस्टच्या म्हसोबा उत्सवास ढोल-ताशांच्या गजरात, परदेशी पाहुण्यांच्या हस्ते आरती करून तसेच समाजातील जास्तीत जास्त गरजू रुग्णांपर्यंत पोहोचण्याचा संकल्प करीत उत्साहाने प्रारंभ झाला. श्रद्धेला सामाजिकतेची जोड देत वर्षभर विविध उपक्रम राबविणा-या म्हसोबा ट्रस्टच्या उत्सवानिमित्त मंदिराला आकर्षक फुलांची आरास व विद्युत रोषणाई करण्यात आली होती. 

शुक्रवार पेठेतील महात्मा फुले मंडई, बुरुड आळी येथे आरती करून उत्सवाला प्रारंभ झाला. यावेळी वेंकीज उद्योग समूहाचे बालाजी राव, फ्रान्सच्या सीसीली, आल्वीन , ट्रस्टचे विश्वस्त अध्यक्ष राहुल सूर्यवंशी, विश्वस्त उपाध्यक्ष निवृत्ती जाधव, शिवसाम्राज्य वाद्य पथकाचे अक्षय बलकवडे उपस्थित होते. सकाळी झालेल्या धार्मिक विधीमध्ये महेश लडकत आणि अनिल दिवाणजी यांनी सपत्नीक होमहवन केले. शिवसाम्राज्य पथकाने यावेळी वादन केले.

निवृत्ती जाधव म्हणाले की, समाजातील गरजू आणि गरीब रुग्णांना योग्य उपचार न मिळाल्याने अनेकदा ते रुग्ण दगावतात. त्यामुळे किडनीचे आजार व कॅन्सरग्रस्त 100 गरजू रुग्णांना डायलिसीसच्या माध्यमातून ट्रस्टतर्फे यंदा मदत देण्यात येणार आहे. पुण्यातील नामांकित रुग्णालयांना यामध्ये सहभागी करून घेण्यात येणार असून 2 हजार रुपयांपर्यंत प्रत्येक रुग्णांचा खर्च ट्रस्ट करणार आहे. समाजातील गरजू व गरीब रुग्णांनी 9763689190, 9960773131 या क्रमांकावर संपर्क साधून या उपक्रमाचा लाभ घ्यावा, असे आवाहन ट्रस्टतर्फे करण्यात आले.

23 Jul 2017

एमपीसी न्यूज - यंदा गणपतीचे आगमन लवकर होत आहे. यावर्षी गणेश चतुर्थी 25 ऑगस्टला आहे. त्यामुळे सध्या गणेश  मूर्ती बनविणयाच्या कारखान्यात जोरदार लगबग सुरू झालीय. आभूषणांनी सजलेल्या गणेश मूर्तींना मोठ्या प्रमाणात  मागणी असल्याचे पिंपळे गुरव येथील प्रज्यो सिद्धी आर्टचे प्रमोद दरेकर यांनी सांगितले.

दरवर्षी साधारणपणे सप्टेंबर महिन्यात मुक्कामाला येणारे गणपती यंदा ऑगस्टलाच येत आहेत. तुळशीबाग गणपती, मंडईचा गणपती या मूर्त्यांना जास्त मागणी आहे. गेल्या वर्षीच्या तुलनेत गणेश मूर्तीच्या किंमतीत 20 ते 25 टक्क्यांनी वाढ झाली आहे, असे त्यांनी सांगितले.

छोटे गणपती साडेपाचशे ते साडेआठशेपर्यंत तर  मध्यम आकाराचे गणपती एक हजार ते साडेतीन हजार व मोठे गणपती चार हजार ते दहा हजारांवर किंमती आहे. यात विविध आभूषणांनी सजविलेल्या गणपतीच्या मूर्तीला भक्तांची जास्त मागणी आहे. त्याच्या किंमती अडीच हजार ते बारा हजारांपर्यंत असल्याचे त्यांनी सांगितले.

23 Jul 2017

एमपीसी न्यूज - अखिल भारतीय महासंघ पिंपरी-चिंचवडच्या वतीने लोकमान्य टिळक यांना पुष्पहार अर्पण करून अभिवादन करण्यात आले.

चिंचवड येथे झालेल्या या कार्यक्रमास संघटनेचे शहर जिल्हा अध्यक्ष दिलीप कुलकर्णी, राष्ट्रीय महिला सरचिटणीस संजीवनी पांडे, उपाध्यक्ष पुष्कराज गोवर्धन,  राजन बुडुख, संघटन सरचिटणीस सुनील  देशपांडे, महेश बारसावडे, अॅड. अंतरा देशपांडे, दिलीप जोशी, मोहन साठे, वैभव जोशी, प्रवीण कुलकर्णी, मधुकर रामदासी, सुहास पोफळे, शामकांत कुलकर्णी, अनंत कुलकर्णी, दिलीप गोसावी आदी उपस्थित होते.

यावेळी दिलीप कुलकर्णी यांनी, लोकमान्य टिळकांच्या जाज्वल्य देशप्रेम आणि निष्ठा यांची आठवण करून दिली. त्याप्रमाणे सर्व देशवासियांनी आचरण केले तर देशाकडे वाकड्या नजरेने पाहण्याची कुणाची हिम्मत होणार नाही, असे मत व्यक्त केले. 

राष्ट्रीय महिला सरचिटणीस संजीवनी पांडे म्हणाल्या की, टिळक कुटुंबावरील होणा-या तथाकथित आरोपामुळे कोणी लोकमान्य टिळकांचे महत्व कमी करण्याचा प्रयत्न करू नये. त्यांचे प्रयत्न यशस्वी आणि महत्व कमी होणार नाही. 

कार्यक्रमाचे आभार मोहन साठे यांनी मानले.

23 Jul 2017

एमपीसी न्यूज - बिफ खाण्यावरून देशात सध्या दररोज हिंसाचार होताना दिसत असून हिंसक झालेला जमाव कायदा हातात घेत आहे. जमावाला कायदा हातात घेण्याचा अधिकार दिला कुणी? देशात सध्या कायदा आणि सुव्यवस्थेचा प्रश्न गंभीर झाला आहे, असे सांगत माजी अर्थमंत्री व खासदार पी. चिदंबरम यांनी सरकारवर टीका केली. पत्रकार भवन येथे आयोजित वार्तालाप कार्यक्रमात ते बोलत होते. यावेळी त्यांनी केंद्र सरकारच्या नाकर्तेपणाचा पाढाच वाचला.


वार्तालापात ते पुढे म्हणाले की, पंतप्रधानांनी गोरक्षेच्या नावाखाली हिंसा करणा-यांना कठोर शासन करण्याच्या सूचना केल्या असतानाही अशा प्रकारच्या घटना थांबताना दिसत नाही. यावरून आपल्याला कुणीही काहीच करू शकत नाही. या अविर्भावात असलेले गोरक्षक किती निर्धास्त आहेत याची कल्पना येते, असे सांगत भाजप सरकार सर्वच पातळ्यांवर काम करण्यात अपयशी ठरल्याची टीका चिदंबरम यांनी केली.

चिनसोबत निर्माण झालेला प्रश्न हा गंभीर आणि संवेदनशील आहे. त्यामुळे सरकारने याविषयी समोर येऊन संवाद साधला पाहिजे. शिवाय सध्या देशभरात सुरू असलेले शेतकरी आंदोलन हाताळण्यातही सरकारला पूर्णपणे अपयश आले आहे. नागरिकांना विश्वासात न घेता वस्तू आणि सेवाकर (जीएसटी) लागू करण्यात आला. या विधेयकाविषयी लोकांमध्ये अजूनही संभ्रम आहे. वस्तू आणि सेवाकर कायदा मंजूर करण्यासाठी सरकारला लोकसभा व राज्यसभेमध्ये मदत केली. पण मूळातच त्या विधेयकामध्ये अनेक त्रुटी आहेत,  असे सांगत हे सरकार सर्वच पातळ्यांवर काम करण्यात अपयशी ठरले आहे, असे ते म्हणाले.

23 Jul 2017


एमपीसी न्यूज - कोल्हापूर येथील पंचगंगेच्या पुरात रेडे डोह येथे पाण्यात कार बुडाल्याची घटना काल (शनिवार) रात्री दहाच्या सुमारास घडली. या घटनेत निगडीतील दोनजण सुखरुप बचावले. मदत पथक आणि पोलिसांच्या दोन तास राबविलेल्या मोहिमेनंतर कार पाण्याबाहेर काढण्यात यश आले. पाण्यात कार बुडत असताना गाडीतील प्रवाशांनी प्रसंगावधान राखून बाहेर पडल्यामुळे दुर्घटना टळली.

सुरेंद्र गुरुराज राव (वय-50) आणि विजय सरवदे (रा. निगडी) असे या अपघातात बचावलेल्या दोन प्रवाशांची नावे आहेत. मिळालेल्या माहितीनुसार, सुरेंद्र आणि वजय हे दोघे बी.एम.डब्ल्यू (MH 14 CK 9159) मधून पन्हाळ्याकडून कोल्हापूरकडे  येत होते. या मार्गावरील आंबेवाडीनजीक असलेल्या रेडे डोह येथे मार्ग बंद केला असल्याने कार चालकाने पुन्हा पन्हाळ्याकडे कार वळवली. परंतु रेडे डोह येथे कार पाण्याच्या प्रवाहामुळे पाण्यात जाऊ लागली.

प्रसंगावधान ओळखून दोघांनी कारचे दरवाजे उघडून गाडीतून बाहेर पडले. परंतु कार पाण्यात वाहून गेली. घडलेली घटना काही अंतरावर बंदोबस्तासाठी असलेल्या पोलिसांना जाऊन सांगितली. पोलिसांनी या घटनेची माहिती आपत्ती निवारण कक्षास दिली. आपत्ती निवारण कक्षातून फायबर बोट, ट्रॅक्टर यांच्यासह पथक घटनास्थळी दाखल झाले. दरम्यान कार पाण्यात बुडाल्याची माहिती गावात पसरल्याने नागरिकांनी घटनास्थळी गर्दी केली.

आपत्ती निवारण पथकाने प्रकाशझोतात कारचा शोध घेऊन कार पाण्याबाहेर काढण्याचा प्रयत्न केला. ट्रॅक्टरला दोर बांधुन कार पाण्या बाहेर काढण्याचा प्रयत्न केला परंतु कार पाण्यात रुतल्याने आणि दोन ते तीन वेळा दोर तुटल्याने कार पाण्यात बाहेर काढण्यास पथकाला दोन तास लागले. राव आणि सरवदे या घटनेत किरकोळ जखमी झाल्याने त्यांना सीपीआर रुग्णालयात उपचारासाठी दाखल करण्यात आले आहे.

23 Jul 2017

खेड तालुक्यातील शेलगाव येथील घटना

(अविनाश दुधवडे)

एमपीसी न्यूज - भिमानदीच्या पुरात वाहुन जाणा-या व्यक्तीला नागरिकांच्या प्रसंगावधानामुळे वाचविण्यात यश आले आहे.  परिसरातील नागरिकांच्या मदतीने वाहुन चालेल्या इसमाला लांब दोराच्या मदतीने सुखरूप बाहेर काढण्यात आले. चाकण ग्रामीण रुग्णालयात सायंकाळी संबंधित इसमाला दाखल करण्यात आले असून त्याच्यावर उपचार सुरु आहेत.

संबंधित व्यक्ती यशवंत भिकाजी जयराम असे नाव सांगत असून पोलिसांनी रात्री उशिरा पर्यंत संबंधित व्यक्ती कडे चौकशी केली असता संबंधित व्यक्ती स्वतःचे नाव वेगवेगळे सांगत असल्याचे व असंबद्ध बोलत असल्याचे पोलिसांनी सांगितले. सध्या भिमाशंकर परिसरात जोरदार पाऊस सुरु आहे त्यामुळे चासकमान जलायशायाच्या साठ्यात लक्षणीय वाढ झाल्याने नदी पात्रात २२६०० क्युसेसने पाणी भिमेच्या पात्रात सोडले असुन नदी हि दुथडी भरुन वाहु लागली आहे. 

नदीकाठच्या गावांना प्रशासनाने सतर्कतेचा इशारा दिला आहे . मात्र शनिवारी  दुपारच्या सुमारास शेलपिंपळगाव जवळील शेलगाव (ता.खेड)  येथे भिमा व भामा नदीच्या संगमावर एक व्यक्ती वाहुन जात सल्याचे नागरिकांच्या लक्षात आले. त्यानंतर येथील नागरिकांनी या व्यक्तीला वाचविण्यासाठी तातडीची मदत करत दोर नदी पात्रात सोडला आणि त्या दोराच्याच्या साह्याने या व्यक्तीला बाहेर काढण्यात ग्रामस्थांना यश आले.

संबंधित व्यक्तीला चाकण येथील ग्रामिण रुग्णालयात उपचारासाठी दाखल करण्यात आले असुन त्याच्या डॉक्टरांच्या मदतीने उपचार सुरु आहे या इसमाची प्रकृती धोक्याच्या बाहेर असल्याचे डॉक्टरांनी स्पष्ट केले आहे. पोलिसांनी संबंधित इसमाकडे रात्री उशिरा पर्यंत चौकशी केली. मात्र स्वतःचे नाव संबंधित व्यक्ती स्पष्टपणे सांगू शकत नसल्याचे व गावाचा पत्ता केवळ बार्शी फाटा असे सांगत असल्याचे पोलिसांनी सांगितले. संबंधित इसमाबाबत स्पष्ट माहिती रात्री उशिरा पर्यंत निष्पन्न झालेली नसून संबंधित इसम मानसिक दृष्ट्या स्वस्थ आहे किंवा कसे हे डॉक्टर व पोलिसांकडून तपासले जात आहे.

23 Jul 2017


दीप अमावस्येनिमित्त विशेष मुलांचे दीपपूजन: संत नामदेव शिंपी समाजातर्फे आयोजन

एमपीसी न्यूज - दीप सूर्याग्निरुपस्त्वं तेजसां तेज उत्तमम,  गृहाण मत्कृतां पूजां सर्वकामप्रदो भव, अशा सूर्यरुप आणि अग्निरुप दिव्याला नमन करीत उज्ज्वल भविष्य आणि उत्तम आरोग्याची प्रार्थना चिमुकल्यांनी केली.  आमच्या जीवनातील, बुद्धीतील अंध:कार नष्ट होऊ दे,  दिव्यासम इतरांचे आयुष्य प्रकाशमान करण्याची बुद्धी दे , अशी प्रार्थना करीत एकलव्य संस्थेतील विशेष मुलांनी दीप अमावस्येनिमित्त दीप पूजन केले.

समस्त नामदेव शिंपी दैव मंडळ कसबा, शिंपी आळीतर्फे  दीप अमावस्या आणि संत नामदेव महाराज यांच्या ६६७ व्या पुण्यतिथीनिमित्त दिप पूजनाचा कार्यक्रम आयोजित करण्यातआला होता. यावेळी शिल्पकार विवेक खटावकर, शाहिर हेमंत मावळे, साईनाथ मंडळ ट्रस्टचे पीयुष शहा, संदीप लचके, संस्थेचे अध्यक्ष रमेश मेहेर, सचिव अ‍ॅड. ज्ञानेश्वर पाटसकर, विश्वस्त अ‍ॅड. प्रकाश सिंदेकर, राहुल सुपेकर, प्रशांत भोंडवे आदी उपस्थित होते.

विवेक खटावकर म्हणाले, समाजातील लोकांनी विविध उत्सवाच्या कारणांनी एकत्र यायला हवे. तंत्रज्ञानामुळे माणसे दूरावत आहेत. समाजातील एकी टिकण्यासाठी माणसा-माणसातील संवाद वाढायला हवा. विशेष मुलांनी त्यांच्या उज्ज्वल भविष्यासाठी दीपप्रार्थना करणे हा अतिशय चांगला उपक्रम आहे, असेही त्यांनी सांगितले.

Page 1 of 237
Open Chat
1
Close chat
Hello! Thanks for visiting us. Please press Start button to chat with our support :)

Start