• 01.jpg
  • 1250x200.jpg
  • MPC_news.JPG
  • PhotoGraphy-School-1.jpg
  • sujit.JPG
23 Jun 2017


एमपीसी न्यूज - कर्जरोखे नंतर आता नालेसफाईवरून विरोधक आक्रमक झाले आहेत. राष्ट्रवादीच्या नगरसेवकांनी थेट बोट घेऊन पुणे महापालिकेत प्रवेश करत अनोखे आंदोलन केले. तसेच ऐन पावसाळ्यात नालेसफाईच्या अभावामुळे नागरिकांवर बोटीने प्रवास करायची वेळ आली आहे, अशी टीकाही यावेळी करण्यात आली.


नाले सफाईची कामे पावसाळ्यापूर्वीच होणे अपेक्षित होते. याची महापौर टिळकांकडून तपासणीही करण्यात आली होती. मात्र, त्यानंतर आदेश देऊनही योग्य त्या प्रकारे नाले सफाई न झाल्याने पहिल्याच पावसात अनेक घरात पाणी शिरल्याच्याही घटना घडल्या होत्या. यावर अधिका-यांवर कारवाई करण्याचेही आदेश देण्यात आले होते. तसेच महापौर टिळकांनी स्वतः देखील नाले सफाईच्या कामावर नाराजी दर्शविली होती. एवढ्या घडामोडी नंतर अद्यापही नाले सफाईचा प्रश्न न सुटल्याने राष्ट्रवादी काँग्रेसच्या नगरसेवकांनी आज या विरोधात आक्रमक होऊन अनोखे बोट आंदोलन केले.

यावेळी नगरसेवक योगेश ससाणे आणि सायली वांजळे यांनी बोटी घेऊन महापालिकेत प्रवेश केला. तसेच नाले सफाईच्या दोषींवर कडक कारवाईची मागणी केली. यावेळी नाले सफाई न झाल्याने पुणेकरांना गाडी सोडून बोटीने प्रवास करावा लागत आहे, अशीही टीका करण्यात आली.
pmc 1

23 Jun 2017


एमपीसी न्यूज - पुणे महानगरपालिकेच्या स्मार्ट सिटी योजनेविरोधात आज पुणे शहर काँग्रेसच्या वतीने महापौर मुक्ता टिळक यांच्या घरापासून ते महापालिकेच्या प्रवेशद्वारापर्यंत मोर्चा काढण्यात आला.

स्मार्ट सिटी हे मृगजळ असल्याचा आरोप करत फक्त पुणे शहरातील काही भागातच ही योजना यशस्वी होऊ शकते. त्यासाठी संपूर्ण पुणेकरांना कर्जाच्या खाईत लोटने चुकीचे आहे, असे मत काँग्रेसचे माजी शहराध्यक्ष अभय छाजेड यांनी केले. यावेळी काँग्रेसचे माजी नगरसेवक संजय बालगुडे, रोहीत टिळक आणि इतर कार्यकर्ते उपस्थित होते.

23 Jun 2017
 
भाजपकडून गटबाजी नसल्याची सारवा-सारव
एमपीसी न्यूज - पिंपरी-चिंचवड महापालिका सत्ताकारणात भाजप शहराध्यक्ष व आमदार लक्ष्मण जगताप विरुद्ध आमदार महेश लांडगे यांच्यात वर्चस्ववादाची सुरुवात झाली आहे. त्याचे पडसाद आज (शुक्रवारी) केएसबी चौकातील ग्रेड सेपरेटर कार्यक्रमाच्या उद्‌घाटनात उमटले. महापौर नितीन काळजे, खासदार अमर साबळे यांनी तासभर प्रतीक्षा करुनही जगताप गटाचे कोणीही कार्यक्रमाला फिरकले नाही. त्यामुळे अखेरीस महापौर काळजे यांच्या हस्ते उद्‌घाटन करण्यात आले. दरम्यान, पक्षात कोणतीही गटबाजी नसल्याची सारवा-सारव भाजपकडून करण्यात आली. 
 
पिंपरी-चिंचवड शहरातील पाणीकपात, ड्रेसकोड, सभाशास्त्र, महापौरांसाठी नवीन मोटारीची खरेदी, विषय समिती सदस्य नियुक्त्या या विविध कारणांवरुन भाजपमध्ये अंतर्गत कलह सुरु झाला आहे. त्याचे पडसाद महापालिका राजकारणात उमटत आहे. त्याची परिणीती दोन दिवसांपूर्वीच महापौर नितीन काळजे आणि स्थायी समितीच्या अध्यक्षा सीमा सावळे यांच्या खडाजंगीमध्ये झाली होती. या दोन सत्ताकेंद्रामध्ये 'वर्चस्व' वादाची लढाई सुरु आहे.
 
या पार्श्वभूमीवर भोसरीचे आमदार महेश लांडगे यांच्या समर्थक 23 नगरसेवकांची मोशीत स्वतंत्र बैठक घेत वेगळी चूल मांडली. या बैठकीत आमदार लांडगे यांनी समर्थक नगरसेवकांना आक्रमक होऊन कामे करण्याचा सल्ला दिला आहे. तसेच बैठक घेऊन आमदार लक्ष्मण जगताप गटाला आव्हान निर्माण केले. भविष्यात हा वाद आणखीनच चिघळण्याची चिन्हे आहेत. त्याची झलक ग्रेड सेपरेटर उद्‌घाटनाच्या कार्यक्रमात दिसली.
 
महापौर नितीन काळजे यांनी केएसबी चौक येथे बांधलेल्या पुलाच्या उजव्या बाजूकडील ग्रेड सेपरेटरचे उद्‌घाटन कार्यक्रमाचे आज (शुक्रवारी) आयोजन केले होते. पुण्याचे पालकमंत्री गिरीश बापट यांच्या हस्ते उद्‌घाटन होणार होते. परंतु, अपरिहार्य कारणास्तव बापट उपस्थित राहू शकले नाहीत.
 
महापौर नितीन काळजे, खासदार अमर साबळे, उपमहापौर शैलजा मोरे तसेच नगरसेवकांनी सुमारे तासभर आमदार लक्ष्मण जगताप यांची वाट पाहिली. सभागृह नेते एकनाथ पवार, स्थायी समितीच्या अध्यक्षा सीमा सावळे किमान हे तरी कार्यक्रमाला येतील अशी अपेक्षा होती. मात्र, आमदार जगतापांसह, पवार, सावळे हे देखील कार्यक्रमाला अनुपस्थित राहिले. त्यामुळे महापौर काळजे यांच्या हस्ते उद्‌घाटन उरकण्यात आले.
 
दरम्यान, जगताप गटाच्या अनुउपस्थितीबाबत महापौर नितीन काळजे यांना विचारले असता, उद्‌घाटनाचा कार्यक्रम ऐनवेळी ठरला होता. नियोजित कार्यक्रम असल्यामुळे काही पदाधिकारी येऊ शकले नाहीत. सभागृह नेते एकनाथ पवार यांनीच उद्‌घाटनाच्या कार्यक्रमाचे आयोजन केले होते. ते जेजुरीला असल्यामुळे येऊ शकले नाहीत. आमच्यात कोणत्याही प्रकारची गटबाजी नसल्याचे सांगत त्यांनी सारवा-सारव करण्याचा प्रयत्न केला.
 
खासदार साबळे म्हणाले, भाजपमध्ये कसलीही गटबाजी नाही. सगळ्यांनी एक दिलाने काम केल्यामुळेच पालिकेत भाजपची एकहाती सत्ता आली आहे. अचानक ठरलेल्या कार्यक्रमामुळे काही पदाधिकारी येऊ शकले नाहीत. पालकमंत्री गिरीश बापट यांनी मला कार्यक्रमाला उपस्थित राहण्याचे सांगितले होते. सर्वांच्या वतीने मी उपस्थित राहिलो आहे.
दरम्यान, आपण शिक्षणमंत्री विनोद तावडे यांच्या सोबत जेजुरीला असल्यामुळे कार्यक्रमाला उपस्थित राहू शकलो नाही, असे सभागृह नेते एकनाथ पवार यांनी सांगितले.
 
आयुक्त, अतिरिक्त आयुक्तांचीही दांडी!
महापालिका मुख्यालयात उपस्थित असलेले आयुक्त श्रावण हर्डीकर, अतिरिक्त आयुक्त अच्युत हांगे आणि शहर अभियंता अंबादास चव्हाण यांनीही या कार्यक्रमाला दांडी मारली. पुर्वनियोजीत बैठका, व्यग्रता यामुळे आयुक्त येऊ शकले नसल्याचे महापौर काळजे यांनी स्पष्ट केले. तर, आयुक्त हर्डीकर यांच्यावर आमदार लक्ष्मण जगताप गटाचा दबाव असल्यामुळे ते अनुउपस्थित राहल्याची चर्चा रंगली आहे.
23 Jun 2017

एमपीसी न्यूज - पिंपरी-चिंचवड परिसराला पाणीपुरवठा करणा-या  पवना धरण परिसरात 1 जून पासून 100 मिमी पावसाची नोंद झाली आहे. त्यानुसार सध्या धरणात 20 टक्के पाणीसाठा शिल्लक आहे. त्यामुळे पवना धरणाला त्याची तहान भागवण्यासाठी अद्याप मुसळधार पावसाची प्रतिक्षा आहे.

पवना धरण परिसरात आज दुपारी 12 वाजेपर्यंत 6 मिली पावसाची नोंद करण्यात आली आहे. त्यानुसार 1 जून ते 23 जून या 22 दिवसाच्या कालावधीत धरण परिसरात 100 मिली पावसाची नोंद झाली आहे. मात्र हा पाऊस धरणाची तहान भागवणारा नसल्याने  धरणात सध्या 20.75 टक्के म्हणजे 1.77 टीएमसी पाणीसाठा शिल्लक आहे. त्यामुळे धरण भरण्यासाठी किमान 1हजार 800 ते 1 हजार 900 मिमी पावसाची आवश्यकता आहे.

पावसाला सुरुवात झाल्यामुळे पिंपरी-चिंचवड  शहराची 13 जूनपासून एक दिवसाड पाणी कपातही रद्द करण्यात आली आहे. या पार्श्वभूमीवर धरण परिसरात जोरदार पाऊस होण्याची गरज आहे.

शहरात आज बरसणार पावसाच्या सरी

मान्सून काही दिवस थंडावला होता. मात्र काल सायंकाळपासून पुणे व पिंपरी-चिंचवड शहर परिसरात पावसाला सुरुवात झाली आहे. पुणे वेधशाळेने वर्तवलेल्या अंदाजानुसार आज काही भागात मध्यम स्वरुपाच्या पावसाच्या सरी बरसतील असा अंदाज वर्तवण्यात आला आहे. त्यामुळे आत्ता तरी पावसाने न थांबता बॅटींग सुरु करावी अशी अपेक्षा शहरवासीय करत आहेत.

23 Jun 2017


केंद्र सरकारकडून 'स्मार्ट सिटी'ची तिसरी यादी जाहीर

एमपीसी न्यूज - केंद्र सरकारच्या बहूचर्चित स्मार्ट सिटी या योजनेत पिंपरी-चिंचवड शहराचा तिस-या यादीत समावेश झाला आहे. या यादीमध्ये एकूण 30 शहरांची नावे जाहीर करण्यात आली. केंद्रीय शहर नागरी विकास मंत्रालयाने स्मार्ट सिटीची तिसरी यादी जाहीर केली. केंद्रीय मंत्री व्यंकय्या नायडू यांनी ट्विटरच्या माध्यमातून ही माहिती दिली आहे, असे महापौर नितीन काळजे यांनी सांगितले.


पुणे व पिंपरी-चिंचवड शहराचा केंद्र सरकारकडे एकत्रित प्रस्ताव गेल्याने शहराच्या गुणवत्ता यादीत 100 पैकी 98 गुण मिळवूनही पिंपरी-चिंचवडला स्मार्ट सिटी योजनेतून डावलले गेले होते. शहराची पात्रता असतानाही डावलले होते. यामुळे नाराजी व्यक्त करण्यात येत होती. दरम्यानच्या काळात नवी मुंबई महापालिका स्वत:हून स्मार्ट सिटी योजनेतून बाहेर पडली. नवी मुंबईच्या ऐवजी पिंपरी-चिंचवड शहराचा स्मार्ट सिटीत समावेश केल्याची घोषणा, केंद्रीय नगरविकास मंत्री व्यंकय्या नायडू यांनी पुण्यामध्ये केली होती. त्यावर आज (शुक्रवारी) अखेर शिक्कामोर्तब झाले आहे.

या तिस-या यादीमध्ये पिंपरी-चिंचवड या महाराष्ट्रातील एकमेव शहराचा समावेश करण्यात आला आहे. शुक्रवारी सकाळी केंद्रीय मंत्री व्यंकय्या नायडू यांनी देशभरातील 30 शहरांची तिसरी यादी जाहीर केली. 'स्मार्ट सिटी' अंतर्गत आता देशभरातील एकूण 90 शहरांचा कायापालट होणार आहे. स्मार्ट शहरांच्या योजनेंतर्गत तिस-या टप्प्यातील यादीत 30 शहरांची निवड करण्यात आली आहे. यादीत पिंपरी-चिंचवड 18 व्या स्थानी आहे.

ही शहरे विकसित करणार!

तिरुअनंतपुरम, नवा रायपूर, राजकोट, अमरावती, पाटणा, करीमनगर, मुजफ्फरपूर, पुद्दूचेरी, गांधीनगर, श्रीनगर, सागर, कर्नाल, सतना, बेंगळुरु, शिमला, त्रिपूर, पिंपरी-चिंचवड, बिलासपूर, पासिघाट, जम्मू, दाहोद, तिरुनेलवेल्ली, थूठकुडी, तिरुचिरापल्ली, झाशी, आयझॉल, अलाहाबाद, अलीगढ आणि गंगटोक.

पिंपरी-चिंचवड शहराचा स्मार्ट सिटीमध्ये समावेश झाल्याने शहरवासीयांना आनंद झाला आहे. यामुळे शहराचा सुनियोजित विकास होणार आहे. स्मार्ट सिटीत शहराचा समावेश व्हावा, यासाठी भाजप पदाधिका-यांनी केलेल्या पाठपुराव्याला यश आले आहे, असे महापौर नितीन काळजे यांनी 'एमपीसी न्यूज'शी बोलताना सांगितले.

सभागृह नेते एकनाथ पवार म्हणाले की, पिंपरी-चिंचवड शहराचा स्मार्ट सिटीत समावेश झाल्याचा मनस्वी आनंद झाला आहे. महापालिकेत भाजपची सत्ता आल्यावर शहराचा स्मार्ट सिटीत समावेश करण्यासाठी आम्ही खूप प्रयत्न केले. त्याला अखेर यश आले आहे. यामुळे शहराचा सर्वांगीण विकास होणार आहे. पंतप्रधान नरेंद्र मोदी, मुख्यमंत्री देवेंद्र फडणवीस यांचे शहरवासीयांच्या वतीने आभार मानतो.

विरोध पक्षनेते योगेश बहल म्हणाले की, पिंपरी-चिंचवड शहराचा पूर्वीच स्मार्ट सिटीमध्ये समावेश होणे गरजेचे होते. शहराचा सर्वांगीण विकास होऊनही डावलले गेले. परंतु, 'देर आये, दुरुस्त आये'' असे म्हणत शहराचा स्मार्ट सिटीत तिस-या यादीत समावेश केल्याने पंतप्रधान नरेंद्र मोदी यांचे त्यांनी आभार मानले. तसेच यामध्ये राजकारण न करता लोकहित डोळ्यासमोर ठेवून काम करावे, अशी अपेक्षाही त्यांनी व्यक्त केली.

याबाबत बोलताना आयुक्त श्रावण हर्डीकर म्हणाले, स्मार्ट सिटी अभियान शहरात राबविण्यासाठी विशेष उद्देश वाहन (स्पेशल पर्पज व्हेइकल) कंपनी स्थापन करण्याची प्रक्रिया सध्या सुरू आहे. स्मार्ट सिटीच्या आराखड्याची अंमलबजावणी करण्यात येईल. स्मार्ट सिटी अंतर्गत कामासाठी अर्थसंकल्पामध्ये तरतूद देखील करण्यात आली असून स्मार्ट सिटीचे काम वेगात करण्यात येणार आहे.

23 Jun 2017

मुंबई पुणे एक्सप्रेस वेवर लेनची शिस्त मोडणाऱ्या अवजड वाहनांना लेनची शिस्त लावण्यासाठी व अपघात तसेच वाहतूक कोंडीवर नियंत्रण ठेवण्यासाठी रस्ते विकास महामंडळ आणि आयआरबी कंपनीच्या वतीने फेक्झिबल हाईट बॅरिअर लावण्यात येणार आहेत. हे बॅरिअर  किमी ३३ ते ५२ दरम्यान मुंबईहून पुण्याकडे येणार्‍या मार्गावर खालापूर टोलनाका ते लोणावळ्यातील तुंगार्लि गावच्या हद्दीत पर्यंत बसविण्यात येणार अाहेत.

या संकल्पनेचे उदघाटन महामार्गाचे अप्पर पोलीस महानिरीक्षक आर. के. पद्मनाभन यांचे हस्ते करण्यात आले आहे. यावेळी रस्ते विकास मंडळाचे कार्यकारी अभियंता प्रशांत औटी, श्री. पत्की आयआरबीचे कर्नल जोशवा, रायगड विभागाचे महामार्ग पोलीस अधिक्षक विजय पाटील, पुणे विभागाचे महामार्गाचे पोलीस अधिक्षक अमोल तांबे, महामार्गाच्या उपविभागीय पोलीस अधिकारी रुपाली अंबुरे, पोलीस निरीक्षक डी. जी. गाढवे यांच्यासह पळस्पे, बोरघाट (दस्तुरी), खंडाळा व वडगाव महामार्ग पोलीस ठाण्याचे पोलीस अधिकारी उपस्थित होते.

मुंबई पुणे एक्सप्रेस वेवर मागील  १२ वर्षापासून झालेल्या हजारो अपघातात हजारो प्रवाशांना प्राणांना मुकावे लागले असून अनेक जण जायबंद झाले आहेत. या अपघातांमागे ओव्हरस्पीड, लेनची बेशिस्त, चुकीचे ओव्हरटेक करणे या प्रमुख कारणांसह इतर कारणे आहे. मागील ४ ते ५ वर्षांपासून एक्सप्रेस वेवरील अपघात रोखण्यासाठी महाराष्ट्र सरकार सह रस्ते विकास महामंडळ आणि महामार्ग पोलीस यंत्रणेने विविध उपाययोजना व संकल्पना राबविल्या आहेत. मात्र त्या सर्व कुचकामी ठरल्या असल्या तरी यामुळे काही प्रमाणात अपघातांवर अंकुश राहिल्याने अपघातांच्या संख्येत घट झाली आहेत. सातत्याने होणाऱ्या अपघातांमुळे दुर्दैवाने या मार्गाला मृत्यूंचा मार्ग म्हणून ओळखला जात आहे.

या मार्गाची हि ओळख नाहीशी करण्यासाठी व प्रवाशांच्या सुरक्षित प्रवासासाठी रस्ते विकास महामंडळ आणि महामार्ग पोलीस यंत्रणेने कंबर कसत विविध उपाययोजना व प्रयोग राबविले आहे. त्यापैकी आता लेनची शिस्त मोडणाऱ्या अवजड वाहनांना लेनची शिस्त लावण्यासाठी एक्सप्रेस वेवरील पहिल्या लेनवर हाईट बॅरिअर बसविण्याच्या कामाला सुरुवात करण्यात आली आहे. खोपोली ते लोणावळा दरम्यान ५६ ठिकाणी हे बँरिअर लावण्यात येणार अाहेत.

23 Jun 2017
 
एमपीसी न्यूज - राष्ट्रवादीच्या विद्यमान नगरसेविकेचा विनयभंग करून जिवे ठार मारण्याची धमकी दिल्याप्रकरणी भाजप कार्यकर्त्यासह दोघांविरुद्ध र्पिंपरी पोलिस ठाण्यात गुन्हा दाखल करण्यात आला आहे.
 
हा प्रकार पिंपरी-चिंचवड महापालिकेच्या मुख्यद्वारासमोरील वाहनतळात गुरुवारी दुपारी दीडच्या सुमारास घडला.
 
कुणाल लांडगे आणि सतीश लांडगे (रा. कासारवाडी) या दोघांविरुद्ध गुन्हा दाखल केलेला आहे. कुणाल लांडगे याने भाजपच्या चिन्हावर संत तुकारामनगरमधून निवडणूक लढवली होती.
 
शिवीगाळ करत विनयभंग केला आणि जीवे मारण्याची धमकी दिली, असे फिर्यादीत नमूद केले आहे.
 
लांडगे यांनी त्यांच्यावरील आरोपांचा इन्कार केला असून बदनामीसाठी जाणीवपूर्वक खोटी फिर्याद दिल्याचा दावा केला आहे.
पिंपरी पोलीस पुढील तपास करीत आहेत.
22 Jun 2017


एमपीसी न्यूज - पुणे महापालिकेचा देशातील पहिला बॉण्ड गुंतवणुकीसाठी खुला करण्याचा शुभारंभ मुंबई शेअर बाजारमधील इंटरनॅशनल कन्व्हेंशन सेंटरमध्ये झाला. केंद्रीय मंत्री व्यंकय्या नायडू आणि मुख्यमंत्री देवेंद्र फडणवीस यांच्या उपस्थितीत झालेल्या या कार्यक्रमाला गर्दी जमवण्यासाठी भाजपने महापालिकेच्या खर्चाने तब्बल 150 अधिकारी व खाते प्रमुखांना नेले, असा आरोप विरोधी पक्षनेते चेतन तुपे यांनी केला आहे. तसेच यामुळे नागरिकांच्या कामे रखडली गेली याला जबाबदार कोण, असा प्रश्नही त्यांनी उपस्थित केला.

याबाबत बोलताना तुपे म्हणाले की, पुणे महानगरपालिकेच्या इतिहासात प्रथमच एखाद्या प्रकल्पासाठी कर्ज काढले जात आहे. याचा भार सर्व सामान्य पुणेकर नागरिकांना सहन करावा लागणार आहे. असे असताना दुसरीकडे या कर्जरोख्याच्या कार्यक्रमासाठी 150 अभियंते व खाते प्रमुखांना महापालिकेच्या खर्चातून मुंबईला नेण्यात आले.

या पुणेकरांनी भाजपला आठ आमदार एक खासदार आणि पुणे महापालिका दिली असताना देखील समान पाणी पुरवठा योजनेसाठी कर्ज काढावे लागले आणि आज त्या कर्जासाठी टोल वाजवून मंजुरी देण्यात आली. त्या कार्यक्रमासाठी केंद्रीय मंत्री, महापौर, महापालिका आयुक्त हे गेले. त्यांनी त्यांच्याबरोबर महापालिकेतील 150 इंजिनअर आणि खाते प्रमुख घेऊन गेले. त्यामुळे आज महापालिकेत येणा-या कोणत्याही व्यक्तीचे काम झाले नाही. याला जबाबदार कोण असा प्रश्न निर्माण झाला आहे.

या कार्यक्रमाला 150 अभियंत्यांना महापालिकेच्या खर्चातून नेण्यात आले आहे. त्यांचे आजच्या दिवसाचे कामाचे वेतन देखील दिले जाणार आहे. हा कार्यक्रम राज्य शासनाशी निगडित असताना महापालिकेचे अधिकारी का घेऊन गेले ? कारण केंद्रीय मंत्री व्यंकय्या नायडू आणि मुख्यमंत्री देवेंद्र फडणवीस यांच्या कार्यक्रमाला गर्दी झाली नसती. या भीतीपोटी भाजपने अधिका-यांना घेऊन गेले, अशी टिपणीही तुपे यांनी केली.

22 Jun 2017

एमपीसी - कर्जमाफी आता फॅशन झाली आहे, केंद्रीय मंत्री व्यंकय्या नायडू यांच्या या वादग्रस्त वक्तव्याचे पडसाद आज पुणे महापालिकेच्या सर्व साधारण सभेत उमटले. शिवसेनेने या वक्तव्याचा तीव्र शब्दांत निषेध व्यक्त केला.

सर्व साधारण सभा चालू होताच शिवसेना गटनेते संजय भोसले म्हणाले की, केंद्रीय मंत्री व्यंकय्या नायडू यांनी आज ज्या प्रकारे कर्जमाफीबाबत जे विधान केले आहे. ते निंदनीय असून शेतकऱ्यांच्या भावना दुखावल्या गेल्या आहे. केंद्रीयमंत्र्यांनी ही भूमिका घेणे चुकीचे असल्याचे भोसले यांनी सांगितले.

पुणेकरांना 24 तास पाणी पुरवठा योजनेच्या कर्जरोख्याच्या कार्यक्रमास, महापौर मुक्ता टिळक, उपमहापौर महापालिका आयुक्त कुणाल कुमार आणि पुणे महापालिकेतील भाजप नगरसेवक, अधिकारी गेल्याने सभागृहात उपस्थितांची संख्या कमी होती तसेच महापौर आणि उपमहापौर उपस्थित नसल्याने महापालिकेतील दुसरा मोठा पक्ष असलेल्या राष्ट्रवादी काँग्रेसच्या नगरसेविका हेमलता मगर यांना एक सर्वसाधारण सभेसाठी महापौरांच्या जागी सभापती म्हणून बसण्याची संधी मिळाली. मात्र, नगरसेवक आणि अधिकाऱ्याच्या अल्प उपस्तिथीमुळे सभा लगेचच तहकूब करण्यात आली.

22 Jun 2017


एमपीसी न्यूज - प्रस्तावित उच्चक्षमता द्रुतगती मार्ग (एचसीएमटीआर) रस्त्यावरील आरक्षणामुळे वाल्हेकरवाडी, चिंचवडेनगर, थेरगाव परिसरातील 850 पेक्षा जास्त घरे पाडली जाणार आहे. याला घरे वाचवा संघर्ष समितीने ठाम विरोध केला आहे. आंदोलनाची दिशा ठरविण्यासाठी संघर्ष समितीची आज (गुरुवारी) रात्री चिंचवड येथे बैठक होणार आहे.

महापालिका आणि प्राधिकरणाच्या मंजूर विकास आराखड्यानुसार 30 मीटर रुंद एचसीएमटीआरचा 65 टक्के जागेचा ताबा असून उर्वरीत जागा ताब्यात घेण्याबाबत पालिका व प्राधिकरणामार्फत कारवाई करण्यात येणार आहे. वाल्हेकरवाडी ते रहाटणीपर्यंतच्या प्राधिकरणाच्या नियोजन क्षेत्रातील एचसीएमटीआर रस्त्याच्या आरक्षित जागेवरील अनधिकृत बांधकामवर कारवाई करण्यात येणार आहे.

या जागेवर आरक्षण टाकताना पिंपरी-चिंचवड नवनगर प्राधिकरण आणि पालिकेने कायद्याने ग्रामसभा बोलवून रहिवाशांचे मत जाणून घेणे गरजेचे होते. त्यानंतरच आरक्षण टाकणे गरजेचे होते. पंरतु, चुकीच्या पद्धतीने आरक्षण टाकण्यात आले आहे, असा आरोप संघर्ष समितीच्या सदस्यांनी केला.

पालिका आणि प्राधिकरणाच्या या चुकीमुळे वाल्हेकरवाडी, चिंचवडेनगर, बिजलीनगर आणि बळवंतनगर येथील 850 पेक्षा जास्त घरे पाडली जाणार आहेत. घरे पाडण्यास चिंचवड ग्रामस्थ आणि रहिवाशांचा तीव्र विरोध आहे. त्यासाठी आंदोलनाची दिशा ठरविण्यासाठी राजकीय पदाधिकारी, सामाजिक कार्यकर्ते, रहिवाशी यांची बुधवारी रात्री बैठक होणार असून आंदोलनाची पुढील दिशा ठरविण्यात येणार आहे.

Page 2 of 183
Open Chat
1
Close chat
Hello! Thanks for visiting us. Please press Start button to chat with our support :)

Start