• 01.jpg
  • 1250x200.jpg
  • MPC_news.JPG
  • PhotoGraphy-School-1.jpg
  • sujit.JPG
20 Jun 2017

एमपीसी न्यूज - महापालिका क्षेत्रातील वीज ग्राहक व वितरण कंपनी यांच्यात सुसंवाद व समन्वय राहावा यासाठी तसेच ग्राहकांना उत्तम व दर्जेदार सेवा पुरवण्यासाठी जिल्हा व तालुका स्तराप्रमाणे महापालिका क्षेत्रातही विद्युत वितरण संनियंत्रण समित्या गठित होणार आहेत. शासनाने तसा अद्यादेशही जारी केला आहे.

वीज पुरवठा ही अत्यंत महत्वाची बाब असून महापालिका क्षेत्रात अशा नियंत्रण समित्या गठित केल्या तर ग्राहक व महावितरण यांच्यात सुसंवाद राहील व ग्राहकांच्या समस्या लवकर सोडविण्यात येतील. विद्युत वितरण सनियंत्रण समिती गठित झाल्यावर या समितीच्या बैठका दर तीन महिन्यांनी होणार असून बैठकीतील निर्णयांची माहिती शासनाला करावयाच्या शिफारसी संदर्भात मुख्य अभियंत्यामार्फत शासनाला कळविण्यात येणार आहे.

राज्य शासनाने काढलेल्या अद्यादेशानुसार मनपा क्षेत्रातील या समितीचे गठन मनपा आयुक्तांना करता येणार आहे. समिती गठीत करण्यापूर्वी अशासकीय सदस्यांच्या नियुक्तीला पालकमंत्र्यांची सहमती घ्यावी लागणार असून ही नियुक्ती महिनाभरात करण्यात येणार आहे. या समितीमध्ये असणा-या कोणत्याही अशासकीय व शासकीय सदस्यांना प्रवास खर्च व भत्ते देण्यात येणार नाहीत.

या समितीच्या अध्यक्षपदी विधानसभा सदस्य, सहअध्यक्ष, संबंधित क्षेत्रातील विधानसभा सदस्य व त्या क्षेत्रातील महावितरणचे कार्यकारी अभियंता, सदस्य म्हणून त्या-त्या विधानसभा मतदारसंघातील सर्व झोन सभापती, विधानसभा मतदारसंघातील 10 नगरसेवक आणि उद्योग, शिक्षण, घरगुती ग्राहक, वितरण क्षेत्रात उत्कृष्ट काम कारणा-या दोन अशासकीय संस्थांचा एक प्रतिनिधी यांचा समावेश असणार आहे.

20 Jun 2017


एमपीसी न्यूज - पुणे कॅन्टोन्मेंट बोर्डाच्यावतीने संत ज्ञानेश्वर माऊली व जगतगुरू संत तुकाराम महाराज पालखी स्वागताकरीता पुलगेट येथे स्वागत कक्ष उभारुन दोन्ही पालख्यांचे स्वागत करण्यात आले. यावेळी पालखीतील वारकरी बांधवाना फराळांचे पाकीट आणि पाण्याच्या बाटल्यांचे वाटप करण्यात आले. दोन्ही पालख्यांचे आदरतिथ्य झाल्यानंतर दोन्ही पालख्या पंढरपूरकडे रवाना झाल्या.

संत ज्ञानेश्वर माऊली व जगतगुरू संत तुकाराम महाराज पालखी स्वागताकरीता पुलगेट येथे पुणे शहर पोलीस आयुक्त रश्मी शुक्ला, सहाय्यक पोलीस आयुक्त रविंद्र कदम, अतिरिक्त पोलिस आयुक्त रविंद्र सेनगावकर, पोलिस उपायुक्त डॉ.प्रविण मुंड़े, बसवराज तेली, अशोक मोराळे, सहाय्यक पोलिस आयुक्त निलेश मोरे, शिवाजी पवार, लष्कर पोलिस ठाण्याचे वरिष्ठ पोलिस निरीक्षक वसंत कुवर व पुणे कॅन्टोन्मेंट शांतता कमिटीचे सदस्य बापूसाहेब गानला, इसाक जाफर, प्रविण गाडे, विकास भांबुरे, दिलीप भिकुले, विजय भोसले, प्रकाश अरगडे, विनय भगत आदी उपस्थित होते.

पुणे कॅन्टोन्मेंट बोर्डाने दोन्ही पालख्यांचे स्वागत कक्ष उभारून स्वागत करण्याचे यंदाचे पहिलेच वर्ष आहे. यावेळी स्वागत कक्षात पुणे कॅन्टोन्मेंट बोर्डाचे मुख्य कार्यकारी अधिकारी डॉ. डी. एन. यादव , पुणे कॅन्टोन्मेंट बोर्डाचे उपाध्यक्ष अतुल गायकवाड, नगरसेवक विनोद मथुरावाला, माजी उपाध्यक्ष बापूसाहेब गानला, अभियंता सुखदेव पाटील, विद्युत अभियंता विजय चव्हाण, महसूल अधिकारी संजय मकवाना, अभियंता अभिजित तावडे, पुणे कॅन्टोन्मेंट बँकेचे संचालक संजय फटके, पोपट गायकवाड, निलेश कणसे, जितेंद्र शिंदे, विक्रम मोरे आदी उपस्थित होते.


पोलिस मित्र लष्कर पोलिस ठाण्याच्यावतीने पालखी सोहळ्यात कायदा सुव्यवस्था राखण्यासाठी  सकाळी मुस्लिम युवकांनी आपल्या पवित्र रमजान महिन्याची सकाळची सहेरी उरकून पोलिसांना सहकार्य केले. यामध्ये मयुरेश जाधव, अरमान शेख, नायाब खत्री, फरहान सय्यद, अतिक आत्तार, ताबिन शेख, सिराज बंगाली, मनाली घाडगे, विलाक्षी झुंबरे आदींनी पोलिस मित्र म्हणून पोलिस बांधवाना विशेष सहकार्य केले.

आषाढी वारीमधील वारकरी बांधवाना समता सामाजिक संस्थेच्यावतीने पुणे लष्कर भागात उपवासाचा फराळ, राजगिरा लाडू वाटप समता सामाजिक संस्थेचे अध्यक्ष विजय भोसले यांच्याहस्ते करण्यात आले. यावेळी विकास भांबुरे, दिलीप भिकुले, अनिकेत भोसले, संजय काळे, भारती अंकलेल्लू व ललिता काळे आदींनी फराळ वाटपासाठी सहकार्य केले. तसेच मुळे सायकल मार्टच्या वतीने हेमंत मुळे यांनी वारकरी बांधवाना फराळ वाटप केले.

tilak palkhi
palkhi 1
palkhi 2


20 Jun 2017

दिलीप कांबळे, बाळा भेगडे, महेश लांडगे, विजय काळे, भीमराव तापकीर सूचक

एमपीसी न्यूज ;  राष्ट्रीय लोकशाही आघाडीचे (एनडीए) राष्ट्रपतिपदाचे उमेदवार रामनाथ कोविंद यांच्या उमेदवारी अर्जावर महाराष्ट्रातील भाजपच्या 25 आमदारांनी आज सूचक म्हणून स्वाक्षऱ्या केल्या आहेत त्यातील पुण्यातील पाच आमदारांचा समावेश आहे.

राष्ट्रपतिपदाच्या निवडणुकीसाठी पुढील 23 जून रोजी कोविंद हे अर्ज दाखल करण्याची शक्‍यता आहे. त्यासाठी भाजपकडून जय्यत तयारी सुरू आहे. या अर्जावर अनुमोदक म्हणून 50 आमदार किंवा खासदार आणि सूचक म्हणूनही तितक्‍याच संख्येने आमदार किंवा खासदार सूचक म्हणून आवश्‍यक असतात. यामध्ये पुण्यातून राज्यमंत्री दिलीप कांबळे, आमदार बाळा भेगडे, भीमराव तापकीर, विजय काळे, महेश लांडगे हे पाच जण गेले होते. राज्याच्या इतर भागातूनही आमदार आले होते.

केंद्रीय संसदीय कामकाजमंत्री अनंतकुमार यांच्या मार्गदर्शनाखाली विशेष गट भाजपने या निवडणुकीसाठी सक्रिय केला आहे. यात राज्यमंत्री मुक्तार अब्बास नक्वी आणि सरचिटणीस भूपेंद्र यादव यांचा समावेश आहे. 
 म्हणजे एका अर्जावर शंभर जणांच्या स्वाक्षऱ्या आवश्‍यक असतात. भाजपकडून चार अर्ज दाखल केले जाणार आहेत. त्यासाठी प्रत्येक राज्यातील खासदार आणि आमदारांना आज दिल्लीत बोलविण्यात आले होते. महाराष्ट्रातील भाजप आमदारांनी सहप्रभारी राकेशसिंग यांच्या निवासस्थानी जाऊन या अर्जावर सह्या केल्या आहेेेत. 
20 Jun 2017


दारुविक्रीसाठी हॉटेलचालकांची नामी शक्कल, 50 मीटरचे झाले 500 मीटर!

एमपीसी न्यूज - सर्वोच्च न्यायालयाने राष्ट्रीय आणि राज्य महामार्गावरील दारू विक्री करणाऱ्या दुकानांवरील बंदी कायम ठेवतानाच त्यामध्ये हॉटेल-रेस्टॉरंट आणि परमीट रूम-बारवरही बंदी असल्याचे स्पष्ट केले आहे, मात्र अनेक हॉटेलचालकांनी नामी शक्कल लढवीत सर्वोच्च न्यायालयाच्या आदेशालाही वाटाण्याच्या अक्षता लावण्याचे काम चालविले आहे. सरकारी अधिकाऱ्यांना दक्षिणा देऊन तसेच हॉटेलला मोठी प्रदक्षिणा मारायला लावून ग्राहकांना सोमरसाचे तीर्थ खुलेआम उपलब्ध करून देण्यात येत आहे. पैशांच्या जोरावर सर्वोच्च न्यायालयाच्या आदेशालाही गुंडाळून ठेवणाऱ्या या हॉटेलचालकांवर शासन काय कारवाई करते, याकडे सर्वसामान्य नागरिकांचे लक्ष लागले आहे.

राष्ट्रीय महामार्गापासून 500 मीटरच्या आत दारु विक्री करण्यास सर्वोच्च न्यायालयाने बंदी घातल्यानंतर पिंपरी-चिंचवडमध्ये अनेक हुशार हॉटेल चालकांनी नामी शक्कल लढवत त्यातूनही पळवाट शोधून काढली आहे. वाकड येथे महामार्गालगत असलेल्या सयाजी हॉटेलने तर अजबच प्रताप केला आहे. शासकीय अधिकाऱ्यांना दक्षिणा देण्याबरोबरच ग्राहकांना हॉटेलला चक्क मोठी 'प्रदक्षिणा' घालयला लावून महामार्गापासून अवघ्या 50 मीटर अंतरावर असलेल्या हॉटेलचे प्रवेशद्वार 500 मीटर लांब करुन करून दाखविण्याची किमया केली आहे. 'सयाजी' प्रमाणेच शहरातील महामार्गालगतच्या अनेक हॉटेलचालकांनी असेच अंतर वाढविण्याची केले आहे.

मद्यप्राशन करून वाहने चालविल्यामुळे होणारे अपघात रोखण्यासाठी सर्वोच्च न्यायालयाने राष्ट्रीय व राज्य महामार्गापासून 500 मीटर अंतराच्या आत दारु विक्रीस बंदी घातली आहे. तसेच राष्ट्रीय व राज्य महामार्गावर मद्याचे चिन्ह किंवा मद्य उपलब्ध असल्याबाबत जाहिरातींवरही निर्बंध घालण्यात आले आहेत.

पिंपरी-चिंचवडमध्ये महामार्गालगत अनेक हॉटेल आहेत. अनेक हुशार हॉटेल चालकांनी त्यातूनही पळवाट काढली आहे. त्यासाठी विविध नामी शक्कल लढविल्या जात आहेत. महामार्गालगतच्या काही हॉटेल चालकांनी तर हॉटेलच्या आजूबाजूची जागा खरेदी केली अथवा भाड्याने घेतली आहे. त्या जागेत वळणावळणाचा रस्ता बनवून हॉटेलचे प्रवेशद्वार महामार्गापासून 500 मीटरपेक्षा जास्त अंतरावर असल्याचे दाखविण्यात येत आहे. त्यामुळे कायदा काहीही केला तरी हॉटेल व्यासायिक त्यातून पळवाट काढत असतात, मात्र या पळवाटेमुळे चक्क सर्वोच्च न्यायालयाच्या आदेशामागील हेतूलाच हरताळ फासण्यापर्यंत या मंडळींची हिंमत वाढल्याचे पहायला मिळत आहे.

देहूरोड -कात्रज बायपास राष्ट्रीय महामार्गावर अलिशान सयाजी हॉटेल आहे. हे अगदी महामार्गालगत आहे. या हॉटेलचे गेट महामार्गापासून जेमतेम 50 मीटर अंतरावर होते. हॉटेल महमार्गापासून 500 मीटरच्या आत असल्याने नियमाप्रमाणे हॉटेलमध्ये दारु विक्री बंद करावी लागणार होती. पंरतु, हॉटेल चालकाने नामी शक्कल लढवून त्यातूनही मार्ग काढल्याचे दिसून येत आहे. त्यामुळे अंतर लांब व्हावे यासाठी हॉटेलमध्ये प्रवेश करण्यासाठी हॉटेलला पूर्ण वळसा घालणारा  500 मीटर अंतराचा रस्ता बनविला. त्यामुळे महामार्गापासून 500 मीटर मोटार चालविल्याशिवाय सयाजी हॉटेलचे गेट येत नाही.

सर्वोच्च न्यायालयाच्या व शासनाच्या सर्व आदेशांचे आम्ही तंतोतंत पालन केले आहे. आम्ही कोणत्याही प्रकारचे बेकायदेशीर काम केलेले नाही, असा दावा सयाजी हॉटेलच्या व्यवस्थापनाकडून करण्यात येत आहे.

याबाबत उत्पादन शुल्क विभागाचे उपनिरीक्षक सूरज दाभेराव म्हणाले की, सार्वजनिक बांधकाम विभाग आणि भूमी अभिलेख कार्यालय यांच्याकडे हॉटेलची जागा मोजण्याची जबाबदारी आहे. त्यासाठी एक समिती नेमली आहे. त्या समितीने रस्त्याचे अंतर मोजल्यास जिल्हाधिकारी परवानगी देतात. उत्पादन शुल्क विभाग परवानगी देत नाही. परवानगी नसेल तरच उत्पादन शुल्क विभाग संबंधित हॉटेलवर कारवाई करु शकतो.

सरकारी अधिकारी एकमेकांवर जबाबदारी टोलवत आहेत आणि महमार्गालगत राजरोजपणे मद्यविक्री सुरू आहे. राज्य शासनाचे वरिष्ठ अधिकारी देखील त्याकडे सोयीस्कर डोळेझाक करीत आहेत.

20 Jun 2017

सवलत रद्द करण्याचा प्रस्ताव विधीसमितीने केला दफतरी दाखल

एमपीसी न्यूज - शहरातील निवासी मिळकतींना गेल्या 47 वर्षांपासून मिळकतकरात दिली जाणारी 40 टक्के सवलत कमी करण्याचा प्रस्ताव महापालिका प्रशासनाने विधी समिती समोर मंजुरीसाठी ठेवण्यात आला होता तो दफतरी दाखल केला आहे, 47 वर्षपासून मिळणारी सवलत तशीच सुरु राहणार आहे.

महापालिकेच्या हद्दीतील निवासी व मालक जागेचा वापर स्वत: राहण्यासाठी करीत असलेल्या मिळकतींना वाजवी भाड्यामध्ये 40 टक्के सवलत दिली जात आहे. त्याचबरोबर देखभाल दुरुस्तीसाठी 15 टक्यांची सवलत दिली जाते. प्रामुख्याने 1970 मध्ये महापालिकेच्या मुख्यसभेत यासंबधीचा ठराव मंजुर झाला होता, त्यास शासनाची मंजुरी मिळाल्यापासून आजपर्यंत ही सवलत मिळकतीच्या बिलात प्रशासनाकडून दिली जात आहे. मात्र या सवलतीबाबत केंद्राच्या लेखा परिक्षण विभागाकडून आक्षेप घेण्यात आला आहे.

प्रामुख्याने देखभाल दुरुस्तीसाठी महापालिका कायद्यान्वये 10 टक्के सवलत देण्याची तरतुद आहे, मात्र पालिका प्रशासनाकडून 15 टक्के सवलत दिली जात आहे. त्यामुळे पालिकेला कोट्यावधी रुपयांच्या उत्पन्नाची नुकसान होत असल्याचे लेखा परिक्षणात स्पष्ट करण्यात आले आहे. त्याचबरोबर वाजवी भाड्यामध्ये देण्यात येत असलेल्या 40 टक्के  सवलतीमुळे पालिकेचे आर्थिक नुकसान होत आहे. त्यामुळे ही सवलत रद्द केल्यास व देखभाल दुरुस्तीची सवलत 15 टक्यांऐवजी 10 टक्के इतकी केल्यास पालिकेच्या मिळकतकरात मोठी भर पडेल असे प्रशासनाकडून ठेवण्यात आलेल्या प्रस्ताव म्हटले होते. मात्र या प्रस्तावाला मान्यता मिळाली असता त्याचा थेट परिणाम 5 लाख मिळकतीत होणार असल्यामुळे हे प्रस्ताव कोणतीही चर्चा करता रद्द करण्याचा निर्णय विधी समितीने घेतला आहे. त्यामुळे पुणेकरांना काहीसा दिलासा मिळणार आहे.
20 Jun 2017

ह.भ.प, मंगला फुके यांनी माऊली पुरस्कार प्रदान

एमपीसी न्यूज - विचार, विवेक, वैराग्य आणि वैभव या चार गोष्टींचा संगम म्हणजे वारी. रथी महारथी होण्यापेक्षा सारथी होऊन तत्वज्ञान सांगता येते हे भगवान श्रीकृष्णाने दाखवून दिले. वारकरी संप्रदाय देखील सारथी होण्याचे काम करतो. त्यामुळे आजच्या युगात समाजाला योग्य दिशा दाखविणारा वारकरी संप्रदाय आपल्यासाठी सारथीचीच भूमिका निभावत आहे, असे प्रतिपादन माजी आमदार उल्हास पवार यांनी केले.

अनुबंध सेवा प्रतिष्ठान ट्रस्ट आणि अभिषेक साप्ते स्मृती फाऊंडेशनतर्फे शंकरराव साप्ते यांच्या स्मरणार्थ माऊली पुरस्कार सोहळ्याचे आयोजन करण्यात आले होते. ह. भ. प. मंगला फुके यांना माऊली पुरस्कार प्रदान करण्यात आला. यावेळी माजी उपमहापौर दीपक मानकर, अशोक कोकाटे, चंद्रकांत सणस, माजी नगरसेवक दत्ता सागरे, अशोक जाधव, दिपक साप्ते, पंडितराव रोकडे उपस्थित होते. सन्मानचिन्ह, शाल, श्रीफळ, पुष्पगुच्छ असे पुरस्कारचे स्वरुप होते.

दीपक मानकर म्हणाले,  वारीमधून आचार-विचारांची शिकवण मिळते. वारी करणे म्हणजे परमेश्वराची सेवा आहे. परमेश्वराची सेवा करताना ऊन, वारा, पाऊस, तहान, भूक लागत नाही. त्यामुळे वारीमध्ये एक वेगळ्या प्रकारचे वातावरण तयार झालेले असते. यामध्ये सामील झालेल्या वारक-यांमध्ये भगवंत स्वत: ऊर्जा निर्माण करून देतो.

अशोक जाधव म्हणाले, वारकरी संप्रदायामध्ये अखंडित वारी आणि मनोभावे विठ्ठलाची सेवा करणाºया वारकºयाचा सन्मान संस्थेतर्फे करण्यात येतो. ह.भ.प. मंगला फुके या अतिशय समर्थपणे ५०० लोकांची दिंडी चालवत आहे. अनेक वर्षे वारकरी संप्रदायाची परंपरा त्या पार पाडत आहेत, त्यामुळे त्यांचा सन्मान करण्यात आला आहे. दिपक काळे यांनी सूत्रसंचालन केले. अथर्व जाधव यांनी आभार मानले.
20 Jun 2017

दिंडीच्या माध्यमातून स्वछतेचा संदेश

एमपीसी : स्वछ भारत अभियान अंतर्गत राज्य शासनाच्या वतीने  स्वच्छता दिंडी आणि ग्रामसभा दिंडीची सुरवात करण्यात अली असून या दिंडीचा शुभारंभ राज्याचे  पाणी पुरवठा आणि स्वच्छता मंत्री बबनराव लोणीकर यांच्या हस्ते करण्यात आला.

संत ज्ञानेश्‍वर महाराज आणि संत तुकाराम महाराज यांच्या पालखी सोहळयात राज्याच्या कानाकोपयातून भाविक सहभागी झाला आहेत. या वारीच्या माध्यमातून जनगागृती करण्याच्या दृष्टिकोनातून राज्य सरकारने स्वच्छता दिंडी आणि ग्रामसभा दिंडीची सुरवात केली आहे. या दिंडीच्या माध्यमातून वारकर्यांना तसेच वारीच्या वाटेतील गावातील गावकर्यांना स्वचतेचा संदेश देण्यात येणार आहे. या दिंडीचा शुभारंभ बबनराव लोणकर यांच्या हस्ते करण्यात आला यावेळी विभागीय आयुक्त चंद्रकांत दळवी,खासदार अनिल शिरोळे,अतिरिक्त जिल्हाधिकारी रमेश काळे आणि वारकरी भाविक या प्रसंगी उपस्थित होते.

यानंतर आयोजित पत्रकार पत्रकार परिषदे मध्ये लोणीकर म्हणाले राज्य सरकारच्या माध्यमातून स्वच्छता आणि नागरिकांच्या आरोग्याच्या दृष्टीने शौचालय बांधण्यात येत आहे.महाराष्ट्र राज्य हे मार्च 2018 अखेर हगणदारी मुक्त होणार आहे. मात्र अजून काही घरामध्ये शौचालय बांधण्याबाबत नागरिकांमध्ये मानसिकता बदलण्याची गरज असल्याचे त्यांनी सांगितले. राज्यात मार्च 2018 अखेर 11 जिल्हे,150 तालुके आणि 16 हजार 706 ग्रामपंचायती हगणदारी मुक्त झालेल्या आहेत.तर 2018 मार्च अखेर 23 जिल्हे मुक्त होतील असा विश्वास त्यांनी व्यक्त केला.तसेच  इतक्या प्रयत्नानं नंतर ,अजून ही काही घरामध्ये शौचालय नाही.अशी खंत त्यांनी व्यक्त केली. त्याचबरोबर हे लक्षात घेता प्राशासना मार्फत  अजून मोठ्या प्रमाणात प्रबोधन करणार असल्याचे सांगितले.
20 Jun 2017


एमपीसी न्यूज- पुण्यातील दोन दिवसांचा  मुक्कामक आटपून पुंडलिक वरदा हरी विठ्ठल, श्री ज्ञानदेव तुकाराम' हा जयघोषत विठ्ठल भक्तांची वारी पंढरपूरच्या दिशेने निघाली आहे. गेले दोन दिवस अभंग आणि भजनांच्या गजराने संपूर्ण पुणे नगरी भक्तीरसात न्हाऊन निघाली होती.

संत तुकाराम महाराज आणि संत ज्ञानेश्वर महाराजांच्या पालख्यांनी काल पुण्यात मुक्काम केल्यानंतर आज या पालख्या पंढरीच्या दिशेने ६ वाजता मार्गस्थ झाली   तुकाराम महाराजांची पालखीच पुढील मुक्काम लोणी काळभोर श्री विठ्ठल मंदिर येथे तर ज्ञानेश्वरांची पालखी सासवड येथे मुक्काम करणार आहे.

काल ज्ञानेश्वर-तुकाराम महाराजांच्या पालख्यांनी पुण्यात मुक्काम केल्याने पुण्यात उत्साहाचे वातावरण होते. पुणेकरांनी पालख्यांचे दर्शन घेतले. काल पुण्यात पाऊस नसल्याने अनेक नागरिकांनी पालख्या पाहण्यासाठी गर्दी केली. ज्ञानोबा-तुकारामांच्या जयघोषाने काल पुणे अगदी वारीमय होऊन गेले होते.

राज्यातून अनेक वारकरी या पालखी सोहळ्यात सहभागी होतात. वारकऱ्यांच्या चेहऱ्यावर उत्साह, आनंद दिसत होता. 'ग्यानबा तुकाराम', 'जय हरी विठ्ठल' च्या जयघोषात असंख्य भाविक उत्साहाने वारीत सहभागी झाले आहेत. आषाढी वारीचा आनंद पुणेकरांनी अनुभवला.

20 Jun 2017

दोन्ही पालख्यांसोबत सुसज्ज रुग्णवाहिका, डॉक्टर्स आणि टँकरची विनामूल्य सुविधा

एमपीसी न्यूज - संतश्रेष्ठ ज्ञानेश्वर महाराज आणि जगद्गुरु तुकाराम महाराजांच्या पालखी सोहळ्यासोबत वारक-यांच्या सेवेकरीता चार सुसज्ज रुग्णवाहिका आणि तीन टँकर पुण्यातून रवाना झाले. जय गणेश रुग्णसेवा अभियानांतर्गत या उपक्रमाची सुरुवात झाली असून यंदा ट्रस्टच्या 125 व्या वर्षानिमित्त मोठया प्रमाणात डॉक्टर्स, औषधे व आरोग्यविषयक सेवा पालखी सोहळा समारोपापर्यंत विनामूल्य पुरविण्यात येणार आहे.

श्रीमंत दगडूशेठ हलवाई गणपती ट्रस्ट, सुवर्णयुग तरुण मंडळातर्फे गणपती मंदिरासमोर रुग्णवाहिकेचे पूजन करुन या उपक्रमाचा शुभारंभ झाला. यावेळी ट्रस्टचे उपाध्यक्ष डॉ.बाळासाहेब परांजपे, उपाध्यक्ष सुनील रासने, बाळासाहेब सातपुते, ज्ञानेश्वर रासने, विश्वास पलुसकर, विजय चव्हाण, बाळासाहेब रायकर यांसह पदाधिकारी उपस्थित होते. उपक्रमाचे यंदा 31 वे वर्ष आहे. रुग्णसेवेकरीता रुग्णवाहिकेसोबत डॉ.स्वाती टिकेकर, डॉ.सुरेश जैन, डॉ.बबन राऊत, डॉ.प्रविण भोई, डॉ.शांताराम पोतदार, डॉ.दिलीप सातव, डॉ.पीयुष पुरोहित यांची टिम पुण्यातून रवाना झाली आहे.

सुनील रासने म्हणाले, सासवड मार्गे जाणा-या संत ज्ञानेश्वर महाराजांच्या पालखीसोहळ्यासोबत आणि लोणीमार्गे जाणा-या संत तुकाराम महाराजांच्या पालखीसोहळ्यासोबत या रुग्णवाहिका व टँकर असणार आहेत. कित्येक किलोमीटरचा पायी प्रवास करणा-या वारक-यांच्या आरोग्याची काळजी घेत, आवश्यक आरोग्यविषयक सेवा त्वरीत मिळाव्यात, याकरीता या उपक्रमाचे आयोजन दरवर्षी केले जाते.
20 Jun 2017

2 कोटी 21 लाखांचा खर्च

एमपीसी न्यूज - पिंपरी-चिंचवड महापालिकेच्या माध्यमिक शाळांमधील विद्यार्थ्यांना महापालिकेतर्फे शालेय गणवेश देण्यात येणार आहे. एक गणवेश 1, 332 रुपयांचा असून गणवेशासाठी 2 कोटी 21 लाख रुपये खर्चाची तयारी महापालिकेने केली आहे.

महापालिका शिक्षण मंडळांतर्गत 136 प्राथमिक शाळा, तर माध्यमिक शिक्षण विभागांतर्गत 18 माध्यमिक शाळा आहेत. शिक्षण मंडळांतर्गत बालवाडी, प्राथमिक शाळा आणि पहिली ते सातवीच्या वर्गातील विद्यार्थी येतात. तर, माध्यमिक शाळांमध्ये आठवी ते दहावीचे विद्यार्थी येतात. या सर्व विद्यार्थ्यांना महापालिकेतर्फे शालेय गणवेशाचे वाटप करण्यात येते.

सन 2017- 18 या चालू शैक्षणिक वर्षामध्ये माध्यमिक शाळेतील विद्यार्थ्यांना महापालिकेतर्फे गणवेश देण्यात येणार आहे. महापालिकेच्या अठरा माध्यमिक विद्यालयांमध्ये आठवी ते दहावीच्या वर्गामध्ये 8302 विद्यार्थी शिकत आहेत. ही विद्यार्थी संख्या एप्रिल 2017 नुसार अंदाजित आहे. त्यांना देण्यात येणा-या प्रति विद्यार्थी दोन गणवेशासाठी ई - निविदा मागविण्यात आली होती.

त्यावर प्राप्त झालेल्या एकूण निविदापैकी वाकड येथील मेसर्स महालक्ष्मी ड्रेसेस अ‍ॅन्ड टेलरींग फर्मची निविदा सर्वात कमी दराची होती. या फर्मतर्फे प्रत्येक गणवेशासाठी 1332 रुपये याप्रमाणे दर आकारणी करण्यात आली आहे. त्यामुळे महापालिकेतर्फे 'महालक्ष्मी' फर्मशीच करारनामा करण्यात आला आहे. 8302 विद्यार्थ्यांना प्रत्येकी दोन गणवेश देण्यात येणार असून यावर 2 कोटी 21 लाख 6 हजार 174 रुपयांचा खर्च होणार आहे.

Page 9 of 184
Open Chat
1
Close chat
Hello! Thanks for visiting us. Please press Start button to chat with our support :)

Start