• Bhausaheb_Bhoir.jpg
  • DPU1250x200.jpg
  • Mahesh_Landge.jpg
  • mpc.jpg
  • MPC_news.JPG
  • Nitin_Kalje.jpg
  • PCCO.jpg
  • Sunil_Shelke.jpg
23 Jul 2017

गायिका पद्मश्री पद्मजा फेणाणी-जोगळेकर यांच्या सुमधूर गायकीने रसिक मंत्रमुग्ध

श्रीमंत दगडूशेठ हलवाई सार्वजनिक गणपती सार्वजनिक गणपती ट्रस्ट शतकोत्तर महोत्सव

एमपीसी न्यूज - हे श्याम सुंदरा राजसा मनमोहना... सुहास्य तुझे मनास मोही... मी मज हरपून बसले गं... केव्हा तरी पहाटे... बहरलेल्या सावल्या अन् अवस आली मोहरा... अशा इंदिरा संत, ग्रेस, शंकर रामाणी, सुरेश भट यांच्या रचनांच्या सादरीकरणाने रसिक तृप्त झाले. प्रख्यात गायिका पद्मश्री पद्मजा फेणाणी-जोगळेकर यांनी काही परिचित असलेल्या तर, काही नवीन रचनांचा सुरेल वर्षाव रसिकांवर केला. मंगलदीपमधून मंगल स्वरांनी गायिका पद्मजा फेणाणी यांनी प्रसिद्ध कवींच्या अनेक रचना आपल्या सुमधूर गायकीने रसिकांसमोर खुलविल्या.

श्रीमंत दगडूशेठ हलवाई सार्वजनिक गणपती ट्रस्ट, सुवर्णयूग तरुण मंडळ तर्फे ट्रस्टच्या शतकोत्तर रौप्यमहोत्सवी (125) वर्षानिमित्त गणेश कला क्रीडा मंच येथे सांस्कृतिक महोत्सव आयोजित करण्यात आला आहे. यामध्ये मंगलदीप कार्यक्रम आयोजित करण्यात आला होता.

कार्यक्रमाची सुरुवात ओम नमोजी आद्या...मंगलचरणा गजानना... या गणेश वंदनेने झाली. यानंतर दीप अमावस्येनिमित्त कवीवर्य शंकर रामाणी यांची रचना असलेले दिवे लागले रे दिवे लागले... या गीताच्या सादरीकरणाने रसिकांवर मोहिनी घातली. शंकर रामाणी यांनी रचलेल्या माझिया दारात चिमण्या आल्या... या गीताला रसिकांनी विशेष दाद दिली. कवीयित्री इंदिरा संत यांची रचना असलेले भिंती रंगल्या स्वप्नांनी, झाल्या गजांच्या कर्दळी... या गीताने रसिकांच्या मनाचा ठाव घेतला. कवी ग्रेस यांनी रचना असलेले पाऊस कधीचा पडतो... या गीताने रसिक मंत्रमुग्ध झाले.

राजू जावळकर, समीर शिवगार (तबला), मनोज देसाई (हार्मोनिअम), मंदार पारखी (सिंथेसायझर), नागेश भोसेकर (रिदम मशीन) यांनी साथसंगत केली. तसेच गौरी साबळे, देवयानी गौड, मैथिली मुंगी, सोनाली बोरकर यांनी सहगायन केले.

23 Jul 2017

एमपीसी न्यूज - भारतीय जनतेत स्वराज्याची व राष्ट्रवादाची जाणीव निर्माण करणारे तसेच स्वराज्य मिळवण्याची सिंहगर्जना करून समाजाला प्रेरित करणारे लोकमान्य टिळक यांची जयंती पिंपरी-चिंचवड महानगरपालिकेच्या वतीने साजरी करण्यात आली. निगडी येथील लोकमान्य टिळकांच्या पुतळ्यास उपमहापौर शैलजा मोरे यांच्या हस्ते पुष्पहार अर्पण करून अभिवादन करण्यात आले.

यावेळी सहाय्यक आयुक्त आशादेवी दुरगुडे, आण्णा बोदडे, सहाय्यक आरोग्य अधिकारी एम.एम. शिंदे, सहाय्यक उद्यान निरीक्षक अनिल हरीचंद्रे, जोपा पवार, विशाल खोंड, माहिती व जनसंपर्क विभागाचे रमेश भोसले आदी उपस्थित होते.

23 Jul 2017

एमपीसी न्यूज - भोसरीतील एका सफाई कर्मचाऱ्याचा नाला साफ-सफाई करताना मृत्यू झाला होता. या कर्मचाऱ्याला मदतीसाठी महाराष्ट्र राज्य सफाई कर्मचारी आयोगाने संबंधित कर्मचारी दुसऱ्या जातीचा असल्याचे सांगत मदतीसाठी नकार दिल्याचा आरोप पिंपरी-चिंचवड महापालिकेचे आरोग्य विभाग तक्रार निवारण समितीचे उपाध्यक्ष अॅड. सागर चरण यांनी केला आहे. त्यामुळे अॅड. चरण यांनी सफाई कर्मचारी आयोगाची पंतप्रधान कार्यालयाच्या संकेतस्थळावर लेखी तक्रार केली आहे.

पिंपरी-चिंचवड महापालिकेच्या ई क्षेत्रीय कार्यालयातील कंत्राटी सफाई कर्मचारी बाळू भगवान सोनवणे यांचा नाला सफाई करताना विजेचा धक्का लागून 30 जून रोजी मृत्यू झाला. या कर्मचाऱ्याच्या कुटूंबाला महापालिकेकडून नुकसान भरपाई मिळवून देण्यासाठी महाराष्ट्र राज्य सफाई कर्मचारी आयोगाचे अध्यक्ष रामू पवार यांच्याकडे अॅड. सागर चरण यांनी मागणी केली होती. परंतु, पवार यांनी सोनवणे हे कर्मचारी दुसऱ्या जातीचे आहेत. त्यांना मदत करता येणार नाही, असा आरोप  अॅड. सागर चरण यांनी  दिलेल्या निवेदनात केला आहे. त्यामुळे सफाई कर्मचारी आयोग फक्त एका जातीपुरता मर्यादीत नसून सफाई कर्मचा-यांना न्याय मिळवून देण्यासाठी असला पाहिजे, असे अॅड. चरण यांनी व्यक्त केले आहे.

तसेच राज्य सफाई कर्मचारी आयोगाचे अध्यक्ष रामू पवार यांची भूमिका योग्य नसल्याचे सांगत अॅड. चरण यांनी आयोगाचीच पंतप्रधान कार्यालयाच्या संकेतस्थळावर लेखी तक्रार केली आहे. तक्रार क्रमांक पि.एम.ओ.पि.जी/ए/2017/0389721 असा आहे. या तक्रारीची दखल पंतप्रधान कार्यालयाने घेतली आहे. त्यानुसार राज्य सरकारच्या संबंधित विभागाला चौकशीचे आदेश दिले आहेत.

दरम्यान, सर्वोच्च न्यायालयाने 27 मार्च 2014 रोजी दिलेल्या आदेशानुसार साफ-सफाई काम करताना मृत्यू झालेल्या संबंधित कर्मचा-यांच्या कुटूंबाला 10 लाख रुपये मदत देण्याचे बंधनकारक असल्याचेही अॅड.चरण यांनी सांगितले.

23 Jul 2017

गुणवंत विद्यार्थी कौतुक सोहळा उत्साहात

एमपीसी न्यूज - तीर्थक्षेत्र आळंदीतील ज्ञानेश्वर शिक्षण संस्थेच्या माध्यमातून यापूर्वी प्रमाणेच पुढे देखील संस्कारक्षम गुणवंत विद्यार्थी घडावेत, असे मत पिंपरी-चिंचवडचे महापौर नितीन काळजे यांनी केले.

आळंदी येथील ज्ञानेश्वर शिक्षण संस्थेच्या वतीने आयोजित गुणवंत विद्यार्थी सत्कार समारंभात प्रमुख मार्गदर्शक म्हणून महापौर काळजे बोलत होते. अध्यक्षस्थानी ह.भ.प.सतीश महाराज काळजे होते. याप्रसंगी आळंदीच्या नगराध्यक्षा वैजयंता उमरगेकर, वडगावचे सरपंच रमेश काकडे, संस्थेचे अध्यक्ष सुरेश वडगावकर, सचिव अजित वडगावकर, विश्वस्त एल.जी.घुंडरे, प्रकाश काळे, प्राचार्य गोविंद यादव आदी उपस्थित होते.

महापौर काळजे म्हणाले,आळंदीत गुणवंत विद्यार्थी घडविण्याचे संस्थेचे कार्य कौतुकास्पद आहे. या पुढील काळातही हे कार्य सुरू राहील. मुलांनी आई, वडील, गुरुजन यांचा आदर करावा त्यांना विसरू नये. आई वडिलांची सेवा करावी. प्रत्येकाने समाजाचे उत्तरदायित्व स्वीकारून सतत कार्यरत राहावे. शालेय मुले भारताचे भावी नागरिक असल्याने मुलांनी संस्कारक्षम होण्यासाठी प्रामाणिकपणे प्रयत्न करावा, असे आवाहन केले.

यावेळी नगराध्यक्षा उमरगेकर म्हणाल्या की, शालेय शिक्षणातील अडचणी दूर केल्या जातील. तसेच संस्थेला आवश्यक ते सहकार्य केले जाईल. संस्थेस यापूर्वी प्रमाणेच या पुढील काळात देखील नगरपरिषदेच्या वतीने सर्वतोपरी मदत केली जाईल, अशी ग्वाही दिली.

यावेळी संस्थेचे सचिव अजित वडगावकर यांनी संस्थेच्या कार्याचा आढावा घेत ज्ञानेश्वर विद्यालयातील प्रत्येक वर्ग खोलीत डिजिटल वर्ग उपक्रमाचा संकल्प करण्यात आला आहे. सर्व शाळा डिजिटल आणि आय.एस.ओ.दर्जा प्राप्त करण्यात येणार आहे. यासाठी शालेय मुलांचे पालक, नागरी आणि दानशूर व्यक्ती संस्था तसेच उद्योजकांनी प्रशालेस सहकार्य करावे, असे आवाहन सचिव अजित वडगावकर यांनी केले आहे.  

याप्रसंगी सतीश महाराज काळजे, विश्वस्त प्रकाश काळे आदींनी मनोगते व्यक्त केली. शालेय उपक्रमास सहकार्य केलेल्या दानशूर व्यक्ती संस्था तसेच गुणवंत विद्यार्थी यांचा सत्कार उपस्थित मान्यवरांचे हस्ते करण्यात आला. पसायदानाने कार्यक्रमाची सांगता झाली.

23 Jul 2017

एमपीसी न्यूज - शिव आरोग्य योजने अंतर्गत पुणे जिल्ह्यातील मोठ्या लोकसंख्येच्या तसेच औद्योगिक क्षेत्रात रुग्णवाहिका शासनाने उपलब्ध करून देण्याची मागणी पुणे जिल्हा शिवसेनेच्या वतीने जिल्हा प्रमुख राम गावडे यांनी केली आहे.

या मागणीसाठी आरोग्यमंत्री दीपक सावंत यांना पुणे जिल्हा शिवसेनेच्या वतीने  निवेदन दिले आहे. पुणे ग्रामीण भागात अजूनही आरोग्य सेवेसाठी रुग्णांच्या नातेवाईकांना धावपळ करावी लागते.लोकसंख्येचा विचार करुवून मोठ्या शहरात तसेच औद्योगिक क्षेत्रात कायम स्वरूपी आरोग्य सेवा तत्पर सेवा मिळावी यासाठी आरोग्य मंत्री सावंत यांचे समवेत सकारात्मक चर्चा झाली असल्याचे गावडे यांनी सांगितले.

रुग्णवाहिका राजगुरूनगर,आळंदी,चाकण,मंचर,जुन्नर,शिक्रापूर,उरुळी कांचन,शिरूर,नारायणगाव तसेच लांडेवाडी आदी परिसरासाठी या रुग्णवाहिका मिळाव्यात अशी मागणी करण्यात आल्याचे त्यांनी सांगितले. 

23 Jul 2017
 
 
एमपीसी न्यूज - पिंपरी-चिंचवड महानगरपालिकेच्या कायदा विभागातील वरिष्ठ लिपिक वाल्मिक पांडुरंग लडकत (वय 58) यांचे शनिवारी रात्री आकस्मिक निधन झाले.
 
त्यांच्या मागे पत्नी, दोन मुलगे व सून असा परिवार आहे. प्राधिकरणातील निवासस्थानी त्यांचे पार्थिव सकाळी अंत्यदर्शनासाठी ठेवण्यात आले होते.
 
अंत्यविधी त्यांच्या मूळगावी शेरीची वाडी (ता.बारामती) येथे आज सकाळी करण्यात आला.
22 Jul 2017

एमपीसी न्यूज - फुगेवाडी परिसराचा दाट लोकवस्तीमध्ये समावेश करण्यासाठी शासन दरबारी निर्णय व्हावा. यासाठी लोकप्रतिनिधी म्हणून शासनाकडे पाठपुरावा करण्यात यावा, अशी मागणी फुगेवाडीतील सामाजिक कार्यकर्ते मनोज वाखारे यांनी आमदार गौतम चाबुकस्वार यांच्याकडे केली आहे.

यासंदर्भात दिलेल्या निवेदनात म्हटले आहे की, फुगेवाडीचा महापालिकेत समावेश असतानाही गावाचा विकास झाला नाही. मेट्रो प्रकल्प, रेल्वेमुळे फुगेवाडीचे क्षेत्रफळ कमी होत आहे. फुगेवाडीचा दाट लोकवस्तीमध्ये समावेश करण्यासाठी शासन दरबारी पाठपुरावा करून विकास करावा.  फुगेवाडी हा परिसर रेल्वे, पीएमटी, रिक्षा आणि इतर खाजगी वाहतूक सेवांनी जोडला असल्याने या परिसरात लोकांची राहण्यासाठी तसेच कार्यालयासाठी पसंती वाढत आहे. रेल्वे आणि इतर प्रकल्पांमुळे फुगेवाडीचा परिसर कमी होत असला तरी या परिसरात राहण्यासाठी लोकांच्या आकर्षणावर त्याचा काहीही परिणाम झालेला नाही.

दाट लोकवस्ती असूनही या भागात पाहिजे तेवढ्या सोयी-सुविधा नसल्याने नागरिकांना नाहक त्रास सहन करावा लागतो. जर दाट लोकवस्तीमध्ये या गावाचा समावेश झाला तर सुविधांमध्ये वाढ होईल आणि पर्यायाने या क्षेत्राचा विकास होईल, असे सामाजिक कार्यकर्ते मनोज वाखारे यांनी सांगितले.

Ajit

Advt

22 Jul 2017

'दहावीच्या गुणांच्या फुगवट्याचे दुष्परिणाम' विषयावरील चर्चासत्रात तज्ज्ञांचा सूर

एमपीसी न्यूज - केवळ गुणांवर आधारित आणि पुस्तकी शिक्षणपद्धतीने विद्यार्थ्यांची बौद्धिक पातळी मोजली जात आहे. गुणांच्या फुगवट्याने विद्यार्थ्यांचे सर्वंकष मूल्यमापन होत नाही. त्यामुळे दहावीत शंभर टक्के गुण मिळवलेल्या विद्यार्थ्यालाही महाविद्यालयीन स्तरावर नापास होण्याची वेळ येते. शिवाय, नोकरीच्या ठिकाणी त्याला असंख्य अडचणींना सामोरे जावे लागते. त्यामुळे विद्यार्थ्यांचा सर्वांगीण विकास हाच केंद्रस्थानी असला पाहिजे, असा सूर तज्ज्ञांनी चर्चासत्रात काढला.

डीपर, सर फाऊंडेशन व तुम्ही-आम्ही पालक मासिकाच्या वर्धापदिनानिमित्त डीपर व सर फाऊंडेशनतर्फे आयोजित 'दहावीच्या गुणांच्या फुगवट्याचे दुष्परिणाम, निर्माण झालेल्या समस्या आणि त्यावरील उपाय' या विषयावरील चर्चासत्रात लातूर पॅटर्नचे जनक प्राचार्य अनिरुद्ध जाधव, ज्येष्ठ करिअर समुपदेशक डॉ. श्रीराम गीत, प्रा. प्रकाश मूळबागल, शिक्षणमंत्र्यांच्या विशेष कार्य अधिकारी प्राची साठे, जडणघडण मासिकाचे संपादक डॉ. सागर देशपांडे, लेखक व पालक समुपदेशक मनोज अंबिके, सिस्कॉमचे अध्यक्ष राजेंद्र धारणकर सहभागी झाले होते. सर फाऊंडेशनचे अध्यक्ष हरीश बुटले यांनी चर्चासत्राचे सूत्रसंचालन केले.

प्राचार्य अनिरुद्ध जाधव म्हणाले की, गुणांच्या फुगवट्याचा दोष आपल्या सर्वांचा आहे. आठवीपर्यंत सरसकट विद्यार्थ्याला उत्तीर्ण करण्यामुळे त्याचे सर्वंकष मूल्यमापन होत नाही. शिक्षक विद्यार्थ्यांत उदासीनता आहे. त्यामुळे शिक्षणव्यवस्था कोचिंग क्लासेसच्या दारात नेऊन ठेवली आहे. विविध कलागुणांचे अतिरिक्त गुण त्याच विद्यार्थ्यांना महाविद्यालयात प्रवेश घेताना राखीव जागा यामुळे विद्यार्थ्यांमध्ये विषमता निर्माण होऊ शकते. पुस्तकी आणि पाठांतरावर आधारित शिक्षणपद्धती रूढ असल्याने विद्यार्थी आणि पालकांचा दृष्टिकोन संकुचित बनतो आहे.

डॉ. श्रीराम गीत म्हणाले की, गुणांची खैरात वाटल्याने सुशिक्षित बेरोजगारांची संख्या वाढणार आहे. कारण गुण भरपूर असतील, मात्र, त्यांच्याकडे कौशल्य नसेल, तर करिअर होणे अवघड बनते. पालकांच्या चुकीच्या कल्पना विद्यार्थ्याला अशा गोष्टींकडे नेतात. आपल्या पाल्यातील क्षमता ओळखून त्याच्या आवडीनुसार शिकण्याचे स्वातंत्र्य त्याला द्यावे. ठराविक शाखेलाच भरपूर संधी आहेत परदेशी शिकणे खूप चांगले; त्यातून मोठे पॅकेज मिळते, अशा चुकीच्या भ्रमातून पालकांनी बाहेर पडून विचार केला पाहिजे.

प्राची साठे म्हणाल्या की, विद्यार्थ्यांचा सर्वांगीण विकास कसा होईल व त्यांना शिकण्यासाठी प्रोत्साहन मिळेल, अशा दृष्टीने सरकारपातळीवर प्रयत्न सुरू आहेत. अतिरिक्त गुण देणे म्हणजे त्यांच्यातील कलागुणांचा सन्मान करणे आहे. कृतिपत्रिका, पाठ्यपुस्तकातील बदल यातून चांगला आणि कौशल्यपूर्ण युवक घडेल. हे गुण देताना जिल्हा, राज्य आणि राष्ट्रीय पातळीवरील त्याने केलेल्या कामगिरीचा विचार केला जात आहे. त्यातून सामाजिक, सांस्कृतिक आणि क्रीडा क्षेत्राचाही विकास होणे शक्य आहे.

प्रा. प्रकाश मूळबागल म्हणाले की, पुस्तकातीलच प्रश्न परीक्षेतही विचारण्याच्या धोरणामुळे पाठांतर प्रथा आली. कोचिंग क्लासेसकडून ठराविक गोष्टी करून घेतल्याने गुणांपुरताच अभ्यास करायचा अशी धारणा विद्यार्थ्यांमध्ये झाली आहे. विषय समजून घेऊन त्याविषयी स्वतःची मते ठरवता येणे अधिक गरजेचे आहे. विद्यार्थ्यांची आकलन क्षमता वाढविण्यासाठी शिक्षकांनी आपली भूमिका चोख बजावायला हवी. 'काय' करतोय यापेक्षा 'का' करतोय या प्रश्नाचे उत्तर विद्यार्थी आणि पालकांनी शोधावे.

मनोज अंबिके म्हणाले की, मागणी तशा प्रकाराची असल्याने शिक्षणाचा पुरवठाही तसाच होतो. गुणांच्या आधारावर मूल्यमापन होत असल्याने शिक्षण देणा-यांनीही त्यावरच भर दिला. मुलांमधील कलागुणांना अधिक वाव दिला, तर त्यांचा सर्वांगीण विकास होऊ शकतो. त्यासाठी हसत-खेळत शिक्षण दिले पाहिजे. प्रकल्पाधारित शिक्षणपद्धती असायला हवी. हे सगळे व्हायचे असेल, तर प्राथमिक आणि पूर्वप्राथमिक शाळा आणि शिक्षक सक्षम बनविले पाहिजेत. शिक्षक व पालक यांना तसे प्रशिक्षण दिले पाहिजे.

डॉ. सागर देशपांडे म्हणाले की, पुस्तकी शिक्षणापेक्षा जीवनशिक्षण देण्यावर आपला भर असला पाहिजे. त्यासाठी प्राथमिक शिक्षणात सुधारणा व्हायला हव्यात. हक्काचे शिक्षण मिळण्याबरोबरच योग्य शिक्षण मिळणेही तितकेच महत्वाचे आहे. बेस्ट फाईव्ह अथवा लिस्ट फाईव्ह यापेक्षा नेक्स्ट फाईव्हचा विचार आपण केला पाहिजे. शिक्षण हे देश व समाज बदलण्याचे माध्यम आहे. त्यामुळे केवळ गुणांच्या बाबतीत 'अच्छे दिन' येऊन चालणार नाही, तर त्यासाठी विद्यार्थी केंद्रस्थानी ठेवून सर्वांगीण विकासाच्या दृष्टीने धोरण आखले पाहिजे.

राजेंद्र धारांकर म्हणाले की, गुणपत्रिकेत भरपूर गुण दिसतात. त्यामुळे मोठ्या महाविद्यालयांत आणि क्षमतेपेक्षा अधिक जड विषयाला आपण प्रवेश घेतो. त्यामुळे आपल्याला अनेकदा तो अभ्यासक्रम झेपत नाही. पदवी मिळते मात्र, नोकरी करण्याची पात्रता आपल्यात येत नाही. परिणामी बेरोजगारांची संख्या वाढते. त्यातून गुन्हेगारी, वाईट प्रवृत्ती पुढे येतात. त्यामुळे कौशल्याधारित शिक्षण द्यायला हवे. हरीश बुटले यांनी चर्चासत्राचे सूत्र सांभाळली. संजय शाह यांनी आभार मानले.

Ajit

Advt

22 Jul 2017

एमपीसी न्यूज -  चिखली येथील श्री छत्रपती शिवाजी महाराज नागरी सहकारी पतसंस्था  या 15 वर्ष सतत 'अ' वर्ग कायम राखलेल्या पतसंस्थेची 15 वी वार्षिक सर्व साधारण सभा झाली.

या निमित्ताने पतसंस्थेच्या सर्व संचालकांच्या हस्ते सामाजिक आणि पर्यावरणाची जाणिव ठेवून चिखलीतील नागेश्वर विद्यालयात वृक्षारोपण केले गेले. 50 झाडे लावले. तसेच चिखलीतील 75 ज्येष्ठ नागरिकांचा सत्कार यावेळी करण्यात आला. सभासदांचे हित जपणारी आणि भविष्याच्या दिशेने योग्य वाटचाल करणारी संस्था, असे  मत प्रशिक्षक विजय लिंबळे यांनी व्यक्त केले.

या पतसंस्थेचे संस्थापक मार्गदर्शक दत्तात्रय मोरे पाटील  आहेत. यावर्षी संस्थेचा लाभांश 10% जाहीर करण्यात आला आहे. संस्थेचे चेअरमन विठ्ठल मोरे यांनी आभार मानले.

22 Jul 2017

एमपीसी न्यूज - संत शिरोमणी सावतामाळी महाराज पुण्यतिथीनिमित्त बुधवार पेठमधील सावतामाळी भवनमध्ये महात्मा फुले मंडळाच्या वतीने विविध धार्मिक कार्यक्रमांचे आयोजन करण्यात आले होते.

कार्यक्रमास माजी आमदार कमल ढोलेपाटील, महात्मा फुले मंडळाचे अध्यक्ष मधुकर राऊत, उपाध्यक्ष हनुमंत टिळेकर, सचिव कैलास काठे, सहसचिव कमलाकर डोके, दिलीप भुजबळ, बाबुराव धायरकर, दिगंबर आलाट, चांगदेव पिंगळे, सुधाकर आरु, दीपक जगताप, गिरीष झगडे, पांडुरंग गाडेकर, भगवानराव डोके आदी उपस्थित होते.

मुक्ताई भजनी मंडळाच्या अध्यक्षा शैलजा सोनटक्के, मालती आगरकर, शमा लडकत, रेखा बावळे यांनी 'कांदा मुळा भाजी अवघी विठाई माझी' आणि 'आमची माळियाची जात शेत लावू बागायती' हे संत शिरोमणी सावता माळी यांचे अभंग सादर केले. भैरोबानाला येथील श्री काळभैरवनाथ मंदिरमध्ये वानवडी देवस्थान एकीकरण ट्रस्टच्या वतीने 'संत सावतामाळी यांचे विचार' या विषयावर प्रवचनकार ह. भ. प. पुरुषोत्तम दादा पाटील यांचे प्रवचन झाले.

22 Jul 2017
एमपीसी न्यूज - माजी उपमुख्यमंत्री तथा विधिमंडळ गटनेते अजित पवार यांच्या वाढदिवसानिमित्त पिंपळे सौदागर येथे वृक्षारोपण करण्यात आले. 
पिंपळे सौदागर परिसरातील विविध ठिकाणी राष्ट्रवादीचे नगरसेवक विठ्ठल काटे, नगरसेविका शीतल काटे यांच्या हस्ते कडूनिंब, पिंपळ, वड असे बहुपयोगी वृक्ष लावण्यात आले. यावेळी सामाजिक कार्यकर्ते अविनाश गायकवाड, प्रशांत पवार, विविध सोसायट्यांचे चेअरमन व नागरिक उपस्थित होते. 
पर्यावरणाचा समतोल राखण्यासाठी प्रत्येकाने वृक्षारोपण करायला हवे. शुद्ध हवा, मुबलक पाणी मिळविण्यासाठी तसेच जमिनीची धूप होऊ नये यासाठी झाडांची मोठी मदत होते. तसेच प्रत्येक झाडाचा औषधी उपयोग आहे. म्हणून बहुपयोगी झाडांची लागवड करायला हवी, असे विठ्ठल काटे म्हणाले.
22 Jul 2017

एमपीसी न्यूज - आमदार अनंतराव गाडगीळ यांच्या स्थानिक विकास कार्यक्रमांतर्गत डि. सी. एम. सोसायटी ऑफ इंडिया संचालित डॉ. बाबासाहेब आंबेडकर महाविद्यालयास तीन लाख रुपयांचे संगणक संच व दोन लाख रुपयांचे बेंचेस प्रदान करण्यात आले.

नाना पेठमधील डॉ. बाबासाहेब आंबेडकर वाणिज्य महाविद्यालयाच्या सभागृहात हा कार्यक्रम संपन्न झाला. यावेळी विधानपरिषदेचे आमदार अनंतराव गाडगीळ, कार्यक्रमाचे अध्यक्ष डि. सी. एम. सोसायटी ऑफ इंडियाचे जनरल सेक्रेटरी एम. डी. शेवाळे, खजिनदार विशाल शेवाळे, पर्यवेक्षक वसंत साळवे, समन्वयक हेमलता सांगळे, महाविद्यालयाच्या प्राचार्य शशिकला गोरे, वाल्मिक जगताप आदी मान्यवर उपस्थित होते.

कार्यक्रमात बोलताना आमदार अनंतराव गाडगीळ म्हणाले, "सध्याचे युग संगणकाचे आहे. संगणकामुळे देशाचा विकास झपाट्याने झाला. परंतु संगणकाचा वापर चुकीचा होऊ लागल्याने अनेक समस्या निर्माण होऊ लागल्या आहेत. संगणकाच्या गैरवापरावर आळा बसवून योग्य वापरातून विद्यार्थ्यांनी नवीन ज्ञान आत्मसात करावे."

कार्यक्रमाचे प्रास्तविक वाल्मिक जगताप यांनी केले. सूत्रसंचालन डॉ. बाळासाहेब सोनवणे यांनी केले तर आभार प्रा. जे .के. म्हस्के यांनी मानले.

Advt

Ajit

22 Jul 2017

एमपीसी न्यूज - महाबळेश्वर येथील ओशोनिक विजन संस्थेच्या अंध मुलांनी बनविलेल्या राख्यांचे प्रदर्शन सातारा रस्त्यावरील पुष्प मंगल कार्यालयात भरविण्यात आले. या प्रदर्शनाला डोळस लोकांनी उदंड प्रतिसाद दिला. तसेच राख्यांची खरेदी करण्यासाठी एकच गर्दी उडाली.

विशेष मुले आणि महिलांनी बनविलेल्या वस्तूंचे प्रदर्शन सातारा रस्ता येथील पुष्प मंगल कार्यालयात मागील सोळा वर्षांपासून मेरी सहेली मंडळातर्फे आयोजित करण्यात येते. या प्रदर्शनात अंध मुलांच्या पुनर्वसनाचे कार्य करणारी महाबळेश्वर येथील ओशोनिक विजन संस्थेच्या मुलांनी बनविलेल्या राख्या आणि इतर वस्तू ठेवण्यात येतात. यंदा अंध मुलांनी तयार केलेल्या आकर्षक राख्या प्रदर्शनात विक्रीसाठी ठेवण्यात आल्या होत्या.

ओशोनिक विजन संस्थेतर्फे अंध मुलांसाठी व्यवसायाभिमुख कोर्सेस चालविण्यात येतात. विशिष्ट कालावधीचा व्यवसायाभिमुख अभ्यासक्रम पूर्ण केल्यानंतर विद्यार्थी विविध वस्तू तयार करतात. संस्थेतर्फे या वस्तू प्रदर्शनात मांडल्या जातात. त्यातून मिळणार निधी अंधांच्या पुनर्वसनासाठी वापरण्यात येतो. रक्षाबंधनाच्या वेळी राख्यांचे प्रदर्शन, दिवाळीच्या वेळी आकाश कंदील आणि पणत्या या वस्तूंचे प्रदर्शन भरविण्यात येते. वर्षभर इतर वस्तूंची देखील प्रदर्शने भरविण्यात येतात. यातून संस्थेला आणि पर्यायाने अंध मुलांना आर्थिक आधार मिळतो. तसेच त्यांनी केलेल्या कामाचे चीज होत असल्याचे लक्षात येताच ती मुले नव्या जोमाने आणि नव्या कल्पकतेने वस्तू तयार करतात.

प्रदर्शनामध्ये घरगुती व्यवसाय करणा-या महिलांनी बनविलेल्या वस्तूंचा समावेश या प्रदर्शनात करण्यात आला होता. प्रदर्शनाचे आयोजन मंडळाच्या अध्यक्षा देवी तन्ना यांनी केले होते.

22 Jul 2017

एमपीसी न्यूज - पिंपरी-चिंचवड महापालिका हद्दीतील वडमुखवाडी, साई मंदिर परिसरातील नागरिकाचा मृत्यू झाल्यास, अंत्यसंस्कारासाठी आळंदी स्मशानभूमीत मृतदेह आणावा लागतो. ही बाब लक्षात घेऊन, हवेली तालुक्‍याच्या हद्दीत नव्याने स्मशानभूमी उभारण्याची मागणी नगरसेविका विनया तापकीर यांनी आळंदी नगरपरिषदेकडे केली आहे.

याबाबत तापकीर यांनी आळंदी नगरपरिषदेचे नगराध्यक्ष व मुख्याधिकारी यांना निवेदन दिले आहे. त्यात म्हटले आहे की, आळंदी नगरपरिषदेची हद्द खेड तालुक्‍याबरोबरच हवेली तालुका हद्दीत येते. हवेली तालुक्‍यातील नगरपरिषदेची हद्द पिंपरी-चिंचवड महापालिका हद्दीलगत आहे. पिंपरी-चिंचवड महापालिकेत समावेश झाल्याने च-होलीत अनेक गृहप्रकल्प तयार झाले आहेत . त्यामुळे या परिसराची लोकसंख्या झपाट्याने वाढली आहे.

साई मंदिर व वडमुखवाडी या परिसरातील नागरिकाचा मृत्यू झाल्यास, हवेली तालुक्‍याच्या हद्दीत इंद्रायणी नदीकाठी मृतदेहावर अंत्यसंस्काराची व्यवस्था करण्यात आली आहे. आळंदीपासून हे अंतर चार ते पाच किलोमीटर आहे. मात्र, ही जागा इंद्रायणी नदीपात्रालगत असल्याने, पावसाळ्यात नदीपात्राची रुंदावणारी पातळी लक्षात घेऊन, या ठिकाणी पत्राशेडची व्यवस्था करण्यात आली नाही.

अंत्यसंस्कारासाठी केवळ चौथ-याची व्यवस्था होती. पत्राशेड नसल्याने कालांतराने अंत्यसंस्कारासाठी हे मृतदेह आळंदी स्मशानभूमीत आणले जाऊ लागले आहेत. त्यामुळे हवेली हद्दीत पत्राशेड असलेली स्मशानभूमी उभारून नागरिकांना दिलासा द्यावा, अशी मागणी विनया तापकीर यांनी केली आहे.

Advt

Ajit

21 Jul 2017


एमपीसी न्यूज - रास्ता पेठमधील एथेल गार्डन अध्यापिका महाविद्यालयास विधानपरिषदेचे आमदार अनंतराव गाडगीळ यांच्या आमदार निधीतून सहा संगणक देण्यात आले. संगणक कक्षाचे उद्घाटन आमदार अनंतराव गाडगीळ यांच्या हस्ते करण्यात आले.


यावेळी एथेल गार्डन अध्यापिका महाविद्यालयाच्या मुख्याध्यापिका प्रतिभा म्हंकाळे, विल्सन मॅसी, अनिल गडकरी, सुजया पुणेकर, गोपाळराव पायगुडे, सर्वेश्वर थोरात आदी मान्यवर उपस्थित होते.

आमदार अनंतराव गाडगीळ म्हणाले की, राजीव गांधी यांनी संगणकाच्या माध्यमातून माहिती तंत्रज्ञानाची क्रांती आणली. त्या क्रांतीमुळे आज आय टी उद्योग भरारी घेत आहे. प्रत्येक क्षेत्रात संगणकाचा वापर वाढला असून प्रत्येकाने संगणक साक्षर होणे काळाची गरज आहे. यासाठी आमदार निधीतून शैक्षणिक क्षेत्रात ही मदत देत आहोत. कार्यक्रमाचे सूत्रसंचालन शिल्पा पंडित यांनी केले. आभार मनिषा गडकरी यांनी मानले.

21 Jul 2017


पद्मभूषण डॉ. वसंतदादा पाटील कॉलेज ऑफ आर्किटेक्चरचा उपक्रम

एमपीसी न्यूज - पद्मभूषण डॉ. वसंतदादा पाटील कॉलेज (पीव्हीपी) ऑफ आर्किटेक्चर आणि इंडियन इन्स्टिट्यूट ऑफ आर्किटेक्टतर्फे आंतरमहाविद्यालयीन स्थापत्यशास्त्र प्रश्नमंजूषा स्पर्धा आयोजित करण्यात आली होती. स्पर्धेचा पारितोषिक वितरण समारंभ महाविद्यालयाचे संचालक अभय छाजेड यांच्या हस्ते झाला.

यावेळी महाविद्यालयाचे सचिव जितेंद्र पितळीया, प्राचार्य  प्रसन्न देसाई, आर्किटेक्टस् इंजीनिअर्स सव्हेयर्स असोसिएशनचे हेमंत साठे, प्रा. मीनल सागरे, देवेंद्र देशपांडे, प्रा.शेखर गरुड आदी उपस्थित होते. स्पर्धेचे यंदा 9 वे वर्ष होते.

पुण्यातील 12 महाविद्यालयातील 120 गट या स्पर्धेत सहभागी झाले होते. बी.के.पी.एस. कॉलेज ऑफ आर्किटेक्चरने  प्रथम क्रमांक पटकाविला. तर पद्मभूषण डॉ. वसंतदादा पाटील कॉलेज ऑफ आर्किटेक्चरने दुसरा आणि एस.बी. पाटील महाविद्यालयाने तिसरा क्रमांक मिळविला. अलाना कॉलेज ऑफ आर्किटेक्चरला विशेष पारितोषिक देण्यात आले. प्रथम क्रमांकास 10 हजार, द्वितीय क्रमांकास 5 हजार आणि तृतीय क्रमांकास 2 हजार पाचशे रुपये आणि ट्रॉफी देण्यात आली.

प्राचार्य प्रसन्ना देसाई म्हणाले की, स्थापत्यशास्त्राचे शिक्षण घेताना, विद्यार्थ्यांना स्थापत्यशास्त्रांशी संबंधित सर्व घडामोडींची माहिती व्हावी, यासाठी आंतरमहाविद्यालयीन प्रश्नमंजूषा स्पर्धेचे आयोजन दरवर्षी करण्यात येते.  विद्यार्थ्यांच्या बुद्धीला चालना देण्यासाठी आणि त्यांच्या माहितीत भर घालण्यासाठी हे अतिशय महत्त्वाचे व्यासपीठ ठरते.

21 Jul 2017


आयआयटी मद्रास आणि हासुराद्वारा ऑनलाईन कार्यशाळा

एमपीसी न्यूज - आयआयटी मद्रास व हासुरा यांच्यातर्फे - इन्ट्रोडक्शन टू मॉडर्न अॅप्लिकेशन डेव्हलपमेंट- ही ऑनलाईन कार्यशाळा होणार आहे. ही कार्यशाळा 24 जुलै रोजी सुरू होणार असून त्यासाठी नावनोंदणी करण्यात येत आहे.

या कार्यशाळेत विद्यार्थ्यांना अ‍ॅप विकसित करण्याचे मूलभूत ज्ञान तसेच नवीन वेब अॅप्लिकेशन बनविण्यासाठी मार्गदर्शन केले जाणार आहे. कार्यशाळेसाठी नावनोंदणीची शेवटची तारीख 24 जुलै असून www.imad.tech या संकेतस्थळावर नोंदणी करुन विद्यार्थ्यांना कार्यशाळेत सहभागी होता येईल.

हासुराचे संस्थापक तन्मय गोपाल व आयआयटी मद्रासचे प्राध्यापक डॉ. गौरव रैना कार्यशाळेत मार्गदर्शन करणार आहेत. पदवी मिळवताना ज्या अद्ययावत माहितीपासून विद्यार्थी दूर आहेत ती माहिती या कार्यशाळेतून मिळणार आहे. ही कार्यशाळा पूर्ण झाल्यावर पात्रता परीक्षा देऊन विद्यार्थी आयआयटी मद्रासचे प्रशस्तीपत्रकही मिळवू शकतात. गुणवंत विद्यार्थ्यांना हासुरा ( https://hasura. io) मध्ये इंटर्नशिप/ फेलोशिप ही मिळू शकते.

21 Jul 2017


महेशदादा सोशल फाऊंडेशनचा उपक्रम

एमपीसी न्यूज - भारतीय नौदलातील विविध संधींबाबत तरुण आणि उच्चशिक्षितांना मार्गदर्शन व्‍हावे. यासाठी आमदार महेश लांडगे यांच्या मार्गदर्शनाखाली भोसरी येथे मार्गदर्शन शिबिराचे आयोजन केले आहे.

महेशदादा सोशल फाऊंडेशन, जुन्नर यांच्या वतीने भोसरी येथील कै. अंकुशराव लांडगे सभागृहात सोमवार, दि. 24 जुलैला सकाळी दहा वाजता मार्गदर्शन शिबिर होणार आहे. यावेळी भारतीय नौदलात तब्बल 25 वर्षे सेवा केलेले निवृत्त कमांडर जयंत एस. कोंडे मार्गदर्शन करणार आहेत.

बी.ई. आणि बी.टेक. साठी अंतिम वर्षात शिकणा-या विद्यार्थ्यांसाठी पुणे विद्यापीठातील ‘नौदल अधिकारी अभ्यासक्रम-2018’ करीता प्रवेश अर्ज करण्याचे आवाहन करण्यात आले आहे. अभ्यासक्रमासाठी वेळापत्रकही जाहीर केले आहे. 31 जुलै 2017 पर्यंत ऑनलाईन अर्ज करण्याची अंतिम मुदत आहे. अभियांत्रिकी विद्यार्थ्यांना भारतीय नौदलातील करिअर पर्याय शोधणे ही एक सुवर्ण संधी आहे. भारतीय नौदल अभ्यासक्रमाची पदवी मिळाल्यामुळे अनेक विद्यार्थ्यांना चांगले वेतन आणि भत्ता मिळत आहे. तसेच, सामाजिक क्षेत्रात मानही मिळत आहे. त्यामुळे अभियांत्रिकी शाखेतील शेवटच्या वर्षात शिकणा-या विद्यार्थ्यांना अभ्यासक्रमाची माहिती देण्यात येणार आहे, अशी माहिती महेशदादा सोशल फाऊंडेशनचे अध्यक्ष अमोल बांगर यांनी दिली.

Page 1 of 56
Open Chat
1
Close chat
Hello! Thanks for visiting us. Please press Start button to chat with our support :)

Start