• Bhausaheb_Bhoir.jpg
  • DPU1250x200.jpg
  • Mahesh_Landge.jpg
  • mpc.jpg
  • MPC_news.JPG
  • Nitin_Kalje.jpg
  • PCCO.jpg
  • Sunil_Shelke.jpg
23 Jul 2017

एमपीसी न्यूज - ढाण्या वाघ म्हणून पश्चिम महाराष्ट्रात अन्यायाविरोधात चार दशकाहूनही अधिक काळ लढा दिलेल्या बापू बिरू वाटेगावकर यांच्यावर मावळातील पवना रुग्णालयात सांधे प्रत्यारोपणाची यशस्वी शस्त्रक्रिया नुकतीच करण्यात आली. वयाच्या 102 वर्षाच्या रुग्णाच्या दोन्ही पायांवर हे प्रत्यारोपण झाले असून बापू पुन्हा एकदा स्वत:च्या पायावर चालू लागले आहेत.

पवना हॉस्पिटलच्या कार्यकारी संचालिका डॉ. वर्षा वाढोकर, संचालक डॉ. सत्यजित वाढोकर यांनी पत्रकार परिषदेत ही माहिती दिली. त्यापूर्वी पत्रकारांनी बापू वाटेगावकर यांच्याशी संवादही साधला. गुडघेरोपण तज्ज्ञ डॉ. प्रवीण वाघमारे, डॉ. अजय डोंबाळे आणि डॉ. अश्विन भालेराव यांनी ही शस्त्रक्रिया केली. बापू वाटेगावकर वयाच्या शंभरीनंतरही धडधाकट असून त्यांचे कसलेले शरीर, दमदार आवाज आणि स्मरणशक्ती अजूनही शाबूत आहे. देशभरातील वाढत्या विनयभंग, बलात्कार आणि विवाहितांच्या छळांच्या घटनांना आळा कसा घालायचा, असे छेडले असता ते म्हणाले, लढलं पाहिजे. ताकद, हिम्मत आणि नैतिक नियमांचे पालन केले तर अन्यायाला गाडता येते. पण त्यासाठी गुरू पाहिजे.

पोलीस, सरकार, न्यायालय संरक्षण करू शकत नाही, न्याय होत नाही तेव्हा लढले पाहिजे. असे लढा की पुरावा देखील शिल्लक राहायला नको. मायाबहिणींच्या अब्रूवर घाला घातलेल्यांना मी कायमचं मिटवलं. आजही सर्व जातीधर्माची लोक बोरगावला माझ्याकडे येतात. माहेरवाशीनींना न्याय द्यायला सासरकडच्यांना शब्द टाकला तरी ते तो पाळतात. व्यसनमुक्तीचेही काम सुरू आहे. मांस, दारू, बाईचा नाद, तंबाखू अशा व्यसनांनी माणूस स्वत: संपतो आणि दुस-यांना देखील संपवतो. अन्यायाचे मूळ इथे आहे. लढायचे असेल तर माणूस म्हणून नितीनियम पाळले पाहिजेत.

पवना रुग्णालयातील डॉक्टरांबद्दल त्यांनी कृतज्ञता व्यक्त केली. पुण्या मुंबईतील डॉक्टरांनी वयाचे कारण देत गुडघ्यावर ऑपरेशन करायचे धाडस नाही केले. इथे मात्र वेगळा अनुभव आला. सर्वांनी माझी काळजी घेतली. आज चार वर्षांनी मी चालू लागलो आहे. आमचे 70 माणसांचे कुटुंब आहे. त्यांनाही आनंद झालाय.

23 Jul 2017

एमपीसी न्यूज - आंदर मावळातील डाहुली गावालगत असलेल्या बेंदेवाडी बंधार्‍याच्या पाण्यात बुडून आज पर्यटनासाठी आलेल्या एका युवा पर्यटकाचा मृत्यू झाला.

कुशल नारायण सुतार (वय 26, रा. महाड, जिल्हा रायगड), असे या बुडून मयत झालेल्या युवकाचे नाव आहे.

वडगाव मावळ पोलिसांनी दिलेल्या माहितीनुसार, हडपसर पुणे येथील इन्स्टिट्यूट ऑफ चार्टर्ड अकाऊंटंट ऑफ इंडिया या ठिकाणी सीएचे शिक्षण घेणारे सुमारे 15 विद्यार्थी आंदर मावळ भागात आज सकाळी रविवारच्या सुट्टीनिमित्त वर्षाविहारासाठी आले होते. दुपारी अडीच वाजण्याच्या सुमारास ते डाहुली गावालगतच्या बेंदेवाडी या तलावात पोहत असताना कुशलचा दमछाक झाल्याने पाण्यात बुडून मृत्यू झाला.

लोणावळा परिसरात मागील आठवड्यात दोन युवा पर्यटकाचा वेगवेगळ्या धबधब्यामध्ये पडून मृत्यू झाल्याची घटना ताजी असताना ही तिसरी घटना मावळात घडली आहे. निसर्गसौंदर्याने नटलेल्या मावळ तालुक्यात विविध पर्यटनस्थळांवर राज्यभरातून तसेच परराज्यांमधून मोठ्या संख्येने पर्यटक वर्षाविहारासाठी येत असतात. उत्साहाच्या भरात युवा पर्यटक स्वतःच्या हाताने जिविताला धोका निर्माण होईल अशा पद्धतीने वागत असल्याने दुर्दैवी घटना घडत आहे. याकरिता पर्यटकांनी सुरक्षित पर्यटनाचा आनंद घ्यावा, असे आवाहन वडगाव मावळचे पोलीस निरीक्षक प्रदीप काळे यांनी केले आहे.

21 Jul 2017


एमपीसी न्यूज - तुकाराम सहकारी साखर कारखान्याचे संचालक पांडूरंग ठाकर यांना मातृ शोक झाला असून त्यांच्या आई सोनाबाई ठाकर यांचे आज (शुक्रवारी) वृद्धापकाळाने दुःखद निधन झाले.

सोनाबाई धोडींबा ठाकर यांचे वय 95 वर्ष होते. त्या येळसे येथे राहत होत्या. त्यांच्या मागे चार मुलगे, दोन मुली, सुना, नातवंडे, जावई, नातसुना, नातजावई, परतुंडे असा परिवार असून त्या स्वतः वारकरी होत्या. एकत्र कुटूंब पद्धतीचा वारसा त्यांनी जपला होता.

तर आधुनिक शेतीचा त्यांचा नेहमी कल आसायचा. त्या पवना मावळ वारकरी संप्रदायाचे विश्वस्थ ह.भ.प. भिकाजी ठाकर व पांडूरंग ठाकर यांच्या त्या मातोश्री तर पत्रकार ज्ञानेश्वर ठाकर यांच्या त्या आजी होत्या.

 

 

 

Advt

21 Jul 2017

एमपीसी न्यूज - तळेगाव दाभाडे येथील निवृत्त मंडलाधिकारी राजकुमार नारायण बारसवडे (वय 58) यांचे आज (शुक्रवार) सकाळी हृदयविकाराच्या तीव्र झटक्याने चिंचवडच्या बिर्ला रुग्णालयात निधन झाले.

त्यांच्या मागे पत्नी, मुलगा पार्थेश व सून असा परिवार आहे. त्यांच्या पार्थिवावर दुपारी दीडच्या सुमारास तळेगाव दाभाडे येथील बनेश्वर स्मशानभूमीत अंत्यसंस्कार करण्यात येणार आहेत.

राज्य शासनाच्या महसूल खात्यात प्रदीर्घ सेवा केल्यानंतर त्यांनी स्वेच्छानिवृत्ती घेतली होती. सातारा रोड, वाठार स्टेशन तसेच कोरेगाव तालुक्यात तलाठी व नंतर मंडलाधिकारी म्हणून त्यांनी जबाबदारी सांभाळली होती. निवृत्तीनंतर ते तळेगाव दाभाडे येथे स्थायिक झाले होते. एमपीसी न्यूजचे संपादक विवेक इनामदार यांचे ते मामा होत.

20 Jul 2017

एमपीसी न्यूज- विदेशात नोकरी  मिळवून देण्याचे आमिष दाखवून  एका अभियंत्याला  लाखोंचा गंडा घातल्याची घटना सोमवारी तळेगाव येथे उघडकीस  आली.

या संदर्भात   विलास नामदेव नितनवरे (वय ४१, रा. शिंदेवस्ती - रावेत, ता. हवेली.) यांनी तळेगाव  एमआयडीसी पोलीस ठाण्यात  फसवणूक झाल्याची  फिर्याद  दिली  आहे.

पोलीस सुत्रांनी दिलेल्या माहितीनुसार, फिर्यादी विलास नितनवरे यांना 4 मे ते 2017 ते 17जुलै 2017 या कालावधीत इम्प्रेस ऑटोमिशन कंपनी सिडनी (ऑस्ट्रेलिया) येथे पदांची भरती सुरु असून तुम्ही इच्छुक असाल तर तुमचा बायोडाटा व इतर सविस्तर माहिती मेलवरपाठवण्यास  सांगितले. त्याप्रमाणे नितनवरे यांनी  माहिती  पाठवली. त्यानंतर त्यांची सहाय्यक व्यवस्थापक पदावर नियुक्ती झाल्याचा मेल त्यांना पाठविण्यात आला. अग्रीमेंट करून पुन्हा सविस्तर माहिती पाठविण्यासाठी सांगितले.

आरोपी अॅन्ड्र्यू (पूर्ण नाव व  पत्ता माहित नाही) यांनी विलास  नितनवरे यांना  वेळोवेळी  नोकरीला जाण्याचा फोन करून पैसे उकळले. भामट्याने  त्यांच्याकडून ऑनलाईन  एकूण सहा  लाख ५९  हजार १०० रुपये उकळले. आपली  फसवणूक  झाल्याचे  लक्षात  येताच  नितनवरे यांनी अखेरीस सोमवारी  फसवणूक झाल्याचा गुन्हा  पोलीस ठाण्यात दाखल केला.
20 Jul 2017

तळेगाव-चाकण रस्त्याची  सहा महिन्यात झाली दुरवस्था, वाहतूक कोंडीत भर

तळेगाव दाभाडे - तळेगाव- चाकण रस्ता अत्यंत रहदारीचा रस्ता म्हणून ओळखला जातो. हा रस्ता चाकण एमआयडीसी, तळेगाव एमआयडीसी यांसारख्या औद्योगिक भागांना जोडतो. त्यामुळे या रस्त्यावर वाहतूक अगदी व्यस्त असते. या रस्त्याचे काम होऊन सहा महिन्यांचा देखील कालावधी उलटला नाही. तोवरच या रस्त्याची अवस्था अत्यंत विदारक झाली आहे. मोठमोठे खड्डे, त्यात भरलेले पाणी, भरधाव वेगात येणारी वाहने आणि खड्डे चुकविताना चालकांची होणारी दमछाक हे दृश्य बघण्यालायक झाले आहे. रस्त्याची चाळण झाल्याने वाहतूक कोंडीत अधिकच भर पडत आहे.

राज्य महामार्गाकडून वर्ग करून राष्ट्रीय महामार्गाकडे या रस्त्याला नेण्यासाठी प्रयत्न सुरु आहेत. परंतु हा रस्ता तळेगाव नगरपरिषदेकडे देण्याची मागणी नागरिक करीत आहेत. कारण राज्य महामार्ग मंडळाने उड्डाणपूल, चौपदरीकरण करण्याच्या गर्जना केल्या. पण खर्च मात्र 1 रुपया देखील केला नाही. नागरपरिषदेकडे रस्ता आला तर किमान त्यामुळे रस्त्याची चांगल्या प्रकारे दुरुस्ती व निगा राखली जाईल. मागील सहा महिन्यापूर्वी इंद्रायणी महाविद्यालय ते शहा पेट्रोल पंप दरम्यान रस्ता दुरुस्तीसाठी दीड कोटी रुपयांचा निधी मंजूर करण्यात आला पण एवढ्या मोठ्या रकमेचे काम मात्र कुठेच दिसत नाही.

रस्त्यावर खड्डे पडले, नागरिकांची आरडा ओरड सुरु झाली की पडलेल्या खड्ड्यांमध्ये मुरूम टाकून किंवा ओबड धोबड काम करून तात्पुरती मलमपट्टी करण्याचे काम मागील अनेक वर्षांपासून सुरु आहे. डांबरीकरण करून बाजूने गटार होणे अपेक्षित होते. परंतु रस्त्याचेच विद्रुपीकरण होत आहे, त्यात गटार कुठून तयार होणार. एवढा निधी मंजूर होऊन काम काहीच दिसत नसल्याने निधी नेमका कुणाच्या खिशात गेला याचीही चौकशी होणे गरजेचे आहे. या रस्त्यावर झालेल्या वाहनांच्या अपघातात मागील दहा वर्षांत वाहनचालक, प्रवासी, पादचारी तसेच नेत्यांची मुले व पोलीस अधिका-यांना मृत्यूने आमंत्रण दिले आहे.

रस्त्याच्या दुरावस्थेबाबत सार्वजनिक बांधकाम अधिका-यांना विचारले असता; वाढीव निधीसाठी प्रस्ताव वरिष्ठांकडे पाठविला आहे. एवढे सांगून अंग काढून घेण्याचा प्रकार होत आहे. रस्त्यावर मोठे खड्डे पडल्याने वाहनचालकांच्या जीवाला धोका निर्माण झाला आहे. पावसाने चांगला जोर धरला असल्याने रस्त्यावरील खड्डे सतत भरलेलेच असतात. त्यामुळे मोठ्या अपघात होण्याचा धोका वाढत आहे.

रस्त्यामुळे तळेगावात अपघाताचा वाढता धोका

वडगाव फाट्यावरून तळेगावकडे निघाल्यास महाराजा हॉटेल चौक लागतो. या चौकात भर रस्त्याच्या मधोमध मोठा खड्डा असल्याने अपघात होण्याची शक्यता आहे. त्यामुळे वाहनचालक वाहने रस्त्याच्या खाली उतरवून मार्ग काढतात. पुढे स्टेशन चौकात भेगडे पाटील कॉम्प्लेक्सच्या समोर खड्ड्यांनी रस्त्याची पार चाळणी झालेली नजरेतून सुटत नाही. या ठिकाणी येणाऱ्या प्रत्येक वाहन चालकास खड्डे सुरु होण्यापूर्वी थांबावे लागते, विचार करावा लागतो आणि मग खड्डे चुकविण्याचे कौशल्य वापरावे लागते. कितीही सराईत चालक असला तरी त्याला एक किंवा दोन खड्डे चुकविण्यापलीकडे मजल मारता येत नाही. पुढे जनरल हॉस्पिटल समोर, प्रताप मेमोरियल हॉस्पिटल समोर रस्त्याच्या मधोमध दोन्ही बाजूंनी खड्डे आढळतात. या खड्डयांमधून एकही वाहन सुटत नाही. त्यामुळे अपघातांच्या संख्येत दिवसेंदिवस वाढ होत आहे.

तळेगावकरांना हवाय चांगला रस्ता

तळेगावमध्ये रस्त्यांची दुरवस्था आणि वाहतूक व्यवस्थेचे तीन तेरा वाजले आहेत. चौकाचौकात वाहतुकीचे सिग्नल आहेत, पण वाहतुकीच्या नियमांचे पालन मात्र कोणीच करीत नाही. त्यामुळे वाहतूक नियमनयुक्त आणि खड्डेमुक्त रस्त्याच्या प्रतीक्षेत प्रत्येक तळेगावकर आहे. प्रशासनाबरोबर सामाजिक संस्था आणि नागरिकांनी पुढाकार घेऊन चांगल्या रस्त्यांसाठी प्रयत्न करायला हवे.  

talegaon road 1
talegaon road 2
talegaon road 3
talegaon road 5
talegaon road 6
talegaon road 7
talegaon road 8
talegaon road 9
talegaon road 10


     
20 Jul 2017

एमपीसी न्यूज - डी वाय पाटील स्कूल ऑफ इंजिनिअरिंग अकॅडमी आंबीचे विद्यार्थी अनोखी रेस कार बनवत आहेत. ऑटोमोबाईल आणि मेकॅनिकल शाखेचे 25 विद्यार्थी मिळून साधारण 30 दिवसांच्या कालावधीत अनोखी रेस कार बनवत आहेत. या कारसाठी साधारणतः 12 लाखांच्या आसपास खर्च येणार आहे. सध्या कारचे डिजाईन पूर्ण झाले असून निर्मितीसाठी विद्यार्थ्यांनी कंबर कसली आहे.

कुठल्याही व्यावसायिक किंवा अनुभवाची मदत न घेता. महाविद्यालयीन विद्यार्थी केवळ वर्गात घेतलेल्या पुस्तकी आणि प्रात्यक्षिक ज्ञानाच्या आधारावर ही नवनिर्मिती करीत आहेत. राष्ट्रीय स्तरावर दिल्ली येथे होत असलेल्या फॉर्म्युला भारत या स्पर्धेत हे विद्यार्थी सहभागी होत आहेत. मागच्या वर्षी देखील डी वाय पाटील स्कूल ऑफ इंजिनिअरिंग अकॅडमीच्या विद्यार्थ्यांनी अशीच एक रेस कार बनविली होती. त्या कारसाठी मागच्या वर्षी दिल्लीमध्ये बुद्ध इंटरनॅशनल सर्किट नोएडा येथे झालेल्या राष्ट्रीय स्तरावरील स्पर्धेत पहिल्याच वर्षी राष्ट्रीय पातळीवर पहिल्या फेरीत 33 वा क्रमांक मिळाला होता तर अंतिम रेस मध्ये संपूर्ण भारतात 9 वा क्रमांक मिळाला होता.

मागील वर्षीपेक्षा आधुनिक तंत्रज्ञान यावर्षी या कारमध्ये वापरण्यात येणार आहे. कारच्या इंजिनमध्ये किंवा इतर भागात काही तांत्रिक अथवा इतर बिघाड झाला तर त्याची तात्काळ माहिती मोबाईल फोनवर मिळणार आहे. आतापर्यंत अशा प्रकारचे तंत्रज्ञान वापरून कॉम्प्युटर किंवा मोठ्या स्क्रीनवर पाहण्याची सोय करण्यात येत होती. परंतु मोबाईलवर ही माहिती मिळविण्यासाठी विद्यार्थ्यांना भरपूर मेहनत घ्यावी लागणार असल्याचे या प्रकल्पातील विद्यार्थी प्रमुख चैतन्य कुलकर्णीने एमपीसी न्यूजशी बोलताना सांगितले.

जानेवारी, 2018 मध्ये कोयम्बतूर येथे होत असलेल्या फॉर्म्युला भारत या राष्ट्रीय स्पर्धेत डी वाय पाटील स्कूल ऑफ इंजिनिअरिंग अकॅडमी आंबीचे विद्यार्थी सहभागी होणार आहेत. या स्पर्धेत सहभागी होण्यासाठी पात्रता परीक्षा द्यावी लागते. त्या परीक्षेच्या निकालावरून संपूर्ण भारतातून 60 संघांना मुख्य स्पर्धेत प्रवेश दिला जातो. ही स्पर्धा अतिशय कठीण असते. मोठमोठ्या कल्पनांचा विस्तार झालेला इथे पाहायला मिळतो. या स्पर्धेसाठी केवळ पात्रता परीक्षाच नाही तर मुख्य परीक्षेतही आपल्या महाविद्यालयाचे नाव झळकविण्याचा चंग विद्यार्थ्यांनी मनाशी बांधला असल्याचे सहभागी विद्यार्थी प्रथमेश भालेराव सांगतो.

race car 2
race car 3
race car 5
race car 7
race car 1






20 Jul 2017

एमपीसी न्यूज - वडगाव मावळ कृषी संशोधन केंद्राने यावर्षी तब्बल 62 भात चाचण्या केल्या असून महाराष्ट्रातील भात संशोधन केंद्राच्या यादीत वरचे स्थान प्राप्त केले आहे. वडगाव केंद्राने आजवर भाताच्या पाच जाती प्रसारित केल्या आहेत. भात उत्पादन वाढीसाठी या केंद्राने केलेल्या लागवड तंत्रज्ञानाच्या 19 शिफारशी शासनाने मान्य केल्या आहेत.  आर्थिक दृष्ट्या फायदेशीर ठरणा-या भात पीक पद्धतीचा राज्यभरात प्रसार करण्यासाठी केंद्र सातत्याने प्रयत्न करत असल्याचे वडगाव मावळ कृषी संशोधन केंद्राचे प्रमुख डॉ. नरेंद्र काशीद यांनी सांगितले.

महाराष्ट्रात कर्जत येथे मुख्य भात संशोधन केंद्र असून त्याअंतर्गत विविध भात चाचणी केंद्रे कृषी विद्यापीठांच्या अधिपत्याखाली स्थापन करण्यात आली आहेत. वडगाव मावळ केंद्राची स्थापना 1940 साली करण्यात आली. त्यानंतर 1969 साली हे संशोधन केंद्र महात्मा फुले कृषी विद्यापीठ राहुरी यांच्या अधिपत्याखाली हस्तांतरित करण्यात आले. भाताचे उच्चतम दर्जाचे प्रसारित वाणाचे बियाणे पुरविणे व उपपर्वतीय भागासाठी भाताच्या नवीन जाती व त्यासाठी सुधारित लागवड पद्धती संशोधित करणे हा उद्देश समोर ठेवून केंद्राने आतापर्यंत इंद्रायणी, पवना, कुंडलिका, फुले मावळ, फुले समृद्धी या पाच जाती प्रसारित केल्या आहेत.

मावळ भागातील जमिनी व हवामान यांचा विचार करून भात बियाणाची निवड, पेरणी पूर्व बियाणे प्रक्रिया, रोपवाटिका व्यवस्थापन, जैविक खतांचा वापर, एकात्मिक खत व्यवस्थापन, लावणी किंवा पुनर्लागवड, लागवड अंतर, रोपांची हेक्टरी संख्या, अंतर मशागत, एकात्मिक तण व्यवस्थापन, भात आधारित पीक पद्धती व पाणी व्यवस्थापन अशा प्रकारच्या वडगाव केंद्राने शासनाकडे 19 शिफारशी केल्या. या सर्व शिफारशींमुळे भात उत्पादनात वाढ झाल्याने शासनाने त्या मान्य देखील केल्या. उपपर्वतीय विभागाच्या मावळ विभागासाठी सुधारित व अधिक उत्पन्न देणा-या कीड व रोगप्रतिबंधक जातीची निर्मिती करणे. सुधारित व अधिक उत्पन्न देणा-या जातींसाठी सुधारित लागवड तंत्रज्ञान संशोधित करणे, व  त्यासाठी कृषी विद्या विभागामार्फत प्रयोग घेणे. सुधारित व अधिक उत्पन्न देणा-या जातींचे पैदासकार, मूलभूत, पायाभूत व सत्यप्रत बियाणांचा बीजोत्पादन कार्यक्रम घेणे व त्याचा पुरवठा राज्य सरकारच्या संस्था, बियाणे महामंडळ व शेतक-यांना पुरविणे. भाताची उत्पादकता वाढण्यासाठी शेतक-यांना सुधारित लागवड तंत्रज्ञान देणे. भात संशोधनाने काढलेले निष्कर्ष शेतक-यांपर्यंत पोहोचविणे व त्याची अंमलबजावणी करणे. यांसारख्या उद्देशांना घेऊन वडगाव केंद्र सुरुवातीपासून काम करीत आहे.

वडगाव कृषी संशोधन केंद्राने तयार केलेल्या इंद्रायणी वाणाचे प्रसारण 1987 साली करण्यात आले. आंबेमोहोर 157 आणि आय. आर. 8 या जातींपासून संकरित केले आहे. 1988 मध्ये प्रसारित झालेले पवना हे वाण पुसा 33 आणि आय. आर. 28 या दोन जातींपासून संकरित केले आहे. कुंडलिका वाणाचे प्रसारण 1988 साली वडगाव मावळ कृषी संशोधन केंद्रामार्फत करण्यात आले. यांची निर्मिती आर 24 आणि आय ई टी 3228 यांपासून करण्यात आली. 2007 मध्ये फुले मावळ ही जात या केंद्रामार्फत प्रसारित करण्यात आली. हिची निर्मिती पवना आणि इंद्रायणी यांपासून संकरित केली आहे. फुले समृद्धी हे वाण 2007 साली प्रसारित करण्यात आले. इंद्रायणी आणि सोनसाळ यांच्या एकत्रीकरणातून संकरित करण्यात आलेले फुले समृद्धी वाण लांब, बारीक दाण्याचे सुवासिक वाण आहे. सर्व वाणांची उत्पादन क्षमता सरासरी हेक्टरी 40 ते 45 क्विंटल आहे. सर्व जाती भात पिकावर येणा-या रोगांना प्रतिकारक करणा-या आहेत.

केंद्राद्वारे पुढील काळात वेगवेगळ्या वातावरणास जुळणारे, अधिक भाताचे उत्पादन देणारे वाण विकसित करण्यात येणार आहेत. चांगल्या गुणवत्तेबरोबरच किडीस व रोगास प्रतिकारक असणारे वाण तयार करून लागवड तंत्रातही योग्य बदल करण्याविषयी अभ्यास सुरू आहे, अशी माहितीही काशिद यांनी दिली.

k3

19 Jul 2017


खंडणी प्रकरणातील आरोपीचे धागेदोरे सापडले

एमपीसी न्यूज - राष्ट्रवादी काँग्रेसचे वरिष्ठ जिल्हाउपाध्यक्ष व ज्येष्ठ नगरसेवक गणेश खांडगे यांना जीवे मारण्याची धमकी देऊन खंडणी मागितल्या प्रकरणातील आरोपीचे धागेदोरे हाती लागले असून लवकरच अटक करण्यात येईल, अशी माहिती पोलीस निरीक्षक पाटील यांनी दिली आहे. आरोपीच्या शोधासाठी पोलिसांची पथके विविध ठिकाणी रवाना झाली आहे.

या प्रकरणी मंगळवारी रात्री उशिरा तळेगाव पोलीस ठाण्यात गुन्हा दाखल करण्यात आला.

पोलिसांनी दिलेल्या माहितीनुसार, गणेश खांडगे यांच्या मोबाईलवर अज्ञात व्यक्तीने शनिवारी (दि.15) मेसेज पाठविला. त्यांनी सोमवारी (दि.17) मोबाईलवर आलेला मेसेज वाचला. या मेसेजमध्ये, 12 जण तुमचा पेट्रोल पंप व शोरूमचे नुकसान करून तुमची गेम करण्याचा धोका आहे. त्या 12 जणांमधील मी एक असून मला त्यात पडायचे नाही. ही माहिती तुम्हाला देतो याबद्दल तुम्ही काय देणार? या नंबरची चौकशी करू नका. रिप्लाय मेसेज करूनच द्यावा, असे नमूद केले होते. खांडगे यांनी या मेसेजकडे दुर्लक्ष केले. पुन्हा सोमवारी (दि.17) 'काय झाले साहेब', असा मेसेज आला. त्यावर खांडगे यांनी मदत करण्याची तयारी दर्शवून 'प्रत्यक्ष भेटण्यास यावे' असा मेसेज केला. मात्र, त्यास आरोपीने सकारात्मक प्रतिसाद दिला नाही. अखेरीस मंगळवारी (दि. 18) रात्री उशिरा खांडगे यांनी येथील पोलीस  ठाण्यात फिर्याद दिली.

तपासादरम्यान आरोपी हा तळेगाव येथील यशवंतनगर भागात वास्तव्यास होता, तो मूळचा तळेगावचा नाही, हे स्पष्ट झाले असले तरी या घटनेमागचा मुख्य सुत्रधार कोण हे शोधण्याचे आव्हान पोलिसांसमोर आहे.

 

पुणे ग्रामीण पोलीस अधीक्षक सुवेज हक यांनी घटनेची दखल घेतली आहे. गुन्ह्याचा तपास पोलीस उपनिरीक्षक वैभव सोनवणे करत आहे.

19 Jul 2017

एमपीसी न्यूज- भात पिकाचे हेक्टरी उत्पादन कमी होण्याची अनेक करणे आहेत. त्यामध्ये प्रमुख कारण म्हणजे एकात्मिक पीक व्यवस्थापनाचा अभाव हे होय. एकात्मिक पीक व्यवस्थापनातील महत्वाचा घटक भात पिकाची योग्य पुनर्लागवड हा होय. भात पिकाची योग्य लावणी / पुनर्लागवड करताना योग्य पद्धतीने करावी. चिखलणी, एकात्मिक अन्नद्रव्य व्यवस्थापन आणि लावणी किंवा पुनर्लागवड अशा क्रमाने तांत्रिक पद्धत वापरून लावणी केल्यास भात पिकास चांगला उतार पडतो.

चिखलणी - भात पिकाच्या मशागतीत चिखलणी करणे फार महत्वाचे असते. चिखलणीमुळे शेतात पाणी साचून राहण्यायोग्य स्थिती निर्माण होते. त्यामुळे तणांचा नाश होतो. दिलेल्या खतांची कार्यक्षमता वाढते. जमिनीतील कणांतर्गत हवेचे चलनवलन मर्यादित राहते आणि जास्त क्रियाशील होऊन इतर प्रतिक्रिया चालू होतात. उभी आडवी चिखलणी करून, फळी फिरवून शेतात पाणी सर्व भागात सामान पातळीत राहील अशा पद्धतीने पूर्वमशागतीची कामे वेळेवर व आधुनिक यंत्रांनी पार पाडावीत.

एकात्मिक अन्नद्रव्य व्यवस्थापन - चांगले उत्पादन येण्यासाठी भात पिकास आवश्यक ती सर्व अन्नद्रव्य मिळाली पाहिजेत. मुख्य अन्नद्रव्यात नत्र, स्फुरद व पालाश यांचा समावेश होतो. नत्र या अन्नद्रव्यामुळे भात पिकाची वाढ जोमदार होते. स्फुरद या अन्नद्रव्यामुळे मुळांची वाढ चांगली होऊन फुलोरा चांगला धरला जातो. पालाश या पोषक द्रव्यामुळे कणखरपणा येऊन पिक लोळत नाही तसेच तांदळातील पिष्टमय पदार्थ तयार होण्यास मदत होते. अधिक उत्पादन देणाऱ्या भाताच्या जातींना योग्य प्रमाणात खत घालावे लागते तसे न केल्यास अपेक्षित उत्पादन येत नाही. आवश्यकतेपेक्षा जास्त खते पिकास दिल्यासही उत्पादनावर अनिष्ट परिणाम होतो, शिवाय खर्च जास्त झाल्याने उत्पादन किफायतशीर होत नाही. सेंद्रिय, रासायनिक व जैविक खतांचा योग्य प्रमाणात वापर करायला हवा. रोप लावणी / पुनर्लागवड - हळव्या जातींची लागण पेरणीनंतर 21 ते 25 दिवसांनी करावी, निमगरव्या जातींची लागण 23 ते 27 दिवसांनी करावी आणि गरव्या जातींची लागण 25 ते 30 दिवसांनी करावी. हळव्या जातीच्या रोपांची लागवड 15-15 सेंटीमीटर अंतरावर करावी. तर निमगरव्या, गरव्या व संकरित जातीच्या रोपांची लागवड 15-20 सेंटीमीटर अंतरावर करावी. साधारणतः एका चुडात 3 ते 4 रोपे ठेवावीत. संकरित जातींसाठी एका चुडात फक्त 1 ते 2 रोपेच ठेवावीत.

भात शेती करताना चारसूत्रे लक्षात घेणे अत्यावश्यक आहे. चारसूत्री लावणी भात तंत्रज्ञान वापरून भात शेती केल्यास उत्पादनाचा चांगला उतार पडतो. ही पद्धत सोपी, शास्त्रीयदृष्ट्या कार्यक्षम, एकूण लागवडीचा जसे की बी, मजूर व खत यांचा खर्च कमी करणारे, वातावरणाचा परिणाम टाळणारे व भात शेती निश्चितपणे फायदेशीर करणारे आहे. यातील पहिले सूत्र भातपिकाच्या अवशेषांचा फेरवापर करणे हे आहे. यामध्ये भाताच्या तुसाची काळी राख रोपवाटिकेत बी पेरण्यापूर्वी मिसळून भाताचा पेंढा लावणीपूर्वी शेतात गाढावा.

वनशेती तंत्रज्ञानाचा उपयोग करून गिरीपुष्प हिरवळीच्या खताचा मर्यादित वापर करणे हे दुसरे सूत्र आहे. यामध्ये गिरिपुष्पाच्या फांद्या जमिनीपासून 30 ते 40 सेंटीमीटर उंचीवर तोडाव्यात. सर्वसाधारणपणे 2 ते 4 गिरिपुष्पाच्या झाडांची हिरवी पाने (साधारणतः 30 किलो) प्रति आर चिखलणीपूर्वी 6 ते 8 दिवस अगोदर खाचरात पसराव्यात. आठवड्यात फांद्यांवरील पाने गाळून पडतात. उरलेल्या फांद्या गोळा करून इंधन म्हणून वापरता येऊ शकतात. चिखलणी करून गळून पडलेली पाने चिखलात व्यवस्थित मिसळावीत नंतर लावणी करावी. यामुळे बियाणांची 30 टक्क्यांपर्यंत बचत होते. लावणी व कापणीवरील खर्च कमी होतो, तसेच खताचा वापर देखील योग्य होतो.

सुधारित किंवा संकरित जातीची भाताची रोपे वापरून चुडांची नियंत्रित लावणी करणे हे तिसरे सूत्र आहे. नियंत्रित लावणी करावयाच्या सुधारित दोरीवर 25 सेंटीमीटर व 15 सेंटीमीटर आलटून पालटून 25-15-25-15 सेंटीमीटर अशा अंतरावर खुणा कराव्यात. सुधारित लावणी दोरीवर 15 सेंटीमीटर अंतरावर असलेल्या प्रथम एक व नंतर दुसरा चुड लावावा. एका चुडमध्ये साधारणतः 2-3 रोपे असावीत. अशा प्रकारे एकावेळी जोडओळ पद्धत वापरून त्याच दोरीत लावणीचे काम पूर्ण करावे. संकरित भातासाठी एका ठिकाणी एक रोप लावावे. रोपे सरळ व उथळ 2-4 सेंटीमीटर खोलीवर लावावीत.

नियंत्रित लावणीनंतर त्याच दिवशी प्रत्येक चार चुडांच्या चौकोनात मधोमध सरासरी 2.7 ग्रॅम वजनाची (युरिया-डीएपी) 1 ब्रिकेट (खताची गोळी) हाताने 7-10 सेंटीमीटर अंतरावर खोल खोचावी. यामुळे पाण्याबरोबर नत्र व स्फुरदयुक्त खत वाहून जात नाही. खतामुळे होणारे प्रदूषण टळते. दिलेल्या खतांपैकी 80 टक्के नत्र पिकास उपयोगी पडते. ब्रिकेट्स खोल खोचल्यामुळे अन्नद्रव्ये तणाला मिळत नाहीत. तणाचा त्रास कमी होतो. आणि तणनाशक न वापरल्यामुळे प्रदूषण टळते. सर्वात महत्वाचे भाताचे उत्पादन निश्चित वाढते व भात शेती फायद्याची ठरते.

Bhat

Page 1 of 27
Open Chat
1
Close chat
Hello! Thanks for visiting us. Please press Start button to chat with our support :)

Start