मोशीत कारच्या धडकेत दुचाकीस्वाराचा मृत्यू
एमपीसी न्यूज – भरधाव कार आणि दुचाकीची धडक होऊन झालेल्या अपघातात दुचाकीस्वाराचा जागीच मृत्यू झाला. ही घटना मंगळवारी (दि.7) सकाळी साडेसहाच्या सुमारास मोशीतील संतनगर चौकात घडली.
शंकर तुकाराम सवदे (वय 55, रा. कळस, पुणे) असे मृत्यू झालेल्या दुचाकीस्वाराचे नाव आहे. याप्रकरणी अजित सवदे (वय 23, रा. कळस, पुणे) यांनी भोसरी, एमआयडीसी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, शंकर सवदे मंगळवारी सकाळी मोशी येथून दुचाकीवरुन जात होते. संतनगर चौकातून जात असताना पाठीमागून भरधाव आलेल्या कारने त्यांना जोरात धडक दिली. त्यात त्यांचा जागीच मृत्यू झाला. अपघातानंतर कारचालकाने घटनास्थळी न थांबता पोबारा केला. एमआयडीसी ठाण्याचे फौजदार एम. आर. निकम तपास करत आहेत.
