धाराशिव : तुळजापूर विधानसभा मतदारसंघाचा तिढा सुटला असून काँग्रेस पक्षाचे विद्यमान जिल्हाध्यक्ष तथा धाराशिव जिल्हा परिषदेचे माजी अध्यक्ष अॅडवोकेट धीरज पाटील कदम यांना विधानसभेची लॉटरी लागली आहे. माजी मंत्री मधुकर चव्हाण यांना काँग्रेस पक्षाने डावलले असल्याचे स्पष्ट झाले आहे. त्यामुळे मतदारसंघातील राजकारण कोणते वळण घेणार याकडे लक्ष लागले आहे.
काँग्रेस पक्षाचे ज्येष्ठ नेते तथा माजी मंत्री मधुकर चव्हाण यांनी तुळजापूर मतदारसंघावर दावा सांगितला होता. काँग्रेस पक्षाचे विद्यमान जिल्हाध्यक्ष तथा जिल्हा परिषदेचे माजी अध्यक्ष एडवोकेट धीरज कदम पाटील हे सुद्धा इच्छुक होते. मुळातच तुळजापूर विधानसभा मतदारसंघावरुन महाविकास आघाडीत चर्चा सुरुच होती पण निर्णय होत नव्हता. अखेर हा मतदारसंघ आता काँग्रेसच्या पारड्यात पडल्याने तिढा सुटल्याचे स्पष्ट झाले आहे. काँग्रेस पक्षाकडून धीरज कदम पाटील यांच्या नावावर शिक्कामोर्त़ब करण्यात आला आहे.
तुळजापूर मतदारसंघ हा काँग्रेसचा बालोकिल्ला म्हणून ओळखला जातो. दिवंगत आमदार साहेबराव हंगरगेकर यांच्यानंतर मधुकर चव्हाण हे सलग पाच वेळा याच मतदारसंघातून विजयी झाले होते. त्यानंतर भाजपने ही जागा खेचून आणली होती. आपला बालेकिल्ला पुन्हा काबीज करण्यासाठी अॅडवोकेट धीरज कदम पाटील हे पहिल्यांदाच येथून आपले नशीब आजमावणार आहेत.
महायुतीतील भाजपचे विद्यमान आमदार राणा जगजीत सिंह पाटील यांच्याशी अॅडवोकेट धीरज कदम पाटील यांचा मुकाबला होणार आहे. त्यामुळे यंदा तुळजापूरा अटीतटीचा सामना रंगणार आहे. अॅडवोकेट धीरज कदम पाटील यांनी मागच्या सहा महिन्यांपासून तुळजापूर मतदारसंघातील प्रत्येक गावात खेड्यात तांडा वस्तीमध्ये जाऊन मतदारांशी संपर्क वाढवला होता. तर गावत बैठकांचा सपाटाही लावला होता, मध्यंतरीच्या काळात त्यांनी कार्यकर्ता मेळावे सुद्धा घेतले होते.
कोण आहेत अँडवोकेट धीरज कदम पाटील
एडवोकेट धीरज कदम पाटील हे २०१२ ते २०२२ यादरम्यान जिल्हा परिषद धाराशिवचे सदस्य होते. तुळजापूर तालुक्यातील सिंदफळ या गटातून ते सलग दोन वेळा जिल्हा परिषद सदस्य झाले होते. तसेच २०१४ ते २०१७ या दरम्यान ते जिल्हा परिषद धाराशिवचे होते. त्यांचा या मतदारसंघात तगडा जनसंपर्क आहे.
अॅडवोकेट धीरज कदम पाटील यांची उमेदवारी घोषित झाल्यानंतर माजी मंत्री मधुकर चव्हाण काय निर्णय घेतात हे पुढील काही दिवसात स्पष्ट होईलच. दरम्यान मधुकर चव्हाण यांनी तुळजापूर विधानसभा मतदारसंघातून दोन उमेदवारी अर्ज दाखल केले आहेत. पक्षश्रेष्ठी मधुकर चव्हाण यांना काय आदेश देणार पुढील काही दिवसात स्पष्ट होणार आहे.
स्रोत : महाराष्ट्र टाईम्स
