पुणे : रोहित शर्मा हा कलंदर व्यक्ती आहे. कारण तो कधी काय बोलेल हे सांगता येत नाही. भारताचा पराभव झाला होता. रोहित शर्मा त्यानंतर पत्रकारांशी बोलण्यासाठी आला. पण त्यावेळी रोहित असं एक वाक्य बोलून गेला की, त्यामधून त्याने प्रशिक्षक गौतम गंभीर यांना टोला लगावल्याचे समोर येत आहे.
रोहित शर्मा सामना संपल्यावर म्हणाला की, ” WTC Final बाबत आता भाष्य करणे योग्य ठरणार नाही, कारण त्या गोष्टीला अजूनही बराच वेळ आहे. आम्ही हा सामना गमावला आहे, त्यामुळे त्याचा यावर काय परीणाम होईल आणि यापुढे काय घडू शकतं, हे आता सांगता येणार नाही. पण आता मी दुखावलो आहे. कारण भारताने फक्त सलग दोन सामने गमावले नाहीत तर मालिकाही हातून निसटली आहे. गेल्या दोन सामन्यांत आपल्याकडून चांगली कामगिरी झाली नाही, त्यामुळे मी दुखावलो आहे. पण एक संघ म्हणून आम्ही काही गोष्टी करणे महत्वाचे आहे. फक्त फलंदाज नाही तर गोलंदाजांकडूनही चुका घडल्या आहेत. जेव्हा तुम्ही कसोटी सामना गमावता तेव्हा कोणत्या एका गोष्टीमुळे तुमचा पराभव होत नसतो, तर सर्व गोष्टी त्यासाठी कारणीभूत ठरत असतात.”
रोहित पुढे म्हणाला की, ” कोणत्याही सामन्यात तुम्ही एक संघ म्हणून कशी कामगिरी करता, हे सर्वात महत्वाचे असते. जेव्हा तुम्ही एखादा कसोटी सामना जिंकता तेव्हा संपूर्ण संघातील सर्वांना ते श्रेय दिलं जातं. पण जेव्हा तुम्ही कसोटी सामना गमावता तेव्हा संघातील प्रत्येकाने पराभवाची जबाबदारी घ्यायला हवी. ” रोहित शर्मा पराभवाने व्यथित झाला असला तरी त्याने जे खरं आहे ते सांगितलं आहे. जेव्हा भारतीय संघ जिंकतो तेव्हा गौतम गंभीर यांचे कौतुक होते. विजयानंतर गंभीर सोशल मीडियावर पोस्टही करतात. पण पराभवानंतर मात्र त्यांना दोषी धरले जात नाही किंवा ते कोणतीही पोस्ट करत मनातील भावना व्यक्त करत नाहीत. फक्त विजयानंतरच त्यांच्या या गोष्टी पाहायला मिळतात. त्यामुळे रोहितने गंभीर यांनाच टोला हाणल्याचे चाहते म्हणायला लागले आहेत.
माझं मराठी एवढं चांगलं नाही ते पुढचा गिल, जैस्वाल, बुमराह तुमच्यापैकीच; रोहित शर्माचं मराठीत भाषण
रोहित शर्माच्या नेतृत्वाखाली भारताने कसोटी मालिका गमावली आहे. पण या मालिकेतील अखेरचा कसोटी सामना शिल्लक आहे. त्यामुळे या सामन्यात भारतीय संघ कशी कामगिरी करतो, याकडे सर्वांचे लक्ष लागलेले असणार आहे. कारण या सामन्यात विजय मिळवून भारतीय संघाला आपली लाज वाचवता येऊ शकते.
स्रोत : महाराष्ट्र टाईम्स
