IPL 2025 Auction: IPL 2025 पूर्वी मेगा लिलाव होणार आहे. हा लिलाव नोव्हेंबरच्या शेवटच्या आठवड्यात किंवा डिंसेबरच्या सुरूवातीला होणार आहे. या मेगा लिलावापूर्वी, सर्व संघ राईट टू मॅच कार्डसह जास्तीत जास्त ६ खेळाडू रिटेन करू शकतात. एखाद्या संघाने ५ खेळाडूंना कायम ठेवल्यास, त्यांना लिलावाच्या वेळी एक RTM वापरण्याची संधी असेल. ६ खेळाडूंना कायम ठेवताना, संघात ५ कॅप्ड खेळाडू तर एक अनकॅप्ड खेळाडूचाही समावेश असेल. सर्व फ्रँचायझींना रिटेन केलेल्या खेळाडूंची यादी ३१ ऑक्टोबरला आयपीएल गव्हर्निंग काऊन्सिलकडे सादर करायची आहे.
केएल राहुल मेगा लिलावात उतरणार?
लखनौ सुपर जायंट्स संघ निकोलस पुरन, मयंक यादव, रवी बिश्नोई यांना कॅप्ड खेळाडू म्हणून कायम ठेवण्यासाठी तयार आहे. याशिवाय मोहसीन खान आणि आयुष बडोनी या युवा खेळाडूंना अनकॅप्ड खेळाडू म्हणून कायम ठेवू शकतात. अनकॅप्ड खेळाडूला कायम ठेवण्यासाठी फ्रँचायझीला ४ कोटी रुपये खर्च करावे लागतील. या पाच खेळाडूंचे लखनौ संघात पुनरागमन होणार हे जवळपास निश्चित झाले आहे. याशिवाय मेगा लिलावासाठी लखनऊ संघाक़े आरटीएमचा पर्यायही असेल.
या खेळाडूला मिळू शकते कर्णधारपदाची जबाबदारी
लखनौचा संघाच्या रिटेन खेळाडूंच्या यादीत निकोलस पुरन पहिल्या स्थानी असू शकतो आणि त्यासाठी १८ कोटी रुपये संघ खर्च करू शकतो, असे मानले जात आहे. IPL 2024 मध्ये केएल राहुलच्या अनुपस्थितीतही पुरनने संघाची कमान सांभाळली होती. तो स्फोटक फलंदाजीसाठी ओळखला जातो आणि तो स्वत:च्या फलंदाजीच्या जोरावर सामना फिरवू शकतो, यष्टिरक्षकाची जबाबदारीही तो पार पाडू शकतो. त्याने आतापर्यंत ७६ IPL सामन्यांमध्ये १७६९ धावा केल्या आहेत, ज्यात ९ अर्धशतकांचा समावेश आहे. लखनौचा संघ त्याला कर्णधारही बनवू शकतो.
लखनौ संघाने आयपीएल २०२२ आणि २०२३ मध्ये प्लेऑफमध्ये प्रवेश केला होता, परंतु त्यानंतर संघ एलिमिनेटरच्या पुढे जाऊ शकला नाही. याशिवाय, संघाने आयपीएल २०२४ मध्ये अत्यंत खराब कामगिरी केली. या मोसमात ते प्लेऑफपर्यंत पोहोचण्यापासून खूप दूर होते तर पॉइंट टेबलमध्ये ७व्या क्रमांकावर होते.
स्रोत : लोकसत्ता
