IND vs NZ: “आज भारताला द्रविडची आठवण येत असेल…”, पाकिस्तानी माजी खेळाडूने व्हाईटवॉशनंतर गौतम गंभीरला सुनावलं, IPL रणनितीवर उपस्थित केले प्रश्न

भारतीय संघाला तिसऱ्या कसोटीत विजयासाठी १४७ धावांचे आव्हान दिले होते. भारतीय संघाने कसोटी मालिका आधीच २-० ने गमावली होती. पण तिसरा सामना जिंकण्याची संधी संघाकडे होती. पण भारताच्या फलंदाजांनी पुन्हा एकदा निराशा केली. भारताच्या टॉप ऑर्डरमधील फलंदाजांचा डाव पत्त्यांसारखा कोसळला. ऋषभ पंतच्या ६४ धावांच्या खेळीच्या जोरावर भारतीय संघ जिंकेल अशी आशा होती. पण वानखेडेवरील फिरकीला अनुकूल लाल मातीच्या खेळपट्टीवर भारतीय संघ फार काळ टिकू शकला नाही आणि परिणामी संघाला २५ धावांनी पराभव पत्करावा लागला.

पाकिस्तानच्या माजी खेळाडूने व्हाईटवॉशनंतर गौतम गंभीरच्या IPL रणनितीवर ओढले ताशेरे

भारताच्या या मोठ्या पराभवानंतर पाकिस्तानचा माजी खेळाडू बासित अलीने संघाच मुख्य प्रशिक्षक गौतम गंभीरच्या आयपीएल सामन्यांमधील रणनितीवरून त्याला सुनावलं आहे. बासित अली म्हणाला, “आज भारताला राहुल द्रविडची आठवण येत असेल. राहुल द्रविड कसोटी सामन्यापूर्वी ४ दिवसांचं प्लॅनिंग करायचे. हे लोक २ किंवा अडीज दिवसांचं प्लॅनिंग करतात.”

बासित अली पुढे म्हणाला, “तुम्ही आजकाल प्रशिक्षकांच्या मुलाखती ऐकत असाल की कसोटी सामने हल्ली ड्रॉ होत नाहीत. हो बरोबर आहे. पण तुम्ही आयपीएलचे जेतेपद जिंकून आला आहात आणि म्हणून कसोटी सामना पण त्याच पद्धतीने खेळला पाहिजे, असा त्याचा अर्थ होत नाही. टी-२० क्रिकेट हे फार वेगळं आहे. अश्याने तुमचा कसोटी सामना खराब होईल.”

इंग्लंडच्या बॅझबॉलचं उदाहरण देत पाकिस्तानचा माजी खेळाडू पुढे म्हणाला, “सर्वच जण आता बॅझबॉलची कॉपी करू पाहतायत. पण बॅझबॉल म्हणजेच इंग्लंड अजूनपर्यंत वर्ल्ड टेस्ट चॅम्पियनशिपच्या अंतिम फेरीसाठी पात्र ठरला आहे का? मग बॅझबॉलप्रमाणे खेळण्याचा उपयोग काय?”