Pune News : दसऱ्याला कारविक्री टॉप गिअरमध्ये

एमपीसी न्यूज : दसऱ्याच्या मुहूर्तावर पुणे आणि पिंपरी-चिंचवड शहरात जवळपास चार हजार कारची विक्री झाली आहे. दुचाकीचे शहर अशी ओळख असलेल्या पुण्यात लॉकडाउननंतर टॉप गिअरमध्ये असलेली कारविक्री अद्यापही कायम आहे. पुण्यात २३३९; तर पिंपरी-चिंचवडमध्ये १४६० कारची विक्री झाली आहे. दोन्ही आरटीओत नवरात्रांत मुहूर्तावर एकूण १० हजार ८५ वाहनांची नोंदणी झाली आहे.

साडेतीन मुहूर्तांपैकी एक असलेल्या दसऱ्याला वाहन खरेदी करण्याचे प्रमाण अधिक असते. यंदा गुढीपाडवा आणि अक्षय तृतीया हे दोन्ही मुहूर्त लॉकडाउनमध्येच आले असल्याने पुरेशी वाहन खरेदी झाली नव्हती. त्यामुळे दसऱ्याच्या मुहूर्तावर नेहमीसारखी वाहन खरेदी होणार का, असा प्रश्न उपस्थित झाला होता. मात्र, प्रत्यक्षात गेल्या वर्षाएवढीच वाहनविक्री झाली आहे.

पुणे आरटीओ कार्यालयात ३७५१ दुचाकींची नोंदणी झाली असून, २३३९ चारचाकीची नोंदणी झाली आहे. तर, ३६५ व्यवसायिक वाहनांची नोंदणी झाली आहे. पिंपरी-चिंचवड आरटीओत १९२३ दुचाकींची नोंदणी झाली आहे. तर, १४६० कारची नोंदणी असून, २४७ अन्य व्यावसायिक वाहनांची नोंदणी झाली आहे. याद्वारे पुणे आरटीओला ३१ कोटी ९७ लाख रुपये आणि पिंपरी-चिंचवड आरटीओला २४ कोटी १३ लाख रुपये महसूल प्राप्त झाला आहे.