Pune : विद्यापीठ चौकातील तरुणावर गोळीबार; हिंजवडी पोलिसांनी एकाला घेतले ताब्यात

एमपीसी न्यूज – पुणे विद्यापीठ चौकातील तरुणावर झालेल्या गोळीबार प्रकरणी हिंजवडी पोलिसांनी एकाला नाकाबंदी करून पकडले आहे. ही घटना आज (शनिवारी) सकाळी साडेअकराच्या सुमारास घडली होती. दरम्यान, विद्यापीठ चौकात भरदिवसा गर्दीत हा प्रकार घडल्याने एकच खळबळ उडाली आहे. 

समीर किसन येणपुरे (वय 39, रा. मेहदले गैरेज, एरंडवणा) असे गोळीबार झालेल्या तरुणाचे नाव आहे. याप्रकरणी गोळीबार करणा-या शुक्राचार्य मधाळे आणि त्याच्या साथीदाराला हिंजवडी पोलिसांनी अटक केली आहे.

समीर याचा फ्लेक्स लावण्याचा व्यवसाय आहे. तर, आरोपी शुक्राचार्य मधाळे याची एरंडवणे भागात टपरी होती. अतिक्रमण विभागाने मधाळे याची टपरी तोडली. समीर येणपुरे याच्या सांगण्यावरुनच अतिक्रमण विभागाने ही कारवाई केली, असा संशय मधाळे याला होता. आज शनिवारी समीर विद्यापीठ चौकातून जात होता. त्यावेळी दुचाकीवरुन आलेल्या शुक्राचार्य याने समीर याच्यावर गोळीबार केला. त्यात जखमी झालेल्या समीर याच्यावर एका खासगी रुग्णालयात उपचार सुरु आहेत. वर्दळीतील आणि भरदिवसा घडलेल्या घटनेने एकच खळबळ उडाली आहे.

दरम्यान, गोळीबार करणा-या शुक्राचार्य आणि त्याच्या साथीदाराला हिंजवडी पोलिसांनी नाकाबंदी करून पकडले आहे. चतुःशृंगी पोलीस पुढील तपास करीत आहेत.