Chikhli : कुदळवाडीच्या महापालिकेच्या शाळेमध्ये आठवी ते दहावीचे वर्ग चालू करण्याची मागणी
एमपीसी न्यूज – कुदळवाडी येथील महापालिकेच्या शाळेमध्ये इयत्ता आठवी ते दहावीचे वर्ग सुरु करण्याची मागणी स्वीकृत सदस्य दिनेश यादव यांनी पिंपरी-चिंचवड महापालिकेच्या शिक्षण मंडळाच्या सभापती सोनाली गव्हाणे यांच्याकडे लेखी निवेदनांद्वारे केली आहे.
दिलेल्या निवेदनांत त्यांनी म्हटले आहे की, पिंपरी-चिंचवड महापालिका हद्दीतील मौजे टाळगाव चिखली, या भागात नागरीवस्ती मोठया प्रमाणात आहे.या भागातील कुदळवाड येथे पिंपरी-चिंचवड महानगरपालिकेची शाळा क्रमांक 89 कुदळवाडी या शाळेमध्ये इयत्ता पहिली ते सातवी पर्यंतचे वर्ग चालू आहे. याठिकाणी गोरगरीब विद्यार्थी शिक्षण घेत आहेत.
कुदळवाडी मनपा शाळा येथे पिंपरी-चिंचवड महानगरपालिका फ प्रभाग स्थापत्य विभागाकडून माध्यमिक शाळेकरिता नवीन इमारत बांधण्याचे काम सुरु आहे. हे काम तीन ते चार महिन्याच्या कालावधीत पूर्ण होणार आहे. तोपर्यंत या विद्यार्थ्यांना दुस-या शाळेमध्ये जावे लागते. विद्यार्थ्यांची गैरसोय होऊ नये म्हणून विद्यार्थ्यांकरिता इयत्ता आठवी ते दहावीचे वर्ग माध्यमिक शिक्षण विभागाकडून चालू करण्यात यावे अशी मागणी करण्यात आली आहे.
