Pune : खोलीत आढळले दोन तरुणांचे मृतदेह ; पेस्ट कंट्रोल केल्यामुळे दोघांचा बळी गेल्याची शक्यता

एमपीसी न्यूज- खोलीत झालेले ढेकूण घालवण्यासाठी केलेल्या पेस्ट कंट्रोलमुळे दोघा कँटीन कर्मचाऱ्यांना आपला जीव गमवावा लागला. ही घटना भारती विद्यापीठ पोलीस ठाण्याच्या हद्दीत घडली.

अजय बेलदार ( रा. जळगाव ) व अनंता खेडकर ( रा. बुलढाणा) अशी मृत्यू झालेल्या दोन कँटीन कर्मचाऱ्यांची नावे आहेत.

_MPC_DIR_MPU_II

भारती विद्यापीठ पोलीस ठाण्याचे वरिष्ठ पोलीस निरीक्षक विष्णू पवार यांनी याबाबत माहिती दिली. पुण्यातील एका महाविद्यालयाच्या कॅन्टीनमध्ये हे दोन तरुण काम करत होते. हॉटेल मालकानेच त्यांना राहण्यासाठी एक खोली दिली होती. या खोलीत ढेकूण झाल्याने तीन दिवसांपूर्वी खोलीत पेस्ट कंट्रोल करून खोली पूर्णपणे पॅकबंद करण्यात आली होती. त्यानंतर ते दोघेजण तीन दिवस एका मित्राच्या घरी जाऊन राहिले होते. मंगळवारी रात्री ते परत आपल्या खोलीवर येऊन झोपले.

बुधवारी बराच वेळ झाला तरी कामावर न आल्याने कॅन्टीन मॅनेजरने त्यांच्या खोलीवर येऊन पाहिले असता दरवाजा आतून बंद होता. खिडकीतून पाहिले असता दोघेही झोपलेले आढळून आले. त्यानंतर कॅन्टीन मॅनेजरने दरवाजा तोडून आत प्रवेश केला आणि दोघांनाही रुग्णालयात दाखल केले. तपासणीअंती डॉक्टरांनी दोघांनाही मृत घोषित केले. दोघांचेही मृतदेह शवविच्छेदनासाठी ससून रुग्णालयात पाठवण्यात आले असून सहाय्यक पोलीस निरीक्षक सुर्यवंशी अधिक तपास करीत आहेत.

MPCNEWS आता टेलीग्रामवर आहे. आमचं चॅनेल (@mpcnews1) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.