Badminton : अमनोरा-पीवायसी एचटीबीए कप बॅडमिंटन स्पर्धेत अनन्या गाडगीळला दुहेरी मुकुट
एमपीसी न्यूज – हवेली तालुका बॅडमिंटन संघटना (एचटीबीए) आणि पीवायसी हिंदू जिमखाना क्लब यांच्या संयुक्त विद्यमाने आयोजित अमनोरा-पीवायसी एचटीबीए बॅडमिंटन (Badminton) कप अजिंक्यपद स्पर्धेत अनन्या गाडगीळने दुहेरी मुकुट मिळवला. तिने 17 आणि 19-वर्षांखालील मुलींच्या एकेरीचे विजेतेपद पटकावले.
पीवायसी हिंदू जिमखान्याच्या बॅडमिंटन (Badminton) कोर्टवर ही स्पर्धा झाली. स्पर्धेतील 17 वर्षांखालील मुलींच्या एकेरीच्या अंतिम फेरीत अग्रमानांकित अनन्याने ओजल रजकवर 15-8, 15-7 अशी 16 मिनिटांत मात केली आणि विजेतेपद पटकावले. यानंतर अनन्याने 19 वर्षांखालील मुलींच्या गटाच्या अंतिम फेरीत श्रेया शेलारवर 15-17, 15-11, 15-9 अशी 39 मिनिटांत मात केली आणि दुहेरी मुकुट मिळवला. 16 वर्षीय अनन्या ही केळकर अकादमीत नीता केळकर यांच्याकडे सराव करते.
स्पर्धेतील अकरा वर्षांखालील मुलांच्या अंतिम फेरीत सिबतैनरझा सोमजीने मीर शहझार अलीवर 15-5, 15-5 अशी बारा मिनिटांत मात केली आणि विजेतेपद पटकावले. अकरा वर्षांखालील मुलींच्या गटात अग्रमानांकित ख्यात्री कत्रेने अपेक्षेप्रमाणे जेतेपद पटकावले. तिने दुसऱ्या मानांकित तेजस्वी भुतडावर 15-3, 15-3 अशी मात केली. यानंतर 13 वर्षाखालील मुलांच्या गटात अरहम रेडासनीने बाजी मारली.
अग्रमानांकित अरहमने चौथ्या मानांकित कपिल जगदाळेला 15-7, 15-7 असे पराभूत केले. तेरा वर्षांखालील मुलींच्या गटात अग्रमानांकित शरयू रांजणेने जेतेपद मिळवले. तिने विजेतेपदाच्या लढतीत दुसऱ्या मानांकित सोयरा शेलारला 16-14, 15-11 असे 22 मिनिटांत पराभूत केले.
