भाई व्यक्ती की वल्ली ““( उत्तरार्ध)….. मनोहारी दर्शन….

(दीनानाथ घारपुरे)

एमपीसी न्यूज- पुरुषोत्तम लक्ष्मण देशपांडे, सर्वच रसिकांचे लाडके व्यक्तिमत्व, आपल्या लेखनामधून, अभिनयातून, संगीतामधून, पेतीवाद्नातून, नाटकातून, चित्रपटातून, भाषणामधून, रसिकजनांना फक्त त्यांनी आनंदाचा वर्षाव केला, त्यांनी लिहिलेल्या आणि सादर केलेल्या नाट्यकृती, चित्रकृती मधून मनोरंजन केले, त्यांच्या आयुष्यात सुद्धा कौटुंबिक, सामाजिक इत्यादी स्तरावर चढ-उताराचे प्रसंग आले पण त्यांनी त्याकडे सुद्धा सकारात्मक वृतीने पाहिले, भाई व्यक्ती की वल्ली पूर्वार्ध आणि उत्तरार्ध मिळून त्यांच्या आयुष्यातील मनोहारी घटनांचे दर्शन सादर केले आहे.

भाई व्यक्ती की वल्ली उत्तरार्ध ची प्रस्तुती वायकॉम १८ मोशन पिक्चर्स ने केली असून महेश मांजरेकर मुव्हीज ची निर्मिती आहे. निर्माते महेश मांजरेकर, अविनाश अहाले, वैभव पंडित, महेश पटेल, वीरेंद्र उपाध्ये हे आहेत. दिग्दर्शन महेश मांजरेकर यांचे लाभले आहे. पटकथा गणेश मतकरी, संवाद रत्नाकर मतकरी, संगीत अजित परब, छायाचित्रण करण रावत, रंगभूषा विक्रम गायकवाड यांचे असून या मध्ये सागर देशमुख, इरावती हर्षे, विजय केंकरे, शुभांगी दामले, अश्या अनेक नामवंत कलाकारांचा सहभाग लाभला आहे.

पुरुषोत्तम लक्ष्मण देशपांडे यांच्या जीवनामधील अनमोल क्षणांची एकत्रित बांधणी करून भाई व्यक्ती कि वल्ली मध्ये ती सादर केली आहे. त्यामध्ये त्यांनी केलेली दूरदर्शन मधील नोकरी, आनंदवन मध्ये बाबा आमटे यांच्या कडील सहभाग, मुक्तांगण, बहुरूपी तर्फे बटाट्याच्या चाळीची निर्मित, आचार्य प्रल्हाद केशव अत्रे यांनी केलेलं त्यांचे कौतुक, त्याच बरोबर त्यांनी निर्माण केलेल्या ट्रस्ट च्या माध्यमातून अनेक संस्थाना केलेली मदत, अश्या प्रसंगा बरोबरच त्यांना मिळालेला महाराष्ट्र भूषण पुरस्कार, आणि आणीबाणी च्या काळात त्यांनी व्यक्त केलेली मते, शिवाय फुलराणी, सुंदर मी होणार नाटकाच्या तालमीचे प्रसंग इत्यादीवर हा सिनेमा प्रकाश टाकतो.

सुनीताबाईनी त्यांना पूर्णपणे साथ दिली, वसंतराव देशपांडे, कुमार गंधर्व, भीमसेन जोशी, हिराबाई बडोदेकर, माणिक वर्मा ह्यांची जमलेली मैफल हि आनंद देऊन जाते, आनंदवन मध्ये त्यांनी सादर केलेलं “ नाच रे मोरा “ हे गीत सुद्धा मन प्रसन्न करते. तसेच सुनीताबाई आणि पु ल देशपांडे यांच्यामधील कौटुंबिक प्रसंग मनाला चटका लाऊन जातात.

भाई व्यक्ती की वल्ली { उत्तरार्ध } हा सिनेमा मनाला अधिक भावतो, या चित्रपटातील सर्वच कलाकारांची कामे सुरेख, उत्तम झाली आहेत. एक सुरेख मनोहारी दर्शन ह्या सिनेमातून अनुभवायला मिळेल.

MPCNEWS आता टेलीग्रामवर आहे. आमचं चॅनेल (@mpcnews1) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.