Pimpri News : शहरात नाट्यसंकुल उभारण्याचा संकल्प –  भाऊसाहेब भोईर

एमपीसी न्यूज – कलाक्षेत्रात जात, पात, धर्म, पंथ नसतो. या क्षेत्राच्या संवर्धनासाठी काम करणारी प्रत्येक व्यक्ती ही कलाकारच आहे, असे प्रतिपादन अखिल भारतीय मराठी नाट्य परिषदेचे पिंपरी-चिंचवड अध्यक्ष भाऊसाहेब भोईर यांनी केले. शहरात एक नाट्यसंकुल उभारण्याचाही संकल्प त्यांनी केला आहे.

नाट्य परिषदेचे प्रमुख कार्यवाह सुहास जोशी, खजिनदार किरण येवलेकर, सहखजिनदार संतोष शिंदे, सदस्य नरेंद्र आमले, गौरी लोंढे, सुदाम परब आदी उपस्थित होते.

भाऊसाहेब भोईर म्हणाले की, कलाक्षेत्रामुळे लय, ताल कळू लागला. पण, तोल ढळू दिला नाही. राजकारणात जरी मोठी पदे मिळाली नसली तरी कलाक्षेत्रामुळे मिळालेली श्रीमंत मनाची माणसे आणि पदे मला ‘पद्मश्री’ प्रमाणेच आहेत. पंचवीस वर्षांपूर्वी शरद पवार यांच्या हस्ते आठ ऑगस्टला या संस्थेचे उद्‌घाटन झाले. मागील पंचवीस वर्षांत या शाखेच्या वतीने आशा भोसले पुरस्कार, बालनाट्य स्पर्धा, रामगणेश गडकरी राज्यस्तरीय एकांकीका स्पर्धा, राज्यस्तरीय कवी संमेलने, पु. ल. देशपांडे लेखन स्पर्धा, स्थानिक कलाकारांच्या कलागुणांना संधी उपलब्ध करुन देण्यासाठी पिंपरी-चिंचवड आयडॉल स्पर्धा, राज्यस्तरीय राजा गोसावी बाल नाट्य शिबीरांचे आयोजन तसेच राज्यस्तरीय बालनाट्य स्पर्धांचे आयोजन मागील पंचवीस वर्षात केले.

दरवर्षी संस्थेच्या वर्धापनदिनानिमित्त ज्येष्ठ रंगकर्मी आणि नवोदित कलाकारांना ज्येष्ठ कलाकारांच्या नावे विविध सहा पुरस्कार देऊन गौरविण्यात येते. महासाधू मोरया गोसावी यांच्या पदस्पर्शाने पावन झालेल्या या भूमीत चापेकर बंधूंच्या प्रेरणेने संस्थेच्या पंचवीसाव्या वर्धापनदिनाचे औचित्य साधून कोरोनाचे संकट दूर झाल्यावर शहराच्या कानाकोप-यात पंचवीस आठवडे विविध सांस्कृतिक कार्यक्रम घेण्याचे नियोजन आहे. तसेच या क्षेत्रात योगदान देणा-या शहरातील काही संस्था, व्यक्ती आणि कलाकारांचा सन्मान करण्याचे नियोजन असल्याचे भोईर यांनी सांगितले.

पुढील आठवड्यात उपमुख्यमंत्री अजित पवार यांच्या उपस्थितीत आणि राज्यातील ज्येष्ठ कलाकारांच्या उपस्थितीत रौप्यमहोत्सवी कार्यक्रम करण्याचे नियोजन आहे. तसेच शहरात एक नाट्यसंकुल उभारण्याचाही संकल्प आहे. या शहरात नाट्य चळवळ वाढीस लागावी म्हणून विविध पक्षांच्या पदाधिका-यांनीही सहकार्य केले आहे, असेही भोईर म्हणाले.