Bhosari : भोसरी, निगडी, हिंजवडीमधून तीन महागड्या दुचाकी चोरीला

Three expensive two-wheelers were stolen from Bhosari, Nigdi and Hinjewadi

0

एमपीसी न्यूज – भोसरी, निगडी आणि हिंजवडी परिसरातून एक लाख 25 हजार रुपये किमतीच्या तीन दुचाकी चोरीला गेल्याच्या घटना उघडकीस आल्या आहेत. याबाबत सोमवारी (दि. 29) अज्ञात चोरट्याच्या विरोधात गुन्हे दाखल करण्यात आले आहेत.

सत्यमप्रकाश योगेंद्र माल (वय 27, रा. दापोडी) यांनी भोसरी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी माल यांनी त्यांची 80 हजार रुपये किमतीची दुचाकी (एमएच 14 / एचआर 1192) 26 जून रोजी रात्री त्यांच्या सोसायटीच्या पार्किंगमध्ये पार्क केली.

रात्री अज्ञात चोरट्यांनी त्यांची दुचाकीचे लॉक तोडून चोरून नेली. 27 जून रोजी सकाळी नऊ वाजताच्या सुमारास हा प्रकार उघडकीस आला. भोसरी पोलीस तपास करीत आहेत.

दिलीप राजाराम भोसले (वय 59, रा. बीजे कॉर्नर, निगडी) यांनी निगडी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी यांनी त्यांची 30 हजार रुपये किमतीची दुचाकी ( एमएच 14 / ईएल 6139) त्यांच्या सोसायटीच्या पार्किंगमध्ये 21 जून रोजी पार्क केली होती.

अज्ञात चोरट्यांनी दुचाकीचे लॉक तोडून दुचाकी चोरून नेली. 22 जून रोजी हा प्रकार उघडकीस आला आहे. निगडी पोलीस तपास करीत आहेत.

आरती प्रकाश वैदय (वय 25, रा. लक्ष्मी चौक, हिंजवडी) यांनी हिंजवडी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी त्यांची 15 हजार रुपये किमतीची दुचाकी (एमएच 35 / व्ही 7276) राहत्या सोसायटीच्या पार्किंगमध्ये पार्क करून लॉकडाऊन असल्यामुळे 20 मार्च रोजी सायंकाळी त्यांच्या मूळ गावी गोंदिया येथे गेल्या.

त्यांचे काम सुरु झाल्याने ३ जून रोजी त्या परत हिंजवडी येथे आल्या. त्यावेळी त्यांची दुचाकी अज्ञात चोरट्यांनी चोरून नेल्याचे त्यांच्या निदर्शनास आले.

मात्र, गावाहून आल्यानंतर 15 दिवस होम क्वारंटाईन केल्यामुळे त्यांनी त्यांच्या दुचाकीचा शोध घेतला नाही. त्यानंतर दुचाकीचा शोध घेतला. मात्र, दुचाकी मिळून आली नाही म्हणून 29 जून रोजी पोलिसात तक्रार दाखल केली आहे.

सोसायटीच्या पार्किंगमधून दुचाकी चोरीला जाण्याचे प्रमाण वाढत आहे. रस्त्याच्या बाजूला, घरासमोरील मोकळ्या जागेत पार्क केलेली वाहने चोरी होत आहेत.

मात्र, आता सोसायटीच्या पार्किंग मधून देखील वाहने चोरीला जात आहेत. बहुतांश सोसायट्यांमध्ये सुरक्षा रक्षक, सीसीटीव्ही कॅमेरा तसेच अन्य सुरक्षेची साधने नसल्यामुळे हे प्रकार घडत आहेत. त्यातच पोलिसांचा वावर देखील कमी झाल्याचे या घटनांवरून दिसून येत आहे.

MPCNEWS आता टेलीग्रामवर आहे. आमचं चॅनेल (@mpcnews1) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.
You might also like