एमपीसी न्यूज – इंद्रायणी नदीपात्रात आज सायंकाळी साडेपाच वाजता एकजण बुडत असल्याची घटना घडली. त्याला वाचवण्यासाठी दोनजण पाण्यात उतरले. मात्र त्याला वाचवण्याच्या नादात दोघांपैकी आणखी एकजण बुडाला. तर तिस-याला वाचविण्यात यश आले आहे. ही घटना आंबी येथे घडली.
शंकर दत्तात्रय वाडेकर (वय २६ रा.इंदोरी ता. मावळ) असे पाण्यात बुडून मृत्युमुखी पडलेल्या युवकाचे नाव आहे. तर तुषार भड (रा. नाशिक) या बुडालेल्या व्यक्तीचा शोध सुरु आहे. राहुल माने (रा. सोलापूर) याचा जीव वाचला आहे.
वरिष्ठ पोलीस निरीक्षक रंगनाथ उंडे यांनी दिलेल्या माहितीनुसार, राहुल माने व तुषार भड हे रस्त्याचे काम करणारे मजूर असून त्यांना शंकर वाडेकर इंद्रायणी नदीपात्रात बुडत असताना दिसला. त्याला वाचविण्यासाठी राहुल माने व तुषार भड धावून गेले पण पाण्यात दम लागल्याने शंकर वाडेकर व तुषार भड बुडाले. यात सुदैवाने राहुल माने वाचला.
दरम्यान, घटनास्थळी पोलीस उपनिरीक्षक राहुल कोळी व त्याचे कर्मचारी पोहोचून त्याचा शोध घेण्यासाठी एनडीआरएफ पथकाला बोलाविले. पथक दाखल होऊन शोध घेतला असता शंकर वाडेकर याचा मृतदेह सापडला. तुषार भड याचा शोध सुरू आहे. अंधार पडल्याने शोध कार्य थांबले. एमआयडीसी पोलिसांचा पुढील तपास सुरू आहे.
