Chinchwad news : संभाजीनगर येथे 45 वर्षावरील दिव्यांगांसाठी स्वतंत्र लसीकरण केंद्र
एमपीसी न्यूज -पिंपरी-चिंचवड महापालिका दिव्यांग कक्ष व रोटरी क्लब ॲाफ पिंपरी यांच्या सहकार्याने शहरातील 45 वर्षावरील दिव्यांगांसाठी स्वतंत्र कोविड 19 लसीकरण केंद्र रोटरी क्लब सभागृह संभाजीनगर, चिंचवड येथे उद्या (बुधवार) पासून सुरू करण्यात येणार आहे. शहरातील सर्व पात्र दिव्यांग व्यक्तींनी या केंद्राचा लाभ घ्यावा असे, आवाहन महापालिका आयुक्त राजेश पाटील यांनी केले.
कोरोनाचा मुकाबला करण्यासाठी कोविड 19 लसीकरण केंद्र शहरात विविध ठिकाणी कार्यरत आहेत. दिव्यांग व्यक्तींसाठी सर्व सुविधा उपलब्ध करून स्वतंत्रपणे लसीकरण केंद्र रोटरी क्लबच्या सहकार्याने सुरू करण्यात येत आहे. असा उपक्रम राबविणारी पिंपरी-चिंचवड ही राज्यातील पहिली महापालिका ठरणार आहे.
पिंपरी-चिंचवड शहरात 45 वर्षावरील एकूण 2145 दिव्यांग नागरिक असून ते लसीकरणासाठी पात्र आहेत.
नागरवस्ती विभागाकडील दिव्यांग कक्ष विभागाचे उपायुक्त अजय चारठणकर व सहाय्यक आयुक्त अण्णा बोदडे यांनी रोटरी क्लब पिंपरीचे अध्यक्ष मेहूल परमार यांच्या समवेत दिव्यांगांच्या लसीकरणाचे नियोजन केले आहे. सर्व दिव्यांगांना लसीकरण केंद्रावर आणण्यासाठी स्वतंत्र वाहनांची व्यवस्था केली आहे.
लसीकरण केंद्रावर आकुर्डी रूग्णालयाच्या प्रमुख डॅा. सुनिता साळवे यांच्या मार्गदर्शनाखाली वैद्यकिय पथक कार्यरत असणार आहे. कोविड लसीकरण हे सुरक्षित आहे. या माध्यमातून कोरोनापासून बचाव करण्यासाठी प्रयत्न करण्यात येत असून सर्व पात्र दिव्यांग लाभार्थ्यांनी लसीकरण करून घ्यावे, असे आवाहन करण्यात आले आहे.
