Chinchwad : एकटे राहणाऱ्या ज्येष्ठ नागरिकांच्या सेवेत पिंपरी चिंचवड पोलीस; वर्दीतील देवमाणसाचे ज्येष्ठांकडून कौतूक
एमपीसी न्यूज – पिंपरी चिंचवड शहरात एकटे राहणाऱ्या ज्येष्ठ नागरिकांच्या मदतीला पोलिसांनी धाव घेतली आहे. वयोमानानुसार संचारबंदीच्या काळात बाहेर फिरता न येणाऱ्या तसेच कुणाचीही मदत न मिळणाऱ्या ज्येष्ठ नागरिकांच्या सेवेत पिंपरी चिंचवड पोलीस दाखल झाले. ज्येष्ठांना फळे आणि आवश्यक वस्तू दिल्याने ज्येष्ठांनी देखील ‘वर्दीतला देव माणूस धावून आला’ अशा भावना व्यक्त केल्या आहेत.
देशभर संचारबंदी लागू झाल्याने अनेकजण विविध शहरात अडकून पडले आहेत. त्यांना त्यांच्या वृद्ध पालकांकडे येता आलेले नाही. तसेच ज्यांना कोणीही नातेवाईक नाही, असे देखील एकटे राहणारे अनेक ज्येष्ठ नागरिक शहरात आहेत. या नागरिकांना इतरांच्या मदतीशिवाय काही करता येत नाही. तसेच संचारबंदीच्या काळात बाहेर फिरण्यावर बंधन आले असल्याने त्यांची चांगलीच गोची झाली आहे. अशा नागरिकांची पिंपरी चिंचवड पोलिसांनी सोय केली आहे.
पिंपरी चिंचवड पोलिसांनी संचारबंदीच्या काळात एकटे राहत असलेल्या ज्येष्ठ नागरिकांच्या भेटी घेऊन त्यांच्या समस्या जाणून घेतल्या. तसेच त्यांना आवश्यक खाद्य पदार्थ, फळे आणि जीवनावश्यक वस्तू दिल्या. पोलीस घरपोच मदत पोहोचवत असल्याने ज्येष्ठांना मोठा आधार मिळाला आहे.
ज्येष्ठ नागरिकांनी पोलिसांच्या या कामगिरीचे तोंडभरून कौतुक केले आहे. ‘वर्दीतला देवमाणूस मदतीला धावून आला’ अशा भावना देखील या ज्येष्ठ नागरिकांनी व्यक्त केल्या आहेत.
