Chinchwad : चिखली आणि चिंचवडमध्ये वटपौर्णिमा उत्साहात साजरी; पतीच्या दीर्घायुष्यासाठी मागितले मागणे

एमपीसी न्यूज – पती-पत्नीचे नाते सात जन्म टिकावे यासाठी (Chinchwad) ज्येष्ठ पौर्णिमा अर्थात वटपौर्णिमेला सुवासिनींनी वडाची पूजा करून पतीच्या दीर्घायुष्यासाठी साकडे घातले. यानिमित्त चिखली येथील महात्मा फुलेनगर मधील श्री गणेश मंदिराच्या प्रांगणात तसेच शिवतेजनगर येथील श्री स्वामी समर्थ मंदिर या ठिकाणी मंदिराच्या समोर असलेल्या वटवृक्षाची पूजा करण्यासाठी मोठ्या प्रमाणावर महिलांनी गर्दी केली होती. 

आख्यायिकेनुसार सत्यवान आणि सावित्री या दाम्पत्याच्या आयुष्यात आलेला एक दिवस म्हणून वटपौर्णिमा आधुनिक युगातही तितक्याच पारंपरिक पद्धतीने साजरा केली जात आहे. हिंदू धर्मातील सण, प्रथा, परंपरा या निसर्गाच्या संस्कृतीशी जोडल्या गेल्या आहेत. जन्मोजन्मी हाच पती मिळावा यासाठी मनोभावे सौभाग्यवतींनी पूजा केली.

सौभाग्याचं लेणं लेवून मिळेल तिथे वडाच्या झाडाची पूजा करण्यासाठी पोहोचल्या. परिसरात राहणाऱ्या सुवासिनींनी बाजारातून वडाची फांदी आणून घरी किंवा अपार्टमेंटच्या बेसमेंटमध्ये, मोकळ्या पटांगणात पूजा न करता परंपरेनुसार वडाच्या झाडाला सुवासिनींनी सात फेरे मारीत धागा बांधला. त्यानंतर तिथे उपस्थित ब्राह्मणांना दान-दक्षिणा देत इतर सुवासिनींनी सौभाग्याचं लेणं हळद-कुंकू लावून, आंब्यांचे वाण देऊन ओट्या भरल्या.

 

वटपौर्णिमेनिमित्त महिलांकडून एकमेकींना शुभेच्छा ही (Chinchwad) दिल्या जात होत्या. सिद्धार्थ गौतम बुद्ध उद्यानातील भल्यामोठ्या डेरेदार वटवृक्षांची पूजा करण्यासाठी महिला वर्गाची झुंबड उडाली होती. त्या ठिकाणी उत्सवाचे रूप आले होते. मंदिराच्या ठिकाणी केळी, सफरचंद, आंबा, जांभूळ आदी वटपौर्णिमेच्या पूजेच्या वस्तूंच्या खरेदीसाठी बाजारपेठेत पतीसह महिलांची गर्दी होती. परिसरात दुपारपर्यंत वडाची पूजा आटोपल्यानंतर घराघरात जाऊन वाण देण्यासाठी महिलांची धावपळ सुरू होती. सर्व महिलांनी नटून थटून पारंपारिक वेशामध्ये येऊन वटवृक्षाची मनोभावे पूजा केली.

Talegaon : मोबाईल चोरी करणाऱ्या सराईतांना अटक, 13 मोबाईल जप्त

वटपौर्णिमेच्या दिवशी चोरीचे प्रमाण अधिक असते त्यामुळे श्रीमंत छत्रपती शिवाजी महाराज प्रतिष्ठानचे कार्यकर्ते महिला भगिनींच्या सुरक्षेसाठी तैनात होते. तसेच चिंचवड येथे उपस्थित महिलांमध्ये महिला मंडळाच्या उपाध्यक्षा अंजली देव, कार्याध्यक्ष सारिका रिकामे, महिला भजनी मंडळाच्या अध्यक्षा देवकाकू तसेच नीलिमा भंगाळे, प्रीती झोपे, केतकी वझे, माही चौरे, इतर महिला मंडळ व सेवेकरी महिला मोठया संख्येने पूजे साठी आल्या होत्या. श्री स्वामी समर्थ प्रतिष्ठानच्या वतीने महिलांचे स्वागत करण्यात आले.