Tuljapur News: नवरात्रोत्सवात बाहेरील भक्तांना तुळजापूर शहरात प्रवेशबंदी
श्रीक्षेत्र तुळजापूर येथील शारदीय नवरात्र महोत्सव यंदा अत्यंत साधेपणाने
- मंदिर प्रशासनाकडून http://www.shrituljabhavani.org या संकेतस्थळावरून दर्शन घेण्याची सुविधा उपलब्ध
- जिल्हाधिकारी कौस्तुभ दिवेगावकर यांनी काढला आदेश
एमपीसी न्यूज – शनिवारपासून सुरू होणाऱ्या शारदीय नवरात्र उत्सवासाठी आणि श्री तुळजाभवानी मंदिर संस्थान करीता मार्गदर्शक सूचना लागू करण्यात आल्या आहेत. यावर्षी नवरात्र महोत्सव अत्यंत साधेपणाने साजरा होणार आहे. या कालावधीत भक्तांना व भाविकांना दर्शनासाठी श्रीक्षेत्र तुळजापूर शहरात वाहनाने अथवा पायी प्रवेश दिला जाणार नाही
नवरात्रीच्या कालावधीत मेळाव्यामध्ये /समारंभामध्ये 50 पेक्षा जास्त व्यक्तींना परवानगी असणार नाही. महाराष्ट्र शासनाने निर्गमीत केलेल्या आदेशानुसार धार्मिक ठिकाणे व प्रार्थना स्थळे शासनाचे पुढील आदेशापर्यंत जनतेसाठी बंद राहतील.
सार्वजनिक मेळावे व समारंभ यांच्यावरील निर्बंध कायम राहतील. गरबा, दांडीया व इतर सांस्कृतिक कार्यक्रम आयोजित करण्यात येणार नाहीत. वरील संदर्भीय परिपत्रकान्वये व साथीच्या आजाराची गांभीर्यता लक्षात घेवून श्रीक्षेत्र तुळजापूर येथील श्री तुळजाभवानी देवीजीचा शारदीय नवरात्र महोत्सव 2020 हा अत्यंत साधेपणाने साजरा करण्याचा निर्णय घेण्यात आलेला आहे.
या कालावधीत भक्तांना व भाविकांना दर्शनासाठी श्रीक्षेत्र तुळजापूर शहरात वाहनाने अथवा पायी प्रवेश दिला जाणार नाही. Covid-19 चा वाढता प्रादुर्भाव पाहता तुळजापूर शहरातील जनतेस किंवा भाविकास महाराष्ट्र शासनाच्या मार्गदर्शक तत्वानुसार मंदिरात प्रवेश दिला जाणार नाही.
उपरोक्त कालावधीमध्ये भवानी ज्योत घेवून जाण्यासाठी कोणत्याही नवरात्र मंडळास, भाविकास श्रीक्षेत्र तुळजापूर शहरास प्रवेश करण्यास प्रतिबंध करण्यांत येत आहे. श्रीदेवीजींचे शारदीय नवरात्र महोत्सवात पुर्वापार प्रथेप्रमाणे होणारे कुलाचार, धार्मिक विधी व पुजा-यासाठी आवश्यक असणारे पुजारी, महंत, सेवेकरी व मानकरी यांनाच मंदिरात प्रवेश देण्यात येईल.
सदर परवानगी उपविभागीय अधिकारी उस्मानाबाद, उपविभागीय पोलीस अधिकारी तुळजापूर, व मंदिर तहसीलदार यांच्या मान्यतेने देण्यात येईल. कोरोना व्हायरस covid-19 या विषाणुचा प्रसार होवू नये म्हणून सदर कालावधीत मंदिर संस्थानकडून रँपीड अँटीजन टेस्टचा तपासणीसाठी अवलंब केला जाणार आहे.
दैनंदिन निर्जतुकीकरण,सामाजिक अंतराचे पालन,आणि मास्क व सॅनिटायझरचा वापर सर्वांसाठी बंधनकारक राहील. या कालावधीत मंदिरात किंवा मंदिर परिसरात मद्यपान,पान,गुटखा,तंबाखू इत्यादी तत्सम पदार्थांचे सेवन करता येणार नाही.
घरी रहा सुरक्षित रहा या संकल्पनेतून शासदीय नवरात्र महोत्सवात भाविक भक्तांनी श्रीदेवीजीचे दर्शन www.shrituljabhavani.org या मंदिर संस्थानचे अधिकृत संकेतस्थळावरुन घेवून प्रशासनास सहकार्य करावे, असे आवाहन श्री तुळजाभवानी मंदिर प्रशासन यांनी केले आहे.
