Hadapsar : एटीएम मशीन फोडण्याच्या तयारीत असलेल्या टोळीस अटक; सव्वालाखाचा ऐवज जप्त
एमपीसी न्यूज – एटीएम मशीन फोडण्याच्या तयारीत असलेल्या टोळीतील दोघांना हडपसर पोलिसांनी अटक करून दरोड्याचा डाव उधळून टाकला आहे. ही कारवाई शनिवारी (दि.8) रात्री साडेअकराच्या दरम्यान हडपसर येथील भागीरथी नगरच्या पाठीमागील बाजूच्या कॅनॉलवर करण्यात आली.
अर्जुनसिंग रजपूतसिंग दुधानी (वय 45, रा. भापकर वस्ती, मांजरी), गोगलसिंग बादलसिंग कल्याणी (वय 46, रा. कोठारी मिल, रामटेकडी) अशी अटक केलेल्या संशयित आरोपींची नावे आहेत. तर त्यांचे टोळातील साथीदार पैतर गब्बरसिंग टाक, तिलकसिंग गब्बरसिंग टाक, विकीसिंग जालिंदर कल्याणी (सर्व रा. रामटेकडी) यांच्याविरुद्ध गुन्हा दाखल केला आहे. याप्रकरणी पोलीस उपनिरीक्षक मंगेश भांगे यांनी फिर्याद दिली आहे.
पोलिसांनी दिलेल्या माहितीनुसार, हडपसर परिसरात गस्त घालत असताना शनिवारी रात्री माळवाडी येथील एका एटीएमवर दरोडा टाकण्याच्या तयारीत असलेले काहीजण पोलिसांना दिसले. पोलिसांनी तातडीने कारवाई करत टोळीतील तिघांना अटक केली. तर टोळीतील तिघेजण तेथून पळून गेले. या कारवाईदरम्यान आरोपींकडून दोन बोअर कटर, 4 लोखंडी कटावण्या, लोखंडी सुरा, मिरची पावडर व एक कार असा तब्बल 1 लाख 27 हजार 950 रूपये किंमतीचा ऐवज पोलिसांनी जप्त केला.
याप्रकरणी पुढील तपास हडपसर पोलीस करत आहेत.
