Hinjawadi : दोन अल्पवयीन मुलींवर बलात्कार; एका मुलीचा मृत्यू

एमपीसी न्यूज – शेतमजुरांच्या दोन अल्पवयीन मुलींवर साखर कारखान्यात काम करणाऱ्या मजुरांच्या मुलांनी बलात्कार केल्याची घटना रविवारी (दि. 16) दुपारी हिंजवडी जवळ घडली. बलात्कार झालेल्या दोन मुलींपैकी एका मुलीची प्रकृती गंभीर आहे तर दुसऱ्या मुलीचा उपचारादरम्यान बुधवारी मृत्यू झाला. याप्रकरणी एकाला अटक करण्यात आली असून एका अल्पवयीन मुलाला ताब्यात घेण्यात आले आहे.

याप्रकरणी आरोपी गणेश निकम याला अटक केली आहे. तर त्याच्या अल्पवयीन साथीदाराला ताब्यात घेतलं आहे.

पोलीस उपायुक्त नम्रता पाटील यांनी दिलेल्या माहितीनुसार, हिंजवडी जवळ राहणाऱ्या शेतमजुरांच्या दोन मुली रविवारी शाळेला सुट्टी असल्याने घराजवळील मंदिरासमोर खेळत होत्या. त्यांच्या घराजवळ असलेल्या साखर कारखान्यातील मजुराच्या दोन मुलांनी मिळून त्या मुलींना चॉकलेटचे आमिष दाखविले आणि मंदिराच्या मागच्या बाजूला येण्यास सांगितले. चॉकलेट मिळणार म्हणून दोघीही मंदिराच्या मागे गेल्या. त्यावेळी आरोपींनी दोघींना मंदिराच्या मागे असलेल्या दाट झाडीमध्ये नेले. तिथे त्यांच्यावर बलात्कार केला. त्यातील एका मुलीवर दोघांनी मिळून बलात्कार केला. त्यामुळे तिला फार मोठा धक्का बसला. दोघींनाही मानसिक आणि शारीरिक इजा झाली. दोघींना रुग्णालयात उपचारासाठी दाखल करण्यात आले. त्यातील एका मुलीचा उपचारादरम्यान काल बुधवारी मृत्यू झाला तर दुसऱ्या मुलीवर अतिदक्षता विभागात उपचार सुरू आहेत.

घडलेला प्रसंग घरच्यांना समजला तेंव्हा त्यांनाही मोठा धक्का बसला. सुरुवातीला त्यांनी तक्रार नोंदविण्यास नकार दिला, मात्र पोलिसांनी त्यांना विश्वास दिला. त्यामुळे मुलीच्या आईने फिर्याद दिली. एक पीडित मुलगी बोलू शकत असल्याने तिच्या मदतीने दोघांना पोलिसांनी ताब्यात घेतले आहे. त्यातील एकजण अल्पवयीन असल्याचे सांगण्यात येत आहे. तर एकजण सज्ञान आहे. त्यामुळे त्याला अटक करण्यात आली आहे. वरिष्ठ पोलीस अधिकाऱ्यांनी घटनास्थळी भेट दिली असून हिंजवडी पोलीस तपास करीत आहेत.