Pune News : पुण्यात जागतिक दर्जाचे साखर संग्रहालय, राज्य मंत्रिमंडळाच्या बैठकीत महत्त्वपूर्ण निर्णय
एमपीसी न्यूज – महाराष्ट्राचे साखर उद्योगातील स्थान विचारात घेता ‘जागतिक दर्जाचे साखर संग्रहालय'(Museum) पुणे येथे उभारण्याच्या प्रस्तावास बुधवारी (दि. 22) मंत्रिमंडळ बैठकीत मान्यता देण्यात आली. बैठकीच्या अध्यक्षस्थानी मुख्यमंत्री उद्धव ठाकरे होते.
पुणे यथील साखर संकुलातील जागेत साखर संग्रहालय उभारण्यात येणार आहे. साखर संग्रहालयास प्रशासकीय मान्यता देणे, संग्रहालयाचे डिझाईन अंतिम करणे, निधी उपलब्ध करुन देणे, संग्रहालयाच्या बांधकाम विषयक कामकाजाचा आढावा घेणे यासाठी उपमुख्यमंत्र्यांच्या अध्यक्षतेखाली राज्यस्तरीय नियामक समिती तसेच सहकार मंत्र्यांच्या अध्यक्षतेखाली साखर संग्रहालयाच्या प्रत्यक्ष उभारणी कामकाजावर देखरेखीसाठी कार्यकारी समिती स्थापन करण्यास मान्यता देण्यात आली.
साखर संग्रहालय उभारणीसाठी अंदाजे 40 कोटी रुपये पर्यत खर्च अपेक्षित असून त्यासाठी शासनाने साखर आयुक्तांना तीन वर्षात सदर निधी उपलब्ध करुन देण्यास मान्यता देण्यात आली. साखर संग्रहालयाच्या उभारणीबाबतचे आरेखन राष्ट्रीय स्तरावरील स्पर्धेतून निवडण्यात येईल.
