Lonavala : वरसोली टोल नाक्यावर दोन वाहनांमधून पाच लाखांची रोकड जप्त
एमपीसी न्यूज- पुणे- मुंबई राष्ट्रीय महामार्गावरील वरसोली टोलनाक्यावर लोणावळा ग्रामीण पोलीस व निवडणूक आयोगाचे स्थिरस्थावर तपासणी पथकाकडून सुरू असलेल्या वाहन तपासणी दरम्यान दोन वाहनांमधून तब्बल पाच लाख रुपयांची रोकड जप्त करण्यात आली आहे. शुक्रवारी दुपारी साडेबारा वाजता व संध्याकाळी ७ वाजता ही कारवाई करण्यात आली.
लोणावळा ग्रामीणचे पोलीस निरीक्षक दीपक लुकडे, पोलीस उपनिरीक्षक माधुरी देशमुख, पोलीस कर्मचारी विशाल जांभळे, संतोष शेळके, शरद जाधवर, काळे, योगेंद्र जगताप, अमित ठोसर, जाधव व चालक उर्किडे यांच्यासह स्थिरस्थावर तपासणी पथकाचे महेश जगताप व पोलीस कॉन्स्टेबल जाधव यांच्या पथकाकडून दुपारी साडेबारा वाजता वाहन तपासणी सुरू असताना फॉर्च्युनर गाडी (एम एच 14 GK 9111) आली.
- या गाडीची तपासणी केली असता गाडीमध्ये तीन लाख रुपयांची रोकड मिळून आली. सदर रकमेबाबत वाहन चालकाकडे विचारणा केली असता त्याला कोणते समाधानकारक उत्तर देता आले नाही. सायंकाळी 7 वाजण्याच्या सुमारास टोलनाक्यावर आलेल्या इको फोर्ड कार (एम एच 04 B 6475) या गाडीची तपासणी केली असता गाडीमध्ये दोन लाख रुपयांची रोकड मिळून आली.
सदर रक्कमेबाबत चौकशी केली असता कोणतेही समाधानकारक उत्तर न मिळाल्याने रक्कम पोलीस ठाण्यात जमा करण्यात आली आहे. मागील पंधरा दिवसात वरसोली टोल नाका परिसरात चार वाहनांमधून 11 लाख 80 हजार रुपयांची रोकड पकडण्यात आली आहे.
