Pimpri : मॉल, चित्रपटगृहातील पार्किंग निःशुल्क करा; राष्ट्रवादीची मागणी
एमपीसी न्यूज – पिंपरी-चिंचवड शहरातील मॉल, मल्टिप्लेक्समध्ये पार्किंग निःशुल्क करावे, अशी मागणी राष्ट्रवादी काँग्रेसने महापालिकेकडे केली आहे.
याबाबत राष्ट्रवादीचे नगरसेवक मयुर कलाटे, पंकज भालेकर यांनी आयुक्त श्रावण हर्डीकर यांना निवेदन दिले आहे. पिंपरी-चिंचवड शहरात मॉल आणि चित्रपटगृहांची संख्या जास्त आहे. याठिकाणी येणा-या नागरिकांची संख्या अधिक आहे. सद्यस्थितीत महापालिका हद्दीतील मॉल व चित्रपटगृहांसाठी राखीव असलेल्या पार्किंगसाठी संबंधितांकडून शुल्क आकारले जात आहे.
पुणे आणि नाशिक महापालिकेने मॉल व मल्टिप्लेक्समध्ये मोफत पार्किंगची सुविधा उपलब्ध करुन देण्याचा निर्णय घेतला आहे. पिंपरी-चिंचवड शहराची लोकसंख्या आणि वाहनांची संख्या लक्षात घेऊन त्याच धर्तीवर मॉल, मल्टिप्लेक्स या ठिकाणी पार्किंग निःशुल्क करावे. वाहतुकीच्यादृष्टीने पार्किंगबाबत निर्णय घेणे आवश्यक आहे, असेही त्यांनी निवेदनात म्हटले आहे.
