Maval Crime News : इंदोरी येथे तीन पत्ती खेळताना झालेल्या वादातून मित्राचा चाकूने भोकसून खून

एमपीसी न्यूज – तीन पत्ती खेळताना खेळाच्या नियमावरून दोघांमध्ये वाद झाला. त्यातून एकाने त्याच्या दोन मेहूण्यांना बोलावून तरुणाला चाकूने भोकसून त्याचा निर्घृणपणे खून केला. ही घटना शनिवारी (दि. 13) रात्री साडेनऊ वाजताच्या सुमारास मावळ तालुक्यातील इंदोरी येथे घडली.

शाबुद्दीन अन्सारी (वय 21) असे खून झालेल्या तरुणाचे नाव आहे. याबाबत रियाज निसार अन्सारी (वय 23, रा. इंदोरी, ता. मावळ. मूळ रा. उत्तर प्रदेश) यांनी तळेगाव एमआयडीसी पोलीस ठाण्यात फिर्याद दिली आहे.

त्यानुसार जलाल शेख, मोहम्मद इस्लाम अन्सारी, मोहम्मद इस्राईल अन्सारी (तिघे रा. इंदोरी, ता. मावळ) यांच्या विरोधात गुन्हा दाखल करण्यात आला आहे.

पोलिसांनी दिलेल्या माहितीनुसार, फिर्यादी रियाज, मयत शाबुद्दीन, अब्दुल हनान अन्सारी आणि आरोपी जलाल हे चौघे इंदोरी येथे एकाच खोलीत भाड्याने राहतात. शनिवारी रात्री ते तीन पत्ती खेळत होते.

तीन पत्ती खेळाच्या नियमावरून शाबुद्दीन आणि जलाल शेख यांच्यात वाद झाला. त्यानंतर जलाल शेख त्याच्या घरी गेला. तो त्याच्या दोन मेहुण्यांसोबत चाकू घेऊन परत फिर्यादी यांच्या खोलीत आला.

तिघांनी मिळून शाबुद्दीनला लाथाबुक्क्यांनी मारहाण केली. मोहम्मद इस्लाम अन्सारी, मोहम्मद इस्राईल अन्सारी या दोघांनी शाबुद्दीनला जीवे मारण्याच्या उद्देशाने घट्ट पकडले. तर जलाल याने शाबुद्दीनच्या छातीवर, पोटावर, डोळ्याजवळ चाकूने भोकसून खून केला.

पोलिसांनी तिन्ही आरोपींना अटक केली आहे. तळेगाव एमआयडीसी पोलीस तपास करीत आहेत.

MPCNEWS आता टेलीग्रामवर आहे. आमचं चॅनेल (@mpcnews1) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.