Mumbai: मावळातील प्रलंबित विकासकामे लवकरात लवकर मार्गी लावा – शरद पवार

मुंबईतील यशवंतराव चव्हाण सेंटरमध्ये झालेल्या या बैठकीस आमदार शेळके यांच्या समवेत संत तुकाराम सहकारी साखर कारखान्याचे उपाध्यक्ष व तळेगावचे ज्येष्ठ नगरसेवक बापूसाहेब भेगडे, महारेलचे व्यवस्थापकीय संचालक राजेशकुमार जयस्वाल, संतोष पाटील, सार्वजनिक बांधकाम विभागाचे अधीक्षक अभियंता राजेंद्र रहाणे, चंद्रकांत नाईक, राष्ट्रीय महामार्ग प्राधिकरण उपव्यवस्थापक अनिल गोराड, रस्ते विकास महामंडळ अधिकारी आर.आर. सोनवणे व इतर अधिकारी उपस्थित होते.

जुन्या पुणे-मुंबई महामार्गावर होणारी वाहतूक कोंडी, अपघात टाळण्यासाठी उड्डाणपूल, सेवा रस्त्यांचा प्रलंबित प्रस्ताव, कान्हे, मळवली रेल्वे उड्डाणपूल उभारणी, तळेगाव-चाकण-शिक्रापूर रस्ता, तसेच केंद्र सरकार संरक्षण खात्याशी संबंधित असलेला क्षेपणास्त्र विकास प्रकल्पासाठी संपादित केलेल्या जमिनींच्या मोबदल्याचा प्रश्न, इंद्रायणी नदी सुधार प्रकल्प अशा विविध विभागांशी संबंधित व अनेक वर्षांपासून प्रलंबित असलेल्या कामांविषयी या बैठकीत सविस्तर चर्चा झाली.

या संयुक्त बैठकीमुळे रखडलेल्या अनेक कामांना गती मिळणार असून मावळ तालुक्याच्या विकासाला नव्याने ऊर्जा आणि गती देण्यासाठी आम्ही नेहमीच प्रयत्नशील आहोत, असे आमदार शेळके यांनी सांगितले.