Mumbai News: राज्यात आता स्वीट मार्टमधील खुल्या मिठाईच्या ट्रेवरही टाकावी लागणार ‘एक्सपायरी डेट’!

एमपीसी न्यूज – स्वीट मार्टमधील खुल्या मिठाईच्या ट्रेवरही एक्सपायरी डेट टाकणे बंधनकारक करणारा एफएसएसएआयचा निर्णय लोकांच्या हिताचाच आहे, या शब्दांत मुंबई उच्च न्यायालयाने त्याबाबतच्या निर्णयाचे समर्थन केले. या निर्णयाच्या विरुद्ध दाखल करण्यात आलेली जनहित याचिका नामंजूर करून याचिकाकर्त्यांना उच्च न्यायालयाने एक लाखाचा दंड सुनावला

राज्यभरातील मिठाईच्या दुकानात खुली विक्री करण्यात येणा-या मिठाईवर ती कधीपर्यंत खाण्यास योग्य आहे याची तारीख लिहीणे  1 ऑक्टोबरपासून बंधनकारक करण्यात आले आहे.

मुंबईतील मिठाई विक्रेत्यांच्या संघटनेने या निर्णयाला आव्हान देणारी जनहित याचिका उच्च न्यायालयात दाखल केली होती. या याचिकेवर मुख्य न्यायमूर्ती दीपांकर दत्ता आणि न्यायमूर्ती गिरीश कुलकर्णी यांच्या खंडपीठापुढे सुनावणी झाली.

ही याचिका विनाकारण दाखल करण्यात आल्याचा शेरा मारत न्यायालयाने याचिका फेटाळून लावली. दंडाची रक्कम कोविड केअर सहायता निधीत जमा करण्याचे निर्देश याचिकाकर्त्यांना देण्यात आले आहेत.

खराब झालेली मिठाई आणि खाद्यपदार्थ ग्राहकांना विकण्यात आल्याच्या अनेक तक्रारी प्राप्त झाल्यामुळे प्रशासनाने हा निर्णय घेतला होता. मिठाईच्या दुकानांत विकण्यात येणाऱ्या खाद्यपदार्थांच्या ट्रेवर पॅकेज फूडप्रमाणे ते कोणत्या तारखेपर्यंत खाण्यास योग्य आहेत त्याची तारीख ठळकपणे लिहीणे बंधनकारक असल्याचे जाहीर करण्यात आले होते.