Mumbai News : नवीन वर्षांचे स्वागत घरीच करा, फटाक्यांची आतिषबाजी करु नका, राज्य सरकारची नियमावली
एमपीसी न्यूज – कोरोनामुळे उद्भवलेल्या संसर्गजन्य परिस्थितीचा विचार करता सरत्या वर्षाला निरोप आणि नूतन वर्षाचे स्वागत अत्यंत साधेपणाने करणे आवश्यक आहे. नवीन वर्षांचे स्वागत घरीच करावे. फटाक्यांची आतिषबाजी करु नये. कोणत्याही प्रकारे धार्मिक/सांस्कृतिक कार्यक्रमाचे आयोजन करु नये तसेच मिरवणुका काढण्यात येऊ नयेत, अशा मार्गदर्शक सूचना राज्य सरकारने दिल्या आहे.
नूतन वर्षाच्या पहिल्या दिवशी बहुसंख्य नागरिक धार्मिक स्थळी जात असतात. अशावेळी त्या ठिकाणी एकाच वेळी गर्दी न करता सोशल डिस्टन्सिंगचे पालन करावे. तसेच संबंधितांनी आरोग्य व स्वच्छतेच्या दृष्टीकोनातून योग्य त्या खबरदारीच्या उपाययोजना कराव्यात. 31 डिसेंबर 2020 रोजी दिवसभर संचारबंदी नसली तरी, देखील सरत्या वर्षाला निरोप देण्यासाठी व 1 जानेवारी 2021 रोजी नववर्षाच्या स्वागताच्या निमित्ताने नागरिकांनी घराबाहेर न पडता नववर्षाचे स्वागत घरीच साधेपणाने साजरे करावे.
सार्वजनिक ठिकाणी मोठ्या संख्येने येऊन गर्दी न करता सोशल डिस्टन्सिंग (सामाजिक अंतर) राहील. तसेच मास्क व सॅनिटायझरचा वापर होईल याकडे विशेष लक्ष देणे आवश्यक आहे. कोरोनाच्या पार्श्वभूमीवर 60 वर्षावरील नागरिकांनी व दहा वर्षाखालील मुलांनी सुरक्षिततेच्या व आरोग्याच्या दृष्टीने शक्यतो घराबाहेर जाणे टाळावे.
