Pimpri : स्पाईन रोड बाधितांचा प्रश्न निकालात, उर्वरित बाधितांना मिळणार भूखंड, महापालिकेने काढली सोडत

कृष्णानगर येथील स्वामी विवेकानंद क्रीडा संकुलात अतिरिक्त आयुक्त (दोन) अजित पवार,  फ प्रभाग अध्यक्षा योगिता नागरगोजे यांच्या उपस्थितीत ही सोडत काढण्यात आली. महापालिकेच्या भूमी आणि जिंदगी विभागामार्फत लाभार्थ्यांना भूखंडाबाबत माहिती देत त्यांच्या विविध शंकांचे निरसन करण्यात आले.

स्पाईन रस्ता विकसित करत असताना त्रिवेणीनगर चौकातील काही घरे बाधित होत होती. त्या बाधितांचे पुनर्वसन करण्यासाठी आमदार महेश लांडगे यांनी पाठपुरावा करुन जागा मंजूर करुन घेतली. या रहिवाशांच्या पुनर्वसनासाठी आवश्यक असलेली प्राधिकरणाच्या पेठ क्रमांक 11 मधील 14  हजार 784 चौरसमीटर जागा यापूर्वीच प्राधिकरणाने 9 हजार 350 प्रति चौरस मीटर या दराने महापालिकेच्या ताब्यात दिली होती.

आमदार महेश लांडगे म्हणाले, बाधितांच्या पुनर्वसनासाठी प्राधिकरणाकडून पेठ क्रमांक 11 मधील पर्यायी निवासी जागा मंजूर करण्यात आली. 75 मीटर स्पाईन रस्त्यापैकी पहिल्या टप्प्यातील 52 मीटर ते 60 मीटर रस्ता बाधितांच्या पुनर्वसनासाठी नगररचना विभागामार्फत 126 जणांची अंतिम यादी तयार करण्यात आली आहे. त्यापैकी 77 लाभार्थ्यांची सोडत 27 ऑगस्ट 2018 रोजी काढण्यात आली होती. उर्वरित 46 लाभार्थ्यांची सोडत अखेर आज मार्गी लागली आहे. त्यामुळे बाधितांना भूखंड मिळण्याचा मार्ग मोकळा झाला आहे. लाभार्थी नागरिक व प्राधिकरण यांच्यामध्ये ‘लीज डीड’ झाल्यानंतर महापालिका नागरिकांना भूखंडाचा ताबा देणार असल्याचेही त्यांनी सांगितले.