Pimpri : ऐपतदार दाखला देण्यासाठी सात हजारांची लाच घेताना नायब तहसीलदार एसीबीच्या जाळ्यात
एमपीसी न्यूज – ऐपतदार दाखला देण्यासाठी सात हजारांची लाच घेताना नायब तहसीलदाराला लाचलुचपत प्रतिबंधक विभागाने रंगेहाथ पकडले. ही कारवाई बुधवारी (दि. 25) करण्यात आली.
विकी मदनसिंग परदेशी (वय 37, रा. वाकड) असे अटक केलेल्या आरोपीचे नाव आहे. याप्रकरणी 33 वर्षीय व्यक्तीने तक्रार दिली आहे.
पोलिसांनी दिलेल्या माहितीनुसार, आरोपी विकी अपर हवेली तहसीलदार कार्यालय, पिंपरी चिंचवड येथे निवासी नायब तहसीलदार आहेत. तक्रारदार यांना ऐपतदार दाखला (सोलव्हनसी सर्टिफिकेट) देण्यासाठी आरोपीने सात हजार रुपयांची लाच मागितली. तक्रारदार यांनी याप्रकरणी एसीबीकडे तक्रार दिली. त्यानुसार सापळा रचून रंगेहाथ पकडले.
पोलीस अधिकारी सीमा मेहेंदळे, श्रीहरी पाटील, पोलीस कर्मचारी विनोद भोकरे, नंदलाल गायकवाड, मुश्ताक खान, प्रशांत बो-हाडे, अविनाश इंगुळकर यांच्या पथकाने ही कारवाई केली.
