Friendship Day : मैत्रीचा ट्रेंड बदलतोय…!
एमपीसी न्यूज – काय रे कसा आहेस, मजेत ना? चल चहा घेऊया, असे सांगून तो मला कॅन्टीनला घेऊन गेला. त्याने लगेच वेटरला सांगितले. ‘भाई, एकात दोन करून चहा आण’ हे ऐकून थोडं बरं वाटलं ना, कारण आजकाल मित्र केवळ ऑनलाइन कट्ट्यावरच जास्त भेटतात. त्यामुळे मैत्रीत आता या बदलत्या ट्रेंडसचा तडका लागल्याने तिची रंगत आणखीनच वाढली आहे, असे दिसते.
सध्याच्या काळात दोन मित्र एकमेकांना केवळ इमोजींच्या सहाय्यानेच भेटत असतात. त्याच्याद्वारेच आपण एकमेकांना चहा, कॉफी ऑफर करतो. थोडक्यात काय आपल्या कट्ट्यावर भेटायला कोणालाही वेळ नाही. कारण आता सोशल मीडियाद्वारे आपण सर्वांना भेटू शकतो. त्या एकात दोन चहाच्या सोबत रंगणाऱ्या गप्पा आज केवळ शब्दांच्या शॉर्टफॉर्ममध्येच संपतात.
जसे hi, gm, whtssp, gnsdtc यांच्या वापराने आपण आजकाल मित्राशी गप्पा मारतो. कारण काळ बदललाय आणि ट्रेंडही. त्यामुळेच कट्ट्यावरचा मित्र हा व्हॉटसअप फ्रेंड झालाय. त्याला रोज समक्ष भेटण्यापेक्षा आपण व्हिडिओ कॉलवरूनच भेटण्यात धन्यता मानतो.
मैत्री दिनाच्या शुभेच्छासाठी एखादे जुने छायाचित्र मित्रांना स्मार्टफोनवर पाठवनूच त्याला मैत्री दिनाच्या शुभेच्छा देण्याचा हा काळ, मैत्रीचे नाते जोपासताना या न्यू मीडियाचा आधार घेणारा हा काळ. असो, पण हे मैत्रीचे बदलते ट्रेंड आहेत. अगोदरची शाळेची गट्टी आज व्हॉटसअपवर येऊन ऑनलाइन रंगतेय तीही जुन्याच किस्स्यांनी.
व्हॉटसअपच्या या ग्रुपवरून चांगल्या गोष्टींनाही मैत्रीच्या नात्याने जोपासले आहे. त्यात एखाद्या मित्राच्या वाढदिवशी अनाथ मुलांना मदत करणे, गरिबांना कपडे देणे यासारख्या सोशल कामानेही मैत्रीचे बंध टिकून आहेत. एखाद्याची अडचण सोडवून त्याला मदत करणारा हा सोशल ट्रेंड आता रुजतोय. त्याद्वारे त्यांच्या चेहऱ्यावर फुलणारे हास्य हे मैत्रीसाठी दुआ देऊन जातो.
देश, विदेशात असलेले मित्रही याद्वारे जोडले जाऊन आपल्या मनातल्या गोष्टींना वाट मोकळी करतात. गप्पा, गोष्टी, जोक्स आणि बरेच काही या सोशल मीडियावर चालते. मैत्री दिनाचे सेलिब्रेशनचीही तयारी यावर सुरूच आहे. आपले लेटेस्ट सेल्फी, जुने फोटो, मजेदार किस्से, शाळेतला तो बेंच, ती खेळ खेळण्याची जागा या सर्वांद्वारे मैत्री दिनाची वाढवून आपले ते जुने दिवस आठवण्याचा एक नवीन ट्रेंड आलाय.
दहावी, बारावीचे ग्रुप असोत की मग डिग्री घेतानाचे कॉलेज ग्रुप्स सर्वांवर एकच चर्चा सुरू आहे, ती म्हणजे मैत्री दिनाचे सेलिब्रेशन कसे चांगले करता येईल. त्यासाठी पार्टीचा बेत, ऑनलाइन गप्पा, फोटोचे गिफ्ट, मैत्रीबद्दल मला काय वाटते असे काही ट्रेंड्स सध्या ग्रुप्सवर सुरू आहेत. फेसबुक, ट्वीटर, इन्स्टाग्रामवरही आठवणीतील फोटो शेअर करणे, लाइक करून कमेंट्स देऊन मित्रांबद्दल भावना व्यक्त करणे, त्याला शुभेच्छा देणे हेही ट्रेंड्स नेटिझन्स करत आहेतच. यातूनच ते आपल्या शुभेच्छा देऊन मैत्री दिन सेलिब्रेट करताना दिसतात.
वर्षभर शुभेच्छा न देता केवळ खास दिवसालाच मित्रांची कशी काय आठवण होते, त्यामुळे पूर्ण वर्षभर का मित्रांची आठवण येत नाही का, असाही प्रश्न पडतो. मैत्रीदिन आहे त्याच दिवशी का सेलिब्रेट करायला हवा, त्यासाठी कोणत्याही खास दिवसाची आवश्यकता नाही, असाही सल्ला देणारा ट्रेंड पाहायला मिळतोय. शेवटी काय तर मैत्रीचा हा प्रवास ‘ये दोस्ती हम नहीं तोड़ेंगे…तोड़ेंगे दम मगर तेरा साथ ना छोडेंगे’ या गाण्यापासून तर थेट ‘जाने नही देंगे तुझे…’ इथपर्यंत हा प्रवास सुरुच आहे आणि पुढेही सुरुच राहणार.
