Nigdi: शालेय शिक्षण हे दबावमुक्त हवे – मनोज देवळेकर

लॉकडाऊनच्या पार्श्वभूमीवर केंद्रप्रमुख म्हणून नियुक्ती होत असल्याबाबत देवळेकर यांनी लॉकडाऊन बरोबरच शैक्षणिक क्षेत्रावरील आव्हानावर भाष्य केले. त्याचबरोबर शालेय व क्रीडाकुलच्या नवीन योजनांची माहिती देत पुढील वाटचालीची दिशा स्पष्ट केली.

शालेय शिक्षण क्षेत्रावरील समाजातील प्रभाव आणि दबावाबाबत चिंता व्यक्त करताना त्यांनी चांगल्या शिक्षणासाठी चांगले राजकीय नेते तसेच उद्योजकांना एकत्र येण्याचे आवाहन केले. शिक्षणाच्या अर्थकारणात शासनाने लक्ष घातले पाहिजे. शैक्षणिक संस्थांना त्यांच्या विचारांनी स्वायत्त व मोकळेपणाने काम करू दिले पाहिजे, असे त्यांनी सांगितले.

लॉकडाऊनमुळे यंदा वर्षभर नियमित शाळा भरवता येणार नाही असे वाटते, असे सांगून देवळेकर म्हणाले,  त्या प्रमाणे योजना करून आम्ही तीन प्रकारे शिक्षण देण्याच्या व्यवस्था केली आहे. त्यात ऑनलाइन लर्निंग, ऑफलाइन लर्निंग आणि तिसरं कृतीयुक्त शिक्षण यांचा समावेश आहे. यासाठी शाळेतील अडीच हजार मुलांचा डेटा तयार आहे.

ऑफलाइन शिक्षणासाठी मुलांना व्हॉट्स अ‍ॅपच्या माध्यमातून पीडीएफ किंवा पीपीटीच्या माध्यामातून शिक्षण दिले जाईल. शासनाकडून आलेली पुस्तके त्यांना दिली आहेत. पीडीएफ पुस्तके कशी उपलब्ध होतील याचीही माहिती दिली आहे. एकूणच मुलांना घरातच शैक्षणिक साहित्य उपलब्ध करून देण्याची व्यवस्था केली आहे, अशी माहिती त्यांनी दिली.

कृतीयुक्त शिक्षणात मुलांना आम्ही घरातच प्रयोग करा, त्यातून तुम्हीच अनुमान काढा यासाठी प्रत्येक विषयाचे प्रात्यक्षिक शिक्षण देण्याची व्यवस्था केली आहे. याचे मोजमाप नसले तरी मुलांचे शिक्षण सुरू राहील, अशी तीन महिन्यांसाठी योजना तयार आहे. 15 जूनपासून त्याची कार्यवाही सुरू झाली आहे, असे त्यांनी सांगितले.

क्रीडाकुलबाबत बोलताना ते म्हणाले, क्रीडाकुल हा शालेय स्तरावरील आमचा यशस्वी प्रकल्प आहे. तो अमूलाग्र आहे हे मी जाणीवपूर्वक सांगू इच्छितो. कारण आंतरराष्ट्रीय खेळाडू घडविणे तसेच अनेक शास्त्रांचे एकत्रिकरण करणे आणि त्यासाठी भारतात तज्ज्ञ एकत्रित येणे हे आव्हान आहे. ते आम्ही करू शकलो आहोत.