Nigdi : रसिकांनी अनुभवली शब्दरत्नांची श्रीमंती

गुढीपाडव्यानिमित्त स्वरांगण रसिक योजनेचे पहिले पुष्प रविवारी सायंकाळी ज्ञान प्रबोधिनीच्या मनोहर वाढोकार सभागृहात गुंफण्यात आले. जनसामान्यातील असामान्य चारचौघी म्हणजे संत जनाबाई, बहिणाबाई चौधरी, इंदिरा संत आणि शांता शेळके. यांच्यासह त्यांच्या समकालीन कवयत्रींच्या रचना आणि गाणी सादर करण्यात आली. सुप्रसिद्ध गायिका-अभिनेत्री, सारेगमपफेम सायली राजहंस-सांभारे, सारेगमपफेम सुप्रसिद्ध गायक चैतन्य कुलकर्णी यांनी सादर केलेली गीते रसिकांच्या मनाचा ठाव घेणारी ठरली. निवेदनाची बाजू सांभाळली ती सुप्रसिद्ध अभिनेते शंतनू मोघे यांनी. उत्तरोत्तर रंगत गेलेला हा सोहळा रसिकांना शब्दरत्नांची श्रीमंती देऊन गेला.

ऋचा पाटील, गार्गी भाटे, रुपाली पाथरे यांनी कवितांचे नाट्यरूपी सादरीकरण केले. संगीत संयोजन अनय गाडगीळ यांचे होते. तर मंदार गोडसे (संवादिनी), विनीत तिकोनकर (तबला), रोहन वनगे (ऑक्टोपॅड), धनंजय साळुंके (तालवाद्य) यांनी साथसंगत केली. दिग्दर्शन मकरंद कुलकर्णी आणि सहदिग्दर्शन देवेंद्र भिडे यांनी केले.

सुरांच्या गुढीचे पूजन अमित गावडे आणि तृष्णा गावडे यांच्या हस्ते झाले.  स्वागत डॉ. अनिरुद्ध टोणगावकर, दीपाली टोणगावकर, सचिन चपळगावकर,  रुपाली चपळगावकर, नाट्य परिषदेचे कार्यवाह सुहास जोशी, पुणे नाट्य परिषदेच्या संचालिका शोभा कुलकर्णी यांनी स्वागत आणि सत्कार केला. कार्यक्रमाचे सूत्रसंचालन रेणुका भिडे यांनी केले तर मातृ मंदिर विश्वस्त संस्थेचे श्रीकृष्ण अभ्यंकर यांनी आभार मानले