Pimpri News: आता विधी समिती, ‘अ’, ‘फ’ प्रभागातील नगरसेवक जाणार दौऱ्यावर

नगरसेवकांचा अभ्यास दौऱ्यांचा सपाटा सुरूच 

0

एमपीसी न्यूज – कोरोनाची परिस्थिती असतानाही पिंपरी-चिंचवड महापालिकेतील नगरसेवकांचा दौ-यांचा मोह सुटत नाही. दौ-यांचा सपाटा सुरुच आहे. महिला व बालकल्याण समितीनंतर आता विधी समितीच्या सभापतींसह नऊ सदस्य सिक्किम दौ-यावर, ‘अ’ प्रभाग कार्यालयातील नगरसेवक चंदिगड आणि ‘फ’ प्रभागातील नगरसेवकांना जम्मू व कश्मीर दौ-यावर जायचे आहे. यासाठी येणा-या खर्चास आज (बुधवारी) झालेल्या स्थायी समितीच्या बैठकीत मान्यता देण्यात आली.

विधी समिती सदस्यांना कायदा सुव्यवस्थेची पाहणी करण्याकरिता अभ्यास दौ-याचे आयोजन केले जाते. अभ्यास दौरा करण्याकरिता सिक्किम या राज्यातील कायदा व्यवस्थेची पाहणी करण्याकरिता विधी समिती सभापतींसह नऊ सदस्य, संबंधित अधिकारी दौ-यात जाणार आहेत.

‘अ’ क्षेत्रीय कार्यालयाअंतर्गतचे 16 नगरसेवक, तीन स्वीकृत सदस्य आणि तीन अधिकारी असे 22 जण चंदिगड येथे अभ्यास दौ-यासाठी जाणार आहेत. चंदिगड हे सुनियोजित विकसित शहर असल्याने त्या शहरातील महापालिकेने राबविलेल्या विविध योजना, प्रकल्पांची पाहणी, पर्यटन स्थळांची पाहणी करुन त्यातील चांगल्या योजना, प्रकल्पांची अमंलबजावणी शहरात केली जाणार आहे.

_MPC_DIR_MPU_II

चंदिगड, मनाली, सिमला येथील विविध प्रकल्पांची पाहणी दौरा मार्च, एप्रिल 2021 मध्ये करण्यासाठी प्रभाग समितीच्या बैठकीत 12 फेब्रुवारी रोजी मान्यता दिली. या दौ-यास येणा-या प्रत्यक्ष खर्चास आज स्थायी समितीने मान्यता दिली.

‘फ’ क्षेत्रीय कार्यालयाअंतर्गतचे सर्व नगरसेवक आणि चार अधिकारी-कर्मचारी जम्मू व कश्मीर येथे अभ्यास दौ-यासाठी जाणार आहेत. ‘फ’ क्षेत्रीय कार्यालयाअंतर्गत 16 नगरसेवक आणि तीन स्वीकृत सदस्य आहेत. या 19 जणांसह चार अधिकारी कर्मचारी असे 23 जण या दौ-यात सहभागी होणार आहेत.

दौ-यामध्ये शहर स्वच्छता, कचरा विल्हेवाट, घनकचरा व्यवस्थापन, तसेच इतर प्रकल्पांची पाहणी, पर्यटन स्थळांची पाहणी केली जाणार आहे. महत्वाच्या शहरांना भेटी दिल्या जाणार आहेत. या दौ-याला प्रभागाच्या 4 फेब्रुवारीच्या बैठकीत मान्यता देण्यात आली. त्यासाठी येणा-या खर्चास स्थायी समितीने आयत्यावेळी मान्यता दिली.

दरम्यान, ‘क’ क्षेत्रीय कार्यालयाअंतर्गतचे सर्व नगरसेवक आणि चार अधिकारी-कर्मचारी जम्मू व कश्मीर येथे मार्चमध्ये अभ्यास दौ-यासाठी जाणार आहेत. या दौ-यासाठी येणा-या प्रत्यक्ष खर्चास मागील स्थायी समितीच्या बैठकीत आयत्यावेळी मान्यता दिली गेली आहे.

MPCNEWS आता टेलीग्रामवर आहे. आमचं चॅनेल (@mpcnews1) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.