Omicron News: 6 रुग्णांपैकी 5 रुग्ण लक्षणेविरहित; पॅनिक होऊ नका; आयुक्तांचे शहरवासीयांना आवाहन
एमपीसी न्यूज – कोरोनाचा नवीन विषाणू असलेल्या ‘ओमायक्रॉन’चा संसर्ग झालेल्या पिंपरी-चिंचवड शहरातील 6 रुग्णांपैकी 1 रुग्णामध्ये सौम्य लक्षणे आहेत. तर, उर्वरित 5 रुग्णांमध्ये कोणतीही लक्षणे नाहीत. सर्वांची प्रकृती स्थिर आहे. महापालिकेने प्रतिबंधात्मक उपाययोजना हाती घेतल्या आहेत. नागरिकांनी पॅनिक होऊ नये. कोरोना प्रतिबंधात्मक लस, मास्क आणि सुरक्षित अंतर या त्रिसुत्रीचे पालन करावे, असे आवाहन आयुक्त राजेश पाटील यांनी शहरवासीयांना केले.
परदेशातून शहरात आलेल्या 3 आणि त्यांच्या संपर्कातील अशा 6 जणांना ‘ओमायक्रॉन’चा संसर्ग झाला आहे. एकाचदिवशी 6 रुग्णांना संसर्ग झाल्याने एकच खळबळ उडाली. त्यानंतर महापालिका प्रशासनाने आज (सोमवारी) पत्रकार परिषद घेऊन सविस्तर माहिती दिली. महापौर उषा ढोरे, उपमहापौर हिरानानी घुले, सत्तारुढ पक्षनेते नामदेव ढाके, अतिरिक्त आयुक्त विकास ढाकणे, वैद्यकीय विभागप्रमुख डॉ. लक्ष्मण गोफणे, सहाय्यक आयुक्त अण्णा बोदडे उपस्थित होते.
